Gyenesis 16
16
Ismael N’awoo
1Afei Abram ne yer Sarai ɔnnwo mma no: mbom nna ɔwɔ afonabaa Egyptnyi bi a ne dzin dze Hagar. 2Na Sarai see Abram dɛ, Afei hwɛ, EWURADZE esiw me awoo kwan; meserɛ wo, kɔ m’afonabaa nkyɛn; annyɛ a mibenya no ho mba. Na Abram tsiee Sarai ne ndze. 3Na Abram tsenaa Keenan asaase do mfe du n’ekyir no, Abram ne yer Sarai faa n’afonabaa Hagar, Egyptnyi no, na ɔdze no maa no kun Abram awar. 4Na ɔkɔr Hagar nkyɛn, na onyinsenii: na aber a ohun dɛ onyinsen no, obuu no wuraba enyimtsia. 5Na Sarai see Abram dɛ, Mo mfom da wo do; medze m’afonabaa too wo bo mu, na ohun dɛ onyinsen ntsi, obu me enyimtsia: EWURADZE mbua emi nye ɔwo ntamu atsɛn. 6Na Abram see Sarai dɛ, Hwɛ, w’afonabaa wɔ wo nsamu, yɛ no dɛ mbrɛ woara ehwɛ a oye no ara. Na Sarai nye no dzii no dzendzenndzen, ma ofii n’enyim guanee. 7Na EWURADZE no bɔfoe hun no wɔ nsunyiwa bi ho wɔ sar do, Sur kwan mu nsunyiwa no ho a. 8Na obisaa no dɛ, Sarai n’afonabaa Hagar, ifi henfa bae na erokɔ henfa? Na obuaa dɛ, Mifi mo wuraba Sarai n’enyim na muruguan. 9Na EWURADZE no bɔfoe no see no dɛ, San kɔ wo wuraba hɔ, na kɛbrɛ woho adze wɔ n’ase. 10Na EWURADZE no bɔfoe no see no dɛ, Mebɛma w’asefo adɔr menyamenya, ma hɔn dodow ntsi wɔkan hɔn a ɔnnkɛyɛ. 11Na EWURADZE no bɔfoe no see no dɛ, Hwɛ, enyinsen, na ebɔwo babanyin; na ebɛfrɛ ne dzin Ismael, osiandɛ EWURADZE atse w’amandzehu. 12Na ɔbɛyɛ dɛ asoaso bɔyafo wɔ adasa mu; ne nsa betsia nyimpa nyinara, na nyimpa nyinara nsa etsia no; na ɔbɔsoɛr etsia no nuanom nyinara. 13Na ɔfrɛɛ EWURADZE a ɔkasaa kyerɛɛ no no ne dzin dɛ, ɔwo yɛ Nyankopɔn a ihu adze: na ɔkaa dɛ, Aso ha ara mpo mehu nyia ohu me yi? 14Dɛm ntsi wɔfrɛɛ bura no Beer-lahai-roi; na, ɔwɔ Kades nye Bered ntamu. 15#Gal 4.22 Na Hagar woo babanyin maa Abram: na Abram frɛɛ ne babanyin a Hagar woo no no ne dzin Ismael. 16Na aber a Hagar woo Ismael no, nna Abram edzi mfe eduowɔtwe esia.
Jelenleg kiválasztva:
Gyenesis 16: MFANBRP
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
Mfantse Bible © Bible Society of Ghana, 2011.
