1 Musa 20
20
Si Abraham dekket si Abimelekh
1Lompat mo si Abraham i Mamre nai mi selatan tanoh Kanaan, janah merian mo ia i kellang-kellang kuta Kadès dekket Sur. Daoh-daoh ariin, tikan merian i Gerar ia, 2#1 Ms. 12:13, 26:7 iranaken mo ukum si Sara sinibagesna i, turangna ngo. Kerna i ipasulak si Abimelekh raja kalak Gerar mo pasulakkenna meraleng si Sara asa roh mendahisa. 3Tikan sada berngin ipacidah Dèbata mo dirina taba raja i merkitè nipi, mendokken, “Matè mo ko, kerna ibuat ko daberru i; ai enggo lot sinibalèna.”
4Tapi madèng ngo sempat ijamah si Abimelekh ukum si Sara, nai nina raja i mo, “Ialè Jahowa, oda ngo aku salah! Tah mada ngo iripasken kono alè Jahowa, aku dekket bangsangku? 5Si Abraham ngo mendokken bangku, turangna ngo nina daberru i, janah daberru i pè mendokken bagi ma ngo. Kubaing pè bagidi roh ipas pusuh peratèenku tutus nai ngo, jadi oda mersalah aku.”
6Nai ialoi Dèbata mo ibas nipi i, “Tuhu ngo i, Kubettoh ngo ibaing kono pè bagi roh ibas pusuh peratèenmu tutus nai ngo. Kerna i ngo asa Kugerra kono asa ulang merdosa ko bangKu, janah oda Kupaduè kono menjamah daberru idi. 7Tapi balikken mo ia bagèndari mendahi sinibalèna. Sada kalak nabi ngo sinibalèna, asa isodipken kono ulang matè. Tapi èngèt mo, mula oda ibalikken kono ia, kennah matè ngo ko dekket karina ginemgemmu.”
8Njengkas sibarembenkenna, idiloi si Abimelekh mo karina pugabèna, janah ibagahken mo karina simasa i. Gabè buradan kalohon mo kalak i. 9Kessa i, idilo si Abimelekh mo si Abraham janah ikusoken mo, “Kadè ngo enggo ibaing kono taba kami? Kadè ngo salah ku bamu, asa bagidi ibaing kono olpek taba diringku dekket kerajaenku? Situhuna, oda patut ibaing ko bagi taba aku. 10Kasa bagi ibaing kono?”
11Ialoi si Abraham mo, “Dok atèngku, oda lot isèn kalak merkebiaren midah Dèbata, gabè ibunuh kalak simerkelleng atè midah sinibagesku nola mo aku. 12Janah ma, ukum ia tuhu ngo turangku. Sada bapa ngo kami, tapi sinama, nai jejap mo kami. 13Jadi tikan idokken Dèbata kutadingken bages bapangku, mengeranto mi nagerri ni dèba, kudokken ngo tabasa, ‘Tandana ngkelleng atèmu midah aku, kennah dokenkenmu taba barang isè sambing pè, turangmu aku.’ ”
14Kessa bagi, ibalikken si Abimelekh mo si Sara taba si Abraham, janah iberèken ma mo karangkenna i dèba hamba, biri-biri dekket lembu. 15Idokken raja i mo taba si Abraham, “En mo karina nagerringku; merian mo ko barang kan dikè dok atèmu.” 16Nina mo taba si Sara, “Enggo kuberèken taba turangmu seribu riar pirak mahan tanda betti taba jelma, magahken tuhu-tuhu ngo oda mersalah kono.”
17-18Gabè nggempus mo karina daberru i istana si Abimelekh, kumerna simasa bai si Sara i. Nai mersodip mo si Abraham taba Dèbata, gabè ipemalum Dèbata mo si Abimelekh, sinibagesna dekket naposona daberru, gabè ndorok mo menubuhken nola daberru-daberru i.
Jelenleg kiválasztva:
1 Musa 20: LAIBTD
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
