ATŨMWO 11
11
1NA rĩrĩ, atũmwo na ariũ a Ithe witũ arĩa maarĩ Judea nĩmaacokire kũigua atĩ andũ a Ndũrĩrĩ o nao nĩmaamũkĩire Ũhoro wa Ngai. 2Na rĩrĩa Petero aambatire agakinya Jerusalemu, andũ a thiritũ ya arĩa maruaga magĩkararania nake, 3makĩmwĩra atĩrĩ, Hĩ, atĩ nĩwatonyire kwa andũ arĩa mataruĩte ũkĩrĩanĩra nao! 4Nowe Petero agĩitĩka kũmera ũhoro wothe ũthingataine na ũrĩa ũtariĩ, akiuga atĩrĩ,
5Ndarĩ itũũra rĩa Jopa ngĩhoyaga Ngai: na ngĩkorũo ningĩtwo nĩ iringi, ngĩkĩona kĩoneki, na atĩrĩ, hagĩikũrũka kĩnyamũ gĩtariĩ ta gĩtama kĩnene gĩgũikũrũkio kĩnyitĩtwo mĩthia ĩna, gĩkiuma Igũrũ: nakĩo gĩgĩkinya o harĩa ndĩ. 6Na rĩrĩa ndakĩbarire mũno, ngĩĩciria ũhoro wakĩo, ngĩona nyamũ cia magũrũ mana, na nyamũ cia gĩthaka, na iria itambaga thĩ, o na iria ciũmbũkaga na igũrũ. 7Ningĩ ngĩigua mũgambo ũkĩnjĩra atĩrĩ, Ũkĩra, Petero, ũthĩnje ũrĩe. 8Ngĩkiuga, Aca, ti ũguo, Mwathani, nĩ gũkorũo kĩndũ gĩtarĩ kĩamũre, o na kana kĩĩ mũgiro-rĩ, gĩtirĩ gĩatonya kanua gakwa. 9Naguo mũgambo uumĩte Igũrũ ũkĩnjokeria hĩndĩ ya kerĩ ũkĩnjĩra atĩrĩ, Kĩrĩa Ngai atheretie, wee tiga gũgĩtua atĩ ti kĩamũre. 10Naguo ũndũ ũcio ũgĩĩkwo gatatũ, nacio ciothe igĩkĩgucio igĩcokio Igũrũ. 11Na atĩrĩ, kahinda o kau andũ atatũ marareketio kũrĩ niĩ moimĩte Kaisarea makĩrũgama nja, o hau nyũmba-inĩ ĩo twarĩ. 12Nake Roho Mũtheru akĩnjĩra atĩ ’thiĩ nao itegũthangania. Nao ariũ a Ithe witũ aya atandatũ tũgĩthiĩ nao: tũgĩgĩtonya nyũmba ya mũndũ ũcio. 13Nake agĩtwĩra ũrĩa onete mũraika arũgamĩte nyũmba yake thĩinĩ, akamwĩra atĩrĩ, Rekia andũ Jopa, ũgĩrithie Simoni ũrĩa wĩtagwo rĩĩtwa rĩngĩ Petero, 14nake nĩwe ũrĩaria nawe ndeto iria igatũma ũhonokio we mwene mwĩ na andũ anyu othe. 15Na rĩrĩa ndaambĩrĩirie kwaria Roho Mũtheru akĩmaikũrũkĩrĩra, o ta ũrĩa ithuĩ na ithuĩ aambire gũtũikũrukĩrĩra. 16#Atũm 1.5.Ngĩkĩririkana ciugo cia Mwathani iria oigire atĩrĩ, Ti-itherũ Johana aabatithanagia na maĩ, no inyuĩ nĩmũkabatithio na Roho Mũtheru. 17Hakĩrĩ ũguo-rĩ, akorũo Ngai nĩaamaheire kĩheo o ro kĩrĩa aatũheire na ithuĩ hĩndĩ ĩrĩa twehokete Mwathani Jesu Kristo-rĩ, niĩ ndĩkĩrĩ ũ, atĩ ndegane na Ngai? 18Nao maaigua maũndũ macio magĩtiga ngarari, makĩgooca Ngai, makiuga atĩrĩ, Gwagĩkorũo nĩ ũguo, Ngai nĩakĩheete andũ a Ndũrĩrĩ o nao ũhoro wa kwĩrira mehia mao nĩguo magĩe na muoyo.
19 #
Atũm 8.1-4. Na rĩrĩ, andũ arĩa maaharaganĩtio nĩ ũndũ wa thĩna ũrĩa wonekire ũhoro-inĩ wa Stefano magĩthiĩ o kinya Foinike, na Kuporo, na Antiokia, na gũtirĩ andũ maahunjagĩria Ũhoro tiga o Ayahudi oiki. 20No andũ amwe ao, marĩ a Kuporo na a Kurene, maakinya Antiokia, makĩarĩria Ayunani o nao, makĩmahunjĩria ũhoro wa Mwathani Jesu. 21Nakuo guoko kwa Mwathani kwarĩ hamwe nao; andũ aingĩ magĩgĩĩtĩkia, makĩgarũrũkĩra Mwathani. 22Naguo ũhoro wa andũ acio ũgĩkinya kũrĩ andũ a kanitha ũrĩa warĩ Jerusalemu; nao makĩrekia Baranaba athiĩ o kinya Antiokia: 23nake aakinya, akĩona Wega wa Ngai, agĩgĩkena. Akĩmahatĩrĩria othe atĩ matũũre manyitaine na Mwathani marĩ na ngoro irũmĩte wega ũhoro-inĩ wake: 24nĩ gũkorũo aarĩ mũndũ mwega, waiyũirũo nĩ Roho Mũtheru o na wĩtĩkio. Nao andũ arĩa metĩkĩtie Mwathani magĩkĩongerereka aingĩ ma. 25Nake agĩthiĩ Tariso agacarie Saulu: 26na aamuona, akĩmũtwara Antiokia. Na gũgĩkinya atĩrĩ, atĩ mwaka ũmwe mũgima magĩikara kuo makonganaga hamwe na andũ a kanitha, na makarutaga andũ aingĩ maũndũ. Na kũu Antiokia nĩkuo arutwo maambire gũtuwo Akristiano.
27Na rĩu-rĩ, matukũ macio anabii amwe makiuma Jerusalemu magĩtherera magĩkinya Antiokia. 28#Atũm 21.10.Hakĩrũgama ũmwe wao wetagwo Agabo, akĩonania nĩ ũndũ wa kũmenyithio nĩ Roho atĩ gũkiriĩ kũgĩa ng’aragu nene kũndũ guothe kũrĩa gũtũũragwo nĩ andũ. Nayo ĩkĩgĩa matukũ ma Kilaudio. 29Nao arutwo magĩtua atĩ matwarithĩrie ariũ a Ithe witũ arĩa maatũire Judea kĩndũ gĩa kũmateithia, o ta ũrĩa mũndũ o mũndũ angĩkorũo aingĩhĩtie indo. 30Na noguo mekire, magĩtwarithĩria athuri a kanitha indo icio na moko ma Baranaba na Saulu.
Jelenleg kiválasztva:
ATŨMWO 11: OGKBIBLE
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
©Bible Society of Kenya, 2019
