PAMUNGKAAN 7
7
Aek na oto
1Jadi didok Tuhan ma tu si Noak, “Masuk ma ho tu kapal i rap dohot sude isi ni bagasmu; hum sasada ho ma Huida jolma na satano on na patuluskon hagiotKu. 2Boan muse ma pitu pasang sian ragam ni binatang na so haram, tapi anggo na haram tuk ma hum sapasang boanonmu sian ganop ragamna. 3Boan muse ma pitu pasang ganop ragam ni unggas. Baen ma songon i anso laing malua ganop ragam ni binatang dohot unggas sian hamamago i jana laing tarbaen mangulahi martamba halahi di tano on. 4Pitu ari nari paroonKu ma udan na so ra sumirsir opat pulu ari opat pulu borngin lolotna anso abis sude sandok na mangolu na Hutompa i.” 5Jadi dipatulus si Noak ma sanga songon dia na diparentahon ni Tuhan i tusia.
6Marumur 600 taon ma si Noak, di na ro aek na oto tu tano on. 7Masuk ma ia dohot dadaborunia i bope angka dakdanaknia dohot angka dadaboruna be tu kapal i paluahon diri ni halahi sian aek na oto. 8Sada jantan dohot sada boru-boru sian ganop binatang dohot unggas sanga na haram pe i sanga na so haram, 9marmasuhan ma tu kapal i rap dohot si Noak hombar tu parenta ni Debata. 10Dung pitu ari ro ma aek na oto i.
11Di na marumur 600 taon si Noak, di ari pitu bolas bulan paduahon, mapultak ma sandok mata mual ni laut na bidang di toru ni tano jana sude pintu ni aek di langit mungkap ma, 12jana por ma udan di tano on opat pulu ari opat pulu borngin honokna. 13Laing di na sadari i ma si Noak dohot dadaborunia masuk tu kapal i rap dohot anaknia na tolu i, i ma si Sem, si Ham dohot si Jafet rap dohot dadaboru ni halahi be. 14Laing masuk muse ma rap dohot halahi sude ragam ni binatang na jinak sanga na riar pe, na menek dohot na godang bope sude ragam ni unggas. 15Sada ma i jantan dohot sada boru-boru sian ganop horong ni mahluk na mangolu na masuk tu kapal i rap dohot si Noak, 16hombar tu parenta ni Debata tusia. Dung i ditutup Tuhan ma pintu ni kapal i di pudi ni si Noak.
17Laing songon i ma aek na oto i manutupi tano on opat pulu ari honokna, jana manaek ma aek i lopus mumbang kapal i. 18Mur bagas ma aek i jana mumbang-umbang ma kapal i di ginjang ni aek i. 19Mur-mur bagas ma aek i jana dibonom ia ma lopus tu angka dolok na humincat pe. 20Mur manaek dope aek i lopus disalpui 7 meter di ginjang ni puncu ni dolok. 21Marmatean ma sude na mangolu di tano i – angka unggas, binatang dohot angka jolma. 22Sandok na humosa di tano, mate. 23Dipatimpas Tuhan sandok na mangolu di tano on – jolma, binatang dohot unggas. Hum si Noak ma i na so mate dohot sude na rap dohot ia di kapal i. 24Nada mar na sumurut aek i 150 ari honokna.
Jelenleg kiválasztva:
PAMUNGKAAN 7: LAIAKB
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
Indonesian Bible Society
