Matie 15

Zozii ci 'Zufʋnyʋaa' 'kɔgɔbhlägbɩɩ' yëkuu' wälɩ

(Makö 7.1‑13)

1'Tänyɩ ‑kʋ ‑lɔɔ 'nɩ Falizɩɛnyʋa ‑yä ‑Jlämöcɩanyʋa 'sɔ ‑bha Zolizalɛmʋduu' 'nɩ wa ‑yi Zozii yëku, 'nɩ wa yio 'ylä, 2wlä ‑maa sɩ ‑kʋ bhä 'nɩ ‑naa 'kʋgënyʋa waa' 'ŋʋ bhä ‑a 'bäsɩɩ' ‑lɔɔ 'klʋkpää? Wa kä cii‑ nynä wa 'kä lü nä, sä ‑a 'bäsɩɩ' tëtë ‑lɔɔ ylä lä nynä ‑mä ‑a wɔɔ wlɩ nä, waa' wɔɔ ‑wʋ sɔɔ wlɩ 'nɩ wa lü. 3Zozii lä 'nɩ anyɩ, ‑ɔnözä 'nɩ aa' 'ŋʋ bhä Laagɔɔ' ‑Jlämaa 'klʋkpää 'nɩ a 'bäsɩɩ' tëtë ‑lɔɔ 'mʋ a ŋʋ bhä 'klʋkpää? 4Laagɔ cii‑ nynä ‑mä ‑n 'ŋʋ ‑n 'bä ‑yä ‑n ‑nɔɔ. 'Nɩ ʋ cii‑ 'sɩɩ nynä ‑mä, Nyɩkpɔ kä ɔ 'bä ‑yä ɔ 'nɔ 'sɔ ‑gbütë nä, ‑lɔɔ' nyɩkpɔɔ wa 'bhlɔ ‑yä ɔ 'ku.#15.4 Ɩ bha 'Nämʋ 20.12; 21.17; Detlo 5.16. 5'Nɩ anyɩ, a cɩa nynä ‑mä nyɩkpɔ yi mii 'nɩ ɔ yi ɔ 'bä ‑yä ɔ 'nɔ 'sɔ soo nynä ‑mä n yi bhä mii 'nɩ n yi‑i a 'kʋ yi ‑mä lʋʋ n 'kä‑ä bhlä 'nyɛ nä, n 'nö‑ö 'mʋ ‑läyɩɔ 'nyɛ ‑mä Laagɔ‑ n 'kʋ ylä 'nyɛ. 6Ka cɩa lä nynä ‑mä nyɩkpɔ yi mii 'nɩ ɔɔ' ‑lä ɔ 'bä ‑yä ɔ 'nɔ 'sɔ 'mänyɩ. Laagɔɔ' ciciwälɩɩ 'mɩ a gboguë ylä a 'bäsɩɩ tëtë ‑lɔɔ' ‑za. 7'Plɔfɛtɩ Ezayii' wälɩ mɛɛ‑ bhä. 'Kʋ wloowloogbɩɩ' nʋnyʋänyɩ‑! Anyɩ‑ ɔ sä bhlä. Ɔ cii‑ bhä nynä 8‑mä

Laagɔ lä, nyɩkpanä

Nimni 'kʋ wa bʋbɔnö'ö lä,

‑Mä waa' pɔlöö kɩ ‑sä'ä gwë fɛɛn.

9 'Flɛ wa yi'i lä bʋbɔ ‑kää

‑Mä waa' cɩalɩɩ 'mnö nä,

'Ylʋzɔkʋnyʋää' ‑lɔɔ 'mʋ wa cɩa. # 15.8‑9 Ɩ bha Eza 29.13.

Lʋʋ‑ yi lä nyɩkpɔ ‑gesi yëku 'ŋʋ nä

(Makö 7.14‑23)

10'Nɩ Zozii yi ‑jlëa laa 'nɩ ɔ yi nyɩkpaa soo, ɔ lä a poo 'nyukwli 'nägäsä ‑yä a 'nu sä n 'kä lä ci nä! 11‑Lʋʋ nyɩkpɔ lü 'nɩ ‑ʋ mʋ lä ɔɔ' 'mnö nä, ʋʋ' 'ŋʋɔ ‑wʋ ‑gesi yëku. ‑Lʋʋ ‑ʋ bha lä nyɩkpɔ nëë' nä, ʋmʋʋ‑ ŋʋɔ lä ‑gesi yëku. 12Ɔ cii‑ lä sɔɔ nä, 'nɩ ɔɔ' 'kʋgënyʋa yio yëku 'jloo. 'Nɩ wa yio soo, wlä Cɩanyɔ‑, Falizɩɛnyʋa nuu‑ lä ‑naa ciciwälɩɩ nä, ‑n ‑yi sɔɔ nynä ‑mä kɩ ‑kamänʋwa yëkuu ‑a? 13Zozii laa n 'Bäɔ ‑kʋ lä ‑mɔɔ ‑Laagɔɔ' nä, gogolʋʋ' ‑lʋʋ ɔɔ' ‑wʋ lä ‑goo nä, ɔ yiu glu ‑sä. 14A ‑tanʋwa 'yi ‑mä, wa ‑kʋ 'yikpüü' 'nɩ wa 'tie lä 'yikpü‑käänyʋä. 'Yikpü‑käänyɔ kä 'yikpü‑käänyɔ 'tie nä, wamä 'sɔ, kwa bhlüü ‑gbazlʋʋ'. 15'Nɩ Pɩɛlö yi nuwälɩ 'kʋ 'bhlü lä Cɩanyɔ‑, ‑nyädlä 'yɩ nä, ‑n ‑sanyɩma ‑zɔɔ! 16Zozii lä anyɩ ‑mä 'sɩɩ, anyɩa' bhobhowluu' ‑wʋ ‑lɔɔ ‑ŋëë ‑a? 17Aa' bhä sɔɔ ‑yi nynä ‑mä lʋʋ ‑ʋ mʋ lä nyɩkpɔɔ' nëë' nä, 'mnö ʋ bhlünöɔ ‑a? 'Nɩ 'tänyɩ kʋ ‑lɔɔ 'nɩ ɔ mʋ 'klä yëku ‑a? 18‑Mä, ‑ʋ bha lä nyɩkpɔ nëë' nä, ɔɔ' pleyi ʋ bha lä nä, ʋmʋʋ‑ yio lä ‑gesi plaa. 19‑Mɔɔ pleyii, ‑mɔɔ bhobholɩ ‑nyenyi bha lä. ‑Mɔɔ nyɩkpa‑bhlälɩ bha lä. ‑Mɔɔ ŋnʋ‑ylälɩ ‑yä wluylälɩ bha lä. ‑Mɔɔ 'klʋ 'tɛtʋʋ bha lä. ‑Mɔɔ 'ghüghë bha lä. ‑Mɔɔ ‑kpläkplö ‑dläfʋɛ bha lä. ‑Mɔɔ nyɩkpaa' 'luglulɩ bha lä. 20‑Nɩnɩ 'fɩɩn nä, ɩmɩɩ‑ ŋʋ lä nyɩkpɔ ‑gesi yëku. ‑Mä nyɩkpɔ 'nö wlɩ ‑wɔɔ 'nɩ ɔ kä ‑lü nä, ɩɩ 'ŋʋɔ ‑wʋ ‑gesi yëku.

Lowubhlɩ 'kʋʋ 'ŋnɔ ‑kä Zozii' pɔlötɛtɛ

(Makö 7.24‑30)

21Zozii ‑bha lä ‑lɔɔ nä kɔ ‑mʋ Tilö‑bhlɩɛ ‑yä Sidɔɔ‑bhlɩɛ 'mnö. 22Ɔ ‑kʋ ‑mɔɔ 'nɩ lowubhlɩ 'kʋʋ 'ŋnɔ ‑yio yëku. Kananɩɛbhlɩ 'kʋʋ 'ŋnɔ bhä. 'Ŋnɔɔ ‑woo, ɔ lä bheeje Kwlienyɔ‑! Davidö ‑Yowli‑, ‑n yibhënö'ö ŋäzö ‑mä, 'naa 'yuŋnʋgbɛnyɔɔ ‑zuzunyënyu bhɩɔ 'kwlɩ, 'nɩ ʋ nyɩɔ kpänyɩ nyäkälɩ! 23‑Mä 'ŋnɔɔ cii‑ lä sɔɔ nä, Zozii 'nöɔ ‑wʋ në ‑slä. 'Nɩ 'kʋgënyʋa yio yëku 'jloo 'nɩ wa yio soo, wlä Cɩanyɔ‑, ‑n gbä ‑yä 'ŋnɔɔ ‑bha‑anyɩ klë ‑mä ɔɔ' 'kɛsɛɛ yä zumë. 24'Nɩ Zozii yi ci ɔ lä 'Yizlɛ‑bhlɩnɛ 'mnö 'bhabhlöö‑ yä lä too nä, ɩɩ' ‑zä Laagɔ ‑lobho'o lä. 25‑Maa, 'ŋnɔɔ ‑yi 'nɩ ɔ paa‑ Zozii ‑kokoowli dëlü glu, 'nɩ ɔ yio bho klä, ɔ lä Kwlienyɔ‑, bheeje ‑n yi'i 'kʋ! 26'Nɩ Zozii yio soo, ɔ lä ɩɩ' ‑wʋ 'kʋ ‑ŋwa nynä ‑mä, wa 'bhlü 'yuaa lülülɩɩ 'kʋ ‑yä wa 'pɩɩ goyuë. 27'Ŋnɔɔlä ‑ɛɛɛ Kwlienyɔ‑, ɩ ‑kʋ 'zaazɩ sɔɔ. ‑Mä gwëyii' käänyɔ kä lü nä 'pɩä bhlü ‑zɔɔ, 'nɩ ‑lɔɔ 'pɩa gwëyie luwa ‑nä! 28'Ŋnɔɔ cii‑ lä sɔɔ nä, Zozii lä ‑mä 'ŋnɔnɔ kä ‑naa pɔlötɛtɛɛ 'ghlü ‑ɛɛn! Sä ‑n ‑waa lä nynä Laagɔ nʋ ‑naa ‑za nä, sɔɔ yi nʋɔ. Zozii cii‑ lä 'gää sɔɔ nä, kä 'ŋnɔɔ' 'yuŋnʋgbänyɔɔ ‑yamä.

Zozii ‑yamä gupanyʋä ‑bhutukpä

(Makö 7.31‑37)

29'Nɩ Zozii yi ‑lɔɔ' 'bhlɩɛ 'mnö ‑bha, ɔ ‑tito Galilee' 'nyi‑kpʋkpʋʋ 'nɩ ɔ yi ‑mɔɔ' 'kükëa 'wlu mʋ 'nɩ ɔ yi sä kʋ. 30‑Mä nyɩkpaa‑gbʋʋ yinöɔ bhä 'nɩ wa lɔɔ bhä gupanyʋää' nü nü nü. ‑Nänʋä bhlü bhä bhɩ, ‑nänʋä ‑kʋ bhä 'yikpüü', ‑nänʋä kplää‑ bhä, ‑nänʋää' 'nu bhɔɔ 'nɩ waa' ‑sää bhɔɔ 'mʋ ɩyä gupanyʋää' 'yigädalʋä. Wa lʋwa bhä Zozii yëku 'nɩ ɔ yamänʋwa bhä. 31‑Waa ‑sää bhɔɔ lä 'mʋ nä, wa sää bhɛ 'mʋ. 'Kpläkplänyʋä nää bhä. Bhɩ ‑bhlünyʋa nää bhɛ 'nää. 'Yikpü‑käänyʋa ni bhɛ sä. ‑Mä ‑nɩnɩ 'fɩɩn ‑kamä ‑jlëa 'tʋ 'nɩ wa fään 'Yizlɛnyʋää' Laagɔɔ 'ŋnu.

Zozii nyɛɛ‑ nyɩkpaa' ‑bhɛgö ‑mɔɔnä (4.000) lülülɩɩ

(Makö 8.1‑10; Matie 14.25‑31)

32'Nɩ Zozii yi ɔɔ' 'kʋgënyʋa laa, 'nɩ ɔ yi ci, ɔ lä nyɩkpa ‑gbʋnʋʋ' wälɩ ‑kä'ä yɩ ŋäzö 'kʋ. Ɩ nʋ yɩ ylɩɩ taa sä wa kʋ'ʋ lä yëku 'nɩ waa' lü ‑wʋ lʋʋ. ‑Gbugbe bhlʋwa lä nä, nn' ‑lä ci nynä ‑mä wa kʋ 'sɔɔ ‑yä wa 'kä waa' ‑bhäändö mʋ. Wälɩɩ' kwa ‑kä ‑blɔkʋ ŋënö. 33'Nɩ ɔɔ' 'kʋgënyʋa yio soo, wlä Cɩanyɔ‑, ‑gbäsɩɩ ‑a ‑kʋ lä ‑mää nä, ‑mɔɔ ‑zie kpänyɩ gwë. 'Nɩ wa ‑zu lä 'sɩɩ nä, dä ‑sä ‑a yi bhä lülülɩɩ ‑sä 'nɩ ‑a yiwa bhä 'nyɛ 'nɩ wa yi bhä lü 'nɩ wa yi bhä loo? 34Zozii lä 'flɔɔbhü zio a ‑kä bhää? Wlä ‑a ‑kä 'flɔɔbhü ‑ngbɔɔsɔ, 'nɩ ‑a bhɛɛ‑ 'sɩɩ zlüüyilɩä zio. 35‑Mä Zozii ‑gbä 'nɩ nyɩkpaa yi ‑dʋdʋʋ' 'kplɩfɔ. 36'Nɩ ɔ yi 'flɔɔbhüü ‑ngbɔɔsɔ ‑yä zlüü 'kʋ 'bhlü, 'nɩ ɔ yi Laagɔ bhään. Ɔ ‑döödönɩ 'mʋ 'nɩ ɔ yi 'kʋgënyʋa 'nyɛ nynä wa dëë nyɩkpaa' 'fɩɩn. 37‑Mä nyɩkpaa 'fɩɩn ‑lü 'nɩ wa ‑loo, 'nɩ lülülɩɩ ‑ji 'kʋ 'nɩ 'kʋgënyʋa ‑fämʋɩ. ‑Ɩ ‑ji bhlä 'kʋ nä ɩ yie‑ ‑takwü ‑ngbɔɔsɔ. 38Nyɩkpaa 'fɩɩn ‑wa ‑lü lä nä, wa ‑bhlü nyɩkpaa' ‑bhɛgö ‑mɔɔnä (4.000). 'Ŋwnɩa ‑yä 'yua 'sɔɔ bhɔɔ ‑zɛnöɔ. 39'Nɩ Zozii yi gbä 'nɩ nyɩkpaa yi waa' ‑bhäändö mʋ. Ɔmɔ ‑mä 'sɩɩ 'nɩ ɔ yi 'gokpë plä 'nɩ ɔ yi Magadabhlɩ 'kʋ mʋ.

Jelenleg kiválasztva:

Matie 15: god

Kiemelés

Megosztás

Másolás