Génesis 18
18
Abrahamta Tayta Dios watukanqan
1Mamre runapa chakran encina jachakuna kanqanchö taykaptinmi Abrahamta Tayta Dios yuripurqan. Tsay höram pasaypa achaptin toldun punkuchö Abraham llantukur jamaraykarqan. 2Abraham rikachakunqanchömi kimsa runakuna ichiraykaqta rikarqan. Tsaymi chaskinanpä#Heb. 13.2. cörrilla aywar urkunpis patsaman töpanqanyaq qonqurikuykur 3nirqan: <<Taytakuna, päsakuyänayki kaptinpis jamarishunrä. Ama aywakuyaytsu. 4Yakuta apatsimushä chakikikunata mayllakuyänaykipä. Kay jacha chakillanchöpis jamaykulläshun. 5Wamaqllanta chaykäyämuptikiqa imallatapis kusinakaskatsimushärä. Mikuskirnam päsakuyanki>>.
Tsaynö niptinmi paykuna niyarqan: <<Taytay, allichi kanman>>.
6Tsaymi Abrahamqa toldunman yaykuskir Sarata nirqan: <<Ishkay chunka (20) kïlu mas allinnin jarinapita tantata ruraskamuy>>.
7Tsaypitanam wäkankuna kaqman Abraham cörrilla aywar wera torïtuta apamurqan. Tsaytanam sirviqninta entregarqan pishtaskir kusinananpä. 8Tsaypitanam mantequïllata, lichita y kusinakatsinqan aytsata apaykur qorpankuna jamaraykanqallanman qararqan. Paykuna mikuyaptinmi alcäbulla kaykarqan imatapis munayanqanta makyananpä.
9Mikuskirnam Abrahamta tapuyarqan: <<¿Maychötä warmiki Saraqa kaykan?>>
Abrahamnam nirqan: <<Toldu rurinchömi kaykan>>.
10Tsaynö niptinmi juknin nirqan: <<Watan watukaq kutimuptï warmiki Saraqa ollqu wamrayuqnam kanqa>>.#Rom. 9.9.
Abrahamta tsaynö ninqantaqa punku waqtallanpitam Sara wiyaparaykarqan. 11Abrahamwan Saraqa tsatsayashqanam kayarqan. Chakwanna kaptinmi killa qeshyanpis unayna illakashqa karqan. 12Tsaynö parlanqanta wiyarmi Saraqa asikur shonqullanchö nirqan: <<Kanan chakwanna kaykarqa y runäpis rukuna kaykaptinqa ¿imanöpanatä wamräpis kanman?>>
13Tsaymi Abrahamta Tayta Dios nirqan: <<¿Imanirtä Sara asikushqa? ¿Imanirtä chakwanna kar wamran mana kananpä kanqanta yarpan? 14Noqapä ¿imallaqa aja kantsurä? Watan watukaq kutimuptï Saraqa ollqu wamrayuqnam kanqa>>.#Jer. 32.27; Luc. 1.37; Rom. 9.9.
15Tsaynö ninqanta wiyarmi Sara mantsakar nirqan: <<Noqaqa manam asikurqütsu>>.
Tsaynö niptinmi Tayta Dios nirqan: <<Noqa musyämi asikunqaykita>>.
Sodoma markapä Tayta Diosta Abraham mañakunqan
16Tsaypitanam qorpankuna#18.16 Tsay kimsa qorpakunaqa manam runakunatsu kayarqan, sinöqa ishkay angelkunawan Tayta Diosmi. Tsayta musyanaykipä liyinki Gén. 18.17; 19.1. Sodoma markapa päsakuyarqan. Abrahampis paykunata compañarmi karuyaq aywarqan. 17Abrahamwan aywaykarmi Tayta Dios yarpachakur nirqan: <<Abrahamta musyatsishä imata yarpaykanqätapis. 18Paypita miraqkunam atskaman mirar jatun nación kayanqa. Tsaynöllam pay raykur kay patsachö llapan casta runakunapis bendicionnïta chaskiyanqa. 19Paymi tsurinta y paypita miraqkunatapis yachatsinqa munanqänö imaypis kawayänanpä. Tsaypämi payta akrarqü. Tsaynö ruraptinmi Abrahamta awninqäkunata llapanta cumplishä>>.
20Tsaynö yarpachakurirmi Abrahamta Tayta Dios nirqan: <<Sodomachö y Gomorrachö täraq runakunapämi maytsay runakunapis parlayan pasaypa jutsa ruraq kayanqanta. 21Tsaymi kanan aywaykä runakuna niyanqannö rasunpa jutsayuq kanqanta o jutsaynaq kanqantapis musyanäpä>>.
22 Tayta Dioswan Abraham parlanqanyaqmi ishkay kaq qorpankunaqa Sodomaman puntayarqan. 23Tayta Diospa puntanman witiykurmi Abraham tapur nirqan: <<Jutsasapa runakunata ushakätsirqa ¿jutsaynaq kaqkunatapis ushakätsinkitsurä? 24Tsay jatun markachöqa jutsaynaq runakuna capazchi kaykan pitsqa chunkallapis (50). Pitsqa chunka jutsaynaq runakuna kaykaptinqa ¿tsay markata mana kuyapaypatsurä ushakätsinki? 25Taytay, jutsaynaq runakunatawan jutsasapa runakunata iwalqa ama ushakaykatsillaytsu. Kay patsachö llapan runakunapa jueznin kaykarqa ¿manatsurä shumaq arreglaykunkiman?>>
26Abraham tsaynö rugakuptinmi Tayta Dios nirqan: <<Sodoma markachö pitsqa chunka jutsaynaq runakunata tarirqa manam tsay markata ushakätsishätsu>>.
27Tsaymi Abraham nirqan: <<Taytay, yapay tapuptï ama ajanaykullaytsu. Noqaqa polvunö y uchpanöllam kä. 28Jutsaynaq runakunaqa capazchi pishin pitsqallapis pitsqa chunka kananpäqa. ¿Tsaylla pishiykaptintsurä tsay markata ushakaykatsinkiman?>>
Tsaynö rugakuptinnam Tayta Dios nirqan: <<Jutsaynaq runakunata chusku chunka pitsqata (45) tarirqa manam ushakätsishätsu>>.
29Abrahamnam yapay nirqan: <<Capazchi chusku chunkallapis (40) jutsaynaq runakuna tsaychö kaykäyan>>.
Tsaynö niptinmi Tayta Dios nirqan: <<Jutsaynaq runakunata chusku chunkallatapis tarirqa manam ushakätsishätsu>>.
30Yapay rugakurmi Abraham nirqan: <<Taytay, kutin kutin rugakuptï ama ajanaykullaytsu. Capazchi kimsa chunkallapis (30) jutsaynaq runakuna kaykäyan>>.
Tsaynö niptinmi Tayta Dios nirqan: <<Jutsaynaq runakunata kimsa chunkallatapis tarirqa manam tsay markata ushakätsishätsu>>.
31Abraham yapaymi nirqan: <<Taytay, masta tapukuptï ama ajanaykullaytsu. Ishkay chunkallatapis (20) jutsaynaq runakunata tarirninqa ¿ushakätsinkitsurä?>>
Tsaynö tapuptinmi Tayta Dios nirqan: <<Ishkay chunkallatapis jutsaynaq runakunata tarirqa tsay markata manam ushakätsishätsu>>.
32Yapaymi Abraham tapurqan: <<Taytay, kutin kutin tapuptï ama ajanaykullaytsu. Kananllanam tapukulläshayki. Chunkallatapis jutsaynaq runakunata tarirqa ¿imatatä ruranki?>>
Niptinmi Tayta Dios nirqan: <<Tsay markachö chunkallatapis jutsaynaq runakunata tarirqa manam ushakätsishätsu>>.
33Abrahamwan parlayta ushaskirmi Tayta Dios aywakurqan. Abrahamnam täranqan kaqman kutikurqan.
Jelenleg kiválasztva:
Génesis 18: qxo
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
© 2002, 2008, Wycliffe Bible Translators, Inc. All rights reserved.
