1 Musa 7
7
Laè mengeraja
1Nai nina Jahowa mo taba si Noak, “Enggo Kuidah, pellin ko mo kessa mengulaken lemmo atèngKu. Jadi bengketti mo keppel i rebbak dekket karina simpangaen kènè. 2-3Arak mo pitu mpasang gennep matcam manuk-manuk dekket binatang halal sidèbanna i, ukum binatang haram pellin simpasang-simpasang mo ukum. Baing mo i, asa gennep matcam bagè binatang i lot maluah, janah asa ndorok nola merrak-merrik i tanoh èn. 4Pitu ari nai roh mo udan Kubaing, janah oda meradi-adi sidekkah empatpuluh ari empatpuluh berngin, asa ripas karina singgelluh sikuhanaken i.” 5Nai ibaing si Noak mo karinana sinidokken Jahowa i bana.
6Merumur 600 tahun mo si Noak tikan masa laè mengeraja i i tanoh èn. 7#Mat. 24:38-39; Luk. 17:27 Si Noak dekket sinibagesna, dekket anakna bak purmaènna, mbengket mo mi keppel i, paluahken dirina i laè mengeraja i nai. 8Simpasang-simpasang i gennep matcam manuk-manuk bak binatang sidèbanna – halal dekket haram pè – 9mbengket mi keppel i rebbakken si Noak, bagè sinidokken Dèbata. 10Enggo kessa pitu ari roh mo laè mengeraja mengeremrem tanoh èn.
11 #
2 Ptr. 3:6
Tikan merumur 600 tahun si Noak, tupung ari Anggara kolom bulan pekedua, mburtas mo karina takal laè i terruh tanoh. Mbuka mo karina pèntu laè i langit, 12roh mo udan gata-gutu sidekkah empatpuluh ari empatpuluh berngin. 13Arinkenna i ma mo ibengketti si Noak bak sinibagesna keppel i rebbak dekket anakna sitellu i, imo si Sem, si Japet dekket si Ham bagi ma pè sinibagesna. 14Rebbakken dekket kalak i mbengket ma mo gennep matcam manuk-manuk bak binatang-binatang melemmuk bang meriar pè, mbellen bang kètèk pè. 15Simpasang-simpasang ipas gennep matcam singgelluh mbengket mo mi keppel i rebbakken dekket si Noak, 16bagè sinidokken Dèbata bana. Enggo kessa karinana mbengket, itutup Jahowa mo pèntu keppel i.
17Mengeremrem mo laè mengeraja i sidekkah empatpuluh ari, janah ndates kalohon ngo laè i, gabè ndorok mombang keppel i, 18Muat ndatesna ngo laè; janah mombang-ombang mo keppel i babo laè. 19Dak ngo makin ndates laè i, gabè iremrem mo delleng sindatesna kalohon. 20Pukpuk mo muat remremna laè i sanga pitu mèter i babo punca delleng. 21-23Iripasken Dèbata mo karina singgelluh i tanoh èn: Jelma, manuk-manuk dekket binatang darat, kèdèk bang pè mbellen. Siso matè pellin si Noak dekket karinana silot rebbak dekketsa ibagasen keppel i. 24Oda surut laè i sidekkah 150 ari.
Jelenleg kiválasztva:
1 Musa 7: LAIBTD
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
