1 Musa 26
26
Si Isak merian i Gerar
1Masa nola mo lèhè i nagerri i, bagè sienggo nung masa tikan si Abraham. Idahi si Isak mo si Abimelekh, Raja kalak Palistin i kuta Gerar, ipidoken mo asa merian i sidi ia. 2Ibaing pè bagi, kumarna ipacidah Jahowa dirina tabasa janah mendokken, “Ulang ko laus mi Mesir; kennah merian i nagerri èn mo ko, bagè sienggo Kudokken i bamu. 3#1 Ms. 22:16-18 Kuondingi janah Kupasu-pasu pè ko. Karina aur èn Kuberèken ngo bamu dekket bai pemparenmu. Ai naing Kupesaut ngo padan sienggo Kupadanken taba si Abraham bapamu i. 4Kubaing pè pinemparmu bagè buè bintang i langit, janah karina aur èn Kuberèken bai kalak i. Karina bangsa i tanoh èn, mengido taba Aku asa Kupasu-pasu kalak i, bagè pinemparmu sienggo Kupasu-pasu. 5Kupasu-pasu mo ko kumarna si Abraham sienggo menguèi Aku, janah menjamotken karina hukum dekket hatorenKu.”
6Jadi merian i Gerar mo si Isak. 7#1 Ms. 12:13, 20:2 Tikan ikusoi kalak i tersèngèt si Rebekka, nina si Isak turangna ngo i oda sinibagesna. Ai mbiar ngo si Isak ibunuh kalak i, asa dapetsa si Rebekka simberru i. 8Enggo kessa narih ndekkah si Isak merian i sidi, tikan sidari, menatap mo si Abimelekh ibas jendèlana nai, idah mo kumiali si Isak dekket si Rebekka. 9Nai idiloi mo si Isak, nina mo mbangsa, “Otang sinibagesmu ngo daberru i? Kasa idokken kono turangmu ngo ia?”
Ialom si Isak mo, “Katèngku ibunuh ngo aku mula kudokken sinibagesku ia.”
10“Kasa bagi ibaing ko taba kami?” nina si Abimelekh. “Otang ndorok kin mo nemmu ginemgemku sada kalak rebbak meddem dekket sinibagesmu, janah mula sanga kin masa bagi, kono ngo menggongken kesalahen nami i.” 11Nai imara-marai si Abimelekh mo karina ginemgemna bagèen, “Barang isè mengganggu kalak èn barang pè sinibagesna i, kennah matè ngo ia hukumen.”
12Nai mardang mo si Isak i nagerri i, dapetsa mo tahunna i seratus lempit ibas sinisuanna nai, kumerna ipasu-pasu Jahowa ia. 13Kinibèakna pè makin tambah ngo, jadi gabè kaya jong mo ia. 14Nai gabè nangis mo atè kalak Palistin midahsa, kumarna mèduk ngo hambana, bagi ma bang biri-biri bak lembuna. 15Nai ipelpelli kalak i mo tanoh mi karina telaga sienggo ikurak naposo si Abraham tikan nggelluhna.
16Kessa i idokken si Abimelekh mo taba si Isak, “Laus mo ko i nagerri nami èn nai. Enggo gabè merkuasaan ko asa kami.” 17Nai laus mo si Isak janah merian i Napa Gerar. I sidi mo ia barang sadikè dekkah. 18Ikurak nola mo telaga sienggo sanga ipelpel kalak Palistin merkitè tanoh. Ukum gerar telaga i tong ngo bagè gerar sinibaing si Abraham bapana i.
19Ikurak naposo si Isak mo telaga i Napa Gerar i, jumpa kalak i mo laè mbuè kalohon. 20Tapi merselisih mo permakan ni Gerar i dekket permakan si Isak. Nina kalak i, “Kami ngo sidasa laè èn.” Kerna i ngo asa ibaing si Isak gerar telaga i, “Perselisihen.”
21Nai ikurak naposo si Isak nola mo telaga sidèban, tapi masa ma ngo perubaten kemulihkenna i ma. Imo memaingken ibaing si Isak gerar telaga i, “Perubaten.” 22Nai lompat ma mo ia i sidi nai janah ikurak ma mo telaga petelluken. Ukum sikali èn, oda nè ngo masa persilisihen. Kernana i ibaing si Isak mo gerar telaga i “Kebèbasen.” Ai nina ngo, “Bagèndari enggo iberèken Jahowa banta kebèbasen lako merian i nagerri èn, janah nduma mo kita i sèn.”
23Nai berkat mo si Isak, soh mo ia mi Bersyeba. 24Bernginna i, ipacidah Jahowa mo dirina taba si Isak ninganna idokken, “Aku ngo Dèbata si Abraham bapamu i. Ulang ko mbiar; Kuondingi ngo ko. Kupasu-pasu pè ko janah Kubaing mbuè pinemparmu, kumarnaken padanKu taba naposongKu si Abraham.” 25Nai ipajek si Isak mo langgaten, pemèlèen bai Jahowa i sidi. Ibahan mo undung-undungna i sidi, janah ikurak naposona mo telaga sidèban.
Padan si Isak dekket si Abimelekh
26 #
1 Ms. 21:22
Tikan sidari roh mo si Abimelekh mi Gerar dekket si Ahuzat, penasèhatna, bak si Pikhol Pakalimana lako mendahi si Isak. 27Nai ikusoi si Isak mo, “Kasa roh kènè bagèndari mendahi aku, keppèken tikala i, imusuhi janah iusir kènè ngo aku i nagerri ndènè nai?”
28Ialoi kalak i mo, “Bagèndari enggo kubettoh kami, iondingi Jahowa ngo kono, asa dok atè nami sellohen mo kita maing padan. Sumpahken mo, 29magahken oda uè ko maing jahat taba kami, bagè kami oda nung maing jahat meradepken kono. Ai enggo mendè kubaing kami bamu, janah padiatken kono laus ibagasen damè. Enggo ntangkas bai nami, ipasu-pasu Jahowa ngo kono.” 30Nai itamuèi si Isak mo kalak i, mangan mènum mo kalak i. 31Njengkas siberembenkenna merbulaban mo kalak i. Jadi laus mo kalak i kessa idokken si Isak njuah-njuah, janah mersirang mo kalak i ibagasen mersupan-supan.
32Sidarinkenna i, roh mo naposo si Isak magahken tersèngèt telaga sienggo ikurak kalak i. Nina kalak i, “Enggo jupa kami laè.” 33Nai ibaing si Isak mo gerar telaga i, “Bulaban”. I sidi nai mo asal usul kuta i mergerar Bersyeba.
Sinibages si Esau i bangsa sidèban nai
34Tikan merumur empatpuluh tahun si Esau, ikabini mo dua kalak simerbaju i bangsa Het nai, imo si Judit berru si Beeri, dekket si Basmat berru si Elon. 35Duana ngo daberru i menusahi nggelluh si Isak dekket si Rebekka.
Jelenleg kiválasztva:
1 Musa 26: LAIBTD
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
