Matayo 4
4
Etetemaki Yeso te lkees
(Marko 1:12–13; Luka 4:1–13)
1 #
Lbr 2:18, 4:15 Nerik ꞉Ltau Sinyati Yeso atua lkees metetema ꞉Chitani. 2Neen ꞉ninye nkutuk mperot artam eitu enya ndaa kuarie o parkiji, near ꞉sumach. 3Nelotu ilo atemani netii ninye nejoki, <<Tanaa ira iyie Nkerai e Nkai, tiaaki kulo soito metaa mukateni.>>
4 #
Nkit 8:3
Kake nejoki ꞉Yeso ninye, <<Keigeroki aajo, <Kore ltung'ani, naa mara mukate apeny eichiwue, kake rerei pooki oing'uaa nkutuk e Nkai.> >>
5Neitoki Chitani arik ninye lochi kerenket sinyati, neitacheyie to ng'oji neodo aisul pooki ta nkaji e Nkai. 6#SNk 91:11,12Nejoki, <<Kore tanaa ira iyie Nkerai e Nkai, tusulai koon amu keigeroki aajo, <Ikirewaki ꞉Nkai lmalaikani lenyena, niking'amaa taa nkaik enche, payie mikinkub hooyia ndap ino soit.> >> 7#Nkit 6:16Nejoki ꞉Yeso, <<Keigero aitoki ajo, <Mitem Laitoriani Nkai ino.> >>
8Neitoki Chitani arik ninye nkeper e ldonyuo oodo oleng, neitodol nkitoria ee nkopi o murdaicho pooki enche.
9Nejoki, <<Kore ana murdaicho pooki nidolita, kaaicho tinikigilaki kung, nikirigokino asai.>> 10#Nkit 6:13Kake nejoki ꞉Yeso ninye, <<Chomo Chitani, amu keigero ajo, <Tasayia Laitoriani Nkai ino apeny, naa ninye apeny siaayia.> >>
11Kaa hae, neing'uaa ꞉Chitani ninye, nepuonu lmalaikani le Nkai aaisiai ninye.
Ng'asunoto e siaai le Yeso ta Galilaya
(Marko 1:14–15; Luka 4:14–15)
12 #
Mat 14:3; Mrk 6:17; Luka 3:19,20 Kore payie ening ꞉Yeso ajo eteenaki Yoana,#4:12 Kelimu Matayo 14:3 ajo aanyo payie eteenaki Yoana. nechuko alo Galilaya. 13#Yoa 2:12Kore payie eiwuot te lkerenket le Nasaret, nelo awuon te lkerenket le Kapernaum otii nchepata e mpaso, e nkop e Sebulun o Naputali, 14payie ebaya inia apa natejo loiboni le Nkai Isaya,
15 #
Isa 9:1,2 <<Nakop e Sebulun o ne Naputali,
naim ꞉nkoitiei nalo mpaso, e ildo kokun sere e Yordan!
Nakop e Galilaya ee loreren lemeiruk Nkai e Isirael!
16Kore lolo tung'ana otii atua naimin,
etoduaa ninche wong'an kitok oleng,
naa kore sii lolo otii nkop naimulayie ꞉loip lo lkiye,
etoong'aka ninche wong'an.>>
17 #
Mat 3:2
Kore te inia kata, neng'asu Yeso alikoo ajo, <<Erriidu, amu etinyikua nkitoria e chumata.>>
Eipoto ꞉Yeso looiteng'eni lenyena lekue
(Marko 1:16–20; Luka 5:1–11)
18Kore mparri nabo echepita ꞉Yeso mpaso e Galilaya, nedol lalachera oare, enang'akita lgiitani atua mpaso, amu kera apa ninche laibung'ak loo sinkirri. Kore lobo naa Simon, oichooki kenya nkarna naji Petero, neji ilo likae Andirea. 19Nejoki ninche, <<Ootu erukurukoreeki, naa kaiteng'en ntae payie iakuku laibung'ak loo ltung'ana ana ninkoko tinimbung'bung sinkirri.>>
20Neing'uaa lgiitani lenche nabokata, neirukurukore ninye.
21Kore eloito te inie, nedol aitoki lkulie alachera oare, Yakobo layieni le Sebedayo o lalache lenye Yoana, etii atua meli aaitibir lgiitani o papa lenche Sebedayo. Neipotu ninche. 22Neing'uaa nabokata meli o papa lenche, neirukurukore ninye.
Eiteng'ena ꞉Yeso ltung'ana, neichiunyie ltamoyia
(Luka 6:17–19)
23 #
Mat 9:35; Mrk 1:39 Nemanaa Yeso taatua Galilaya pooki, eiteng'enicho taatua Sinagogini,#4:23 Kore Sinagogi naa nkaji e nkomono o ne nkiteng'ena ee Lyiaudi. nelikoo Lomon Supati le nkitoria, neichiunyie nkeeyaitin pooki o moyianitin taatua ltung'ana. 24Nebulaa lomon lenyena ana metabaki nkop e Siria pooki. Neyaki ninye ꞉ltung'ana ltamoyia pooki, oaata moyianitin naapaacha, lolo oaata mion kitok o loaata lairiruani o loaata moyian e nkiterria o lolo ootigilgilete, neichiunyie pooki. 25Neirukurukore ninye ꞉lturrurri kumo ooing'uaa Galilaya o Dekapolis #4:25 Kore Dekapolis naa Lkerenketi Tomon. o Yerusalem o Yudea o ildo kokun le sere e Yordan.
Jelenleg kiválasztva:
Matayo 4: saq
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
© 2021, Bible Translation and Literacy
