Bambata Pai 2
2
1Si du ngbangbaturũ ki nyasi na kpotosende, na rimbasa agu ahe du rogo ho dunduko. 2Ti saba uru Mbori ki nyasi gako sunge nga gu ko amangi he, saba uru ko ki ongodi ti gako sunge dunduko nga gu ko amangi he. 3Mbori ki fu maku ku ri saba uru ki kpara ha ziazia, bambiko rogo ho Mbori aongodi be gako sunge dunduko nga gu ko afu ki mangi he.
4Gere nga pa enga ngbangbaturũ na kpotosende ho Mbori afu he ni.
Ni gu rago Yekova Mbori amangi kpotosende na ngbangbaturũ, 5kurukuru ahe adu nga ho auru kpotosende te, ka kpepasio akura nga ho a ya ― bambiko Yekova Mbori afu nga mai si na ku auru kpotosende te, boro adu nga ho ka asopa bino a te; 6ono kina ndura anagunda auru kpotosende ku ari ki ninadi kpotosende dunduko― 7Yekova Mbori ki mangi kumba rogo nvutu sende, ki ongo onga unga ku õko yo; kumba ki du ni unga mbisimo.
Pa ati Edene
8Yekova Mbori ki moi an ku uroyo Edene yo; ko ki moi gu kumba koyo ko amangi ko. 9Yekova Mbori ki mangi angua dunduko si nisono ti sende, nga gu ngba bi he nga gu ngba tipa riahe, na ngua unga a bebere ati yo, na ngua ina wenepai na gbegberẽpai.
10Di ki kuru Edene yo tipa tuda ati, fuo gure si ki kparaka ki du biama. 11Rimo gu bambata ha nga Pisona; si nga gu di nafu kirikiri pati ringara Avira dunduko, yo du dahabu ni; 12gu dahabu nga ga gu ringara re ki du ni wene he; yo du bedera ni na gu mbia nga oniki a. 13Rimo gu ue di ki ngia Giona; si nga gu di nafu kirikiri pati ringara Kusa dunduko. 14Rimo gu biata di ki ngia ĩdekere, si nga gu di nafu bara ku Asura yo ku uroyo. Biama di ki ngia Ferata.
15Yekova Mbori ki di gu kumba re ki moi ko ku ati Edene yo ko nisópo ho ki nibanda ha. 16Yekova Mbori ki ta ruga kumba, niya, “Agu angua du ati yo dunduko mo nirí zuzuhe ari a wa mo akpi nyemu he; 17ono gu ngua nga ngua ina wenepai na gbegberẽpai ka mo rí nga zuzuhe ya, bambiko ni gu rago ka mo ri zuzuhe mo akpí akpi ni rengo.”
18Yekova Mbori ki ya, “Ngba nga ha kumba sungu ni sa ko te; mi ambákada mounda rengbe tipa ko.” 19Si du Yekova Mbori amangi anya nvuo dunduko kina rogo sende na azire ari dunduko a, ko ki ndu na ami koyo du gu kumba ni re ka bi agu arimo ko ka yamba ha kuti ra; gu rimo ko aniyambu he kuti unga ahe dunduko kina ha ki ngia rimo ho. 20Kumba ki yambu rimo zogozogo anya dunduko, na azire ari yo, na anya nvuo dunduko; ono tipa kumba i abi nga mounda rengbe fu ko te. 21Yekova Mbori ki fu bakere rame fu kumba, ho ko ara ni, Yekova Mbori ki di ngazirako sa, ki furadi pasioko ku ba ha; 22gungazira Yekova Mbori adi ti kumba ko asa ha ni de, ki ye na ri fu kumba. 23Kumba ki ya,
“Gere nga gu meme dagba amemere yo
nga pasio rogo pasiore yo;
i ayá ti ri, De,
bambiko i adi ri ti Kumba.”
24Si du boro nihe bani ti ni na nani, ki ka kuti diani, i ki du wa boro sa. 25I adu ni kundiri yo, kumba na diako, ka zee amanga nga yo ya.
Jelenleg kiválasztva:
Bambata Pai 2: ZB1978
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
La Sainte Bible en Zande © Alliance Biblique Universelle, 1978.
