MAWOOKIONYI 9
9
Ruwa awika mkundana na Noe
1 Ruwa kawikia Noe mboṟa handu hamu na wana wake kawawia, “Pfumbukenyi, mufee muichuṟe masanga. 2Orio indo lya nja iya orukenyi lyechimwowuo na idedema, na orio malehe ha ruwehu; na shindo shose shiichuṟie kunu wanda, na makunga hose ha ipalyipalyinyi; shishiwike mawokonyi hanu. 3Orio kindo kekechumia kii na moo kechiwa kelya kyanu, chandu njilemuinenga mboka tsa maṟa na wudo ngamuinenga ishi shose. 4 Indi nyama tsiwode samu manya mulalye. 5Orio mndu apusuo samu ya odoye njechimkapa. Na orio indo lii na moo lyawaha mndu njechilyikapa. 6 Msa echipusuo samu ya mndu, samu yake yechipusuo nyi mndu; kyamba mndu nalewumbo kui ofano lo Ruwa. 7 Nanyo feenyi mupfumbuke, feenyi mnu, muengeṟeke iya orukenyi.”
Mkomboṟi fo mvuo
8Ruwa kawia Noe na wana wake kahamba, 9“Ambuya nyi ngaṟingishia mkundano foko nanyo; na njechiṟingishia se na oshari lonu lo numa, 10na orio kiumbe kiwode moo; kii nanyo, shilehe, na shuma, na orio indo lya ngeṟenyi iya orukenyi handu hamu nanyo iwo wose wechiwuka kiidi kya safina, na orio kindo kii na moo iya orukenyi. 11Na mkundano foko nanyo njechifuawutsia; manya orio kindo kii na moo kechikombetso-se nyi mfu fo mṟinga-pfo; numa ya isho kochikaase mfu fochinyamaṟa orukapfo.” 12Ruwa kahamba, “Iki nkyo kichano kya mkundano njiwika kiidi kyako, nanyo, na orio kiumbe kyose kii nanyo, na shishari shose tane mlungana. 13Inyi ngawika mkoṟi foko ipfo mapuchinyi, nafo fochiwa kichano kya mkundano kiidi kyako na oruka. 14Na inyi ngameala mapuchi huye ya oruka, mkoṟi fochiwoneka ipfo mapuchinyi, 15na inyi njechikumbuo mkundano foko njiwode nanyo, na orio kiumbe kii na moo kiidi kya wose wawode mbihu, manya mṟinga fochiwase mfu forumatsa wose wawode mbihupfo. 16Nahong'u mkoṟifo fochikaa mapuchinyi, na inyi njechifuambuya, kundu njikumbuo mkundano fo mlungana fui kiidi kya Ruwa na orio kiumbe kii na moo ko walya wose wawode mbihu iya orukenyi.” 17Ruwa kawia Noe, “Iki nkyo kichano kya mkundano ndefuwika na iwo wose wai na mbihu iya orukenyi.”
Noe na wana wake
18Wana wa Noe walewuka safinenyi, nyi Shemu na Hamu, na Yafeti. Hamu nyio ndee o Kanaani. 19Iwa waṟaṟu nyiwo wawei, wana wa Noe, na kipfa kyawo wuyana wose wukadung'ana wandu.
20Noe kawoka idema kadonga msabibu; 21kanyo mpfinyo, kanango; kakaa kitaṟe ipfo ihemenyi lyake. 22Hamu, ndee o Kanaani, kawona kitaṟe kya ndee kawia wana wa mae wawi wawei kulya nja. 23Shemu na Yafeti wakaira nguo wakahekya makosohu hawo wawawi, wakahenda na numa, wakashikia kitaṟe kilya kya ndeawo; shamu shawo shilambuye nduma, manya waleambuya kitaṟe kilya kya ndeawo-pfo. 24Noe kataṟuka kulya wunanzinyi woke, kamanya chandu mana oke mtutu alembutia.
25Kahamba, “Kanaani na nakae ai msese,
nechiwa mosingia wana wa mae na kamu.”
26Kahamba-se, “Kuichiko Mndumii-Ruwa o Shemu;
Kanaani nawe isinga lyake.”
27Ruwa nasuṟishe Yafeti,
nakae kiidi kya ihema lya Shemu,
Kanaani nawe isinga lyake.
28Noe kawada maaka mahana haṟaṟu na makumi hatanu (350) numa ya mfu fulya. 29Ohendo lo moo fo Noe lukawa nyi maaka mahana kenda na makumi hatanu (950), kapfa.
Jelenleg kiválasztva:
MAWOOKIONYI 9: KIM2
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
Kimochi Bible © Bible Society of Tanzania, 2016.
