Mm 10
10
Korneille ya Sézaré
(Mm 10:30-35; 11:13-14; Sam 145:18-19; 112:4)
1Môt éziñ a nga to Sézaré a too jôé na Korneille, évete bezimbi ntete wua, ba loone na Nsamba ya Italie. 2Emien a *nda jé ése, be nga nye'e Zambe, a ko nye woñ. A nga bo Beyude abui ésôs, a loone jôé Zambe biyoñ bise. 3Môs éziñ, bebé *mewolo melale ya mamengô'é, ane a nga yen éngele Zambe biyeyem, a nyi'ine *nda jé, a lo'one nye na: A Korneille! 4Korneille a nga beme nye mis asu, njalan a woñ, a nga yalan a jô na: E ne aya a Nti? Engele a nga jô nye na: Meye'elane môé a abui ésôse dôé, Zambe a simesaneya bie asu dé. 5Ajô te ñhe, éyoñe ji, lôme bôte Yopé, be ke loone môt éziñ a ne jôé na Pierre. 6A ne nneñ e *nda be môt a ne jôé na Simon, nkôme bikôp, a to *nda é ne bebé éwome mañ. 7Ve nné ane éngele a nga zu kobô nye a nga jañe nye mis, Korneille a nga lôme bôt bebaé ya *nda jé, a mone bezimbi wua, a mbe ñye'é Zambe, a tabeya éjôé jé si ayap. 8A nga mane tebele be, a lôme be Yopé.
Nyenane Pierre a to Yopé
(Mm 11:1-18; 15:7-9; Rm 9:25-26)
9Tyé kpwaa, éyoñ be ngenane be kele *zen, be nto bebé Yopé, Pierre a nga bet e mbala'a si ya *nda yôp, a ke bo meye'elan. A mbe bebé zañe *môs. 10A nga wô'ô zaé. Be ngenane be yame nye bidi, atemeteme na, a nga ku Som, 11a yene yôp e yombô'ô; jôm é so'o yôp, ayaé ya kôñelan, é funa'ane beta éndelé meku'u menyiñ, é tebe'e si. 12Eyé te été, mevale me tit mese me bili mebo menyin: e ba ba woñ a ba ba yele yôp. 13Ane *tyiñ é nga so yôp é kobô'ô nye na: Kelek, a Pierre, wôék ô di. 14Pierre na: Teke bebé a Nti; amu aso abialé dam, me ngenan te nambe jôm é ne mvin, nge tee ntunan. 15Tyiñ é nga beta so éyoñe baa é jô'ô nye na: E jôme Zambe a tuneya, wo ye bo te yene je ane jôm é ne mvin! 16Tyiñ éte é nga beta so éyoñe lale, ane éyé é nga bulane yôb été.
17Pierre a nga kusa ve'ele fas nge émien a ne yem atinane ya jôm a nga yen. Minlômane mi Korneille ke ve suane *mbé yôb, valé, a kooé na be maneya ke ba sili li a li vôme *nda Simon é né. 18Ane be nga yôtan, be yi na be tu'a yem, nge Simon, a ne jôé afe na Pierre, a mbe nneñe ya *nda éte. 19Nté te ôse, Pierre a mbe a simesa'ane ñyenan a nga yen. Ane Nsisim a nga jô nye na: Tame yene bôt bebaé ba jeñe wo. 20Sisik éto ji, ô ke mia be be, teke ndiñetan, amu ma ma lôme wo. 21Ane Pierre a nga sis, a ke koone be, nye na, ma nyô. Ma me ne môte mia jeñ. Mia jeñe ma amu jé' 22Ane be nga yalan a jô na: Evete bezimbi ntete wua, môt a ne *zôsôô, nyô a ko Zambe woñ, nye ate fe jôé dé e bili mbamba nkañete ayoñe Beyude ese été. Mfufube éngele, ñwô ô nga liti nye na a loone wo *nda jé na, ô vô'ôlô ane a kañete wo metema jam a nga yen. 23Ane Pierre a nga diine be *mbé a nyoñe be *mvo'é. Tyé kpwaa ya valé, baa be nye be nga ke nsamba, a bobenyañ b'éziñ ya Yopé. 24Alu da e lôteya, ane a nga kui Sézaré. Korneille a nga mane bañete bivuvumane bié a benya bemvôé bé, a yange nye. 25Eyoñe Pierre a nga suan, Korneille a nga ke sôô nye, a ku nye mebo si, a ve nye duma. 26Pierre a nga jô nye na: Kôlô'ô si! Ane a nga bete nye si a jô nye na: Ma fe me ne môt ane wo. 27Be kele ba laan, ane a nga nyiine *nda été. A nga koon abui bôt, 28Nye na: Avale mia yem, e ne étom mfa'a mone Beyude na, a latan, nge siñelane a mone bikuu. Ve mfa'a wom, Zambe a maneya ye'ele ma me yeme na, me nji yiane yene môte mvin nge tee ntunan. 29Ajô te ñhe me nji ve'ele yeme mebo si éyoñ ô nga loone ma. 30Ane Korneille a nga nyoñ nkobô a jô na: A ntoo den melu melaa, *mewolo melale ya mamengô'é, me mbe me ye'elane e *nda jam. 31Atemeteme, na môt a be'e étôto'o ngômesan a ntele ma ôsu a jô me na, meye'elane môé me nyoñebaneya a Korneille, a akabe dôé, Zambe a simesane de. 32Ajô te lôme môt e Yopé, a ke loone Simon, ba loone jôé afe na Pierre, a zu va. A too nneñ e be Simon, nkôme bikôp, e fefele éwome mañ. 33Eté été, ma te lôme bôt be zu loone wo, ô boya mvaé ane wo te zu koone bia. Bia bese ba, bi ne asu dôé, mfa'a ya vô'ôlô mam mese Nti a veya wo na, ô kate bia.
Nkobô Pierre e *nda Korneille
34Ane Pierre a nga taté nkobô a jô na: Me yemeya fo'o na, Zambe a nji bo éngengame. 35Meyoñ mese, môt a ko nye woñ a bo *zôsôô, nye a nyoñebane *mvo'é e be nye. 36A nga lôme Foé jé e be mvô'ô Israél, Mbamba Foé ya *mvo'é, amu Yésus Krist, nyô a ne Nti ya bôte bese. 37Mia yeme beta jame ya mevak, ate. A nga yian afôla ese ya Yudé. E nga taté e Galilé, e mvuse ya nduane Yôanes a nga kañete. 38Yésus ya Nazarét ate, mia yem ane Zambe a nga ve nye Mfufube Nsisim a ngul. A nga volô bôt e vôm ase a nga lôt. A nga saé bôte bese Satan a nga bi éto belo si, amu Zambe a nga too be nye. 39Bia bevok, bi ne bengaa ya ésaé jé ése a nga bo sii Beyude, aval ane Yérusalém. Nye be nga tyelé *krôa yôp a wu. 40Zambe a nga wômôlô nye miñwuan. 41A nga liti émien, saa be bôte bese, ve be bengaa Zambe émien a nga top, te yene biyoñ bi za bo'ok. Bia be nye bi nga di, mvuse ya ñwômane miñwuane wé. 42Ane a nga bendé bia, bi kate de bôt a bo bengaa. Nye Zambe a nga telé *ntyi'i mejô ya bevevee a miñwuan. 43Nye ate bekulu mejô bese ba kañete ajô dé e be môt ase a telé ndi nleme jéé be nye.
Bikul bia nyoñe Mfufube Nsisim
44Pierre a ngenan a kañete'e bibubua bi mam bite, ane Mfufube Nsisim a nga zu e be bôt be nga wô'ô ajô Zambe. 45A mbe jame ya semé, e be bôte be mbe ntyi'ane metyele be nga litane Pierre; nalé fe *meyoñ bikuu, mveane Mfufube Nsisim ô nga mialane e be be. 46Be nga wô'ô be kobô'ô *minkobô, a wumu Zambe. Ane Pierre a nga beta nyoñe nkobô a jô na: 47Ye môt a ne ngule ya kamane bôte ba be duban a mendim, mbe bete be nyoñeya Mfufube Nsisim aval ane bia' 48Ane a nga ve tyiñe na be duu be a jôé Yésus Krist. Ane be nga bu'u nye a beta tabe be be abe melu.
Jelenleg kiválasztva:
Mm 10: BDCB
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
Bible en langue Bulu © L'Alliance Biblique du Cameroun, 2007, 2015.
