Lug 23
23
Payilèd sàʼ Yeso
(Mat 27:1-2,11-14; Mag 15:1-5; Jɔn 18:28-38)
1Itog bəd mbe məjìm ya niŋ Yeso ghò abə Payilèd ne yaʼi gɔbnà. 2Mbɔb ya ko gu zì isaʼi igun məd gha, “Tè gwì wə̀d gho̰ ne we zìyè àbùrì inga aben. Wì gha imbə̀ʼ bəd naʼa awɔb mə̀tag abə Kayisà. Wì bə̀ ywìrì gha, zi ya Wə̀d we ne Ŋwiye zɔ̀ʼi, bə̀ yaʼ ifɔn.”
3Anyumə̀ ne Payilèd ya zughi inug mbo̰, wì ya biri abə Yeso gha, “Àghò kə ifɔn mə̀Ju?”
Yeso ya ywìtì gha, “À ya icheg ne àghò gha.” 4Payilèd ya si ghà abə itog bəd mbàn Ŋwiye, fɔrɔ abə inɔ̰ bəd gha, “Chəyi mə̀ bàri anug mɔ̀ʼɔ ne wə̀d gho̰ gùghi.”
5Mbɔb ya chè imbìghè ni gha, “Wə̀d gho̰ we to atog abə bəd inga isiŋi ijìm a Jùdeyà gha mbe ghiyə ìkɔ̀b abə aben, ane inug ne we chwìte. Wì ya ko a Galìli. Məd gho̰ fə se aŋa.”
Payilèd chà Yeso abə Erɔ̀d
6Icheg ne Payilèd ya zughi anug azo̰, wì ya biri gha, “Wə̀d gho̰ kə wə̀d a Galìli?” 7Anyumə̀ ne Payilèd ya kyeri gha Yeso ya nɔ̀ʼ inga aba aben ne Erɔ̀d yaya sàʼa, wì ya chà aməd abə Erɔ̀d. Erɔ̀d ya bə̀ yaʼ a Jèrusalèm anyumə̀ we.
8Anyumə̀ ne Erɔ̀d ya bàra Yeso, wì ya gyendi kwàʼ ako imbə̀ʼ icheg ne agha ya sà ne wì yaya bè kə̀bə̀ ni bàd aməd. Wì ya zug inug nɔʼ nɔʼ imbə̀ʼ aməd se kə̀bə̀ gha nji Yeso fàʼ ayeti anug mɔ̀ʼɔ zìye bàd. 9Wì ya biri inug nɔʼ nɔʼ abə Yeso, chəyi wì ywìti àze mɔ̀ʼɔ ka amɔʼ. 10Itog bəd mbàn Ŋwiye tì mə̀chwitì mə̀nɔ̀ʼɔ̀ ne ya təmi angu ya zì inug igun məd kwàʼ ane ika. 11Erɔ̀d tì mə̀sogyì məd ya chəʼə Yeso, bə̀ ywìrì chàpà aməd. Mbɔb ya zì ndwi àka inun igun məd si ywìrì chà aməd abə Payilèd. 12Erɔ̀d tì Payilèd ya yaʼ bəd ìpàb. Aneg ze, mbi ya bə̀ŋə̀ si mə̀sə̀ʼ.
Payilèd niŋ isɔbi anug gha mbe zwete Yeso
13Payilèd ya kàrì itog bəd mbàn Ŋwiye tì itog bəd inga aben fɔrɔ inɔ̰ bəd, mbi fete. 14Wì si ghà inɔb gha, “Mbə kə̀ niŋ wə̀d gho̰ yeʼe inum gha məd we to itog abə bəd gha mbe ghiyə ìkɔ̀b abə aben. Mə fə biri inug ibo inən imbìghè, bə̀ zə̰ gha chəyi anug mɔ̀ʼɔ ne wə̀d gho̰ gùghi. 15Chəyi Erɔ̀d bə̀ bàd anug mɔ̀ʼɔ ne wì gùghi. À ya aton ne wì ywirì chà aməd ina. Mbə̰ bàd àzən aghi gha chəyi anug tibɔ̀ŋ mɔ̀ʼɔ ne wì ghì ne chwi gha mbe zweti aməd. 16Ane, mə biri ywiri aməd, sàŋì, wì ghò yi.” [17Gɔbnà yaya nḛ ni sàŋì wə̀d ndəŋ ifibì ne bəd chɔʼi inga nyùmə̀ Iteri Chègun.]#23:17 Chəyi ìŋwàʼrì anun mɔ̀ʼɔ beri akwiri kwa kwa azo̰ ne pè ane 17
18Inɔ̰ bəd we ijìm ya kyen gha, “Zweti wə̀d gho̰! Chìye Bàrabas nàʼ ina!” 19(Bàrabas ya yaʼ inga ndəŋ imbə̀ʼ icheg ne wì ya ghùm to itog abə bəd gha mbe ghiyə ìkɔ̀b abə aben, bə̀ zwèti wə̀d mɔ̀ʼɔ.)
20Icheg ne Payilèd yaya kə̀bə̀ ni sàŋì Yeso, wì ya ywìrì ghàm abə bəd mbe ighəm ndəŋ. 21Mbɔb ya chè imbìghè ni kyen gha, “Kɔ̀mbɔ aməd igun azed abaʼri! Kɔ̀mbɔ aməd igun azed abaʼri!”
22Wì ya ghàm inɔb ane ighəm ne pè ane itad, biri gha, “Mə̀ kɔ̀mbɔ aməd igun azed abaʼri ane aghə? Chəyi mə̀ bàri anug ne wì gùghi ne chwi gha mbi mənyìʼ zwèti aməd. Mə biri ywiri aməd, sàŋì wì gho yi.”
23Mbi ya chè imbìghè ni kyen ane gì ka ka gha Payilèd Kɔ̀mbɔ aməd igun azed abaʼri! Mbi ya kyen anene, Payilèd si fàʼ aghi ne mbɔb yaya kə̀bə̀. 24Ane, Payilèd ya si niŋ isɔbi anug gha mbe zwete Yeso. 25Wì ya chìye Bàrabas sàŋì. Bàrabas ya wə̀d we ne ya ghum to itog abə bəd gha mbe ghiyə ìkɔ̀b abə aben, bə̀ zwèti wə̀d mɔ̀ʼɔ. Payilèd ya si nàʼa Yeso inɔb gha mbe fàʼa aghi ne mbi kə̀bi ni fàʼ tì məd.
Mbe kɔ̀mbi Yeso igun azed abaʼri
(Mat 27:32-44; Mag 15:21-32; Jɔn 19:17-27)
26Mə̀sogyì ya niŋ Yeso ghò. Icheg ne mbi yaya ghò, mbi ya nì bɔ̀mbì tì wə̀d mɔ̀ʼɔ a Sayirèn ne yaya nyḭ̀yḛ inga aben ne ikum məd ya Sayimùn. Mbɔb ya ghì wì bèʼì azed abaʼri ze, Yeso se yḛ̀ ibo anjìm.
27Inɔ̰ bəd ndan ndàn yaya bène ibo anjìm. Mə̀yi yaya bə̀ abɔ̀ʼ. Mbi yaya nḛ̀ aməd, se dèghè, kwìyè ìsaʼ. 28Yeso ya si ghàbri ghà inɔb gha, “Bɔn àyi Jèrusalèm, imbə̀ʼ mbə̰ dèghe awən imbə̀ʼ amə. Mbə̀ dèghe imbə̀ʼ ìwən nyɔd fɔrɔ ìmbən bɔn. 29Mbə̀ dèghe imbə̀ʼ icheg ne nyùmə̀ we yèʼe ne mbi biri gha, ‹Ŋwiye zì àbɔrɔ̀bɔd igun mə̀yi ne yaʼi kɔ̀m, tì igun mə̀yi ne chəyi mbi kweʼì bɔ̀ŋ ibum, fɔrɔ mə̀yi ne chəyi mbi kweʼì nyɔ̀ŋi ŋwan!› 30Anyumə̀ we, mbi biri ghà abə tiwum kyen kyen gha, ‹Mbə̀ suyə igun ina!› bə̀ ywìrì ghà abə tiwum kwa kwa gha, ‹Mbə̀ kubri wa!› 31Bəd kə mə̀ ghì anìŋ inum, wə̀d chɔ̀m ne yaʼi icheg azed zu, mbi kə ywiri si ghì iye abə bəd inug tibɔ̀ŋ ne yaʼi icheg azed zɔbi?”
32Mbi ya bə̀ niŋ mbaŋà mɔ̀ʼɔ tìbe ni ya gùg anug mɔ̀ʼɔ ni ghò zweti awɔb abɔ̀ʼ Yeso. 33Anyumə̀ ne mbi ya niŋi awɔb pè asiŋi ze ne mbe kàrà ane Tìngəʼ-tog.#23:33 Tìngəʼ-tog ya mbe kàrà ane skull ichug mə̀kara. Mbi ya kɔ̀mbi aməd angu igun azed abaʼri. Mbi ya bə̀ kɔ̀mbi bəd mbe ne ya gɔghi anug iban məd, ifibì aba abo jəghi, ìywin aba abo təŋ. 34Yeso ya chàʼra Ŋwiye gha, “Ìmə Mbaʼ, waʼ ìmbɔb inug tibɔ̀ŋ imbə̀ʼ icheg ne chəyi mbi kyeri aghi ne mbe ghìyə̀.”
Mə̀sogyì mbe ya niŋ ndwi məd sàndi, buʼ tikaʼì igun ni ghàpì ndwi ze mbɔb mbɔb. 35Bəd ya təm iban se nḛ̀. Itog bəd yaya chàpà aməd. Mbi ya gha, “Wì yaya pùmnə bəd ndəŋ. Àmə yaʼ aghə ne məd yaʼi Wə̀d we ne Ŋwiye zɔ̀ʼi, ne Ŋwiye bə̀ chɔʼ, wì pumni ìwi nyɔd.”
36Mə̀sogyì ya bə̀ yeʼe chàpì aməd. Mbɔb ya nàʼ mənoʼ ŋwàŋi ŋwàŋi#23:36 Mənoʼ ŋwàŋi ŋwàŋi ya vinegar ichug mə̀kara ibo. 37Mbɔb ya ghà ibo gha, “Àghò mə yaʼ ifɔn mə̀Ju, pumni ìwe nyɔd!” 38Mbi ya ŋwàʼrì àŋwàʼrì mɔ̀ʼɔ kɔ̀mbì atog azed abaʼri məd gha, “AŊA YA IFƆN MƏ̀JU”.
39Wə̀d imɔʼ abɔ̀ʼ bəd mbe ne mbi ya kɔ̀mbi iban Yeso ya chàpì aməd. Wì ya biri ibo gha, “Àghò kə̀ kayi wə̀d ne Ŋwiye zɔ̀ʼi? Pumni ìwe nyɔd bə̀ pùmni wa bə̀!”
40Ìywin tì wə̀d ya gaŋ ibo si gha, “Chim tizi! Àghò kə chəyi àghò we bɔ Ŋwiye? Àghò kə ghàmà anìŋ imbə̀ʼ icheg ne mbi niŋ isɔbi isaʼi ifibì igun ina fɔrɔ məd? 41Mbe kòʼ ni kɔ̀mbi awa anìŋ imbə̀ʼ icheg ne tè gùg anug. Àsi wə̀d gho̰, chəyi Wì ghì anug tibɔ̀ŋ mɔ̀ʼɔ ka!” 42Wì ya si gha, “Yeso, Àghò wendi mə anyumə̀ ne àghò yèʼe icheg ìfɔ̀n.”
43Yeso ya ywìtì ibo gha, “Mə ghà tesiʼ ine, kwàʼ tèchɔ̀ŋ, àghò biri yaʼ tì inum inga paràdayìs#23:43 Paràdayìs ya asiŋi igyendi fɔrɔ àzùtì iban Ŋwiye..”
Icheg ne Yeso ku
(Mat 27:45-56; Mag 15:33-41; Jɔn 19:28-30)
44Ni ko àngɔŋ tisi, isiŋi ya fin aben ijìm, anene dù ane mə̀nyùmə̀ mə̀tad. 45Ze ya yaʼ anìŋ imbə̀ʼ icheg ne nyùmə̀ ya fiyḛ. Chəyi wì ya ywìrè zùʼə. Ndwi kyen ze ne ya ghàpi mbàn Ŋwiye iba ibe ya sè iba ibe ni ko ikaŋ pè aseg. 46Yeso ya chàʼrà Ŋwiye ane gì ka ka gha, “Ìmə Mbaʼ, Mə zì àmə azwighi inga ìte tikye abo.” Wì ya ghàm anìŋ, si ku.
47Atog wə̀d abə mə̀sogyì iki ifibì ne ya bàri inug mbo̰ ya si ghùmni Ŋwiye gha, “Kwàʼ tesiʼ, wə̀d gho̰ ya kə̀ wə̀d ne təmi kòʼ!”
48Anyumə̀ ne bəd məjìm mbe ne ya fete ni nèn anug azo̰ ya bàri anìŋ, mbɔb ya si bèʼì ibo zàbi igun itog se sàkà awɔb. 49Si ya gha, bəd məjìm mbe ne ya kyère aməd tì mə̀yi mbe ne ya nɔ̀ʼi a Galìli bə̀ yḛ̀ abɔ̀ʼ məd, ya si təm agha se, se nḛ̀ inug mbo̰.
Icheg ne mbi twəŋi Yeso
(Mat 27:57-61; Mag 15:42-47; Jɔn 19:38-42)
50Wə̀d mɔ̀ʼɔ ya yaʼ inga ifeti itog bəd mə̀Ju ne ikum məd ya Jòseb. Məd ya wə̀d a Àrimàtiyà inga aba aben Jùdeyà. Məd yaya wə̀d chɔ̀m ne ya bə̀ təm kòʼ imbìghè abə Ŋwiye. 51Chəyi məd ya bḛ isɔbi anug we ne mbi ya niŋi fɔrɔ anug ze ne ifeti itog bəd mə̀Ju ya ghì. Wì yaya bə̀ ghɔ̀mɔ̀ anug ìfɔ̀n Ŋwiye. 52Wì ya ghò abə Payilèd, pè bìri awu àze Yeso. 53Wì ya chì awu məd ikaŋ azed abaʼri nìpi inga ndwi linèn ghò nɔ̀ŋì inga iseg ne mbi ya to inga igho, ne chəyi mbi ya kiri kweʼì nɔ̀ŋì awu wə̀d mɔ̀ʼɔ inga. 54Aneg ni chuʼri nyɔd ni jəg Iteri Chègun ya kòʼ. Aneg àzwètì ya se nḛ̀ ni ko.
55Mə̀yi mbe ne ya yeʼe a Galìli abɔ̀ʼ Yeso ya beni anjìm abə Jòseb. Mbɔb ya ghò bàd iseg we fɔrɔ icheg ne wì ya nɔŋi awu məd inga. 56Mə̀yi mbe ya si kùrə achan, pè tàngi titeti fɔrɔ məwud àka inun.
Mbɔb ya zwètì igun aneg àzwètì mə̀Ju icheg ne tikə Muse ya chwi.
Jelenleg kiválasztva:
Lug 23: MBTP
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
© 2019 CABTAL
