Génesis 19
19
Sodomata y Gomorrata Tayta Dios ushakätsinqan
1Patsa tsakaykaptinnam Sodomaman chäyarqan punta aywaq ishkay angelkuna. Lotnam jamaraykarqan markaman yaykunachö. Rikaskirmi paykunapa puntankunaman Lotqa qonqurikuykurqan urkunpis patsaman töpanqanyaq. 2Tsaymi paykunata nirqan: <<Taytakuna, wayïman aywaykulläshun patsakuyänaykipä. Tsaychömi chakikikunata mayllakuyanki. Waray wäraynam päsakuyanki>>.
Tsaynö niptinmi paykuna niyarqan: <<Päkillä, taytay. Kananqa cällillachöpis waräkuyäshämi>>.
3Tsaynö mana munaykäyaptinpis wayinchö patsakuyänanpä Lot kutin kutin rugaptinmi wayinman aywayarqan. Wayinman chaykuyaptinnam levadüraynaq tantata ruratsir alli mikuyta mikuyänanpä Lot kusinatsirqan.
4Lotpa wayinchö mayqanpis manarä punuptinmi Sodoma marka runakuna jövinkunapita qallaykur hasta rukukunayaq juntapaskiyarqan. 5Lotman qayaykacharmi niyarqan: <<¿Maytä wayikiman patsakamuq runakuna? ¡Paykunata violayänäpä juklla qarqamuy!>>
6Tsaynö niyaptinmi wayinpita Lot yarquskir punkunta shumaq wichqarkur 7tsay runakunata nirqan: <<Taytakuna, qorpäkunata ima mana allitapis ama ruraykuyaytsu. 8Qorpäkunapa rantin ishkay warmi tsurïkunata jipimushä munayanqaykita rurayänaykipä. Tsurïkunaqa manarämi pï runawanpis punuyashqarätsu. Wayïman chämuq runakunataqa ama imatapis ruraykuyällaytsu>>.
9Tsaynö niptinmi runakuna niyarqan: <<¡Qamqa jukläman witikuy! ¿Jäpa runa kaykarku mandayämayta munaykanki? ¡Kananmi sïqa paykunata rurayänäpä kanqanpita qamta mas peor rurayäshayki!>>
Tsaynö nirmi Lotta maqakachaskir aywayarqan wayi punkunta amiyänanpä.
10Tsaymi qorpankunaqa Lotta sutaypa wayi rurinman yaykaskatsir punkuta wichqarkur trancaskayämurqan. 11Tsaypitam waqtachö kaykaq runakunata qaprayätsiyarqan jövinkunapita qallaykur hasta rukukunayaq. Tsaynö karmi punkuta ashiykäyanqallanchö ajayaskiyarqan.
12Tsaypitanam qorpankuna Lotta niyarqan: <<¿Kay markachö mas castaykikuna kanku? Castaykikuna kaptinqa warmitapis, ollqutapis, mashaykipä kaq jövinkunatapis llapanta pushakurkur kay markapita aywakuyay. 13Atskaqmi Tayta Diosman quejakuyashqa kay markachö runakuna jutsa ruraq kayanqanta. Tsaynö jutsasapa kayaptinmi noqakunata mandayämashqa kay markata chipyaq ushakätsiyänäpä>>.
14Tsaynö niptinmi mashan kananpä kaq jövinkunaman aywaykur Lot nirqan: <<¡Kay markapita llapantsik aywakushun! ¡Tayta Diosmi kay markata ushakätsinanpä kaykan!>>
Tsaynö niptinpis Lot brömapanqanta yarparmi criyiyarqantsu.
15Patsa waraykaptinnam Lotta angelkuna niyarqan: <<Kay markata ushakätsiyaptï mana ushakänaykipä ishkan tsurikita y warmikita pushakurkur empëñu aywakuy>>.
16Lot ras mana yarquptinmi angelkuna payta, warminta y tsurinkunatapis makipita jancharkur tsay markapita jipiyarqan. Tsaynöpam Tayta Dios kuyaparnin paykunata jipirqan tsay markachö mana ushakäyänanpä.#2Ped. 2.7. 17Markapita karuchö kaykäyaptinnam juk ángel nirqan: <<Mana wanuyänaykipä cörrilla qeshpir aywakuyay. Qepaman mana tikramuypa ni pampachöpis mana ichiypa jirkayaq aywakuyay>>.
18Tsaynö niyaptinmi Lot nirqan: <<¡Taytakuna, ichikllata shuyaskiyayrä! 19Qamkunaqa alli runakuna karmi kuyapäyämar mana wanuyänäpä jipiyämarquyki. Markata juklla ushakätsiyaptikiqa jirkayaq manam qeshpiyta puëdiyäshätsu. Lätaykachaykaqllatachi ushakätsiyämanqa. 20Taytakuna, taqay cercachö kaykaq taksha markallaman qeshpiyanqäyaq shuyaykuyällay. Tsay taksha markataqa ama ushakaykatsiyällaytsu>>.
21Tsaymi ángel nirqan: <<Mañakamanqaykinö katsun. Taqay taksha markata manam ushakätsishätsu. 22Tsaynö kaykaptinqa juklla tsay markaman qeshpir aywakuyay. Tsayman manarä chäyaptikiqa ushakätsinäpä kaq markata manarämi ushakätsishärätsu>>.
Tsaypitanam tsay taksha markapa jutinta churarqan Zoarta.#19.22 Zoar ninanqa takshalla ninanmi.
23Patsa waraskiptinnam Zoarman Lot charqan. 24Chaykuptinnam Sodoma y Gomorra markakunaman azufritawan lunyaykaq ninata Tayta Dios tamyatsimurqan. 25Tsay täyanqan pampa markakunachömi runakunata, ashmakunata y llapan imaykatapis chipyaq nina usharqan.#Mat. 10.15; 11.23-24; Luc. 10.12; 17.29; 2Ped. 2.6; Jud. 7. 26Peru Lotpa warminmi#Luc. 17.32. sïqa qeshpiykanqanchö qepapa tikraskir kachi rumiman tikraskirqan.
27Tsaypita waraynin wäraynam Tayta Dioswan parlanqan kaqman Abraham aywarqan. 28Tsaypitam rikarqan Sodoma y Gomorra markakunapita jornupitanörä qoshni shäriykaqta. 29Tsaynömi Tayta Dios ushakätsirqan Lot täranqan pampachö markakunata. Tsaynö ushakätsirpis Abraham mañakushqa kaptinmi tsay markakunapita Lotta qeshpitsirqan.
Lotpa warmi tsurinkuna imanöpa wamrayuq kayanqanpis
30Tsaypitanam Zoarchö tärayta Lot pasaypa mantsarirqan. Tsaymi ishkan warmi tsurinkunawan jallqaman aywakur machayllachö täyarqan. 31Tsaychömi mayor kaq jipash ñañanta nirqan: <<Papänintsikqa rukunam. Kaychöqa manam ollqu kantsu noqantsikwan tänanpä. 32Tsaymi papänintsikta machaskatsir paywan punushun noqantsikchö tsurin yurir castantsikkuna mana ushakänanpä>>.
33Willanakuyanqan tsakaymi papäninta vïnuwan machätsiyarqan. Tsaypitanam mayor kaq jipash papäninwan punurqan. Papäninqa machashqa karmi mayarqantsu imay höra tsurin yaykunqanta ni yarqunqantapis.
34Waraynin junaqnam mayor kaq jipash qepa kaq ñañanta nirqan: <<Qanyan paqasmi papänintsikwan punurqä. Kanan paqas qampis paywan pununaykipä yapay machätsishun. Tsaynöpam papänintsikpa castankuna ushakäyanqatsu>>.
35Tsaynö willanakuskirmi tsay paqas papäninta yapay upyatsiyarqan. Tsaypitanam qepa kaq jipashna papäninwan punurqan. Pasaypa machashqa karmi papäninqa mayarqantsu imay höra tsurin yaykunqanta ni yarqunqantapis.
36Tsaynöpam Lotpa ishkan tsurinkuna papäninllapata qeshyaq rikakuyarqan. 37Mayor kaq jipashnam ollqu wamrata qeshyakurqan. Tsay wamrapa jutinmi karqan Moab. Paypita miraqkunam moabita runakuna kaykäyan. 38Qepa kaq jipashpis ollqu wamratam qeshyakurqan. Tsay wamrapa jutinnam karqan Ben-Ammi. Ben-Ammipitanam amonita runakuna kaykäyan.
Jelenleg kiválasztva:
Génesis 19: qxo
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
© 2002, 2008, Wycliffe Bible Translators, Inc. All rights reserved.
