ମାତିସ୍ 28
28
ଯୀଶୁସ୍କି ଉଜ୍ଜନା
(ମାର୍କୁସ୍ ୧୬:୧-୧୦; ଲୁକାସ୍ ୨୪:୧-୧୨; ଯୋହାନ୍ ୨୦:୧-୧୦)
1ପାବିତାର୍ ଉଲ୍ଲାଘି ପାଛ୍ଲି, ହାପ୍ତାଘି ପହ୍ଲେ ଉଲ୍ଲା ଭୋର୍ ପାଇରିନ୍ ମାରିୟାମ୍ ମାଗ୍ଦାଲୀନୀ ଆରୁ ଦୁସ୍ରା ମାରିୟାମ୍ ମାସ୍ଣାବନ୍ ଏରାଗେ ବାର୍ଚାର୍। 2ଆରୁ ଏରା, ଅଣ୍ଟା ବାଡ଼୍କା ଭୁଇଁଡୋଲ୍ ମାନ୍ଚା, ଏନ୍ଦେର୍ଗେକା ପ୍ରାଭୁସ୍କି ଅଣ୍ଟା ଦୂଁତ୍ ସରଗ୍ତି ଏତ୍ତିୟା ଆରୁ ଚାହା ବାରିକିରି ଆଦ୍ ଆ ଚାଁଚାନ୍ ପାଖିୟାଚା, ଆରୁ ଆଦ୍ଘି ମିଆଁ ଅକ୍କିୟା। 3ଆଦ୍ଘି ରୂପ୍ଦ୍ ବିଜ୍ଲି ଲେଖା ଆରୁ ଆଦ୍ଘି ଚିଢ଼ାଦ୍ ବରଫ୍ ଲେଖା ଧୋବ୍ ରାଚା। 4ଆଦ୍ଘି ଏଲ୍ଚ୍କାତି ଜାଗୁୱାର୍ ଥାର୍ଥାରାର୍କେରାର୍, ଆରୁ କେଚ୍ଚକାଘି ସାମାନ୍ ମାନ୍ଚାର୍ କେରାର୍। 5ଲେକିନ୍ ସରଗ୍ଦୂଁତ୍ ମାଏକିନିଆଁରିନ୍ ତେଙ୍ଗିୟା, “ଆମା ଏଲ୍ଚା, ଏନ୍ ଆହାଲେନ୍ କା ନିମ୍ କ୍ରୁଶ୍ନୁ ଠୋକ୍ଚ୍କା ଯୀଶୁସିନ୍ ବେଦ୍ଦାଲ୍ଦାର୍। 6ଆସ୍ ଇସାନ୍ ମାଲ୍କାସିନ୍, ଲେକିନ୍ ତାଙ୍ଘା ବଚନ୍ଘି ଲେଖା ଉଜ୍ଜକାଦାସ୍। ବାରା, ଇ ଆଡ୍ଡାନ୍ ଏରା, ଏକାସାନ୍ କା ପ୍ରାଭୁସିନ୍ ଉଇକାଚାର୍, 7ଆରୁ ଚାଁଣେ କାଲା ତାଙ୍ଘା ଚେଲାରିନ୍ ତେଙ୍ଗା କା ଆସ୍ କେଚ୍ଚକାର୍ସ୍ତି ଉଜ୍ଜକାଦାସ୍, ଆରୁ ଯୀଶୁସ୍ ନିହ୍ମାସ୍ତି ଆଘ୍ଲି ଗାଲିଲୀଗେ କାଲ୍ଦାସ୍, ଆସାନ୍ ଆସ୍କି ଦର୍ଶନ୍ ହାଖ୍ଖର୍! ଏରା, ଏନ୍ ନିମାନ୍ ତେଙ୍ଗେଇନ୍ଚାନ୍।”
8ଆଙ୍ଗେନ୍ ଆବ୍ଡ଼ା ମାଏକିନିଆଁର୍ ଏଲ୍ଚ୍କା ଆରୁ ମୁରୁକ୍ ରୀଜ୍ଝୁତି ମାସ୍ଣାସ୍ତି ଚାଁଣେନ୍ କିର୍ରିକିରି ତାଙ୍ଘା ଚେଲାରିନ୍ ଖବର୍ ଚିୟାଗେ କୁଦିୟାରାଚାର୍। 9ଆନ୍ତିନ୍ ଯୀଶୁସ୍ ଆବ୍ଡ଼ାରିନ୍ ଭେଁଟ୍ ମାନ୍ଚାସ୍ ଆରୁ ତେଙ୍ଗିୟାସ୍, “ନିମାଗେ ଶାନ୍ତି ମାନ୍ନାଦ୍”। ଆଙ୍ଗେନ୍ ଆବ୍ଡ଼ାର୍ ଚାହା ବାରିକିରି ଆସ୍କି ହେଡ୍ଡୁବନ୍ ଏସ୍ରିକିରି ଆସିନ୍ ଯୋହାର୍ କାମ୍ଚାର୍। 10ଆନ୍ତିନ୍ ଯୀଶୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ଆମା ଏଲ୍ଚା; ଏଙ୍ଘା ଭାଇର୍ସାନ୍ କାଇକିରି ତେଙ୍ଗା କା ଆବ୍ଡ଼ାର୍ ଗାଲିଲୀଗେ କର୍, ଆସାନ୍ ଏଙ୍ଗାନ୍ ଏରର୍।”
ଜାଗୁୱାର୍ଘି ୟାହୁଦୀ ମୁଖ୍ୟାରିନ୍ ଖବର୍ ଚିନା
11ଆବ୍ଡ଼ା ମାଏକିନିଆଁର୍ କାଲିୟାରିନ୍ କା ମୁଖ୍ୟାର୍ସ୍ତି କେତ୍କ ଲୋକ୍ ସହର୍ନୁ ବାରିକିରି ପୁରା ଘାଟ୍ଣାନ୍ ମୁଖ୍ୟା ପୁରୋହିତ୍ଜାମାରିନ୍ ଶୁଣାବାଚାର୍। 12ଆଙ୍ଗେନ୍ ଆବ୍ଡ଼ାର୍ ମୁଖ୍ୟା ଜାମାର୍ଗାନେ ମେଶ୍ରିକିରି ଉପାୟ କାମ୍ଚାର୍ ଆରୁ ପଲ୍ଟନ୍ ଜାମାର୍ଗେ ବାଗ୍ଗେ ପାଏସା ଚିଇକିରି ତେଙ୍ଗିୟାର୍, 13“ଏନ୍ନେ ତେଙ୍ଗର୍ କା ମାଁହା ଯେତ୍କବାକେନ୍ ଏମ୍ ହାନ୍ଦ୍ରାଲ୍କାମ୍ ତା, ଯୀଶୁସ୍କି ଚେଲାର୍ ବାରିକିରି ଆସିନ୍ ହାଡ୍ଡାର୍ ଅଚ୍ଚାର୍ କେରାର୍। 14ଆରୁ ଯଦି ଇ କାତ୍ଥାଦ୍ ରାଜ୍ପାଲ୍ସ୍କି ହେବ୍ଦାଗେ ମେନ୍ଦ୍ରଦ୍ ତା, ଏମ୍ ଆସିନ୍ ବୁଝାବମ୍ ଆରୁ ନିମାନ୍ ଚିନ୍ତାତି ବାଛାବମ୍।” 15ଆନ୍ତିନ୍ ଜାଗୁର୍ ପାଏସା ହୋଇକିରି ଏସ୍କେ ଶିଖାବାକେର୍କିଚା, ଆନ୍ନେନ୍ କାମ୍ଚାର୍। ଇ କାତ୍ଥାଦ୍ ଇନ୍ନାତକ୍ ୟାହୁଦୀ ଆଲାର୍ଘି ମାଝାନୁ ଚାଲ୍ର୍ତେ ବାରାଲି।
ଯୀଶୁସ୍ ଚେଲାଜାମାର୍ଗେ ଦର୍ଶନ୍ ଚିଆଲ୍ଦାସ୍
(ମାର୍କୁସ୍ ୧୬:୧୪-୧୮; ଲୁକାସ୍ ୨୪:୩୬-୪୯; ଯୋହାନ୍ ୨୦:୧୯-୨୩; ପ୍ରେରିତ୍ ୧:୬-୮)
16ଆରୁ ଏଗାର ଚେଲାର୍ ଗାଲିଲୀଘି ଆ ପାର୍ତ୍ତାଗେ କେରାର୍, ଏକାସାନ୍ କା ଯୀଶୁସ୍ ଆବ୍ଡ଼ାରିନ୍ ତେଙ୍କାଚାସ୍। 17ଆବ୍ଡ଼ାର୍ ଯୀଶୁସିନ୍ ଏରିକିରି ଯୋହାର୍ କାମ୍ଚାର୍, ଲେକିନ୍ ନେକା-ନେକାଗେ ଶାକ୍ ମାନ୍ଚା। 18ଯୀଶୁସ୍ ଆବ୍ଡ଼ାର୍ଘି ଚାହାଗେ ବାରିକିରି ତେଙ୍ଗିୟାସ୍, “ସରଗ୍ ଆରୁ ଦୁନିଆଁନ୍ତା ଜାମା ହକ୍ ଏଙ୍ଗାଗେ ଚିଆ କେର୍କିଚି। 19ହୁଦ୍ଘିଲାଗାନ୍ ନିମ୍ କାଲା, ଜାମା ଜାତିନ୍ତା ଆଲାରିନ୍ ଚେଲା କାମା; ଆରୁ ଆବ୍ଡ଼ାରିନ୍ ବାଙ୍ଗ୍ ଆରୁ ହାଦ୍ଦୁ ଆରୁ ପାବିତାର୍ ଆତ୍ମାଘି ନାମେତି ଆସ୍ନାନ୍ ଚିଆ, 20ଆରୁ ଆବ୍ଡ଼ାରିନ୍ ଜାମା କାତ୍ଥାନ୍ ଏକାନ୍ ଏନ୍ ନିମାନ୍ ହୁକୁମ୍ ଚିଚ୍କାଦାନ୍, ଆଦିନ୍ ମାନାଗେ ଶିଖାବା: ଆରୁ ଏରା, ଏନ୍ ଦୁନିଆଁଘି ଆଖ୍ରୀତକ୍ ଜାମାବାକେନ୍ ନିହ୍ମାଗାନେ ଆତ୍ଲ୍ଦାନ୍।”
Jelenleg kiválasztva:
ମାତିସ୍ 28: xis
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
© (Active) Wycliffe Bible Translators, Inc. All rights reserved.
