1 Musa 2
2
1Nai pul mo enggo ihanaken karina suberri silot, 2#Heb. 4:4, 10 I ari pepituken pul mo enggo ibakin Jahowa ulanNa idi, nai mentadi mo Ia. #2 Ms. 20:11 3Nai ipasu-pasu mo ari pepituken idi janah ibaing gabè ari simerkedekoen, kerna mentadi ngo Dèbata ibas ari i enggo kessa pul ibakin bahanNa. 4Bagi mo tersèngèt penempa Dèbata mi karinana silot.
Pekken Eden
Sinderrang ijadiken Dèbata Jahowa karinana silot, 5madèng ngo lot bennih simertunas janah madèng ngo lot suan-suanen i tanoh èn, kumarna madèng roh udan ibaing Dèbata, janah madèng lot jelma lako mengula tanoh i. 6Tapi ukum laè mulai mo meniir i terruh nai, gabè merlaè mo sisik tanoh i.
7 #
1 Kor. 15:45
Nai ibuat Dèbata Jahowa mo situk tanoh, igana mo i gabè sada kalak jelma, nai isempulken mo kessah simerèken nggelluh mi ruang ègungna; nai nggelluh mo jelma i.
8Nai ibaing Dèbata Jahowa mo pekken Eden, kan kebincaren, janah ibaing mo merian i sidi jelma sienggo nitempaNa i.
9 #
Alm. 2:7, 22:2, 14 Ipenturahken Dèbata Jahowa mo karina matcam bagè kayu merandal, merbuahken buah merandal. I tengah pekken i turah mo kayu merèken nggelluh dekket kayu maing perbinettohen mendè dekket nggodo.
10Menjarir ngo sada laè i Eden nai, asa merlaè pekken i; janah i ruar Eden gabè bagi empat mo laè i. 11Sada mergerar Pison, marir ngo laè i mengkulilingi tanoh Hawila. 12Mbuè ngo i sidi terdapet emmas tingtingen bagi dekket sibaungkus bak batu permata. 13Laè peduaken mergerar Gihon; laèna marir mengkulilingi tanoh Kus. 14Laè petelluken mergerar Tigris, marir mi kebincaren Assur. Laè peempatken mergerar Efrat.
15Nai ibaing Dèbata Jahowa mo jelma i mi pekken Eden asa iula janah irajai pekken i. 16Nina Dèbata mo taba jelma i, “Ndorok ngo panganenmu karina ibas buah kayu ni pekken èn, 17tapi ukum buah kayu perbinettohen mendè dekket nggodo i oda ndorok ipangan kono; mula ipangan kono i, kennah matè ngo ko sidarinkenna i.”
18Nai nina Dèbata Jahowa mo, “Oda selloh jelma i nggelluh punjung. Kubaing mo denganna mahan pengurupi bana.” 19Enggo pul ihanaken Dèbata i tanoh i nai mermatcam bagè binatang darat dekket manuk-manuk. Karinana i iarak Dèbata mendahi jelma i lako mengidah kadè gerarna ibakinken taba binatang-binatang i. Idi mo permulaen lot gerar binatang darat dekket simerkabeng i. 20Bagi mo carana jelma i mahan gerar karina binatang darat dekket simerkabangen i. Tapi sada poda cocok i gabè denganna mahan pengurupina.
21Nai ibaing Dèbata Jahowa mo jelma i meddem lènek kalohon. Tikan meddem i ia, iorot Dèbata Jahowa mo sada rusukna janah idampelken nola suka mi pemuaten i. 22Rusuk i mo ihanaken Dèbata gabè sada daberru, janah iarahken mendahi jelma i. 23Nai nina jelma i mo,
“En mo ia, kalak tosè bagè aku –
tulan ibas tulanku nai, janah suka ibas sukangku nai.
Kugerari mo ia daberru, kerna i daholi nai ngo ia ihanaken.”
24 #
Mat. 19:5; Mrk. 10:7-8; 1 Kor. 6:16; Ep. 5:31 I ngo memaingken asa itadingken anak laki partuana, asa rebbak ia dekket sinibagesna, nai gabè sada mo kalak i sidua.
25Lubus ngo ukum anak laki bak daberru i, tapi oda lot perasaen mèla bai kalak i.
Jelenleg kiválasztva:
1 Musa 2: LAIBTD
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
