Lókasɛ 19
19
Yésusu a lɛ́ naá nnyaŋá ya Secée
1Gɔ́ɔ Yésusu íŋenemú naá Yelíko, a bɛ́ɛ́ ɛ́dá a dómbana naá tɛ́sɔnɔ. 2Mɔtɔ ummue a mba lɛ́ hɔ́ɔ, ufíno yɛ́hɛ́ Secée, a mba lɛ́ ufuŋe yá bogólí tásɛ na bonɔ́mɛ makɔ́nɔ́. 3Gɛ́hɛ́ go ɛ́da go fúmbe goŋaá ɛ ɛ́na ánɛ́ɛ a mbaá lɔmɔ́ Yésusu. Kanɛ́ aŋa batɔ bá mbaá lɔmɔ́ gitúu, a dɛ mbáa lɛ ba go mo ɛ́na, goakɛ́ a mba lɛ́ ibúcibúcí há mɔtɔ. 4Gɔ́ɔ a gɔ́lɔmɔ́ matɛ́tɛ́da, a báá dóáná naá busío, go ɛ́da bólɛga naá boɛ́tɛ bɔ́ɔbɔ bá dɔ́ŋɔnɔmɔ́ bá amɔ́ «sɛkɔmɔ́ɔlɛ», go go ɛ́na Yésusu mɔ́ɔnyɔ a mbaá lɛ bá go nco dómba boayá moánɛ. 5Aŋa Yésusu a mbaá ncó bola hɔ́ɔ, gɛ́hɛ́ go búlugie oŋgíso go mmoɛná, go oyana Secée a amɔ́: «Secée, siíse fɛaŋɔ, goŋaá cɛmɛganana go bɛ́ɛmba uŋunyí bahɔ ínoni yɛ́ɛyɛ.» 6Secée go dómba go siise fɛaŋɔ a báá mo gɛ́ndɛ́gɛ́ná na bɛyaŋa. 7Batɔ biimée báaba bá mbaá lɔmɔ́ hɔ́ɔ bɛ́ ɛ́ná boóma moánɛ, go ɛ́da go uŋguluŋgule bó oya bá amɔ́: «Mɔtɔ mɔ́ɔnyɔ a lama ɛ ɛ́da go íŋene go go gɛ́ga naá nnyaŋá ya ulogílógí múunyú!» 8Kanɛ́, Secée tɛ́nɛ́ɛ naá busío bá Daadáa, go ɛ́da go mo oyanɛna a amɔ́: «Ɛɛ́ɛŋ, Daadáa, kaá salá yɔmɔ́ bonɔ́mɛ biseli bɛ́andɛ́, páa basógasoga giseli gímmue, kunde aáŋa mba gɔ́lɔ́ dóla ya mɔtɔ uncodío naá kanɛ kɔ́ɔ, kaá mo gundínyée dóla ínni#19.8 O bana, go eninye na Gihúmie 21.37; na 2 Sémuele 12.6; na Ncaba 6.31.!» 9Yésusu go mo oyana a amɔ́: «Gisódio gɛ́ ú úlé naá nnyaŋá yɛ́ɛyɛ ínoni, goakɛ́ mɔtɔ mɔ́ɔnyɔ a lɛ́ tɔ́nɔ onana yúmmue yá Ábalaháma. 10Kɔ́ɔ, Moɔnɔ́ ba mɔtɔ a mbuú úlé goŋaá á ba fúmbée báaba bá mbaá yímé, a bó sódio.»
Ncaba ya boyogóní bádadɔ́
(Mot 25.14-30)
11Gɔ́ɔ Yésusu a gɔnɔmɔ́ go ágɛna batɔ báaba bá mbaá ŋá bá gá lɛ́ na go ɔ́bɔnɔ dogálɔ dɛ́hɛ́ ncaba, goakɛ́ a mba lɛ́ mekúígíi na Yolósalɛmɛ, batɔ bá mba lɛ́ ba béeniŋenye bá amɔ́ Bufuŋe bá Asaŋa bó gaá dómbá go úle hɔ́ɔ na hɔ́ɔ. 12A mbaá bó oyáná a amɔ́: «Giidí gá mɔtɔ gímmue gɛ́ mba fadɛ́gɛ́ná, go ɛ́da naá gɛdɔŋɔ gá halaháláa goŋaá bɛ́ ɛ́da mo búlugie naá odɛ́nɛ́ yá ufuŋe hɔ́ɔ, a lɛ go nco gunde. 13A gá lɛ́ a dɛ biené pɛ́, gɛ́hɛ́ go dɔ́ŋɔnɔ bɔ́ɔ́dɔ́ naá boyogóní bɛ́hɛ́, a báá bó abánáa onyɔ moánɛ kɛ́ásɛ́ ya muinyí má góolo ya go oŋona makɔ́nɔ́, a báá bó oyáná a amɔ́: “Síéne no ŋa nyonyí na muinyí mɔ́ɔmɔ gó ɛ́da go éme aŋa nná ncomɔ́ gunde.” 14Kanɛ́ aŋa a mbaá ŋá a báa go biene pɛ́, batɔ bɛ́hɛ́ bá gɛdɔŋɔ báaba bá mbaá lɔmɔ́ bá mo ágana mbɛlɔ́ go síene bá dóma batɔ goŋaá bɛ́ ɛ́da go oyɛda bá amɔ́: “Dɛ dɛ lɛ́gálɛ́gáa goŋaá mɔtɔ mɔ́ɔnyɔ a bɛ́ɛmba ufuŋe yɛ́cɔ́.” 15Gɔ́ɔ bá mo búlugiemú ufuŋe, gɛ́hɛ́ go nco gunde naá mɔ́ gɛdɔŋɔ. Aŋa a mbaá bolá, gɛ́hɛ́ go dɔ́ŋɔnɔ boyogóní bɛ́hɛ́ báaba a mbaá bó fáánánáa muinyí go go íyime aŋa onyɔ moánɛ a mbaá yɔgɔ́nɔ́ɔ na mɔ́. 16Ba busío a búú úlé a amɔ́ gɛ́hɛ́ a amɔ́: “Ogɔ́nɔ́ɔ, ndɛ́ bódáalú kɛ́ásɛ́ sá muinyí sɛ́ɔ́dɔ́ síncoó na yɛ́ɛyɛ o mbaá páá.” 17Ufuŋe go mo oyana a amɔ́: “Bese yɛ́yɔ́ɔ, o lɛ́ gɛnɔ́gɔ́ gá uyogóní; goakɛ́ go á bɛ́ɛ́mbá na pídefide naá boóma bá sɔŋɛ, ŋgaá go búlúgíe ŋgɔ́mɔnɔ ba tɛ́sɔnɔ sɛ́ɔ́dɔ́.” 18Bá gáandɛ́ɛ a búú úlé a amɔ́ gɛ́hɛ́ a amɔ́: “Ogɔ́nɔ́ɔ, ŋgaá bódá kɛ́ásɛ́ sá muinyí ɛ́táanɔ síncoó na yɛ́ɛyɛ o mbaá ncoóo.” 19Ufuŋe go oyana sɔ́gɔ́ɔ mɔ́ɔnyɔ a amɔ́: “Maamɔ́ɔ tɔ́nɔ, ŋgaá go búlúgíe ŋgɔ́mɔnɔ ba tɛ́sɔnɔ ɛ́táanɔ.” 20Uyogóní untió go úle a amɔ́: “Ogɔ́nɔ́ɔ, kɛ́ásɛ́ ya muinyí yahɔ yɛ́yɔ́ɔ; mba yɛ bɛ́dɛ́gɛ́ná naá nábɛ́kɛna gadɛ́ɛ. 21Moatɛ́, mmba lɛ́ ko díine, goakɛ́ o lɛ́ na bɛbabɛna, o gɔ́lɔnɔ bɔ́ɔbɔ o báá lɔmɔ́ o do ágá, o sáŋa bɔ́ɔbɔ o báá lɔmɔ́ o do kasánáa.” 22Ufuŋe go mo oyana a amɔ́: “Gɛbɛ́ gá uyogóní gɛ́ɛgɛ, kaá go bidée naá dogálɔ dáhɔ dá moatɛ́. O mba lɛ́ go íyimene goŋaá ndɛ́ na bɛbabɛna, kɔ́lɔnɔ bɔ́ɔbɔ ndɔ́mɔ́ kanɛ go ága, cáŋa bɔ́ɔbɔ ndɔ́mɔ́ kanɛ go kasana. 23Kɔ́ɔ, goakɛ́ o mbaá lɔmɔ́ o do ɛ́dá go ága yɔmɔ́ muinyí naá nɛbɛ́dɛgɛna o? Naá goncogunde gámɛ náana, ŋgɛ́da gɔ́lɔ yɔmɔ́ muinyí na bɛdálɛ́ná.” 24Kɔ́ɔ, o oyanamɔ́ batɔ báaba bá mbaá lɔmɔ́ hɔ́ɔ a amɔ́: “Gɔ́lɔ́ nɔnɔ kɛ́ásɛ́ ya muinyí yɛ́ɛyɛ a lɔ́mɔ́ na yɛ́ yɛ́ɛyɔ, no íŋene mɔ́ɔnyɔ a bɛananamɔ́ kɛ́ásɛ́ sá muinyí sɛ́ɔ́dɔ́.” 25Bɔ́ɔbɔ go mo gundie bá amɔ́: “Ogɔ́nɔ́ɔ, ábɔ, caá a ná lɛ́ na kɛ́ásɛ́ sá muinyí sɛ́ɔ́dɔ́!” 26Ufuŋe yɔ́ɔyɔ go gundie yó amɔ́: “Ŋgaá nyó oyáná caá: mɔtɔ uŋkimée mɔ́ɔnyɔ a lɔ́mɔ́ na bɔ́ bá ŋga mo gídéné; kanɛ́ mɔ́ɔnyɔ a lɔ́mɔ́ kanɛ bɔ́, bá ŋga mo úlínyé hɛómaŋkóma hɛ́ɛhɛ a bɛananamɔ́. 27Kanɛ́ go babɛlɔ́bɛlɔ bámɛ, batɔ báaba bá mbaá lɔmɔ́ bá amɔ́ cɛ bɛ́ɛ́mbá ufuŋe yábɔ́, bó gɔ́lɔ́ɔmɔ́ nɔnɔ, no bó óna háalá naá yɔmɔ́ oŋgíso.”» 28Aŋa Yésusu a mbaá ŋá a báa go gálagala nɔ́ɔnɔ, gɛ́hɛ́ go gɔ́gɛdɔ gitúu gá batɔ gɛ́ɛgɔ naá busío go go ɛ́da naá Yolósalɛmɛ.
Goíŋene gá Yésusu naá Yolósalɛmɛ
(Mot 21.1-11,15-17; Mél 11.1-10; Sáŋ 12.12-16)
29Aŋa a mbaá ŋá a ná lɛ́ mekúígíi na tɛ́sɔnɔ sɛ́ɛsɛ Bɛ́tɛ́fasɛ na Beteníi, go go ɛ́da Ogɔndɔ yá magónɛ́dá má boolifíe#19.29 Go ɛ́na naá Mél 11.1 na gibélincígínyé gɛ́ɛgɛ gɛ́ lɔ́mɔ́ hɔ́ɔ., gɛ́hɛ́ go dúenye behúúní báandɛ́, a báá bó oyáná a amɔ́: 30«Ɛ́dá nɔnɔ naá gɛdɔŋɔ gɛ́ɛgɔ gɛ́ lɔ́mɔ́ cɛŋɛ nɛnyɔ́ gɛ́ɛgɔ. Naá gobola hɔ́ɔ, no gaá gídé moɔnɔ́ ba abaŋa bɛbɛa súnígéelú, mɔtɔ a gá báasa a dɛ mo bólɛ́gá. Mo súdúnéemú nɔnɔ, no úle nɛhɛ́. 31Kanɛ́ mɔtɔ a amɔ́ a nyó úhune a amɔ́: “No mo súdune goakɛ́ o?” Mo gundíemú nɔnɔ no amɔ́: “Bó lɛ́ goŋaá Daadáa#19.31 Daadáa : gokikilidie gúncoó gó lɔ́mɔ́ Ogɔ́nɔ́ɔ ɛ́na gɔnɔ́ Moatɛ́ɛ bɛhɛ́. a lɛ́ ncaná yɛhɛ́!”» 32Gɔ́ɔ behúúní bɔ́ɔbɔ bɛ́ ɛ́damɔ́ bá báá gídé boóma buimée gɔgɔ́ aŋa Yésusu a mbaá lɔmɔ́ bó oyánáalú. 33Aŋa bá mbaá lɔmɔ́ bá súdune moɔnɔ́ ba abaŋa bɛbɛa, batɔ bɛ́hɛ́ go bó úhune bá amɔ́: «No súdunemú moɔnɔ́ ba abaŋa bɛbɛa mɔ́ɔnyɔ goakɛ́ o?» 34Bɔ́ɔ go gundie bá amɔ́: «Daadáa a lɛ́ ncaná yɛhɛ́.» 35Kɔ́ɔ bú úlenemú Yésusu na nnyama yɛ́ɛyɔ. Gáábɔ́ go nɔɔnɔnɔ naá nnyimé ya yɛ́ bɛla bábɔ́, go yelie Yésusu kɔ́ɔ#19.35 O bana, go eninye na Sakalɛ́a 9.9.. 36Aŋa a mbaá lɔmɔ́ ɛ ɛ́da ɛ ɛnda, batɔ bá ana bɛla bábɔ́ pɛ́ iŋkimée#19.36 O bana, go eninye na 2 Mefuŋe 9.13.. 37Aŋa a mbaá ŋá a ná lɛ́ mekúígíi na Yolósalɛmɛ, naá pɛ́ yɛ́ɛyɛ ɛ gɔsɔnɛnɔmɔ́ Ogɔndɔ yá boolifíe, gitúu gá behúúní giimée, na bɛyaŋa dácɛ, go ɛ́da go gúmenye Asaŋa ukelú naá mmoɛná go muune miimée máama ba mbɛɛ́ ɛ́nánáa. 38Ba mba lɛ́ bó oya bá amɔ́:
«Gɛfona gɛ́ bɛ́ɛmba na mɔ́ɔnyɔ u úlenemú, ufuŋe, go ufíno yá Daadáa!
Buumbénú naá mmoɛná, nigúmi naá mmoɛná páábɔ́ gúunú#19.38 O bana, go eninye na bɔ́ɔbɔ naá Ɛsagɔ 118.26; naá Lók 2.14.!»
39Befelisiéŋe bóncodío báaba bá mbaá lɔmɔ́ naá gitúu gɛ́ɛgɔ, go oyana Yésusu bá amɔ́: «Iloodio, oyána behúúní báhɔ bá máma.» 40Gɛ́hɛ́ go bó gundie a amɔ́: «Ŋgaá nyó oyáná caá, bá amɔ́ bá máma, adánɛ́ yá gaá áncáa.»
Yésusu a baŋa Yolósalɛmɛ
41Kanɛ́ aŋa Yésusu a mbaá ŋá a ná lɛ́ mekúígíi na tɛ́sɔnɔ ya Yolósalɛmɛ, a báá yɛ ɛ́ná, gɛ́hɛ́ go ɛ́da go yɛ baŋa, 42o oya a amɔ́: «Aáŋa maamɔ́ɔ tɔ́nɔ o lɛ́ ba go ɔ́bɔ ínoni, boóma bɔ́ɔbɔ bó lɔ́mɔ́ bá go go fáa buumbénú! Kanɛ́ áhanɛ́ɛ, bá mba go bó ɔsɛ́gɛ́nɔ́! 43Ɛɛ́ɛŋ, medúgú má ná go úline máama babɛlɔ́bɛlɔ báhɔ bá ná go bɔŋɛnɔmɔ́ na gɛgaaga gá omɛndɛ́ yá adánɛ́, bá go gaŋɛna, bá go mɔ́mɛnɔ maayá miimée. 44Bá ná go gada púmú, maamɔ́ɔ na batɔ báhɔ, bá dɛ ná go dɛ́ɛnɛna akɛ́ ɛdánɛ́ nímmue nɛ́ lɔbɔ dáláalú naá sɔ́gɔ́ɔ ɛdánɛ́ mmoɛná, goakɛ́ o lɛ́ kanɛ go íyime gɛcamɛna gɛ́ɛgɛ Asaŋa a lɔ́mɔ́ úléelú go gidúgune gáhɔ.»
Yésusu a á gúné bedúí naá Nnyaŋá ya Asaŋa
(Mot 21.12-13; Mél 11.15-19; Sáŋ 2.13-16)
45Gɔ́ɔ Yésusu i íŋenemú naá Nnyaŋá ya Asaŋa, gɛ́hɛ́ go ɛ́da go gúne bedúí moóma, 46a bó gálagala a amɔ́: «Bó lɛ́ ɔ́ŋɔ́ɔlú goŋaá: Nnyaŋá yamɛ ɛ ná bɛ́ɛmba nnyaŋá ya mbósógólí. Kanɛ́ bɛɛnyɔ́ɔ no báa go yɛ íyie nɛbɔ́ɔsɛgɔ ná biíbi#19.46 O bana, go eninye na bɔ́ɔbɔ naá Iseyíi 56.7; naá Selemíi 7.11..» 47A mba lɛ́ a húunenye medúgú miimée naá Nnyaŋá ya Asaŋa. Bagɔ́nɔ́ɔ bá bedúmbí bɛbáágá naá Asaŋa, muloodio má gicele na bafɛanɔ́ɔ bá batɔ bá gɛdɔŋɔ bá mba lɛ́ bá fúmbe go mo óna. 48Kanɛ́ bá dɛ mbáa lɛ bí íyimene nɛɛ́nɛ bá lɔ́mɔ́ bá ŋaá bá ŋa, goŋaá gɛdɔŋɔ gɛ́ mba lɛ́ edúu eŋkimée go go bódólonyo moóma mɔ́ɔmɔ Yésusu a mbaá lɔmɔ́ a húunenye.
Jelenleg kiválasztva:
Lókasɛ 19: YAS
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
