Seemthawhnak 32
32
1Jakob cu a lamtah a pehkau ih Pathian ih vanmile ni an tuakla; 2culeh Jakob ni a hmuh hngai tikah, “Hihi cu Pathian ih ralkaple an ik hi tang!” tiah a ti. Curuangah Mahanaim#32:2 Mahanaim ti cu Riahbuuk pahnih tican. tiah a ko.
Jakob ni Esau Laksawng a Kuat
3Jakob ni Edom ram, Seir timi hmunram ih om a u Esau hemah thuphurtule a hmaiah thlah hngai in, 4“Ka bawipa Esau hemah hitihin nan sim thok henakhawh: Na tungsau Jakob ni, ‘Laban hemah tluangmi in khua ka sa ih atu tiang hi ka om; 5cun cawpepawl, laakpawl, tuu leh merunpawl, pami salpawl leh numi salpawl ka ngei hngai; na mithmaiṭha hmu dingah ti’n ka bawipa namah tan sim dingah mi ka thlah hngai,” tiah a cah hngai.
6Thuphurtule cu Jakob hemah kirṭhan in, “Na upa Esau hem kan pha ih namah tan tuak dingin a tat lio, mi 400 rum an ii,” tiah an ti. 7Cutikah Jakob cu a thin a phang vuai ih a thin a baang; culeh amah rum a om tu mipawl leh sumhnam runpawl leh kalaukpawl cu buur hnih ah a ṭhen hngai. 8“Esau phain buur khat a siatsuah a’cun a taangmi cu an luat thok,” tiah a ruat.
9Culeh Jakob ni, “Ka pa Abraham leh ka pa Isaak ih Pathian, ka hemah, ‘Na ram leh na sungkhat hemah kir la, na parah thilṭha ka vua thok’ tiah a ma ti tu maw Bawipa, 10na tungsau hemih na lansak rommi a hmunmi dawtnak leh rinsantlaknak hmawhhmawh hi a tlawmtleng hman co dingah ka tlak lo, icatile hi Jordan hi teileng pakhat rum ceu ka tan; culeh atu hi buur hnih ih ṭhentia ah ka cang. 11Naktiahtein, ka upa Esau ih kut in ma rungsuak hram, icatile amah ka ṭih; phain nupawl leh tepangpawl kan zate a man that kho men. 12A i nain nang ni cu, ‘Na parah thilṭha ka ti thok, cun na ciitlang cu an tam tuk ah siarhanglo a imi rili siatnel zet in ka vua hngai thok,’ tiah a ma ti rom’ ” tiah a ti.
13Curuangah acui zan cu acunangah zan a caam ih a ngeihmi sungin a upa Esau laksawng piak ding 14mepinu lu 200 leh metuum lu kul, tuupinu lu 200 leh a tuum lu kul, 15hnawisurmi kalauk lu sawmthum leh an suanle, cawpe pinu lu sawmli leh cawpetuum lu hra, laakpinu lu kul leh laak tuum lu hra, a la hngai. 16Buur khat tete in a ṭhen hngai ih a tungsaule pakhat vek kut ah a pia hngai, cun an hemah, “Ka hmalaah tat li u la, buur khat leh buur khat hlattia duau in tahsak uh,” tiah a ti hngai. 17Hmapitleng ih tat tu hemah, “Ka upa Esau ni tan tuak in, ‘Ahu ih minung ii ci maw? Khaw’h tat lei ci maw? Cun hi na hmai ih sumhnamle hi teh ahu ih an ii?’ tiah a tan dil a’cun, 18nang ni, ‘Hipawl hi na tungsau Jakob ih an ii; ka bawipa Esau namah tan ṭhen ding laksawng ah a tan kuatmi an ii; cuhleiah amah cu kan dungla a’hin a ii’ tiah ti lei ci,” tiah a cah. 19Acumangcun a sontu leh a pathumnak leh sumhnamrun a hruai sakmi an zate hemah, “Esau nan tuah tikah sakhatin nan sim thok henakhawh, 20culeh, ‘Cuhleiah na tungsau Jakob cu kan dunglaah a ii’ tiah nan ti thok,’ tiah a ti hngai. Icatile, “Ka hmala ih a tat limi laksawng hin a lung ka tluansak kho men ih a mithmai ka hmuhngah kho men; cun a ma cosang kho men,” tiah a ruat. 21Curuangah laksawng piak ding sumhnampawl cu a hmalaah an tat li; culeh amah cu acu zan cu riahbuuk ah a caam.
Peniel ah Jakob Mi a Buan
22Jakob cu zan ahcun a tho ih a nupile pahnih, a hemomnule pahnih leh a tiale hleikhat thiarta hngai in Jabbok thlawng a niamnak hmun in a tan. 23Thlawng ih khatla ral ah a thiar hngai, cun a ngeihmi izongza khaw acumangcun a thiar hngai. 24Amah ceu a taang. Mipa pakhat ni khuavang tiang a buan ciamco. 25Culeh acu pa ni a neh thok lo a hmuh tikah Jakob cu a kheel hlikhlok ah a thawng ih an buantiak lioah Jakob cu a kheel a pel. 26Mipa ni, “Ma thlah, khua a vaang vel hi!” tiah a ti. Ihmansela Jakob ni, “Thlua a ma suah lo a’cun ka tan thlah lei lo,” tiah a ti. 27Curuangah acu pa ni, “Na min hutu a ii?” tiah a ti. Culeh ani ni, “Jakob,” tiah a ti. 28Cutikah cu pa ni, “Jakob tiah kawh na i ti thok lo, Israel ti’h kawh na i thok, icatile Pathian leh minungpawl na buan hngai ih na neh hngai rom,” tiah a ti. 29Cutikah Jakob ni, “Naktiahtein na min ma sim hram,” tiah a ti. Ihmansela ani ni, “Ituruangah hmen ka min cu a ma dil duh?” tiah a ti. Culeh acunang ahcun a thluasuah. 30Curuangah Jakob ni acui hmun cu Peniel#32:30 Peniel ti cu Pathian ih Hmai, Pathian ih Hmai Hmel tican. tiah koin, “Pathian cu hmaiton in ka hmu rom na’n ka nunnak cu zuah a ik tu hi,” tiah a ti. 31Penuel in a pawh ah ni ni a suah non, a kheel ruangah a kawng a zawng. 32Curuangah nihinni tiang Israel mipawl ni a kheel hlikhlok ih ommi tit aw loin an sawng, icatile mipa ni a kheel hlikhlok ih a tit a thawng ruangah a ii.
Jelenleg kiválasztva:
Seemthawhnak 32: KHBF
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
Khualsim Holy Bible © Bible Society of Myanmar, 2021.
