Lókasɛ 24
24
Yésusu a á húmé naá gɛbɛ́lá
1Buisí bá busío bá gɛanyɛ, bakɔ́dɔ bɔ́ɔbɔ go yáfa na gɛyɛ́nɛ́ túlúbú naá gɛbɛ́lá na megúdé má go fofa máama bá mbaá gedégédíe#24.1 Go ɛ́na naá 23.56.. 2Gáábɔ́ go gíde goŋaá ɛdánɛ́ nɛ́ɛnɛ nɛ́ mbaá lɔmɔ́ gindígénéelú naá gɛbɛ́lá nɛ́ mba lɛ́ tíŋgílídíelú go boayá. 3Bá báa lɛ gó íŋene naá gɛbɛ́lá, go lɔbɛnɔ bá dɛ gídé gigúe gá Daadáa Yésusu. 4Aŋa nciŋí ɛ mbaá ŋá ɛ báa go bó yímene naá odóɛ, batɔ báandɛ́ go bó hémine na bɛla go nnyɔ́dɔ bɛ́ geyime. 5Bakɔ́dɔ go bɛa bofoá, gáábɔ́ go dábana mosío go cí. Kɔ́ɔ batɔ bɔ́ɔbɔ bá bó oyana bá amɔ́: «No do háánánáa go fúmbe ogɔ́sɔ naá tɛ́mádɛ́má ya begúe. 6A dɛ báá háalá, a á fúfúgé. Bééníŋínyéemú nɔnɔ dogálɔ dɔ́ɔdɔ a mbaá nyó oyánɛ́náa gɔ́ɔgɔ a mbaá ŋá a gá lɛ́ naá Gelilée, 7a amɔ́: “Bó úhene goŋaá bá dúe Moɔnɔ́ ba mɔtɔ go bologílógí, bá mo gilene naá kolósi, naá nnyimé ya medúgú mádadɔ́ a lɛ go fúfuge#24.7 Go ɛ́na naá 9.22; 17.25; 18.32-33..”» 8Gɔ́ɔ bakɔ́dɔ bá béeniŋinyemú dogálɔ dá Yésusu. 9Gáábɔ́ go fadɛgɛna go go ɛ́da go oya buimée púmú naá baapótɛlɛ bɔ́ɔ́dɔ́ na ummue na behúúní biimée báaba bóntió. 10Bakɔ́dɔ bɔ́ɔbɔ bá mbaá lɛ Malɛ́a ba Magadaláa, Sáánɛ na Malɛ́a mɔ́ɔnyɔ nnyeedíi ba Sáakɛ. Bakɔ́dɔ bóntió báaba bá mbaá lɔmɔ́ olɔŋɔ nabɔ́ bó oyanɛna baapótɛlɛ boóma búmmue eé búmmue. 11Kanɛ́ baapótɛlɛ go gɔ́lɔ ŋgoyáamɔ́ ya bakɔ́dɔ aŋa moóma má buegu; bá báá lɛ gó inye go bó oliminyo. [12Akɛ́ nɔ́ɔnɔ, Píele go fadɛgɛna na odɛ́dá go go ɛ́da naá gɛbɛ́lá; ɛ ɛ́da bolana, gɛ́hɛ́ go gudimene go go ɛ́na, go ɛ́na goana biseli bá nnɔ́mbɔ́. Gɔ́ɔ a ncomɔ́ gunde na nnyimé u úle a békúke boóma bɔ́ɔbɔ bó mbaá bádómbánáa.]
Yésusu ɛ ɛ́ ɛ́nɛ́gɛ́ná behúúní báandɛ́
13Go buisí moánɛ bɔ́ɔbɔ, behúúní báandɛ́ bá mba lɛ́ bɛ́ ɛ́dana naá gɛdɔŋɔ gímmue, ufíno Ɛmóosɛ#24.13 Ɛmóosɛ : cuŋí sɛ́ lɛ́ naá hoóma moatɛ́ háaha gɛdɔŋɔ gɛ́ɛgɛ gɛ́ lɔ́mɔ́., bó mba lɛ́ go ɛnda bigúlí bɛ́andɛ́ go go fadɛgɛna gɔ́ɔgɔ naá Yolósalɛmɛ. 14Bá mba lɛ́ bá gálagala bɔ́ɔ na bɔ́ɔ moóma muimée mɔ́ɔmɔ mó mbaá bádómbánáa. 15Aŋa bá mbaá lɔmɔ́ bɛ́ ɛ́da bá gálagala, bá gundinye gundinye, Yésusu moatɛ́ go bó bégídene, ɛ ɛnda olɔŋɔ nabɔ́. 16Kanɛ́ oŋgíso yábɔ́ yá mba lɛ́ na bibúde, bá báa lɛ gó lɔbɛnɔ kanɛ go mo lɛnca. 17Yésusu go bó úhune a amɔ́: «No bɛ́ɛmbamɔ́ no oya ŋkádɛ gɔ́ɔgɔ no úlemú no ɛnda o?» Gɔ́ɔ ba dɛ́lɛmɛnamɔ́, na makánya naá odɛ́má. 18Ummue naá bɔ́ɔ báandɛ́, ufíno Kɛlɛyópasɛ, go gundie a amɔ́: «O lɛ́ mokáa, naá olɔŋɔ yá batɔ biimée báaba naá Yolósalɛmɛ, ba kanɛ go ɔ́bɔ ɛkádɛ gɛ́ɛgɛ gɛ́ á ná bádómbánáa hɔ́ɔ o?» 19Yésusu go bó úhune a amɔ́: «Ɛkádɛ kanɛ́ o?» Gáábɔ́ go mo gundie ba amɔ́: «Boóma bɔ́ɔbɔ bó á ná bolɛ́ná Yésusu ba Násalɛdɛ, gɛgaaga gá mbúsí ya Asaŋa; a lɛ́ dúfíelú bogaaga bɛ́hɛ́ naá meŋiigíe mɛ́hɛ́ na dogálɔ dɛ́hɛ́ naá oŋgíso yá Asaŋa na yá gɛdɔŋɔ giimée. 20Bagɔ́nɔ́ɔ bá bedúmbí bɛbáágá naá Asaŋa na bafɛanɔ́ɔ bá gɛdɔŋɔ bá lɛ́ mo dúelú, bá báá sómbá goŋaá a háanana na nigúe, bá báá mo giléné naá kolósi. 21Bɛɛcɔ́ɔ dɛ mba lɛ́ dɛ béeniŋenye dɛ amɔ́, mɔ́ɔ a ŋgaá bɛ́ɛ́mbá uféŋí ba gɛdɔŋɔ gá Ɛ́sɛlahɛ́ɛlɛ. Kanɛ́, medúgú mádadɔ́ mámáa má manɛmɔ́ go dómba. 22Kanɛ́ gɔgɔ́ bakɔ́dɔ naá giimbó gɛ́cɔ́, bá á có gulúgúsíe bɛnamá: go go ɛ́da gáábɔ́ gɔ́ɔgɔ naá gɛbɛ́lá na gɛyɛ́nɛ́ túlúbú, 23bá dɛ gídé gigúe gá nnyɔ́dɔ yɛhɛ́, gɔ́ɔ bá báá ná ncó gunde na ŋgoyáamɔ́ ya goŋaáa bá bɛ́ɛ ɛ́na giínigie: bɛɛ́ŋgɛlɛsɛ bá bó oyɛda goŋaá a lɛ́ ogɔ́sɔ#24.23 Go ɛ́na naá 24.1-11.. 24Nɛnamá níntió naá olɔŋɔ yɛ́cɔ́ nɛ́ bɛ́ɛ ɛ́da naá gɛbɛ́lá, bɔ́ɔbɔ bá báá nɛ́ ɛ́ná bó lumenene na ŋgoyáamɔ́ ya bakɔ́dɔ. Kanɛ́ mɔ́ɔ, bá lɛ́ kanɛ go mo ɛ́na.»
25Kɔ́ɔ a bó oyanamɔ́ a amɔ́: «Batɔ bá kanɛ nciŋí, ɛdɛ́má ndɔlɛ go go oliminyo buimée bɔ́ɔbɔ mbúsí sá Asaŋa sɛ́ lɔ́mɔ́ oyáalú! 26Ábɔ, bó do mbáa lɛ bó úhene goŋaá Mesíi a ŋgɔ ɔ́bɛ́gɔ́nɔ́ɔ buimée bɔ́ɔbɔ, a lɛ go íŋene naá nigúmi nɛ́hɛ́#24.26 bó do mbáa lɛ bó úhene… go ɛ́na naá 9.22; 17.25. o?» 27Kɔ́ɔ a dúmemú go bó falonanɛna buimée bɔ́ɔbɔ Ŋgɔ́ŋɛ́ sɛ́ mbaá lɛ sɛ́ oya go busío bɛ́hɛ́, gó bayɛga naá bakálata bá Mɔ́sɛsɛ gó nco húme naá báaba mbúsí sá Asaŋa sɛ́ mbɔɔ́ ɔ́ŋɔ́ɔ.
28Behúúní bá ná lɛ́ mekúígíi na gɛdɔŋɔ gɛ́ɛgɛ bá mbaá lɛ bɛ́ ɛ́dana hɔ́ɔ, Yésusu go yiŋie aŋa ɛ ɛ́dana páábɔ́. 29Bɔ́ɔ go mo gálɛda bá amɔ́: «Lɔbɛ́nɔ nɛcɔ́, hɛɔbɔ́bɔ́ɔ hɛ́hɛ́ɛ, goakɛ́ budúgú bó gaá gá lɛ́ go oba.» Gɔ́ɔ i íŋenemú go go bɛ́ɛmba olɔŋɔ nabɔ́. 30Aŋa a mbaá lukúméné olɔŋɔ nabɔ́ go manyáanya, gɛ́hɛ́ go gɔ́lɔ gɛlɛ́dɛ, a báá gɛ́ foná, a báá gɛ́sá, go bó íŋene. 31Oŋgíso yábɔ́ go dómba go fuunuge, bá báá mo lɛncá. Kanɛ́ mɔ́ɔ go bó yímene go oŋgíso. 32Gáábɔ́ go ɛ́da go bágálɛnagalɛna bá amɔ́: «Ábɔ, odɛ́má yɛ́cɔ́ yó do báa lɛ yó lɔ́kɔ gúunú gɛcamɛna gɛ́ɛgɛ a báá ná lɛ a có gálagala go pɛ́ a gɔnɔ có falonanɛna Ŋgɔ́ŋɛ́ o?»
33Gɔ́ɔ bá dúmbiemú go fadɛgɛna, bá báá gundé naá Yolósalɛmɛ, go gíde Bɛɔdɔ́ɔ na gímmue na boɛhɛ́ɛ bábándɛ́gɛ́náalú. 34Bɔ́ɔbɔ go bó oyana bá amɔ́: «Bó lɛ́ mammana, Daadáa a á hémé naá gɛbɛ́lá, a bɛ́ɛ ɛ́nɛgɛna Símono.»
35Báaba báandɛ́ go ɛ́da go oya bɔ́ɔbɔ bó mbaá bádómbánáa go pɛ́, gɔnɔ́ nɛɛ́nɛ bá mbaá mo lɛncá naá go gɛ́sa gá gɛlɛ́dɛ.
Yésusu ɛ ɛ́ ɛ́nɛ́gɛ́ná Bɛɔdɔ́ɔ na gímmue
36Bá lɛ́ naá go gálagala nɔ́ɔnɔ, Yésusu go dómba go bó bolɛna boasɛ naá kadɛ́gadɛ́ɛ yabɔ́, go bó oyana a amɔ́: «Ŋgáa buumbénú bó bɛ́ɛmba nɛnyɔ́.» 37Gáábɔ́ go ɛ́da go dagadana na gɛantá gá bofoá, bá béeniŋenye bá amɔ́ bá núune nnyɔlɛ. 38Kanɛ́ mɔ́ɔ go bó gálɛda a amɔ́: «Ɛkádɛ no lɔ́mɔ́ na bofoá náana o? Ɛkádɛ no lɔ́mɔ́ na cuŋí naá ɛdɛ́má yɛnyɔ́ mbɔ́dɔ yɛ́ɛyɛ náana o? 39Núúnée nɔnɔ ɛmbɔ́gɔ yamɛ na yɔmɔ́ bɛgɔ́ndɔ́, ábɔ, caá ndɔ́mɔ́ yɔmɔ́ɔ o? Mbáláfɛ́náamɔ́ nɔnɔ no gunde no íyime goŋaá nnyɔlɛ ɛ dɛ bɛanánáa mmegú ɛ́na gigúégúé aŋa yɔmɔ́ɔ ndɔ́mɔ́ na mɔ́ɔ náana.» [40Naá dogálɔ dɔ́ɔdɔ, gɛ́hɛ́ go bó dúfie ɛmbɔ́gɔ na bɛgɔ́ndɔ́ bɛ́hɛ́.] 41Na bɛyaŋa makɔ́nɔ́ naá odɛ́má, bá báá lɔbɛ́nɔ́ na cuŋí na bibékúkí, kanɛ́ gɛ́hɛ́ go bó oyana a amɔ́: «No do bɛanánáa boóma bá go nyáa háalá o?» 42Gáábɔ́ go mo fáa gigísi gá hɛɔbɔ́ foáalú. 43A báa gɔ́lɔ́, a báá nyáá naá oŋgíso yábɔ́.
44Yésusu go bó oyana kanɛ́ a amɔ́: «Mmba nyó oyánɛ́náa moóma mɔ́ɔmɔ gɔ́ɔgɔ mmbaá ŋá ká lɛ́ nɛnyɔ́: moóma mɔ́ɔmɔ mó lɔ́mɔ́ ɔ́ŋɔ́ɔlú go busío bámɛ naá kálata ya gicele ya Mɔ́sɛsɛ, na naá bakálata bá mbúsí sá Asaŋa na naá kálata ya ɛsagɔ, muimée mó mba lɛ́ má úhene goŋaá mó bóhóogio.» 45Gɔ́ɔ a bó buunemú nciŋí goŋaá bɔ́ ɔ́bɔ Ŋgɔ́ŋɛ́, 46go gɔnɔ bó oyana a amɔ́: «Náana gɔ́ɔ bó lɔ́mɔ́ ɔ́ŋɔ́ɔlú: Kilítusu a ŋgɔ ɔ́bɛ́gɔ́nɔ́ɔ, a lɛ go fúfuge naá nnyimé ya medúgú mádadɔ́#24.46 O bana, go eninye na Iseyíi 53; tɔ́nɔ na Osée 6.2.. 47Bá ŋga dúményée go ufíno yɛ́hɛ́ cɔ́mɔ ya goŋaá batɔ bá núgie ɛdɛ́má yabɔ́, Asaŋa a bó héehinye bɛlɔgɔ bábɔ́, naá mɛɛ́nɔ má cí miimée, gó bayɛga naá Yolósalɛmɛ. 48No lɛ́ ŋgominyo sá moóma mɔ́ɔmɔ muimée. 49Yɔmɔ́ɔ moatɛ́ ka ŋga nyó dómɛ́ná boóma bɔ́ɔbɔ Baaba a mbaá dáná. Kanɛ́ bɛɛnyɔ́ɔ, gɛ́gáa nɔnɔ naá tɛ́sɔnɔ, gó ɛ́da húme naá gɛcamɛna gɛ́ɛgɛ no ŋgaá bɛáa bogaaga bá go ɛ́da go úle naá mmoɛná#24.49 Go ɛ́na Meŋ 1.4-5..»
Asaŋa a á gɔ́lɔ́ Yésusu naá mmoɛná
50Naá nnyimé ya dogálɔ dɔ́ɔdɔ, gɛ́hɛ́ go ɛ́da nabɔ́ gɛayá gá Beteníi#24.50 Go ɛ́na naá Mél 11.1 na gibélincígínyé gɛ́ɛgɛ hɔ́ɔ.; go fediginye ɛmbɔ́gɔ, go ɛ́da go bó fona. 51Gɛcamɛna gɛ́ɛgɛ a mbaá lɛ a bó fona, gɛ́hɛ́ go ádogana nabɔ́. Asaŋa go mo gɔ́lɔ naá mmoɛná#24.51 O bana go eninye na Meŋ 1.9.. 52Kanɛ́ bɔ́ɔ, naá nnyimé ya go mo búlugenye enúu guléelú go cí, gáábɔ́ go nco gunde naá Yolósalɛmɛ, bɛyaŋa naá ɛdɛ́má dácɛ. 53Bá mba lɛ́ gɛcamɛna giimée naá Nnyaŋá ya Asaŋa, bá mo leebenye.
Jelenleg kiválasztva:
Lókasɛ 24: YAS
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
