Lukö 4

'Dëvlo nyɛɛ‑ Zozii ‑zɔɔpälɩ

(Matie 4.1‑11; Makö 1.12‑13)

1Kplɔɔkplɔɔ‑wugɔɔ kwlii‑ bhɛ lä Zozii 'kʋ kpänyɩ nä, ɔ ‑bha lä 'gä Zludɛɛ‑nyie yëku nä, kʋ ‑fɔɔ 'popie 'mnö. 2‑Mɔɔ ɔ ‑kʋ 'nɩ, ylɩɩ' gwlɩ 'sɔ 'mnö, 'Dëvlo nyɩɔ‑ ‑zɔɔpälɩ. Ylɩɩ 'fɩɩn ɔ ‑sä lä ‑mɔɔ nä, ɔɔ' ‑wʋ lʋʋ ‑lü. ‑Mä ylɩɩ' gwlɩɩ 'sɔ ‑glää ylä 'klʋ nä, kä ‑gbugbe ‑klɔ. 3Ɩ ‑kä 'ŋnö nä, 'Dëvlo ‑yi 'nɩ ʋ ‑sonöɔ, ʋ lä ‑n gä 'zaazɩ Laagɔ ‑Yowli plöö‑ nä, ‑n gbä ‑yä cɛkʋbhënä jɩjlää 'flɔɔbhëë'! 4'Dëvlö cii‑ lä sɔɔ nä, Zozii lä ɩ ‑jɩjlɔ Laagɔ‑bɔɔgʋʋ 'mnö nynä

Lülülɩɩ ‑tɛɛ 'nyɛ ‑wʋ nyɩkpɔ zëkpë. # 4.4 Ɩ bha Detlo 8.3.

5Ɔ cii‑ lä sɔɔ nä, 'nɩ 'Dëvlo yio dä ‑bhlo fä. ‑Lɔɔ ‑zii sää 'wlu. 'Nɩ 'kpobhuu ‑bhlo 'kʋ, ʋ yio 'ylʋzɔɔ' 'leyi‑bhlɩɩ 'fɩɩn tlaa. 6'Nɩ ʋ yio soo, ʋ lä 'leyi‑bhlɩnɩ 'fɩɩn, n yi‑i mɩ 'kämäädä 'nyɛ, ɩmɩ ‑yä ɩɩ' 'klʋagbaa 'fɩɩn. ‑Amʋ wa nyɩɩ‑ lä nä, nyɩkpɔɔ' lɔɔ n ‑waa lä nä, ɔmɔ n nyɩɩ. 7Nä, ‑n gä mii 'nɩ ‑n gä'ä dëlü 'wlu sä ‑glaa, 'nɩ ‑n gä'ä ‑bʋbɔ nä, 'leyi‑bhlɩnɩ 'fɩɩn yi ‑naa lɩɩ 'plö! 8'Dëvlo cii‑ lä sɔɔ nä, Zozii lä ‑Kwlienyɔɔ, ‑naa Laagɔ, ɔmɔ ‑bhlo 'coo ‑n ‑kä 'nɩ 'gä bʋbɔ, ɩyä ɔmɔ ‑bhlo 'coo ‑n 'gä 'wlu sä glaa.#4.8 Ɩ bha Detlo 6.13.

9Ɔ cii‑ lä sɔɔ nä, 'nɩ 'Dëvlo yio Zolizalɛmʋduu' fä, 'nɩ ‑mɔɔ' Laagɔ‑bhutu 'kädʋʋ 'wluu, ʋ yio ‑mɔɔ gbla. 'Nɩ ʋ yio soo, ʋ lä ‑mɔɔ gä 'zaazɩ Laagɔ ‑Yowli plöö‑ nä, ‑n ‑bha ‑mää ŋɔkʋ ‑yä ‑n bhlü ‑zɔɔ ‑mä, 10ɩ ‑jɩjlɔ nynä ‑mä,

Laagɔ yi ‑Laagɔzizii soo ‑naa ‑za,

'Nɩ ɩ yi‑i 'kʋ wloo.

11 Ɩ yi‑i wlɩ ‑zɔɔ tlaa 'nɩ,

‑Naa ‑kokokpëë' ‑lä cɛkʋbhë gozo. # 4.10‑11 Ɩ bha Lɔlɔ 91.11‑12.

12'Dëvlo cii‑ lä sɔɔ nä, Zozii lä ɩ cio‑ ‑mɔɔ Laagɔ‑bɔɔgʋʋ 'mnö nynä ‑mä, Kwlienyɔ ‑naa Laagɔ, ‑naa ylɔɔ ‑lä gbɩɩ'!#4.12 Ɩ bha Detlo 6.16.

13'Dëvlo nyɛɛ‑ 'sää Zozii ‑zɔɔpälɩɩ ‑aaa, 'nɩ ʋ yio yëku ‑bha, 'nɩ ʋ yi mʋ. 'Tänyɩ 'kä bhɛ ‑lɔɔ kʋ ‑yä ʋ 'kä bʋkʋ yi.

Zozii ɔ 'bhunyʋä 'nöɔ ‑wʋ 'mänyɩ‑

(Matie 4.12‑17; Makö 1.14‑15)

14‑Lää ‑nɩnɩ 'fɩɩn plöö‑ ylä nä, kä Zozii 'ylɩbhɔ‑ Galilee‑bhlɩɛ 'mnö. ‑Mä Kplɔɔkplɔɔ‑wugɔɔ' 'tɛtɩɩ ‑kʋɔ bhä kpänyɩ yëku. 'Nɩ wa ci bhä ɔɔ' wälɩ ‑lɔɔ' 'lëkpëa 'fɩɩn 'mnö. 15Ɔ cɩa bhä Laagɔ‑bhitii 'mnö, 'nɩ nyɩkpaa 'fɩɩn fänöɔ bhä 'ŋnu. 16'Nɩ ɔ yi Nazalɛtöduu' mʋ, ‑mɔɔ ‑gbäsɩɩ ɔ 'bhʋä lä nä. Ɔɔ' 'bhlɛ bhɛ lä nä, Sabaa‑gwlɛylʋʋ 'kʋ, kɔ ‑mʋ Laagɔ‑bhutuu'. Laagɔ‑bɔɔgʋʋ' zɛɛ‑tänyɩ ‑ŋëë ylä nä, kɔ ‑bha yɩ 'kʋ ‑yä ɔ 'kä zɛɛ. 17'Nɩ wa yio 'plɔfɛtɩ Ezayii' 'bɔɔgʋʋ 'nyɛ. Ɔ ‑känʋ lä 'klʋ nä, wälɩklëa ɔ ‑ghlää lä 'kʋ nä, ka ci bhä nynä

18 Kwlienyɔ Laagɔɔ' 'Wugɔɔ ‑kʋ'ʋ yëku.

Kɔ ‑sä'ä, 'nɩ ɔ ‑lobho'o ‑yä

N 'kä ŋäzönyʋa 'Nägädöö ‑lä.

Kɔ ‑lobho'o lä ‑yä,

Nyɩkpaa ‑wa ‑kʋ lä ‑säklöö' nä,

Wa 'kä 'kpɔ döɔ.

Ɩyä ‑lʋa ‑waa 'ni ‑wʋ lä sä nä,

Waa' 'yii 'kä welio.

Ɩyä ‑lʋa nyɩkpa klä lä geyusä nä,

Wa 'kä geylüü' ‑bha. # 4.18 Ɩ bha Eza 61.1‑2.

19 Ɩyä Kwlienyɔ Laagɔɔ' plɛkʋmɛnɔɔ' ylʋʋ,

Lioo 'mnö ɔ 'kʋ lä pana nä,

N 'kä ‑lɔɔ' lioo' yëkuu' wälɩɩ ci. # 4.19 Ɩ bha Levi 25.10.

20Zozii ‑bhɩä lä zɛɛlɩ nä, 'nɩ ɔ yi 'bɔɔgʋʋ 'klʋ ‑gbaa. 'Nɩ ɔ yiu Laagɔ‑bhutuu' ‑gänʋnyɔɔ 'nyɛ. 'Nɩ ɔ yi 'plö 'nɩ ɔ yi sä kʋ. ‑Bhlɛ nyɩkpaa 'fɩɩn ‑wa ‑kʋ bhlä ‑mɔɔ Laagɔ‑bhutuu 'mnö nä, wa wluo bhä. 21'Nɩ ɔ yiwa soo, ɔ lä ‑zɩkä nä, wälɩnɩ ‑ɩ ‑jɩjlɔ lä 'bɔɔgʋnʋ 'mnö 'nɩ a nuu‑ lä nä, ɩ yä glää. 22‑Mä Zozii sää bhlä 'mʋ nä, kä nyɩkpaa ‑bhutukpä plɛkʋ 'niniwa‑ ɔɔ' ciciwälɩɩ' mɛnɔɔ' ‑za. 'Nɩ wa ci bhä, wlä ‑maa, Zozɛfʋ ‑yowli, ɔmɔɔ‑ bhä ‑lɔyɩ ‑kʋ ‑a? 23Zozii lä a yi'i 'nünë 'pää nynä ‑mä ‑dɔtä, ‑n nʋ yɩ ‑n yëku gwäzö ‑nä! Wälɩɩ 'fɩɩn ‑n ‑nʋ lä Kapɛnayumöö' nä, ‑a nui‑ ‑klää! Nä ‑n nʋnɩ yɩ 'sɩɩ ‑mää ‑n 'bhlɩ ‑nä! 24'Nɩ Zozii yiwa bʋkʋ soo, ɔ lä n sonö'anyɩ ‑nʋawlɛɛ' nynä ‑mä 'plɔfɛtɩ kä ɔ 'bhlɩ ‑kʋ nä, ɔ 'bhunyʋää' 'mänyɩnöɔ ‑wʋ. 25A ni 'yi ‑a, ‑nʋawlɛɛ 'mnö, 'plɔfɛtɩ Elii' 'tänyɩɛɛ' nä, ŋɔkʋ gbɔɔ‑ bhä 'klʋ, 'nɩ 'nyuu ‑wʋ ‑bhlä ‑kaaa, 'nɩ ɩ ‑nʋ 'ylʋbɔ taa ‑yä 'cɩ ‑ngboplo. 'Nɩ 'bhlɩɛ 'fɩɩn 'mnö ‑gbugbe 'kädɛ ‑yi. ‑Lɔɔ' 'tänyɩɩ nä, 'kuzëlüŋwnɩä ‑zu bhä 'Yizlɛ‑bhlɩɛ 'mnö. 26‑Mä ɩ ‑kʋ sɔɔ, 'nɩ 'plɔfɛtɩ Elii, Laagɔ 'nöɔ ‑wʋ waa' nëëdëë' 'kuzëlüŋnɔ yëku ‑lobho. ‑Mä Sidɔɔ‑bhlɩɛ 'mnö 'duu wa laa lä Salɛpɩta nä, ‑mɔɔ' 'kuzëlüŋnɔ, ɔmɔ yëku Laagɔ ‑lobho Elii.#4.26 Zɛɛ 'sɩɩ 1 'Loyua 17.9. 27'Nɩ 'Plɔfɛtɩ Elizee' 'tänyɩɛɛ' ‑mä 'sɩɩ, 'zläbhlänyʋä ‑zu bhä 'Yizlɛ‑bhlɩɛ 'mnö, ‑mä sɔɔ ɩ ‑kʋ 'nɩ Elizee' ‑wʋ waa' 'kʋʋ nyɩkpɔ ‑yamä. ‑Mä lowuyu Naamä, Siliibhlɩ 'kʋʋ nyɩkpɔɔ 'zlaa bhlä bhlä nä, ɔmɔ ‑bhlo Elizee ‑yamä.#4.27 Zɛɛ 'sɩɩ 2 'Loyua 5.1‑14.

28Zozii cii‑ ylä sɔɔ nä, nyɩkpa 'fɩɩn ‑wa ‑kʋ bhlä ‑mɔɔ Laagɔ‑bhutuu' nä, kä plɛkʋ ‑siwa. 29Wa ‑bha 'kʋ 'nɩ wa yio klä, 'nɩ wa yio 'duu ‑glëglë fä. 'Kükë 'klʋ wa 'slää‑ bhlä Nazalɛtö‑duu nä, 'kükënä aa' ‑kpʋkpʋʋ 'wlu, ‑mɔɔ wa ‑fɔɔ ‑yä wa 'kɔ bhɛ aa' ‑gbazlʋʋ 'mnö 'suu. 30‑Mä Zozii blüë‑ nyɩkpanä nëëdë, 'nɩ ɔ yi mʋ.

Zozii ‑sä nyɩkpɔ ‑zuzunyënyu kätää'

(Makö 1.21‑28)

31‑Nɩnɩ 'fɩɩn plöö‑ ylä nä, Galilee' 'duu wa laa lä Kapɛnayumö nä 'mnö, Zozii ‑mʋ ‑mɔɔ. 'Nɩ Sabaa‑gwlɛylʋʋ 'kʋ, ɔ cɩa bhä Laagɔ‑bhutuu 'mnö. 32Sä ɔɔ' cɩalɩɩ ‑kä bhlä 'päwä kpänyɩ nä, nyɩkpaa plɛkʋ 'niniwa‑. 33Nä ‑mɔɔ Laagɔ‑bhutuu' nyɩkpɔ ‑kʋ bhä ‑mɔɔ 'nɩ ‑zuzunyënyu ‑kʋɔ bhä kätää'. ‑Mä nyɩkpɔɔ gaa‑ 'mʋ, 34ɔ lä 'aaa! Nazalɛtöö' Zozii‑, wälɩ ‑sä ‑n 'ylänö‑anyɩ bhä? Kä ‑n yi yɩ ‑yä ‑n 'gä‑anyɩ nuë ‑a? ‑Mɔɔ nä, n ‑yi‑i! Laagɔɔ' Kplɔɔkplɔɔnyɔɔ‑ ‑yi lä ‑mää 'ylʋzɔɔ nä, ‑mɔɔ‑ plöɔ lä. 35‑Mä ‑zuzunyënyuu ci bhɛ lä sɔɔ nä, kä Zozii ‑gaanʋ 'kʋ, ɔ lä ‑n bhlü nëkʋ ‑yä ‑n ‑bha nyɩkpɔyɩ kätää'! Ɔ cii‑ lä sɔɔ nä, 'nɩ ‑zuzunyënyuu yi nyɩkpɔɔ sä pää ‑jlëa nëëdë. 'Nɩ ʋ yio kätää' ‑bha. Ʋ 'nöɔ ‑wʋ sää 'jülɛɛ ŋʋʋ‑. 36‑Mä nyɩkpa 'fɩɩn‑ ‑kʋ bhlä ‑lɔɔ nä, kä plɛkʋ 'niniwa‑, 'nɩ wa sonö sonö bhä, wlä nyɩkpɔnɔɔ' ciciwälɩɩ ‑kä 'päwä ‑ɛɛn! Ɔɔ' 'päwaa ‑yä ɔɔ' 'tɛtɩɩ, ɩ tlü ‑zizinyenyii, 'nɩ ɩ gu! 37‑Nɩnɩ 'fɩɩn gbä bhɛ 'nɩ Zozii' 'ŋnöö bhlüü‑ ‑lɔɔ' 'lëkpëa 'kʋ.

Zozii ‑yamä gupänyʋä ‑bhutukpä

(Matie 8.14‑17; Makö 1.29‑34)

38Zozii ‑bha lä Laagɔ‑bhutuu 'mnö nä, kɔ ‑mʋ Simɔɔ' ‑gbäsɩɩ. ‑Mä Simɔɔ ɔ 'wʋtɔŋnɔ wätlɩ‑kukwë bhlɔɔ bhä. 'Nɩ wa yi Zozii soo nynä bheeje ɔ klänöɔ. 39'Nɩ Zozii yi 'ŋnɔɔ yëku 'kʋ kwlio, 'nɩ wätlɩ ‑kukwëa, ɔ yia 'kʋ ‑gaa nynä a ‑bhɔɔ 'yɛkɛɛ. 'Nɩ wätlɩɩ yio 'yɛkɛɛ ‑bha! 'Nɩ, 'kpobhuu ‑bhlo 'kʋ, 'ŋnɔɔ yi 'kʋ bha 'nɩ ɔ yiwa ŋënü 'nyɛ.

40‑Kugbë‑tänyɩɩ' ‑ŋëë ylä nä, nyɩkpaa 'fɩɩn‑ ‑kä bhlä gupanyʋä, 'nɩ ‑lʋa 'fɩɩn guu' nü nü nü bhlä bhlä nä, wa ‑lʋwa Zozii yëku. ‑Mä ɔ ‑gbɛɛ nyɩkpɔ nyɩkpɔ ‑klɔgbä 'kʋ 'nɩ ɔ yiwa yamä. 41‑Zizinyenyi ‑bha 'sɩɩ ‑lɔɔ nyɩkpa ‑bhutukpä kätää'. Ɩ woo bhä, 'nɩ ɩ ci bhä nynä ‑mä ‑mɔɔ nä, ‑mɔɔ plöö‑ lä Laagɔ ‑Yowli! ‑Mä kä Zozii ‑gaanɩ bhä 'kʋ. Ɩ ‑yi bhlä sɔɔ nynä ɔmɔɔ‑ plöö‑ lä Klisöɔ nä, ɔɔ' 'ylä bhɔɔ nynä ɩ ‑sää 'mʋ.

Zozii ci Laagɔwälɩ Laagɔ‑bhitii 'mnö

(Matie 4.23; Makö 1.35‑39)

42Zeli ‑ze lä 'gää ‑jaa nä, kä Zozii ‑bha duu' 'nɩ ‑gbäsɩɩ nyɩkpɔɔ' ‑bhɔ lä ‑kʋ nä, ɔ ‑mʋ ‑mɔɔ. 'Nɩ nyɩkpaa ‑bhutukpä yio täälɩ 'kʋ cie. Wa nio‑ ylä nä, waa' bhɛ ‑waa nynä ‑mä ɔ ‑bhʋwa yëku. 43'Nɩ ɔ yiwa soo, ɔ lä ɩ ‑ŋwa 'kʋ nynä ‑mä n mʋ 'yigäda‑dii 'mnö ‑yä, n 'kä Laagɔɔ' 'Leyiduu' 'Nägädöö ‑mɔɔ fä ‑mä, 'ɩzä Laagɔ ‑lobho'o lä. 44'Nɩ Zozii nä, ɔ bhlü bhä 'bhlɩɛ Laagɔ‑bhitii, 'nɩ ɔ ci bhä ‑mɔɔ Laagɔwälɩ.

Jelenleg kiválasztva:

Lukö 4: god

Kiemelés

Megosztás

Másolás