Lukö 1

Luköö' 'bɔɔgʋʋ' gba

1'Klʋkpää kʋnyɔ Teofilö‑#1.1 Teofilö: Zɛɛ 'sɩɩ Nʋnʋ 1.1., wälɩɩ‑ plöö‑anyɩ lä nëëdë 'kʋ nä, nyɩkpa ‑bhutukpä yɩɩ 'bɔɔgʋʋ' 'ŋʋlɩ 'kʋ cie. 2Nyɩkpaa 'fɩɩn ‑wa 'nii‑ lä dɩ cie‑ lä 'kʋ nä, 'nɩ ‑wa ‑kä ylä ‑zɩkä Laagɔwälɩɩ' bielɩɩ' ‑tëbhuu nä, wamää‑ ‑sonö‑anyɩ lä. 3Nä, 'klʋkpää kʋnyɔ Teofilö‑, ‑amʋ ‑mä 'sɩɩ, n cie‑ ‑bhɔɔdää 'nɩ n ‑tänɩ lä 'nɩä 'nɩä ‑aaa nä, ɩɩ' sä n nii‑ lä nä, ɩ ‑ŋwa 'kʋ nynä ‑mä n sonö‑ö sɔɔ 'pɛlɩ 'pɛlɩ. 4Kä n jɩjlä‑ä lä 'bɔɔgʋnʋ ‑yä ‑n 'gä sɔɔ yibhë nynä ‑mä 'klüü 'fɩɩn wa cɩä‑ä lä nä, ɩ ‑glö nyaasäsä.

Zakalii ‑yä ɔ 'ŋnɔ Elizabɛtö 'sɔɔ' ‑wʋ 'yu ‑kä

5Zudee‑bhlɩɛ 'mnö 'loyoo wa laa bhlä Elodö nä, ɔɔ' 'tänyɩɛ 'mnö, 'cibhisänyɔ ‑bhlo, ɔmɔ wa laa bhä Zakalii. Ɔ ‑glö bhä ‑mɔɔ ‑gɔgɔbhlää' 'cibhisänyɔ Abɩaa' 'lɔlʋnyɔ. Zakaliinɔ, ɔ 'ŋnɔ 'mɔ wa laa bhä Elizabɛtö. Elizabɛtö nä, ɔ ‑glö bhä ‑mɔɔ ‑gɔgɔbhlää' 'cibhisänyɔ Alɔɔ' 'lɔlʋŋnɔ. 6‑Mä Laagɔ dëlü nä, kä Zakalii ‑yä Elizabɛtö 'sɔ waa' nʋnʋgbɩ gëë‑ bhä 'yi. Wa ŋʋ bhä sää 'titi Kwlienyɔ Laagɔɔ' ‑Lɔɔ ‑yä ‑Jlämaa 'sɔ 'klʋkpää'. 7‑Maa, Elizabɛtöö' gään bhɔɔ nä, waa' ‑wʋ 'yu ‑gään ‑kaaa 'nɩ wamä 'sɔ yi 'kɔgwlɛ plä.

‑Laagɔzuzu ‑soo Zakalii nynä ɔ yi 'yu gään

8'Ylʋʋ ‑bhlo ‑kʋ ‑lɔɔ, 'nɩ 'cibhisänyɔ Zakalii yi 'cibhisäda mʋ ‑yä ɔ 'kä 'cibhi ‑sä. Ɔɔ' 'cibhisä‑jlëa' 'ylʋʋ bhlä, 9'nɩ waa' 'bhlɛ bhlä 'sɩɩ nä, kwa paa‑ ‑nugbe, 'nɩ ‑nugbenɛ yi Zakalii ‑sä ‑yä ɔ 'kä Laagɔ‑bhutu 'kädʋʋ 'mnö plä ‑yä ɔ 'kä 'cibhisä‑kätawlɛɛ ŋu. 10‑Mä ‑kätawlɛɛ' ŋu‑tänyɩɛ ‑ŋëë ylä nä, nyɩkpa ‑bhutukpä ‑yi bʋbɔ ‑kää 'nɩ wa ‑kʋ bhä ‑mɔɔ jlukʋ 'nɩ wa bhibhie bhä. 11‑Mä ‑lɔɔ' 'tänyɩɛ ‑bhlobhlo 'mnö, ‑mɔɔ 'cibhisädaa, ‑Laagɔzuzu ‑ghlä Zakalii 'yii. Ʋ 'nynigo‑ 'cibhisädaa' ‑kätawlɛɛ'#1.11 ‑kätawlɛɛ: Kä Yizlɛnyʋä bʋbɔnɩɛ bhä mʋ, ‑mɔɔ Laagɔ‑bhutu 'kädʋʋ 'mnö. ŋuudaa. 12Zakalii niu‑ lä 'yi nä, kä plɛ ‑bhɔɔ 'mnö. ‑Ŋänö yɔ bhɛ plä. 13'Nɩ ‑Laagɔzuzuu yio soo, ʋ lä Zakalii‑, ‑naa ‑guu lä ‑mä, ‑naa bhibhiee yä Laagɔ dëlü ŋëë! ‑N 'ŋnɔ Elizabɛtö yi 'yuŋwadi gään. 'Ŋnöö ‑n 'gɔ lä 'pä nä, ɩmɩ plöö‑ lä Zään. 14'Yunɔɔ' wälɩɩ yi ‑naa pleyii ‑jäkä 'ŋʋ. 'Nɩ nyɩkpa ‑bhutukpä yi ‑lɔɔ' gälʋʋ' ‑pʋpɛ nʋ. 15‑Mä Kwlienyɔ Laagɔ dëlü nä, 'yuo ‑glö nyɩkpa 'kädɔ. Ɔɔ' 'mnä ‑lä kɩ divaa ‑yä 'bhlä 'bhlänʋ! Ɔ yi ɔ 'nɔ 'mnö kʋ 'nɩ Kplɔɔkplɔɔ‑wugɔ yio ‑mɔɔ 'kʋ kwlii. 16Ɔ yi gbä 'nɩ 'Yizlɛnyʋä ‑bhutukpä yi bʋkʋ waa' Kwlienyɔɔ, ‑yä waa' Laagɔɔ 'klʋ tlaa. 17'Yuo yi yi nynä Laagɔɔ' lobho lobhonyɔ. 'Plɔfɛtɩ Elii' 'päwaa ‑yä 'tɛtɩɩ ɔ ‑kä bhlä nä, 'yunɔ yii 'sɩɩ kään. Ɔ yi mii 'nɩ 'bäsɩɩ' pɔlöö, ɔ yii 'ylɩbha. 'Nɩ ɔ yi gbä 'nɩ wa ‑yä waa' 'yua 'sɔ yi 'jɛnyɩ bʋkʋ. Ɔ yi gbä 'nɩ nyɩkpaa‑ ‑waa bhlä cɩcɩɔlɩɩ nä, wa yi 'yigëgbɩɩ' nʋnyʋaa' dɩgälɩɩ 'kʋ 'bhlü. Nyɩkpaa' ‑lʋa yi lä Kwlienyɔ Laagɔɔ' ‑za ‑ghlɩlɩ nä, 'yunɔ yiwa wlʋa.

18‑Laagɔzuzuu cii‑ lä sɔɔ nä, 'nɩ Zakalii yiu 'ylä, ɔ lä ‑maa, sä n yi bhä sɔɔ yibhë nynä ‑mä wälɩɩ ‑n cii‑ lä nä, ɩ yi glää? N ‑plä ‑kɛ kpänyɩ 'kɔgwlɛ, 'nɩ n 'ŋnɔ ‑mä 'sɩɩ ɔ ‑plä ‑kɛ 'kɔgwlɛ! 19'Nɩ ‑Laagɔzuzuu yio soo, ʋ lä ‑amʋ plöö‑ lä ‑Laagɔzuzu Gabliyee#1.19 Gabliyee: Laagɔ ‑kä ‑zizi ‑bhutukpä. 'Nɩ sɩ ‑kʋ lä nä, ɩ ‑kä sɩɩ sɔɔ 'ŋnö. Ɩɩ' pää ‑lɛkädʋ ‑bhlo wa laa lä Gabliyee.. Nä Laagɔ dëlü n ‑kʋ, 'nɩ ‑n lobhuu ‑gä. Kä Laagɔ ‑lobho'o lä nynä ‑mä 'nägädönö, n ‑lämɩɩ. 20‑Mä sä 'naa ciciwälɩɩ, ‑n 'nɩɩ ‑wʋ lä plɛkʋ 'tɛɛ nynä ‑mä, ɩ 'tänyɩɛ kä ‑ŋëë nä, ɩ yi glää nä, ‑a 'bhää ylä ‑zɩkä ‑lää 'kʋ nä, ‑naa ‑blɩɩzɔ‑wälɩɩ yi too. ‑Nn ‑lä 'mʋ sää ‑aaa, 'nɩ wälɩnɩ 'fɩɩn n ‑sonö‑ö lä nä, ɩ yi glää.

21‑Lɔɔ' 'tänyɩɩ nä, nyɩkpaa ‑bɛɛ bhä 'kɔɔkɔ Zakalii ‑mɔɔ jlukʋ. ‑Mä sä ɔ ‑gwlɛ lä 'cibhisäda nä, kɩ 'niniwa plɛkʋ. 22Ɔ wlʋʋ‑ ylä ‑zɔɔ nä, ɔɔ' ‑wʋ mii‑ 'nɩ ɔ 'kä në ‑sä. Ɩ ‑gbä 'nɩ wa ‑yibhë sɔɔ nynä ‑mä, ‑mɔɔ 'cibhisädaa nä, wälɩ ‑ghlɔ ‑mɔɔ 'yii. Ɔ mii‑ bhɛ 'mʋsäälɩ ‑mä nyäkälɩɩ' ɔ cii bhɛ.

23Ɔɔ' lebhenʋylɩɩ ‑bhɩä ylä nä, kɔ 'ylɩbhɔ‑ 'nɩ ɔ yi ɔɔ' ‑bhäändä mʋ. 24‑Mä ɩ ‑nʋ 'tänyɩ 'nɩ, ɔ 'ŋnɔ Elizabɛtö yi 'gʋ plä. Ɔ ‑plä lä 'gʋʋ nä kɔ ‑zizio. Ɔ ‑kʋ ziziodä ‑aaa, 'nɩ ɩ ‑nʋ 'cɩ ‑ngbü. Ɔ ci bhä ɔɔ' pleyi, ɔ lä 25a ni sä Kwlienyɔ Laagɔ ‑nʋ lä 'naa ‑za nä! Wälɩɩ‑ nʋ bhlä ‑mää 'ylʋzɔɔ 'naa zoo nä, ɔ paa‑ 'naa ‑za 'nɩ ɔ ‑sämɩɩ yëku.

‑Laagɔzuzu lä Malii yi 'yu gää

26Elizabɛtö ‑plä lä 'gʋʋ nä, ɩɩ' ‑ngboplona‑cʋʋ 'mnö, Galilee‑bhlɩɛɛ' 'duu wa laa lä Nazalɛtö nä 'mnö, Laagɔ ‑lobho ‑mɔɔ ‑Laagɔzuzuu Gabliyee. 27Ʋ ‑lobho ‑zuzuu ŋnʋgbänyɔ ‑bhlo yëku, ɔmɔ wa laa bhä Malii. Ŋnʋgbänyɔɔ nä, ɔɔ' ‑lä bhä tee ŋwadi ‑yibhë, ‑mä wa yä bhɛ 'ŋʋ nynä nyɩkpɔɔ wa laa lä Zozɛfʋ nä, wa 'kɔnyɔ nöödä 'nyɛ. Zozɛfʋnɔ ‑glö bhä 'loyoo Davidöö' 'lɔlʋnyɔ. 28‑Laagɔzuzuu ‑plä lä ŋnʋgbänyɔɔ' dää nä, kʋ ‑bhänöɔ, ʋ lä ‑ayoo Malii! Laagɔ ‑kʋ‑ʋ yëku! Ʋ yä‑ä 'nää 'kädä 'nyɛ! 29‑Mä Malii nuu‑ lä sä ‑Laagɔzuzuu ‑bhänöɔ lä nä, plɛɛ' bhlüo bhɛ. Ɔ ylä bhɛ ɔ yëku nynä ‑mä bhään‑wälɩnɩ, säsä 'titi ɩ sä bhä ‑zɔɔ? 30'Nɩ ‑Laagɔzuzuu yio soo, ʋ lä Malii, ‑naa ‑guu ‑lä ‑mä ‑n ‑yä 'nää 'ni Laagɔ dëlüü! 31‑N ni 'yi ‑a, ‑n yi 'gʋ plä 'nɩ ‑n yi 'yuŋwadi gään. 'Ŋnöö ‑n 'gɔ lä 'pä nä, ɩmɩɩ‑ plöö‑ lä Zozii. 32Ɔ yi nyɩkpa 'kädɔ 'plö 'nɩ wa yio 'sɩɩ 'Kʋzi Laagɔ ‑Yowli laa. 'Nɩ ɔ tötɔ Davidöö' 'leyi‑këkpëa Kwlienyɔ Laagɔ yionya 'nyɛ. 33Ɔmɔɔ‑ 'gä lä 'Yizlɛnyʋä 'kämä, 'nɩ ɔ yi 'kämälɩɩ ‑wʋ bhloodä ‑kä.

34'Nɩ Malii yi ‑Laagɔzuzuu 'ylä, ɔ lä ‑ma n ‑yä ŋwadi 'sɔɔ ‑läzä yëkuu' mʋʋ nä, säsä ɩ 'kä bhä 'kʋ 'plöö? 35‑Laagɔzuzuu lä Kplɔɔkplɔɔ‑wugɔɔ yi‑i 'kʋ kwlii, 'nɩ 'Kʋzi Laagɔɔ' 'päwaa yi‑i 'kʋ 'gbi nynä ‑zuzu. Nä kplɔɔkplɔɔyu‑ ‑n 'gä lä gään, 'ɩɩ ‑zä wa 'kɔ lä Laagɔ ‑Yowli laa.

36‑N ni ‑naa 'lɔlʋkpöŋnɔ Elizabɛtö, 'ŋnɔɔ wa sä bhlä nynä ‑mä kɔ taa‑ 'kɔɔkɔɔ ‑za nä, ɔ yä 'gʋ plä. Ɔɔ' ŋnʋklölɔɔ yä 'gʋ plä, ʋʋ' ‑ngboplona cʋʋ' ‑a ‑kʋ ylä. 37Nä, lʋʋ ‑wʋ ‑kʋ 'nɩ ʋ 'kä Laagɔ nʋlɩɩ' sɩä. 38‑Laagɔzuzuu cii‑ lä sɔɔ nä, Malii lä n ‑glö Kwlienyɔɔ' Laagɔɔ' ‑gänʋŋnɔ nä, sä ‑n cii‑ lä nynä ‑mä ɩ yi kʋ nä, ɩ kʋ sɔɔ! 'Nɩ ‑Laagɔzuzuu yio yëku ‑bha 'nɩ ʋ yi mʋ.

Malii ‑yi Elizabɛtö 'yi 'ni kää

39‑Lɔɔ' ylɩɩyɩ 'mnö nä, Malii ‑bha 'kʋ 'nɩ ɔ ‑mʋ 'fäfä Zudee‑bhlɩɛ 'mnö ‑gbäsɩɩ 'küküü' ‑kʋ lä nä. 40‑Mɔɔ Zakalii 'gbëä ‑kʋ bhlä. Ɔ ‑ŋëë lä nä, kɔ ‑plä 'nɩ ɔ yi Elizabɛtö bhään. 41‑Mä Elizabɛtö nuu‑ lä Malii' bhään‑wälɩɩ nä, 'yuo‑ ‑kʋɔ bhlä 'mnö nä, kɔ paa‑ 'mʋ. 'Nɩ Kplɔɔkplɔɔ‑wugɔɔ yi Elizabɛtö 'kʋ kwlii 42'nɩ ɔ yi 'mʋ gaa, ɔ lä Malii‑, kä Laagɔ pää‑ 'nyu, 'nɩ ‑n zi 'ŋwnɩa 'fɩɩn 'kʋ! 'Nɩ 'yuo ‑ɔ ‑kʋ‑ʋ lä 'mnö nä, Laagɔɔ' 'nyupälɩ ‑kʋɔ yëku! 43'Nɩ Elizabɛtö yi bʋkʋ ci, ɔ lä 'oo! 'Nɩ ‑amʋ n plöö‑ bhä 'nɩ, 'naa Kwlienyɔɔ ɔ 'nɔ plä bhä 'naa ‑bhutu ‑zɔɔ? 44Wloo, 'tänyɩɛ 'mnö ‑naa bhään‑wälɩɩ ‑klä'ä lä 'nyukwlii nä, 'yuo ‑ɔ ‑kʋ'ʋ lä 'mnö nä, kɔ paa‑ 'mʋ ‑pʋpɛɛ' ‑za. 45'Nyupälɩɩ yä‑ä 'kʋ ŋëë, Malii! Sä Kwlienyɔ ‑sonö‑ö lä nä, ‑n ‑kää lä sɔɔ plɛkʋ nä, ɩɩ' 'nyupälɩɩ yä‑ä 'kʋ ŋëë!

Malii bhlɩ 'nɩ ɔ jäka Laagɔ

46'Nɩ Malii yi në ‑sä, ɔ lä

Ooo! N fään 'naa Kwlienyɔ Laagɔ 'ŋnu 'naa 'wugɔɔ 'mnö!

47'Naa Puënyɔ Laagɔ ‑gbä 'nɩ ‑jäkä 'kädä ‑kʋ yɩ 'naa pleyii yi!

48Nn' ‑wʋ dä ‑kä,

Laagɔɔ' ‑gänʋŋnɔ n plöö‑ lä,

‑Mä ɩ ‑kʋ sɔɔ 'nɩ Laagɔ 'ŋʋnö'ö 'yikʋ!

'Bhää yɩ ‑zɩkä ‑lää 'kʋ ‑yä 'kɔɔkɔ ‑za nä,

'Ylʋzɔkʋnyʋä yi 'naa ‑za ci nynä ‑mä,

Kä n nii‑ 'nyupälɩ.

49Sä 'Tɛtɩ‑Laagɔ ‑nʋ lä 'naa ‑za nä,

Sɔɔ 'ghlü kpänyɩ!

Ʋmʋʋ‑ plöö‑ lä Kplɔɔkplɔɔ Laagɔ.

50‑Wa ŋʋʋ lä 'klʋkpää' nä,

Kʋ yibhënʋwa 'kɔɔ ‑yä 'kɔɔ ŋäzö.

51Ʋʋ 'päwaa ‑za ʋʋ 'tɛtɩɩ yä dää 'fɩɩn ŋëë.

Ʋ ‑gbä 'nɩ ‑blipänyʋa yä ‑dloo.

52Ʋ ‑gbä 'nɩ 'loyua këkpü yiwa ‑zɔɔ ‑bha.

Ʋ ‑gbä 'nɩ ‑waa bhɛ lä ‑cʋcʋ ‑kä nä, wa yä ‑dɔlʋʋ' 'yikʋ 'plöö.#1.52 Zɛɛ 'sɩɩ Zɔbʋ 5.11; 12.19.

53Ʋ ‑gbä 'nɩ ‑lʋa ‑gbugbe bhlä bhlä nä, wa nii‑ 'nää.

'Nɩ lɛkäänyʋa, ʋ tluwa‑ 'nɩ wa nää‑ yɩ wlɩ wlɩ.

54Laagɔɔ' ‑gänʋnyɔ Yizlayɛɛ' 'yua ʋ 'nʋwa ‑wʋ 'kʋ ‑bë.

Ʋʋ' plɛkʋmɛnɔɔ 'mnö, kʋ ‑yi lä ‑yä ʋ 'kwa puë.

55‑Ɛɛɛ, ʋ ‑soo bhä sɔɔ ‑a tɩtɩä.

Ʋ lä, ‑a tötɔ Ablaamʋ ‑yä ɔɔ' 'lɔlʋnyʋä 'sɔ nä,

Ʋ yiwa bhä ŋäzö yibhë 'kɔɔ ‑yä 'kɔɔ ‑za.

56Malii nä, ɔ ‑kʋ Elizabɛtö yëku ‑aaa, 'nɩ ɩ ‑nʋ 'cɩ taa yiosä. 'Nɩ ɔ yi ɔɔ' ‑gbäsɩɩ 'ylɩbhɔ.

Zään Badisö gänö‑tänyɩ

57‑Nɩnɩ 'fɩɩn plöö‑ ylä nä, 'tänyɩɛ 'mnö Elizabɛtö 'kä bhlä gänö nä, kɛ ‑ŋëë yɩ. Ɔ mʋ lä gää ‑kää nä, ɔ ‑gään 'yuŋwadi. 58Nyɩkpaa' ‑lefɩɩn Elizabɛtö ‑yʋwa 'sɔ 'tënö‑ bhlä nä, wa nuu‑ lä wälɩɩ nynä Kwlienyɔ Laagɔ ‑nʋ Elizabɛtö 'nää 'kädä nä, kwa ‑yi 'nɩ, wa ‑yɔsɔ ‑yi ‑lɔɔ' ‑pʋpɛɛ däbhloo' nʋʋ. 59'Yuo ‑kä bhɛ lä ylɩɩ ‑ngbaatä nä, wa döɔ‑ 'kʋ 'nɩ, wa yio 'sɩɩ 'ŋnö 'pä. Ɔ 'bä 'mɔ wa pɔɔ‑, wlä ɔmɔɔ‑ plöö‑ Zakalii. 60'Nɩ 'yuo ɔɔ' 'nɔ yiwa soo, ɔ lä 'nn! ɔmɔ wa 'kä lä Zään laa. 61Nyɩkpaa lä 'Ɔɔɔ! 'Nɩ 'lɔlʋkpaa 'kʋ nyɩkpɔɔ' ‑kä 'gää sɔɔ 'ŋnö plöö‑! 62'Nɩ wa yi Zakalii nyäkälɩɩ 'ylää nynä ɔ panʋwa sä ɔ ‑wa lä nynä wa laa 'yuo nä. 63'Nɩ Zakalii yi ci nynä wa 'nyɩɔ kplupä. Wa nyɩɔ‑ lä kplupaa nä, 'nɩ ɔ yia 'klʋ jɩjlä, nynä ɔmɔɔ‑ plöö‑ Zään. 'Nɩ waa' ‑lefɩɩn nükpëë' yiwa slä. 64'Kpobhuu ‑bhlo 'kʋ, 'nɩ Zakalii' nuwälɩɩ yi welio, 'nɩ ɔ yi 'mʋ ‑säälɩ 'kʋ cie. Ɔ sää bhɛ 'mʋ 'nɩ ɔ fään bhä Laagɔ 'ŋnu.

65‑Mä ‑lɔɔ' kpëkpëkʋʋ' 'dii 'mnö nyɩkpa 'fɩɩn, kä ‑ŋänö ‑plʋwa. 'Nɩ Zudee' 'kükü‑bhlɩɛ 'mnö 'dii nyɩkpaa, wa 'ŋʋʋ bhä wälɩɩ 'dö 'kʋ. 66‑Mä nyɩkpaa 'fɩɩn ‑wa nu bhlä wälɩɩ nä, kä wa fänɩ bhä plɛ yëku. Wa ylä bhä wa yëku nynä ‑maa, 'yunɔ nä, säsä ɔ 'kä bhä ‑zee kʋʋ? 'Nɩ 'yunɔ nä, Kwlienyɔ Laagɔɔ' 'päwaa ‑kʋɔ bhä 'zaazɩ yëku.

Zakalii jäka Laagɔ

67'Nɩ Laagɔɔ' Kplɔɔkplɔɔ‑wugɔɔ yi ɔ 'bä Zakalii 'kʋ kwlii. Laagɔ cinöɔ bhɛ nëë, 68ɔ lä

Kwlienyɔ Laagɔ, ‑ʋ plöö‑ lä 'Yizlɛnyʋaa' Laagɔɔ nä,

Ʋʋ' 'ŋnöö mʋ 'ŋnu!

Ʋ ‑yi‑anyɩ nëëdë ‑yä ʋ 'kä‑anyɩ geylüü' ‑sä!

69Ʋ ‑gbä 'nɩ puënyɔɔ ‑ɔ ‑kä lä 'päwa nä, ɔ yä yi

Ʋ ‑ghlänöɔ ʋʋ' ‑gänʋnyɔɔ Davidöö' 'lɔlʋʋ 'mnö,

'Nɩ ɔ yi‑anyɩ lä nëëdë yi.

70‑Nɩnɩ 'mɩ Kwlienyɔ Laagɔ ŋʋʋ‑ bhlä ‑gɔgɔbhlää' kplɔɔkplɔɔ‑plɔfɛtɩnyʋa nëë'

'Nɩ wa cii‑ bhlä.

71 Wlä ‑anyɩa ‑zɔbhlɛgbänyʋa ‑yä nyɩkpa 'fɩɩn‑ ‑wʋ lä ‑anyɩa wälɩ 'kʋ mɛɛ‑ nä,

Ʋ yi‑anyɩ mʋwa bhä nëë' ‑sä.

72Sɔɔ ʋ ‑yibhë lä ‑a tɩtɩä ŋäzö,

'Nɩ ʋ ‑luë lä ʋʋ' Kplɔɔkplɔɔ‑mɛnʋʋ dä 'kʋ.

73Laagɔ soo bhlä ‑a tötɔ Ablaamʋ nä, kʋ 'sɔlɩ‑,

74Ʋ lä, ʋ yi‑anyɩ bhä ‑zɔbhlɛgbänyʋä nëë' ‑sä,

Ɩyä ‑a gʋ bʋbɔ ‑kää yi nä, ‑ŋänöö' ka‑anyɩ ‑kä 'bhlä.

75Nä, ylɩɩ 'fɩɩn ‑a 'gä lä zëkpë 'kʋ ‑sä nä,

‑A 'gä kplɔɔlɩ ‑yä 'yigëëlɩ 'mnö kʋ.

76'Nɩ Zakalii yi bʋkʋ ci, ɔ lä

'Nɩ ‑mɔɔ! 'Naa 'yunɔ,

‑Mɔɔ wa 'kä lä 'Kʋzi Laagɔɔ' 'plɔfɛtɩ laa.

‑Mɔɔ 'gä lä 'plö ‑bhlɛ ‑yä,

‑N 'gä Kwlienyɔɔ' ‑blɔɔ 'kʋ göglä.

77‑N 'gä gbä ‑yä 'Yizlɛnyʋä 'kä sɔɔ yibhë nynä

Kɔ yi ‑yä ɔ 'kwa nyenyi cie.

78‑Anyɩa Laagɔɔ' plɛkʋmɛnɔɔ' ‑wʋ 'bɛ.

Ʋ yi gbä 'nɩ zëlü yi ŋɔkʋ ghlää.

'Ylʋʋ kä ghlä nää' zëlü, ɩ yi‑anyɩ 'kʋ ŋänɩä.

79Nyɩkpaa‑ ‑kʋ lä 'cucukpa 'mnö sä nä,

Ɩyä ‑lʋa ‑wa ‑kʋ lä 'kwiee ‑zuzuu 'mnö sä nä,

Zëlüü 'kwa 'kʋ ŋänɩä.

Ɩ yi gbä 'nɩ ‑a yi bho 'nägädä slüa,

'Nɩ ‑a yi 'kʋ wɔtɔlɩɩ ‑blɔɔ bhlü.

Zään Badisö bhʋä 'yɛkɛɛ' ‑yä 'wugɔɔ 'mnö

80Naa, 'yunɔ#1.80 'yunɔ: Zään Badisö 'mɔ wa sä lä. nä, sä 'tänyɩ plö bhɛ lä nä, sɔɔ ɔ bhʋä bhɛ, 'nɩ ɔɔ' 'wugɔɔ 'mnö 'tɛtɩɩ 'ŋʋnöɔ bhä 'kʋ. Ɔ ‑mʋ 'nɩ, ɔ ‑kʋ ‑mɔɔ 'popie 'mnö. Ɔ ‑kʋ ‑mɔɔ ‑aaa 'nɩ, ylʋʋ ‑kʋ ‑lɔɔ 'nɩ ɔ yi 'Yizlɛnyʋää' ‑jlëa 'yii ghlä.

Jelenleg kiválasztva:

Lukö 1: god

Kiemelés

Megosztás

Másolás