Lókasɛ 22
22
Ɛdɔgɛ há go óna Yésusu
(Mot 26.1-5,14-16; Mél 14.1-2,10-11)
1Gibíné gá bɛlɛ́dɛ bá kanɛ ondɔ yá go fudugenye gɛ́ɛgɛ bá dɔ́ŋɔnɔmɔ́ bá amɔ́ gibíné gá Pásɛ́ka ya Beyúdene gɛ́ mbaá ŋá gɛ́ ná lɛ́ mekúígíi#22.1 Go ɛ́na Gihúmie 12.1-27.. 2Bagɔ́nɔ́ɔ bá bedúmbí bɛbáágá naá Asaŋa na muloodio má bicele go ɛ́da go fúmbe pɛ́ ya go óna Yésusu, kanɛ́ bá mba lɛ́ bá díine boɛ́nɔ. 3Gɔ́ɔ Sátana i íŋenemú naá odɛ́má yá Yódasɛ Ɛsɛkalɛ́ɔtɛ, ummue naá Bɛɔdɔ́ɔ na bɛ́andɛ́ bá behúúní. 4Yódasɛ go ɛ́da gíde bagɔ́nɔ́ɔ bá bedúmbí bɛbáágá naá Asaŋa na bagɔ́nɔ́ɔ bá bebeŋíbéŋí Nnyaŋá yá Asaŋa, go go éme ukelú naá mbɔ́dɔ ya go bó dúene Yésusu. 5Gáábɔ́ go ɛ́da go békelenye makɔ́nɔ́, aŋa bá mbɔɔ́ ɔ́bɔ́ cɔ́mɔ yɛ́ɛyɛ, bá báá mo dánɛ́ná muinyí má go mo fáa. 6Yódasɛ go oliminyo, go ɛ́da go fúmbe gɛnɔ́gɔ́ gá gɛcamɛna gá go bó dúene Yésusu, gitúu gá batɔ gɛ́ dɛ íyímé.
Yésusu a á dómá behúúní go go gedegedie gíbíné gá Pásɛ́ka
(Mot 26.17-19; Mél 14.12-16)
7Gɛcamɛna gá gibíné gá bɛlɛ́dɛ bá kanɛ ondɔ yá go fudugenye go bola. Buisí moánɛ, bá mba lɛ́ bá sómba baaná bá bɛdómbáa nyɔlɔ́ go gibíné gá Pásɛ́ka ya Beyúdene. 8Yésusu go dómá Píele na Sáŋa a amɔ́ gáábɔ́ a amɔ́: «Ɛ́dá nɔnɔ no có gedinye manyáanya má gibíné gá Pásɛ́ka ya Beyúdene#22.8 Go ɛ́na Gihúmie 12.1-27., goŋaá dɛ nyáa.» 9Gáábɔ́ go mo úhune bá amɔ́: «O lɛ́galɛgamɔ́ go amɔ́ dɛ ɛ́da má gedie áhanɛ́ɛ o?» 10Gɛ́hɛ́ go bó gundie a amɔ́: «Aŋa no gaá ní íŋéné naá tɛ́sɔnɔ, no gaá luméné na mɔtɔ na iséní há miimpo go odóɛ; mo bienéemú nɔnɔ naá nnyaŋá yɛ́ɛyɛ a gaá ní íŋéné hɔ́ɔ. 11Manɛ́ no gaá nó oyáná mɔtɔ ba nnyaŋá no amɔ́: “Iloodio u úhene a amɔ́: Cómba yɛ́ɛyɛ kaá ná nyáá gibíné gá Pásɛ́ka ya Beyúdene olɔŋɔ na behúúní bámɛ ɛ lɔ́mɔ́ áhanɛ́ɛ o?” 12A gaá nyó dúfíe gɛantá gá nɛgɛlɛ́ naá nnyaŋá mmoɛná gedíelú aŋa gó háananamɔ́. Hɔ́ɔ háa no gaá ná có gedínyée manyáanya má gibíné.» 13Behúúní go ɛ́da, go huenye boóma buimée aŋa Yésusu a mbaá bó oyáná, bá báá gedíe manyáanya má gibíné gá Pásɛ́ka ya Beyúdene.
Manyáanya má Asaŋa
(Mot 26.26-29; Mél 14.22-25; 1Kɔ 11.23-26)
14Aŋa gɛcamɛna gɛ́ mbaá háá, Yésusu go lukumene naá tábɛ́la olɔŋɔ na baapótɛlɛ bɛ́hɛ́. 15Gɛ́hɛ́ go bó oyana a amɔ́: «Ŋgaá lɛ ndɛ́galɛga goŋaá nnyáa manyáanya má gibíné gá Pásɛ́ka ya Beyúdene máama olɔŋɔ nɛnyɔ́, otóotoɛ yá goŋaá ŋgɔ́bɛgɔnɔ. 16Mammana, ŋgaá nyó oyáná caá, cɛ ná gɔnɔ má nyáa, gó ɛ́da go éme aŋa buimée bɔ́ɔbɔ má oyamɔ́ naá cí, bó ŋgaá bó hóógío naá Bufuŋe bá Asaŋa.» 17Gɛ́hɛ́ go gɔ́lɔ ɛnnyóɛ́ná na mɔgɛ́bɔ kɔ́ɔ, a báá béhiigí Asaŋa, go oyɛda a amɔ́: «Gɔ́lɔ́ nɔnɔ ɛnnyóɛ́ná hɛ́ɛhɛ, no nyóɛna bɛɛnyɔ́ɔ biimée. 18Ŋgaá nyó oyáná mammana caá: cɛ ná gɔnɔ nyóɛna mɔgɛ́bɔ máama gó lama gó ɛ́da húme aŋa Bufuŋe bá Asaŋa bó nú úlemú.» 19Gɛ́hɛ́ go gɔnɔ gɔ́lɔ gɛlɛ́dɛ, a báá béhiigí Asaŋa, go gɛ́ gɛ́sagɛsa, go bó íŋene a amɔ́: «Bɔ́ɔbɔ bó lɔ́mɔ́ nnyɔ́dɔ yamɛ íŋénéelú go busío bɛ́nyɔ́. Ŋanánáa nɔnɔ boóma moánɛ no mbéeniŋenye.» 20Naá nnyimé ya manyáanya, a báa ŋaáa caŋa mmue na ɛnnyóɛ́ná, a gálagala a amɔ́: «Bɔ́ɔbɔ bó lɔ́mɔ́ ɛnnyóɛ́ná há gɛpáa gá gɛlada bugúle na Asaŋa go manɔ́ŋɔ́ mámɛ máama má lɔ́mɔ́ udúgéelú go busío bɛ́nyɔ́#22.20 O bana, go eninye na Gihúmie 24.8; Selemíi 31.31-34..
21«Moánɛ, núúnée nɔnɔ, mɔ́ɔnyɔ a gaá ná túé, a nyáanya olɔŋɔ namɛ naá tábɛ́la háalá#22.21 O bana, go eninye na Ɛsagɔ 41.10.. 22Mammana, Moɔnɔ́ ba mɔtɔ a gaá gúé aŋa Asaŋa a mbaá dílímínyée. Kanɛ́ mahana makɔ́nɔ́ na mɔ́ɔnyɔ a gaá ná mo dúé.» 23Gáábɔ́ go ɛ́da go búúhenine ánɛ́ɛ naá olɔŋɔ yábɔ́ a gaá ná ŋaáa boóma aŋa bɔ́ɔbɔ nɔ́ɔnɔ.
Ánɛ́ɛ a lɔ́mɔ́ ogɔ́nɔ́ɔ a dómbana basɔ́gɔ́ɔ
(Mot 18.1; 20.25-28; Mél 9.34; 10.42-45)
24Gɔ́ɔ bɛ́ ɛ́damɔ́ go suŋene suŋene go go íyime ánɛ́ɛ naá kadɛ́gadɛ́ɛ yabɔ́ a lɔ́mɔ́ ba go bɛ́ɛmba gɛkɔ́nɔ́nɔ́ɔ a dómba basɔ́gɔ́ɔ. 25Yésusu go bó oyana a amɔ́: «Mefuŋe má bɛdɔŋɔ mí íligene batɔ bábɔ́, bɛgaaga bɛ́ bó míneminie, bɛ́ lɛ́galɛga goŋaá bá bɛ́ dɔ́ŋɔnɔ Beŋií besé. 26Bó do báá nɔ́ɔnɔ naá kadɛ́gadɛ́ɛ yɛnyɔ́. Kanɛ́ mɔ́ɔnyɔ a lɔ́mɔ́ ogɔ́nɔ́ɔ naá kadɛ́gadɛ́ɛ yɛnyɔ́ a háanana go gɔ́lɔ undukí yá moádɔmbɔ́; mɔ́ɔnyɔ a nonamɔ́ basɔ́gɔ́ɔ, a gɔ́lɔ odɛ́nɛ́ yá uyogóní. 27Mammana, ohanɛ́ a lɔ́mɔ́ ogɔ́nɔ́ɔ a dómbana basɔ́gɔ́ɔ o? Mɔ́ɔnyɔ a lɔ́mɔ́ ndukíi naá tábɛ́la lí, mɔ́ɔnyɔ a yɔgɔnɔmɔ́ o? Ábɔ caá mɔ́ɔnyɔ a lɔ́mɔ́ ndukíi naá tábɛ́la o? Kanɛ́ yɔmɔ́ɔ ndɛ́ naá kadɛ́gadɛ́ɛ yɛnyɔ́ aŋa mɔ́ɔnyɔ a yɔgɔnɔmɔ́.
(Mot 19.28)
28«Bɛɛnyɔ́ɔ no lɛ́ báaba no mbaá kéléméné namɛ naá bɛdɔmbɔ bámɛ. 29Gó moánɛ nnyó fáamɔ́ bufuŋe bá Asaŋa aŋa Baaba a mbaá páá. 30No ŋga nyáányáa, no nyóanana naá tábɛ́la yamɛ naá yɔmɔ́ Bufuŋe; no lukumenene naá ɛŋgɛ́yɔ́ go go sómba bɛsɛnɛ bá egúli yɔ́ɔ́dɔ́ na áhandɛ́ yá Ɛ́sɛlahɛ́ɛlɛ.»
Yésusu a á dóógío goŋaá Píele a gaá mo básáŋóná
31Yésusu go gálɛda a amɔ́: «Símono, Símono, Sátana a bɔ́ɔ ɔŋɛnɔ bogaaga bá go nyó fúne aŋa bá fúnemú camɔ́ go go úlie bifúnú. 32Kanɛ́ yɔmɔ́ɔ, ŋgaá bósógólónyóo go busío báhɔ, goŋaá, gioliminyo gáhɔ gɛ́ dɛ yímé. Aŋa o ná ncomɔ́ gunde naá yɔmɔ́ɔ, gíndényée batɛ́ɔbɛnɔ.»
(Mot 26.33-34; Mél 14.29-30)
33Píele go mo oyana a amɔ́: «Daadáa, ndɛ́ pɛnɛ́ɛ goŋaá dɛ ɛ́da naá ncíbo ya gɛaŋɔ́, akɛ́ goŋaá dɛ gúenye.» 34Yésusu go mo gundie a amɔ́: «Píele, otóotoɛ yá goŋaá gɛnɔ́mɛ gá ŋgɔɔ́ gɛ́ dádɛda ínoni yɛ́ɛyɛ, o gaá ŋá o báa go mbásáŋona ɛŋɛndɔ ɛdadɔ́ go amɔ́, o do ŋgíyíménée.»
Yésusu o oyanɛna behúúní goŋaá bá bégedegedie go bidé
35Gɛ́hɛ́ go gɔnɔ bó oyana a amɔ́: «Gɔ́ɔgɔ mbaá nyó dómánáa kanɛ gɛgada gá muinyí, kanɛ gɛgada gá oŋɛndɔ, kanɛ nnaadɛna, no mba baŋɛ́dá boóma lí?» Gáábɔ́ go mo gundie bá amɔ́: «Akɛ́ gɔnɔ́ɔ.» 36Gɛ́hɛ́ go bó oyana a amɔ́: «Godɔ́ɔdɔ, mɔ́ɔnyɔ a lɔ́mɔ́ na gɛgada gá muinyí, ŋgáa a gɛ́ gɔ́lɔ, caŋa mmue na mɔ́ɔnyɔ a lɔ́mɔ́ na gɛgada gá ɔŋɛndɔ; mɔ́ɔnyɔ a lɔ́mɔ́ a dɛ bɛanánáa kalafɔ, a háanana go dúe gɛla gɛ́hɛ́ gá isió, go go yɛ ɔ́ndɔ. 37Ŋgaá nyó oyáná naá mammana caá, bó úhene goŋaá Ŋgɔ́ŋɛ́ yɛ́ɛyɛ ɛ bóhóogio naá nnyɔ́dɔ yamɛ: “Bá mba mo baná naá olɔŋɔ yá bepelípélí#22.37 Iseyíi 53.12..” Ɛɛ́ɛŋ, buimée bɔ́ɔbɔ bó nnúunemú, bó ná bóhóogio.» 38Gáábɔ́ go mo oyana bá amɔ́: «Daadáa, kalafɔ ɛ́handɛ́ sɛ́sɛ́ɛ.» Gɛ́hɛ́ go bó gundie a amɔ́: «Gó háanana nɔ́ɔnɔ.»
Yésusu a bósógolonyo naá ogɔndɔ yá Boolifíe
(Mot 26.36-46; Mél 14.32-42)
39Yésusu go húme, go bofɛ́lánɔ́ bɛ́hɛ́ go go ɛ́da naá Ogɔndɔ yá boolifíe. Behúúní bɛ́hɛ́ bá báa lɛ gó mo biene. 40Aŋa a mbɛɛ́ ɛ́dá bola naá hoóma há ndiemi, gɛ́hɛ́ go bó oyana a amɔ́: «Bósógólónyóomú nɔnɔ goŋaá no do obɛ́ná naá magálá má ɛsɔgɛdɔ.» 41Gɔ́ɔ a bó yáŋɛmɛdɛnamɔ́ boóma bá nnɛɛnɔ́ ya ɛdánɛ́, go gule enúu go cí, a bósógolonyo, a gálagala a amɔ́: 42«Baaba, aáŋa o lɛ́galɛga, tɔ́ŋɔ́nɛ́náamɔ́ ɛnnyóɛ́ná há makánya hɛ́ɛhɛ. Kanɛ́ caá akɛ́ go ndɛ́ga yamɛ, ŋgáa bó báŋa go ndɛ́ga yahɔ.» [43Gɔ́ɔ ɛ́ŋgɛlɛsɛ ba Asaŋa a mo ɛ́nɛgɛnamɔ́ go go mo gíndenye. 44Aŋa a mbaá bɛáa bofoá bá nigúe, Yésusu go ɛ́da go bósógolonyo na bogaaga gɔnɔ́ makɔ́nɔ́. Giukú naá mbɔ́dɔ ya manɔ́ŋɔ́, go ɛ́da go mo húmene, gɛ́ débe go cí.] 45Naá nnyimé ya mbósógólí, gɛ́hɛ́ go fadɛgɛna, go nco gunde anáa behúúní bɛ́hɛ́ bá mbaá lɔmɔ́, go bó gíde go dɔnɔ́ɔ, na gɛdɔmbɔ gá odɛ́má go kánya. 46Gɛ́hɛ́ go bó úhune a amɔ́: «Nɛɛ́nɛ no lɔ́mɔ́ go dɔnɔ́ɔ o? Fadɛ́gɛ́na nɔnɔ no bósógolonyo goŋaá no do obɛ́ná naá magálá má ɛsɔgɛdɔ.»
Bá á gumbéné Yésusu
(Mot 26.47-55; Mél 14.43-49)
47A gá gálagala nɔ́ɔnɔ, gɔ́ɔ gitúu gá batɔ gɛ́ magamɔ́ boasɛ. Ummue naá Bɛɔdɔ́ɔ na bɛ́andɛ́ bá behúúní, ufíno yɛ́hɛ́ Yódasɛ, mɔ́ɔ a mbaá lɛ a bó gɔ́gɔ, gɛ́hɛ́ go báyɛkɛna Yésusu go go mo gɔ́lɔ kude. 48Yésusu go mo úhune a amɔ́: «Yódasɛ, o gɔ́lɔnɔ Moɔnɔ́ ba mɔtɔ kude go go mo dúe o?» 49Báaba bá mbaá lɛ mo géŋgélídíelú bɛ́ ɛ́nana boóma bɔ́ɔbɔ bó mbaá lɔmɔ́ bá go bola, go mo úhune bá amɔ́: «Daadáa, dɛ háanana go somona kalafɔ sɛ́cɔ́ lí?» 50Ummue naá bɔ́ɔ go canɛda uyogóní ba Ufuŋe yá bedúmbí bɛbáágá naá Asaŋa, a báá mo sólóná udúu yá ombɔ́gɔ onɔ́mɛ#22.50 O bana, go eninye na Sáŋ 18.10,26.. 51Kanɛ́ Yésusu go bó oyana a amɔ́: «Dɛ́ɛ́na nɔnɔ, bó háanana nɔ́ɔnɔ.» Gɛ́hɛ́ go báláfɛna udúu yá mɔtɔ mɔ́ɔnyɔ, a báá mo éŋúgíe. 52Gɔ́ɔ o oyanamɔ́ biimée báaba bá mbaá bégedíe go go mo gumbene, bagɔ́nɔ́ɔ bá bedúmbí bɛbáágá naá Asaŋa, bagɔ́nɔ́ɔ bá bebeŋíbéŋí Nnyaŋá ya Asaŋa na bafɛanɔ́ɔ bá gɛdɔŋɔ a amɔ́: «No búu úle na kalafɔ na ŋkɛ́báa aŋa go go gumbene ohándá! 53Gɔ́ɔgɔ ŋgaá lɔmɔ́ nɛnyɔ́ miisí miimée naá Nnyaŋá ya Asaŋa, no lɛ́ kanɛ go tála ombɔ́gɔ. Kanɛ́ gɛcamɛna gɛ́nyɔ́ gɛ́gɛ́ɛ, gɛcamɛna gá bogaaga bá ohándá.»
Píele a á básáŋóná Yésusu
(Mot 26.69-75; Mél 14.66-72; Sáŋ 18.12-18,25-27)
54Gáábɔ́ go yɔkɛnɔ Yésusu, go ɛ́da nɛhɛ́ naá nnyaŋá ya Ufuŋe yá bedúmbí bɛbáágá naá Asaŋa. Píele a bó bienene gɛyábá. 55Bá mba fóáná gɛantá gá íyuke go tɛ́mádɛ́má ya nnyaáŋgadɛ́ɛ, Píele go lukumene olɔŋɔ na báaba bá mbaá lɛ hɔ́ɔ bá báá hɛ́ géŋgélídíe. 56Okɔ́dɔ ba masɔ́mɔ ummue go ɛ́na Píele ndukíi naá gise gá íyuke, go mo ágɛna oŋgíso a amɔ́: «Múunyú tɔ́nɔ a mba lɛ́ olɔŋɔ nɛhɛ́.» 57Kanɛ́ gɛ́hɛ́ go básáŋona a amɔ́: «Okɔ́dɔ, cɛ mo íyíménée.» 58Moɔnɔ́ ba gɛcamɛna naá nnyimé, mɔtɔ untió go mo ɛ́na, go gálɛda a amɔ́: «Maamɔ́ɔ tɔ́nɔ o lɛ́ olɔŋɔ nabɔ́.» Píele go gundie a amɔ́: «Akɛ́ɛ, cɛ báá kɔ́ɔ.» 59Boóma bá gigúlí gímmue naá nnyimé hɔ́ɔlɔ́, mɔtɔ gɔnɔ́ untió go ɛ́da go éleninye a amɔ́: «Bó lɛ́ mammana, mɔtɔ múunyú a mba lɛ́ olɔŋɔ nɛhɛ́; moatɛ́, a lɛ́ ba Bégelilée.» 60Píele go gundie a amɔ́: «Cɛ íyíménée bɔ́ɔbɔ o lɛ́galɛgamɔ́ go oyɛda.» Hɔ́ɔ na hɔ́ɔ, a gá lɛ́ na dogálɔ naá nyuudé, gɛnɔ́mɛ gá ŋgɔɔ́ go dádɛda. 61Daadáa go bábondona, go ɛ́da go mo núune. Gɔ́ɔ Píele a béeniŋinyemú nogálɔ nɔ́ɔnɔ Daadáa a mbaá mo gálɛ́dá a amɔ́: «Otóotoɛ yá goŋaá gɛnɔ́mɛ gá ŋgɔɔ́ gɛ́ dádɛda ínoni, o gaá ŋá o báa go mbásáŋona ɛŋɛndɔ ɛdadɔ́.» 62Píele go húme, a báá dúmbúgé na mbií gɛbɛ́ gɛbɛ́.
Bá fánɛnafanɛna Yésusu, bá mo gide
(Mot 26.67-68; Mél 14.65)
63Batɔ báaba bá mbaá lɔmɔ́ bá beŋebeŋe Yésusu, bá mba lɛ́ bá mo fánɛnafanɛna, bá mo gide. 64Bá báá mo gódá busío, bá mo úhene bá amɔ́: «Lɛncá ánɛ́ɛ a go góbamɔ́ o?» 65Bá mba lɛ́ bá mo lába gɛcɛcá gá cigí síntió.
Yésusu naá Nɛgála Nɛgɔ́nɔ́
(Mot 26.59,63-65; Mél 14.55,61-64)
66Aŋa gɛyɛ́nɛ́ gɛ́ mbaá bálá, bafɛanɔ́ɔ bá boɛ́nɔ bá Beyúdene, bagɔ́nɔ́ɔ bá bedúmbí bɛbáágá naá Asaŋa na muloodio má gicele go bábándɛgɛna. Gáábɔ́ go ŋa goŋaá bú úle na Yésusu naá Nɛgála nɛgɔ́nɔ́ nábɔ́. 67Go mo úhune bá amɔ́: «Aáŋa o lɛ́ Mesíi, có oyánáamɔ́ nɔ́ɔ.» Gɛ́hɛ́ go bó gundie a amɔ́: «Caá nyó oyana nɔ́ɔ, no do gaá ŋgolímínyóo. 68Caá kunde mbáá nyó úhúné ŋgúhune, no do gaá kundíe. 69Kanɛ́ gó bayɛga godɔ́ɔdɔ, Moɔnɔ́ ba mɔtɔ a ŋga bɛ́ɛ́mbá ndukíi naá boayá bá ombɔ́gɔ onɔ́mɛ yá Asaŋa bogaaga#22.69 Ɛsagɔ 110.1..» 70Biimée go oyɛda bá amɔ́: «O lɛ́ kanɛ́ Moɔnɔ́ ba Asaŋa!» Gɛ́hɛ́ go bó gundie a amɔ́: «No ó oyɛ́dá, ndɛ́ nɔ́ɔ.» 71Gɔ́ɔ bá gálɛdamɔ́ bá a amɔ́: «Dɛ dɛ gaá gɔnɔ́ fúmbe batɔ bóntió bá go mo sɔ́mɔnɔ, goŋaá dɛ á bɔ́ɔ́bɛ́nɔ́ bɛɛcɔ́ɔ moatɛ́ naá nyuudé nɛ́hɛ́!»
Jelenleg kiválasztva:
Lókasɛ 22: YAS
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
