Jɔn 2
2
Yeso bə̀ŋì mənib ane mənoʼ
1Ineg ya chè ibe, àsi igun aneg abɔ̀ʼ, mbi ya ghi inami a Kanà ne ya asiŋi mɔ̀ʼɔ inga aben Galìli. Ngɔb Yeso ya yaʼ ane inam we. 2Mbi ya bə̀ kàʼa Yeso tì mə̀mə̀nənùg məd ane inami we. 3Anyumə̀ ne mənoʼ ya mèghi, ngɔb Yeso ya ghò ghà ibo gha, “Mənoʼ fə mèg.”
4Yeso ya ywìtì gha, “Àghò kə kə̀bə̀ gha mə ghənə? Chəyi ìmə nyumə̀ ni fàʼ aghi mɔ̀ʼɔ aŋa kiri koʼi.”
5Ngɔb ìwi Yeso ya ghà abə bəd mbe ne yaya ko̰ mənoʼ gha, “Aghi ne wì gha inən gha mbə̀ fàʼa, mbə̀ bə fàʼ kwàʼ àzewən.” 6Mbe akwighe mənib kyen kyen tìfughə ne mbi ya to ane ateg ya yaʼ angu. mə̀Ju ya bèrì iku mbe akwighe mbo̰ ne mbe kɔ̀mɔ̀ mənib inga sò ìwɔb nyɔd icheg ne ìmbɔb mə̀nɔ̀ʼɔ̀ chwi. Akwighe imɔʼ ya nìŋə mə̀lità icheg ìghum ìfàmi kə̀ iki ifibì tì ìghum ibe. 7Ane ngɔb Yeso ya gha ane, iki nyumə̀ mɔ̀ʼɔ ya chè, Yeso si ghà abə bəd mbe ne yaya ko̰ mənoʼ gha, “Mbə̀ swe mbe akwighe mbo̰ ane mənib.” Ane, mbi ya swe mənib inga mbe akwighe mbe. 8Wì ya si ghà inɔb gha, “Mbə̀ kɔmɔ mbi mɔ̀ʼɔ ghò nàʼ abə wə̀d ne chà inami gho̰ gha wì zweʼi.” Mbi ya ghì ane. 9Wì ya kɔ̀m ghò nàʼ. Wə̀d we ya zweʼi ne mənib mbe fə bə̀ŋə ane mənoʼ, chəyi wì ya kyeri asiŋi ne mənoʼ mbe ya nɔ̀ʼi angu. Si ya gha, bəd mbe ne yaya ko̰ mənoʼ ya kyeri. Ane, wì ya tiye mbaʼ igən ghò anjìm ghà ibo gha, 10“Wə̀d ya mə̀ kàʼ anug, wì ya fə bì nàʼ mənoʼ chɔm abə bəd mbi no bɔŋ se nàʼà mbe ne chəyi mbi taŋ bɔ̀ŋ. Àsi awe, àghò si nàʼ mbi chɔm mbo̰ yaʼ anjìm.”
11Àzo̰ ya ayeti anug mbègtog ne Yeso ya fàʼi. Wì ya fàʼ ayeti anug azo̰ ni chwi ìwi ika a Kanà, asiŋi ne yaʼi inga Galìli. Ane, mə̀mə̀nənùg məd ya si taŋ zì ìwɔb ibḛfiŋ igun məd.
Yeso ya kamni bəd ne ghìyə̀ iywin inga mbàn Ŋwiye
(Mat 21:12,13; Mag 11:15-17; Lug 19:45,46)
12Yeso ya nɔ̀ʼ angu, ghò a Kàpenàwum. Ngɔb Yeso tì məfi Yeso fɔrɔ mə̀mə̀nənùg məd ya si nɔ̀ʼ ghò abɔ̀ʼ məd. Mbi ya chughi angu ane inun ineg mɔ̀ʼɔ.
13Nyùmə̀ yaya se tìnde ane ineg mbe ne mə̀Ju mbe jə̀ghə Iteri Chègun. Ane, Yeso nɔ̀ʼ ghò a Jèrusalèm. 14Wì ya pè angu, nyi inga ikam mbàn Ŋwiye, si bàd icheg ne bəd mbe fèndè pɔ̀ŋ tì njə̀g fɔrɔ mə̀bupə. Wì ya bə̀ bàd bəd ne ya chughi igun ìtɔb tiŋaŋi se kɔ̀pɔ məkab. 15Wì ya twendi məniʼ ane ngwàn, kàmni bəd mbe ne yaya fèndè pɔ̀ŋ tì njə̀g fɔrɔ mə̀bupə inga ikam mbàn. Wì ya bə̀ gwè tiŋaŋi aseg, sàkì məkab abə bəd mbe ne yaya kɔ̀pɔ məkab. 16Wì ya si kyen abə bəd mbe ne yaya fèndè mə̀bupə, ghà inɔb gha, “Mbə̀ kə niŋ dù! Imbə̀ʼ mbə̰ bə̀ŋə̀ awən nəb ìmə Mbaʼ ane asiŋi iywin.”
17Mə̀mə̀nənùg məd ya si wendi icheg ne mbi ya ŋwàʼri imbə̀ʼ aməd gha, “Tèta, icheg ne mə̀ zi atog ni fàʼ inga ìze nəb, à ya anug ne biri niŋ àmə atog.”
18Anyumə̀ ne Yeso ya fə kamni bəd chì inga ikam mbàn Ŋwiye, itog bəd mə̀Ju ya ghò bìri ibo gha, “Àkə iku ayeti anug weg ne tì àghò chwi ina ni gha tì kyeri gha àghò bèrì ika ni fàʼ àfàʼì azo̰ ne àghò fàʼi anìŋ?”
19Yeso ya ywìtì inɔb gha, “Mbə saʼa mbàn Ŋwiye ìzo̰ aseg, mə biri ywiri kɔd ane ineg itad.”
20Mə̀Ju ya ghà ibo gha, “Mbi ya niŋ tituʼ ìghum ikwè chɔ̀b tìfughə ni kɔd mbàn Ŋwiye izo̰. Ze kə che iye ne àghò gha àghò biri kɔd ane ineg itad?” 21Mbi yaya ghà ane ne chəyi mbi kyeri gha, mbàn Ŋwiye ze ne Yeso yaya ghà ya nyàmnyɔd məd. 22Ane, anyumə̀ we ne Yeso ya si zwème ane iwu, mə̀mə̀nənùg məd ya ki si wèndi anug ne yaʼi inga Àŋwàʼrì Ŋwiye, bə̀ si wèndi anug ne Yeso ya ghum ghà inɔb.
Yeso kyèri anug imbə̀ʼ ikuchèg wə̀d-aku
23Anyumə̀ we ne Yeso ya kiri biri a Jèrusalèm ane Iteri Chègun, bəd nɔʼ nɔʼ ya bàd iyeti inug ne wì yaya ghìyə̀ si bḛ anug məd. 24Si ya gha, chəyi Yeso ya zi fìŋ igun inɔb imbə̀ʼ icheg ne wì ya fə kyeri ìwɔb ikuchèg mbɔb məjìm. 25Chəyi wə̀d mɔ̀ʼɔ ndəŋ ya beri ni tòʼrì awɔb abə Yeso imbə̀ʼ icheg ne wì ya fə kyeri inug ijìm ne yaʼi inga ìtɔb fìŋ.
Jelenleg kiválasztva:
Jɔn 2: MBTP
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
© 2019 CABTAL
