Lókasɛ 17
17
Yésusu a fáanana behúúní bɛ́hɛ́ témbuginye
(Mot 18.7-8; Mél 9.42)
1Gɔ́ɔ Yésusu o oyanamɔ́ behúúní bɛ́hɛ́ a amɔ́: «Bɛcamɛna biimée, moóma mó ŋga bɛ́ɛ́mbá hɔ́ɔ, goŋaá batɔ bá ŋanana moóma mobɛ́. Kanɛ́ mahana makɔ́nɔ́ na mɔ́ɔnyɔ ubenyemú basɔ́gɔ́ɔ naá gɛlɔgɔ! 2Bó lɛ́ bese nɛhɛ́ goŋaá bá mo gódana ɛdánɛ́ ná go gola go ukelú, bá mo nɔɔ naá máŋɛ́, a dɛ ŋaáa goŋaá ummue naá baábayɔ́ báaba obɛna naá gɛlɔgɔ. 3Bébeŋéemú nɔnɔ bese! Tɛ́ɔbɛnɔ a amɔ́ a go ŋa boóma bobɛ́, mo dúfíemú bese bese goŋaá a á go budée. Kanɛ́ a amɔ́ a bésíme gɛoba gɛ́hɛ́, o mo héehinye. 4A amɔ́ a go ŋa gɛbɛ́ ɛŋɛndɔ ɛtáanɔ na ɛhandɛ́ go buisí, a amɔ́ a nco go gundine gundine nɔ́ɔnɔ ɛŋɛndɔ ɛtáanɔ na ɛhandɛ́, oya a amɔ́ a bésíme bobɛ́ bɛ́hɛ́, o mo héehinye.»
(Mot 17.20)
5Gɔ́ɔ baapótɛlɛ bó oyanamɔ́ Daadáa bá amɔ́: «Ŋaáa goŋaá gioliminyo gɛ́cɔ́ gɛ́ goma.» 6Daadáa go gundie a amɔ́: «Aáŋa gɔ́ɔ no lɔ́mɔ́ na gioliminyo gɛ́ búe aŋa camɔ́ ya motáladɛ#17.6 Go ɛ́na naá Mot 17.20 na gibélincígínyé gɛ́ɛgɛ hɔ́ɔ., gásɛ́ no lɛ́ ba go oyana boɛ́tɛ bɔ́ɔbɔ no amɔ́: “Bálɛ́ga háalá, go ɛ́da bágóna naá máŋɛ́, bó gaá nyó ɔ́bɛnɔ”.»
Uyogóní mɔ́ɔnyɔ a báá ná ŋaáa buelí bɛ́hɛ́
7«Ŋgáa dɛ eninye dɛ amɔ́: Ummue naá bɛɛnyɔ́ɔ a lɛ́ na uyogóní ba go mo kuhenine ntɛ́mɛ́ ɛ́na lí ba go mo beŋine beŋine bidúgé. Gɔ́ɔgɔ a mo ɛ́namɔ́ a na lɛ́ go nco gundene ntɛ́mɛ́, a gaá mo oyáná a amɔ́: “Úlé fɛaŋɔ, o ncó lukumene naá tábɛ́la go manyáanya lí?” 8Akɛ́ɛ, goana a gaá ná mo oyáná a amɔ́: “Kedínyéemú manyáanya, bénúgíemú bɛla go úle o nco ŋgana, o gɛ́gana goŋaá mmanɛ nyáa, nnyóa, manɛ́ kanɛ́ maamɔ́ɔ tɔ́nɔ o gaá ná súgúdínyée o nco nyáa, o nyóa.” 9A dɛ báá naá gɛgaŋa gá goŋaá á ba fáá uyogóní bɛhɛ́ bibéhiigí goakɛ́ a báa ŋa boóma bɔ́ɔbɔ a báá ná mo oyáná, ábɔ ɔ́? 10Bó lɛ́ nɔ́ɔnɔ caŋa mmue gɛ́nyɔ́. Aŋa nó náŋamɔ́ no báa go ŋa buimée bɔ́ɔbɔ bá nyó úhenemú, no gálɛda no á amɔ́: “dɛ lɛ́ bidugúnúu bá boyogóní, dɛ báa ŋa goana bɔ́ɔbɔ bá báá ná có úhúné goŋaá dɛ ŋa.”»
Lɛncá o gunde o béhiigi Asaŋa
11Aŋa gɔ́ɔgɔ Yésusu a mbaá lɔ́mɔ́ ɛ ɛ́dana naá Yolósalɛmɛ, gɛ́hɛ́ go dómba naá ombálá yɔ́ɔyɔ na Samalɛ́ɛ na Gelilée. 12I í íŋéné naá gɛdɔŋɔ gímmue, bekúnúkunu bɔ́ɔ́dɔ́ go úle go go lumene nɛhɛ́. Bá á dɛ́lɛ́mɛ́ná héení néení#17.12 Go ɛ́na naá Léfi 13.45-46., 13gáábɔ́ go oyɛda ukelú naá mmoɛná bá amɔ́: «Yésusu, Ogɔ́nɔ́ɔ, có ɛ́náamɔ́ mahana.» 14Yésusu a á bó ɛ́ná, gɛ́hɛ́ go bó oyana a amɔ́: «Ɛ́dá no bédúfie naá bedúmbí bɛbáágá naá Asaŋa#17.14 Go ɛ́na naá Léfi 14.2-3..» Aŋa bá mbaá ŋá bá gɛ́ ɛ́dana, gáábɔ́ go éŋuge. 15Aŋa ummue naá bɔ́ɔ a mbɛɛ́ ɛ́ná goŋaá a báa go éŋuge, gɛ́hɛ́ go nco gunde na nnyimé, u úle a gúmenye Asaŋa ukelú naá mmoɛná, 16go danda o obɛna Yésusu naá bɛgɔ́ndɔ́, busío dábáalú go cí, a bɛ́ɛ́ ɛ́dá go mo béhiigi; mɔtɔ mɔ́ɔnyɔ a mba lɛ́ ba Básamalɛtɛ́ŋɛ. 17Yésusu go oyɛda a amɔ́: «Bekúnúkunu biimée bɔ́ɔ́dɔ́ bá bée éŋuge, ábɔ ɔ́? Kanɛ́ báaba bóntió bánnámanyɛ́ na ummue bɔ́ɔ báhaába o? 18Mɔtɔ untió a dɛ báa nco gunde go go fáa Asaŋa bibéhiigí, goana uŋunyí mɔ́ɔnyɔ o?» 19Kanɛ́ Yésusu go mo oyáná a amɔ́: «Fadɛ́gɛ́na go ɛ́da, gioliminyo gáhɔ gɛ́ á go sódío.»
Buisí bɔ́ɔbɔ Moɔnɔ́ ba mɔtɔ a ŋgaá ncó gunde
20Gɔ́ɔ Befelisiéŋe bú úhunemú Yésusu bá amɔ́: «Bufuŋe bá mmoɛná bó lɔ́mɔ́ ba go úle nikíi o?» Gɛ́hɛ́ go bó gundie a amɔ́: «Bufuŋe bá mmoɛná bó do úlénée mbɔ́dɔ ya goŋaá no lɛ́ ba go bó ɛ́na. 21Bá dɛ ŋgá oyɛda bá amɔ́: “Núúnée nɔnɔ bɔ́ bɔ́bɔ́ɔ háalá”, ɛ́ná lí “Bɔ́ búunú héení”; kanɛ́ íyíme nɔnɔ goŋaá Bufuŋe bá Asaŋa bó lɛ́ naá kadɛ́gadɛ́ɛ yɛnyɔ́.»
22Gɔ́ɔ a gɔnɔmɔ́ go oyana behúúní bɛ́hɛ́ a amɔ́: «Gɛcamɛna gɛ́ úlene gɛ́ɛgɛ no ná maamanamɔ́ go ɛ́na buisí búmmue bá miisí bá Moɔnɔ́ ba mɔtɔ, kanɛ́ no do ná bó ɛ́na.
23«Bá ná nyó oyana bá amɔ́: “Núúnée nɔnɔ héení”, ɛ́na lí, “Núúnée nɔnɔ háalá”, kanɛ́ no do hóámá no do ɛ́dá no díine hɔ́ɔ. 24Aŋa gobege gá mpólómɛnáa go sánamɔ́, gó seemenye bɔ́ɔbɔ boayá bá mpólómɛnáa aŋa bɔ́ɔbɔ, nɔ́ɔnɔ gɔ́ɔ Moɔnɔ́ ba mɔtɔ a ŋgaá bɛ́ɛ́mbá naá Buisí bɛ́hɛ́ bá goncogunde. 25Kanɛ́ gó sɛmɛganana goŋaá a manɛ go ɔ́bɛgɔnɔ makɔ́nɔ́, batɔ bá ogɛlɛ yɔ́ɔyɔ bá mo inye.
26«Moóma mɔ́ɔmɔ mó mbaá bádómbánáa naá gɛcamɛna gá Nóe, mó ŋga bádómbánáa caŋa táŋɛ́ mmue naá muúle má Moɔnɔ́ ba mɔtɔ: 27Batɔ ba mba lɛ́ bá nyáanya, bá nyóanana, bá ŋanana bigiŋe, gó ɛ́da húme aŋa Nóe a mbií íŋéné naá gilué gɛgɔ́nɔ́, gɔ́ɔ nobólá ná púugie nó mbaá naáa, nó báá bó fúúgíe biimée#17.27 Go big. 26-27, go ɛ́na naá Mabayɛga 6.9—7.24.. 28Bó mba bɛ́ɛ́mbá gɔgɔ́ tɔ́nɔ naá medúgú má Lɔ́ɔtɛ: Batɔ bá mba lɛ́ bá nyáanana, bá nyóanana, bó ɔ́ndɔ bá dúenene, bá góna, bá fóaga; 29kanɛ́ buisí bɔ́ɔbɔ Lɔ́ɔtɛ a mbaá húmé naá Sɔdɔ́mɔ, íyuke na ndusú gá mɔ́ go oba go naanana mo ɛ́da go úlene naá mmoɛná, mó báá bó fúúgíe púmú#17.29 Go big. 28-29, go ɛ́na naá Mabayɛga 18.20—19.25. . 30Bó ŋga bɛ́ɛ́mbá nɔ́ɔnɔ naá Buisí bɔ́ɔbɔ Moɔnɔ́ ba mɔtɔ a ŋgaá bédúfíe.
31«Naá Buisí bɔ́ɔbɔ, mɔ́ɔnyɔ a ŋgaá bɛ́ɛ́mbá naá balánda ba nnyaŋá mmoɛná gɔ́ɔ moóma mɛ́hɛ́ naá ncíbo, a dɛ siisé go go nco mó gɔ́lɔ#17.31 Go ɛ́na naá Mot 24.17 na gibélincígínyé gɛ́ɛgɛ gɛ́ lɔ́mɔ́ hɔ́ɔ., nɔ́ɔnɔ tɔ́nɔ mɔ́ɔnyɔ a ŋgaá bɛ́ɛ́mbá naá ntɛ́mɛ́, a dɛ ncó gunde na nnyimé.
32«Bééníŋínyéemú nɔnɔ boóma bɔ́ɔbɔ bó mbaá bolɛ́ná ogánɛ́ Lɔ́ɔtɛ#17.32 Go ɛ́na naá Mabayɛga 19.26.. 33Mɔtɔ mɔ́ɔnyɔ a ná fúmbemú goŋaá á ba sódío gɛɔyɔ gɛ́hɛ́, a na gɛ́ yímie. Kanɛ́ mɔ́ɔnyɔ a ná yímiemú gɛɔyɔ gɛ́hɛ́, a ná gɔnɔ gɛ́ bɛa. 34Ŋgaá nyó oyáná caá, naá budúgú bɔ́ɔbɔ, batɔ báandɛ́ bá ŋgaá bɛ́ɛ́mbá ombɛ́dɛ́ yúmmue mbɛ́dɛ́ɛ: bá gɔ́lɔ ummue, bá dɛ́ɛna mɔ́ɔnyɔ untió. 35Bakɔ́dɔ báandɛ́ bá ŋga bɛ́ɛ́mbá naá ɛdánɛ́, bá gola camɔ́: bá ŋga gɔ́lɔ́ ummue, bá dɛ́ɛna mɔ́ɔnyɔ untió. [36Banɔ́mɔtɔ́ bá ŋga bɛ́ɛ́mbá naá ntɛ́mɛ́ olɔŋɔ: bá gɔ́lɔ mɔ́ɔnyɔ, ummue a síene.»]
37Behúúní go mo úhune bá amɔ́: «Daadáa, áhanɛ́ɛ bó ŋgaá báŋaáa nɔ́ɔnɔ o?» Kanɛ́ gɛ́hɛ́ go gundie a amɔ́: «Anáa gigúe gɛ́ lɔ́mɔ́, hɔ́ɔ tɔ́nɔ bɛgɔ́mbɛ́ɛ bɛ́ ŋgaá bábándáa#17.37 O bana, go eninye na bɔ́ɔbɔ naá Yóobe 39.30..»
Jelenleg kiválasztva:
Lókasɛ 17: YAS
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
