Matiyə̈ 11
11
1Ndə̂ Jezü kâ pö ndə̂ yê, tche zâma sə̈ adjisîpili ndə̂ yê lə̂ könô gbɛ̂ tchêpâ nə̈ bïchuû, kə̈ âlafô kə̈ ê ndə̂kə̂ nyisə̂ rə sə̈ azü, lakə̂ mu Tchôtchô Pö lə̂ agö ndə̂ andjê.
Jâan-Batîse wän adjisîpili ndə̂ yê sə̈ Jezü
(Luk 7.18-35)
2Dëkë gbô Jâan-Batîse kä bhâlə̂ nda kânga. Tche djê pö ndə̂ arə ndə̂ Krîsiti mbô rə̂ ânyë kə̈ wân angâ adjisîpili ndə̂ yê 3ndə̂kə̂ pa andjë yu Jezü päkëdə̂: «Mo də̈ Krîsiti ndə̂ tche wâ ndə̂kə̂ nə lâme? Âdəndjë rə̂ pä ârâ wä ndə̂kə̂ sə bëte ngâ akrə ngbî?» 4Jezü tô rə̂ ndə̂nə̈ sə̈ andjê päkëdə̂: «Nyë kâkä kə̂ to tchêngbâ apö ndə̂ rə ndə̂ nyë wûn rə̂, la rə ndə̂ nyë djê rə̂ sə̈ Jâan: 5A-earə̂ föla wün tchô, azü ndə̂ da andjê ndɨ̂, andjë nə̂ la köbo nə̈, a-earə̂ broma tchâ-ê, a-earə̂ bïtü djê pö, azü ndə̂ andjë tchû jô-ê, ânyë a mû Tchôtchô Pö sə̈ a-earə̂ yûkü nə̂#11.5 Nyë dɨ̈ Eza 35.5-6; 61.1.. 6Mômô kä tə̂ akrə ndə̂ tche gbôâbo gbôtə̂ kə̂ za su yê sə̈ mê!»
7Ndə̂ adjisîpili ndə̂ Jâan-Batîse âsə̈ dotə̂ andjê, Jezü jêtə̂ kə̂ to pö ndə̂ Jâan sə̈ kpûlû azü nə̈ päkëdə̂: «Giamâ kä ndə̂ nyë ê ndə̂kə̂ wun rə̂ bhâlə̂ kpaɛ̈gâ? Ngâ wärə̈ ndə̂ yi nyôânyoa rə̂? 8Giamâ kä ndə̂ nyë ê ndə̂kə̂ wun rə̂? Ngâ köchë ndə̂ tche yû alə̂ba ndə̂ âfû? Azü ndə̂ andjë yu alə̂ba ndə̂ âfû sə̈ bhâlə̂ gbadja ndə̂ agbïɛ̈! 9Giamâ kä ndə̂ nyë ê ndə̂kə̂ wun rə̂? Ngâ earə̂ ndə̂ma Ndjapä? Ɛn-ɛn, më tö rə̂ sə̈ nyê pä nyë wûn ngâ akrə ndə̂ tche rô earə̂ ndə̂ma Ndjapä nə̂. 10Bëte Jâan də̈ akrə ndə̂ Mbëtï Ndjapä tô pö ndə̂ yê päkëdə̂: ‹Akrə ndə̂ më wân tchë tchâtchu zə̈ kä âtə, ndə̂kə̂ nyikrə köbo tchâtchu zə̈#11.10 Nyë dɨ̈ Mal 3.1..› 11Ɛn-ɛn, tə̂ lëge nə̈ më tö rə̂ sə̈ nyê: Lə̂ gbâtə̂ azü ndə̂ aɛ̈chë zɨ̂ andjê, ngâ akrə ndə̂ tche wâ gbölö ânyë kə̈ rô Jâan-Batîse wâbo-a. Lə̂ rə lâme gbɛ̂, tchanə̈ ndə̂ tche wâ kpîɛ̂kpîɛ̂ rə̂ lə̂ Gbölö gö-gbïɛ̈ ndə̂ tchêlafô rö tchë. 12Ätö tə̂ losə̂ Jâan-Batîse, a nyïsə̂ Tchôtchô Pö ndə̂ Gbölö gö-gbïɛ̈ ndə̂ tchêlafô sə̈ azü, ânyë azü kä lakə̂ mbo gbôgbô gbɛ̂ ndə̂kə̂ li atə̂lə̂ nə̈. 13A-earə̂ ndə̂ma Ndjapä gbɛ̂ la ndïɛ̈ ndə̂ Möyîze tö ndə̂ma Ndjapä pâ Gbölö gö-gbïɛ̈ ndə̂ tchêlafô zoo âwûtu tə̂ Jâan. 14Âdə nyë ânyində̂ kə̂ dje pö ndə̂ mê, Jâan kä ndə̂ âdə̂ Elïe ndə̂ a tô pö ndə̂ yê pä tchetchë kä âkə̈ kângbâ yê lâme. 15Akrə ndə̂ tche wâ la tü, äwäpä tche dje pö âtə!
16«Mê toadje rə̂ sə̈ nyê pä azü ndə̂ tchô angêta wä batə̂ giamâ? Andjë wä batə̂ abechë ndə̂ andjë sə̂ sə̂nə̈ ndə̂ azü ngbângbä tâ, ânyë angânə̈ ê angâ andjê päkëdə̂: 17‹Ârâ bhï ndûgû-ɛ̈ngbä, lakə̂ hrʉ küdambala, praâbalë nyë dâbo ɛ̈ngbä ndə̂sə̂ nə̈-a! Ârâ pä düwü-müä, praâbalë nyë dɨ̂âbo tchə̂lə̂ ma nyê-a!› 18Bëte Jâan nə̂ nə̂, tche zɨ̂âbo rə-a, kə̈ ndjôâbo ndjë rə-a, a tô rə̂ päkëdə̂: ‹Tche kä la ngbongbo tchozö lə̂ yê!› 19Modô ndə̂ Akrə nə̈, kə̈ zɨ̂ rə, kə̈ ndjô rə, azü tô rə̂ päkëdə̂: ‹Wunsa köchë âtə ndə̂ kua ndə̂ yê wâ kütû ndə̂kə̂ zɨ rə gbɛ̂, lakə̂ ndjo vɛ̂n-ɛn, tche mbö agü la a-earə̂ kə̂ pala makətche-lapöo, la a-earə̂ ngbongbo rə!› Praâbalë küma akrə ndə̂ âwa lanə̈, ndə̂ âtô bhândə̂ Ndjapä nyïsə̂ nə̈ pä kə̂ mbo kua ndə̂ yê wä djîrə̂.»
Agö ndə̂ âkôsə̂ Jezü
(Luk 10.13-15)
20Pânə̈ Jezü sə̂ lakə̂ hro la azü ndə̂ tche mbô akpɨ̈ngbɨ̈ rə lə̂ gö ndə̂ andjê tə̂ gbölösə̂nə̈ lâme. Tche hrö la andjê bëte rə̂ ndə̂ andjë gbôâbo tə̂ bəndɨ kə̂ mbo rə ndə̂ andjê-a. 21Jezü tô rə̂ sə̈ andjê päkëdə̂: «Nyonyo kä tə̂ nyê, azü gö ndə̂ Korazɛ̈n! Nyonyo kä tə̂ nyê, azü gö ndə̂ Betesayidä! Bëte âdə akpɨ̈ngbɨ̈ rə ndə̂ Ndjapä mbô rə̂ lə̂ gö ndə̂ nyê âtə, tche âmbo rə̂ alême lə̂ gö ndə̂ Tîre la Sidön, dëkë azü gö nə̈ gbôtə̂ bəndɨ kə̂ mbo rə ndə̂ andjê alême nə̂. Azü gö nə̈ lâme âyu sâke#11.21 Bhândə̂ ajuîfu, âdə akrə âyu sâke ëtə̂ yê, dëkë akrə nə̈ lâme kä lə̂ müä. ëtə̂ andjê, kə̂ ko kʉ̂tê andjê la vörə ndə̂kə̂ nyisə̂ nə̈ pä anyë gbôtə̂ bəndɨ kə̂ mbo rə ndə̂ anyê nə̂. 22Ɛn-ɛn, më tö rə̂ sə̈ nyê: Lo nə̈ ndə̂ Ndjapä wa ngbanga pâ azü, ngbanga ndə̂ azü ndə̂ Tîre la Sidön âwatə̂ mömö nə̈ tə̂ andə̂ nye nə̈. 23Âdə andə̂ nye nə̈, azü gö ndə̂ Käpërënäyûmo, nyë wüntî pä Ndjapä âkengadje gö ndə̂ nyê ndjoa bhâ lafô? A âmboadje rə̂ pä nyë jre zoo bhâlə̂ tchô ndə̂ akuzü! Bëte akpɨ̈ngbɨ̈ rə ndə̂ Ndjapä mbô rə̂ lə̂ gbâtə̂ azü ndə̂ zə̈ âtə, âdə tche âmbô rə̂ lə̂ gö ndə̂ Sodômo dëkë gö nə̈ lâme, gbô rə̂ kä tâ ndjoa ëtə̂ tchô angêta! 24Ɛn-ɛn, më tö rə̂ sə̈ nyê: Lo nə̈ ndə̂ Ndjapä wa ngbanga pâ azü, ngbanga ndə̂ azü gö ndə̂ Sodômo âwatə̂ mömö nə̈ tə̂ andə̂ zə nə̈.»
Jezü nyïsə̂ Bha nə̈ sə̈ akpîɛ̂kpîɛ̂ azü
(Luk 10.21-22)
25Lo nə̈ lâme, Jezü tô rə̂ päkëdə̂: «Bha mê, Gbölö Gbïɛ̈ ndə̂ tchêlafô la tchêbêche, më zä ayîabâ sə̈ mö, bëte mo vüsə̂ rə lâme tə̂ azü ndə̂ küma andjê wâ lanə̈ la a-earə̂ kə̂ wunsə̂ rə, ânyë kə̈ nyîsə̂ nə̈ sə̈ akpîɛ̂kpîɛ̂ azü. 26Tə̂ lëge nə̈, mo mbö tâ käko bëte momö kä ndə̂ ânyîndə̂ nə̈.
27«Bha mê gbötə̂ rə gbɛ̂ ëtchânə̂ mê. Ngâ akrə balë wûn-âbo sə̂ Modô nə̈-a, kütû Bha nə̈ balë. Ngâ akrə balë wûn-âbo sə̂ Bha nə̈-a, kütû Modô nə̈ la andjanə̈ ndə̂ Modô nə̈ nyîndə̂ kə̂ nyisə̂ Bha nə̈ sə̈ andjê.
28«Nyë nə̈ pu mê, nyënyê gbɛ̂ ndə̂ nyë mô lakə̂ kʉ arə ndə̂ âlû, mê zadje kə̂ yatə̂ sə̈ nyê. 29Nyë zä kʉ̂ngbô ndə̂ mê ndə̂ âlûâbô lû-î, kə̂ gbotə̂ köbo sə̈ mê ndə̂kə̂ pa më nyisə̂ rə sə̈ nyê! Bëte më wâbo tə̂ akrə ndə̂ mê mbo gbôgbô tə̂ azü-a, kə̈ pûâbo ndjë gbölö tchô-a. Nyê gboadje tchô ndə̂kə̂ yatə̂ nyê tâ#11.29 Nyë dɨ̈ Jer 6.16.. 30Nyë mbö rə gundə̂sə̂ arə ndə̂ më nyîsə̂ nə̈ sə̈ nyê. Kʉ̂ngbô ndə̂ më zâ rə̂ sə̈ nyê ndə̂kə̂ pa nyë za rə̂ lûâbo-a.»
Jelenleg kiválasztva:
Matiyə̈ 11: lnl
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
© Wycliffe Bible Translators, Inc.
