Génesis 30
30
1Raquelqa wamran mana kaptinmi ñañan Leata chikirqan. Tsaymi Jacobta nirqan: <<Noqachö tsuriki mana kaykaptinqa ¿imapänatä kawashäpis?>>
2Tsaynö niptinmi Jacob pasaypa rabyar Raquelta nirqan: <<Tsaynö nimänaykipäqa manam noqaqa Diostsu kä. Paychi destinashurquyki wamraynaq kanaykipäpis>>.
3Tsaymi Raquel nirqan: <<Sirviqnï Bilhawan punuy. Paychö tsuriki yurirmi wamränö kanqa. Tsaynöpam wamrayuq kashä>>.
4Tsaynö nirmi sirviqnin Bilhata entregarqan paywanpis pununanpä. 5Tsaynöpam Bilhapis Jacobpa tsurinta qeshyakurqan. 6Raquelnam nirqan: <<Wamrayuq kanäpä mañakunqätam Tayta Dios wiyamashqa. Tsaymi favornï shäriptin wamrayuqna kaykä>>.
Tsaynö nirmi wamrapa jutinta churarqan Danta#30.6 Dan ninanqa favornin shärin ninanmi..
7Tsaypita yapaymi Jacobpa tsurinta Bilha qeshyakurqan. 8Tsaymi Raquel nirqan: <<Wamrä mana kanqanpitam ñañäwan pasaypa chikinakuyarqü. Kananqa kikïpapis wamrä kannam>>.
Tsaynö nirmi wamrapa jutinta churarqan Neftalíta#30.8 Neftalí ninanqa chikinakuy ninanmi..
9Wamran manana kaptinmi Jacobta Lea entregarqan sirviqnin Zilpawan pununanpä. 10Tsaynöpam Zilpapis Jacobpa tsurinta qeshyakurqan. 11Tsaymi Lea nirqan: <<Suertiyuqmi kaykurqü>>.
Tsaynö nirmi wamrapa jutinta churarqan Gadta#30.11 Gad ninanqa suerti ninanmi..
12Tsaypitam yapay Jacobpa tsurinta Zilpa qeshyakurqan. 13Tsaymi Lea nirqan: <<Pasaypam kushikü. Kananpitaqa llapan warmikunam kushishqa kaykanqäta niyämanqa>>.
Tsaynö nirmi wamrapa jutinta churarqan Aserta#30.13 Aser ninanqa kushishqa ninanmi..
14Trïgu cosëcha witsan chakrapa Rubén aywarmi tarimurqan mandrágora ninqan jachapa frütankunata.#30.14 Tsay witsanshi yarpäyänä qolluq warmikuna mandrágora jachapa frütanta mikur wamrayuq kayänanpä kanqanta. Tsay jachapa frütankunatam maman Leapä aparqan. Tsayta Raquel rikaykurmi Leata nirqan: <<Wamrayki apamunqan juk ishkay mandrágora frütata qaraykamay>>.
15Leanam nirqan: <<¡Ä mana penqakuq! ¿Runäta qechurkamarpis wamrä apamunqan mandrágora frütataräku qechumayta munaykanki?>>
Tsaymi Raquel nirqan: <<Wamrayki apamunqan mandrágora frütata qaramaptikiqa kanan paqasmi qamwan Jacob pununqa>>.
16Tsay tardi chakrapita Jacob kutiykämuptinmi taripaykur Lea nirqan: <<Kanan paqas noqawan pununaykipämi wamräpa mandrágora frütanta pägakurqü>>.
Tsaynö niptinmi tsay paqas Leawan Jacob punurqan. 17Lea mañakunqanta Tayta Dios wiyaptinmi Jacobpa tsurinta yapay qeshyakurqan. Tsaywanqa pitsqanam Leapa wamrankuna kayarqan. 18Tsaymi Lea nirqan: <<Sirviqnïwan runäta punutsinqäpitam#Gén. 30.9-13. Tayta Dios kay premiuta qaramashqa>>.
Tsaynö nirmi wamrapa jutinta churarqan Isacarta#30.18 Isacar ninanqa premiu ninanmi..
19Tsaypitam Jacobpa tsurinta Lea yapay qeshyakurqan. Tsaywanqa joqtanam wamrankuna karqan. 20Leanam nirqan: <<Tayta Diosmi kay wamrata qaramashqa. Joqtatana tsurinta wachaykaptïqa runä noqatanam mas kuyamanqa>>.
Tsaynö nirmi wamrapa jutinta churarqan Zabulónta#30.20 Zabulón ninanqa qaray ninanmi.. 21Tsaypita Leapa wamran mas jukpis karqanrämi. Tsay wamran warmi kaptinmi jutinta churarqan Dinata.
22Tsaynöllam Raqueltapis Tayta Dios kuyaparqan. Mañakunqanta wiyarmi wamrayuq kananpä destinarqan. 23Mayor wamran yuriskiptinmi Raquel nirqan: <<Qolluq kanqäpita runakuna mana parlayämänanpämi Tayta Dios permitishqa wamrayuq kanäpä. 24Tayta Dios munaykullätsun wamrä maspis kananpä>>.
Tsaynö nirmi tsay wamrapa jutinta churarqan Joséta#30.24 José ninanqa mastapis Tayta Dios taritsimätsun ninanmi..
Jacob rïcuyanqan
25Joséta Raquel qeshyakuykuptinnam Labánta Jacob nirqan: <<Papä, kananqa markäman kutikunäpä despachaykallämayna. 26Rikanqaykinöpis llapan voluntänïwanmi tsurikikunapä aruparqü. Kutikunäpä warmïkunata y tsurïkunatapis dëjapaykallämay>>.
27Labánnam nirqan: <<¡Hïju, ama kutikuytsu! Kayllachö täkushun. Arupämaptiki Tayta Dios bendisamanqantam tantiyarqü. 28Aykata gänayta munanqaykitapis willamay. Mañamanqaykitam pägashayki>>.
29Tsaymi Jacob nirqan: <<Musyankim ashmaykikunata imanö rikanqätapis. 30Chämunqäpitam Tayta Dios bendicionninta churamushqa wallkallapita ashmaykikuna mirayänanpä. Qamllapä arurqa ¿kikïkunapäqa imaynatä arukushä?>>
31Labánnam yapay nirqan: <<Aykata gänayta munanqaykitapis willamay>>.
Jacobnam nirqan: <<Ama imatapis pägamaytsu. Üshaykikunata y cabraykikunata mitsinäta munarqa ninqäta awnimay. 32Üsha kunchaman yaykuykur kanan akramushä yana muru chispa chispa üshakuna y yana malta üshakunata. Tsaynöllam akramushä muru muru cabrakunata y chispas mullu cabrakunata. Tsaykunallam pägü kanqa. 33Tsaynöpam akranqä ashmakunata imaypis rikaq shamur musyanki mana suwapanqäta. Ashmäkuna kayanqanchöqa chispas mullulla y muru murulla cabrakunam kayanqa. Üshakunanam yanalla kayanqa. Juk color takuraykaqta tarirmi musyanki suwapanqäta>>.
34Labánnam nirqan: <<Ninqaykinö kaykullätsun>>.
35Tsaynö awniykarmi tsay junaq Labán rakirqan yana üshakunata y yuraqyuq chïvukunata y cabrakunata. Tsaynöllam rakirqan mullu chïvukunata y muru muru chïvukunata, chispas mullu cabrakunata y muru muru cabrakunatapis. Tsay rakinqan ashmakunatanam tsurinkunaman paytakurqan. 36Tsay rakinqan ashmakunata qatikurkurmi Jacob taykanqanpita kimsa junaq aywayta aywayarqan. Jacobnam Labánpa wakin üshankunata y cabrankunata mitsirqan.
37Tsaypitanam Jacobqa pallarqan álamupa, avellänupa y castäñupa llullu rämankunata. Tsay rämakunapa qeruntam shiptarqan räya räya rikakänanpä. 38Shiptanqan rämakunatanam ashmakuna yakükuyänanman churarqan. Tsayman yaku upuq yaykurmi rämakunapa ñöpanchö calintatsinakuyaq. 39Tsay shiptanqan rämakunapa ñöpanchö calintayaptinmi ashkashkuna yuriyaq räya räya, yana mullu y muru. 40Tsaykunatam kikinpä Jacob rakirqan. Tsaymi Labánpa üshankunata muyayänanpä#30.40 Wakin runakunaqa üshankuna yawayänanpä niyanmi. tsay rakinqan üshakunapa lädunman qatipaq. Tsaynöllam cabrakunatapis qatipaptin yuraqyuqta wachayaq. Üshakunanam yanata wachayaq. Tsaynöpam Jacobpa üshankuna y cabrankuna atskaman mirayarqan.
41Tsaynöllam wera ashmakuna calintayanqan höra yakükunanman shiptanqan rämakunata Jacob churaq calintatsinakuyaptin yawananpä. 42Uyu ashmakuna calintaptinmi sïqa shiptanqan rämakunata churapaqtsu. Tsaynöpam uyu ashmakunapa wawan yanalla yuraqlla yurir Labánpä karqan. Wera kaqkunapa wawankunanam räya räya, yana muru y muru yurir Jacobpä karqan. 43Tsaynöpam üshankuna cabrankuna atskaman miraptin Jacob rïcuyarqan. Camëllunkunapis ashnunkunapis atskam karqan. Tsaynöllam sirviqninkuna warmipis ollqupis atskaq kayarqan.
Jelenleg kiválasztva:
Génesis 30: qxo
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
© 2002, 2008, Wycliffe Bible Translators, Inc. All rights reserved.
