MATIU 6
6
A huhuiana huri na hokohoko
1I Jisas mo kwaha taliku mo viti kwara, “A bohianamiu hinea tulu mo toko vai, kwara vae tulu ne domi mavaki i God luna, tulu tagahuri kwara tulu hatu vai lo nako na tangaloi kwara rana tagaikamu. Diko tulu ne vai kwehini tulu nehe lai te kaitakwe ti Tamamiu lolo taetae. #Mat 23.5
2“Hokinia komo bete nomu hokohoko lakwa na tangaloi kakaravi, ko hatu horo tavui huri, hoki na tangaloi hinea rau kwetukwetutu rau domidomira, ramo vai lolo vale* na tiutangaroa, vake lo sara, kwara vae a tangaloi rana kalukinira. Kareaki na viti lakwakamu, rau lai a kaitakwega vunu ba. 3Vae i nigo komo hokaki lakwa na tangaloi kakaravi, ko hatu tiraki na ngwairi kabamu mo kikilai a havakinau a matuai kabamu mo vai. 4Ko tavuniki na nomu boloboloki karea kwara a tangaloi rana hatu kikilai. Vunu i Tamamu hinea u tagai na kinau hinea komo vai tavuniki neri bete kaitakwemu.”
A huhuiana huri na tiutangaroa
(Luk 11.2-4)
5I Jisas mo viti vake kwara, “Lolona komo tiutangaroa ko hatu vai hoki na tangaloi hinea rau kwetukwetutu, rau viti kinau ki ringoga vohoki. rau lagwa kwara rana tiutangaroa lolo vale* na tiutangaroa, vake lo sara kwara a tangaloi savia rana tagaira. Kareaki na viti lakwakamu, aira rau lai a kaitakwega ba. #Mat 6.16; 23.5 6Vae lolona komo tiutangaroa, ko soro vaki lolo ingwamu, ko hogoi nomu katama, ko tiutangaroa lakwai Tamamu hinea aia eia maiko, vae a tangaloi rahe taga lavia tea. Vae i Tamamu hinea u tagai na havakinau hi komo vai tavuniki neri bete kaitakwemu. #Aes 26.20; 2 King 4.33
7“Lo nomiu tiutangaroa tulu hatu viti na leo mo rusa hoki na tangaloi hinea rahe kikilai i God tea. Rau domi kwara i God ne rongora huri na noga leo rusa. 8Tulu hatu vai hokinira. I Tamamiu u kikilai a havakinau hinea tulu lengaia, vunu tulu mori uduhuri kinia. #Mat 6.32; Luk 12.30 9Tulu tiutangaroa hokinia hika.
‘Tamamai lolo taetae,
a hinamu u kokona.
Keu tiutangaroa kwara a tangaloi
rana domi mavakinigo, #Esik 36.23
10rana hugu tavutimu,
i nigo a Hugwe Lakua,
rana vai na domimu lo varamana
ne taritarisa hokinia hinea aira lolo taetae ramo toko vai. #Mat 26.42; Luk 22.42
11Ko bete kamai hinaka hika karagwa
huri na rani hika.
12Ko domidomi koro lakwakami nomai vakasileana
hokinia i kami keu domidomi koro lakwara
hinea rau vakasile vovohikami. #Mat 18.32-33
13Ko hatu tirakikami tilo hala na sinasina huira,
vae ko kwiribibikami ti Setano*.’ #6.13: Lo Buku Kokona tuaki hinea a tangaloi rau ulira tuai, rau hoke na leo hika kina leo hinea mo viti kwara, “I nigo kaheko a Hugwe Lakua, i nigo kaheko ku hago huirana koro na kinau savia, vake a karekarea savia a nomu kaheko vaki tuai a gwereki tikei. Amen.” #a Mat 26.41; Luk 22.40; b Sione 17.15; 2 Tes 3.3; 2 Tim 4.18
14“Diko i kamu tulu domidomi koro lakwa na tangaloi hinea rau vakasile vovohikamu, vae i Tamamiu lolo taetae ne domidomi koro lakwakamu vake. #Mak 11.25; Eves 4.32; Kol 3.13 15Vae diko tulu he domidomi koro tea lakwa na tangaloi, vae i Tamamiu lolo taetae nehe domidomi koro te nomiu vakasileana.” #Mat 18.35
A huhuiana huri na reterete
16Vunu i Jisas mo viti kwara, “Lolona tulu mo rete, tulu hatu vai na nakomiu ramo hati hoki na tangaloi hinea rau kwetukwetutu rau domidomira, ramo toko vai. Aira rau vai na nakoga ramo hati, kwara vae a tangaloi rana tagaira rana kikilai kwara rau rete. Kareaki na viti lakwakamu, rau lai a kaitakwega vunu ba. #a Aes 58.5; b Mat 6.5; 23.5 17Vae i nigo komo rete, ko rovi nakomu, ko gari vulumu, 18vae a tangaloi ranahe kikilai tea kwara ku rete, vae kehekeheki i Tamamu u kikilai hinea aia eia maiko, vae a tangaloi rahe taga lavia tea. Vae i Tamamu hinea u tagai na havakinau hi komo vai tavuniki neri bete kaitakwemu.”
A vivilagoki rusa lolo taetae
(Luk 12.33-34)
19I Jisas mo hoke na leona, mo viti kwara, “Tulu hatu tau nomiu vivilagoki mo rusa lo varamana. Takwa-hi vae a kanikani ramai kanira, ramai daira, vake a tangaloi babalua ramai soro ramo balu. #Sem 5.2-3 20Vae tulu tau nomiu vivilagoki maira lolo taetae. Takwa-hi a kanikani ranahe kanira tea, ranahe daira tea, vake a tangaloi babalua ranahe soro lai tea kwara rana balu. #Mat 19.21; Mak 10.21; Luk 18.22; Kol 3.1-2 21Takwanahavaki a nomiu vivilagoki rau eno eia, vae a domimiu u eno takwa-hi vake tigwaravu.”
A laeti na tarabehi
(Luk 11.34-36)
22Vunu i Jisas mo viti kwara, “A mata aia hoki na laeti huri na tarabehi. Vae diko a matamu rau karea a tarabehimu savia aia lo leleha. 23Vae diko a matamu rau hati a tarabehimu savia u eno lo dodoki. Diko a leleha hi lumu vae u dodoka, hi u dodoka vohoki kareaki.” #Mat 20.15; Mak 7.22
A tangaloi nehe boloki tea lakwa na hugwe kairua vakatukwale
(Luk 16.13)
24Vunu i Jisas mo viti vake kwara, “Hete tangaloi kwara ne boloki lakwa na hugwe kairua vakatukwale. Diko a tangaloi ne vai kwehi, ne bena kinia kairuaki ne lagwa maia kairuaki. Vunu vake ne domi mavakinia kairuaki ne domi bulakikinia kairuaki. Tulu nehe vai lai tea kwara tulu ne kwareki i God ki nomiu Hugwe tulu ne boloki nona, vunu tulu nete vai na mane* ne kwareki nomiu hugwe vake, tulu ne boloki nona.”
Tulu hauhuri lui God
(Luk 12.22-31)
25Vunu i Jisas mo viti kwara, “Huri na kinau hi, na viti lakwakamu kwara a domimiu rana hatu kwalao laliki huri na hinaka mana inuinu hinea tulu mo lengaia kwara tulu ne ahi kinia, diko huri na lugwa hinea tulu mo lengaia huri na tarabehimiu. A maurianamiu u sileti na hinaka, vake a tarabehimiu u sileti na lugwa. #Vil 4.6 26Tulu tagai na manu na mahaleki. Rahe rivurivu tea, rahe makuriki te hinaka, vake rahe tau te hinaka lolo ingwa, vae i Tamamiu lolo taetae u vanganira. Vae i kamu tulu karea siletira. #Mat 10.31; Luk 12.7,24 27?Diko a tangaloi a domina u kwalao laliki huri na maurianana hinea kwara ne toka nehe tuai tea, vae tulu domi kwara lo hala hi ne vaia ne toka ne tuai vakevake? #6.27: Lo hala kairuaki a domidomi na leo uhiuhi hi aia hokinia hika kwara, ?Diko a tangaloi a domina u kwalao laliki huri u gwanugwanu, vae tulu domi kwara lo hala hi ne vaia ne mauri ne gwaravu vakevake? Hetea.
28“?Vake kworoho a domimiu ramo kwalao laliki huri na vulavula? Tulu tagai na vira na bubu ramo mauri. Rahe boloki tea, diko rahe vai te vulavulaga siboga. 29Vae na viti lakwakamu, i Solomon aia a tangaloi hugwe lakua lengalenga, vae a vulavulana rahe karea tea haburu hoki na vira aira vano hi. #1 King 10; 2 Kron 9 30I God u vakavula na duvu na bubu. A duvu vano hi rau eno a rani katukwale vohoki, vunu mavukona a tangaloi rau vohokinira tilolo kabu. ?Tulu domi kwara i God nehe vakavulakamu tea? !A nomiu hauhuriana u kelekele haburu!
31“Vae huri hi, he karea te kwara a domimiu rana kwalao laliki tulu ne domidomi kwara, ‘?Kena kani aha?’ diko ‘?Kena inu aha?’ diko ‘?Kena lugwaki aha?’ 32A kinau aira vano hi, a tangaloi tavalavarea tina gwaloana noi Isrel* rau domidomi luga tigwaravu. Vae i Tamamiu lolo taetae u kikilai kwara u taritarisa kwara tulu ne lai savi na kinau aira vano hi. #Mat 6.8; Luk 12.30 33Vae tomuaki tulu ne tagahuri ne karea kwara tulu ne rongohuri i God hinea aia a nomiu Hugwe Lakua, tulu ne vai na kinau hinea rau bakoto hokinia aia u lengaia. Vunu aia neri bete savi na kinau aira vano hi vake lakwakamu. #Sam 37.4
34“Vae huri hi, a domimiu rana hatu kwalao laliki huri na rani mavuko. A kinau huri na rani mavuko tulu neri domidomi luga lo rani mavuko. A rongoana hati huri na rani katukwale u taritarisa huri na rani hi vohoki.” #Eks 16.4
Jelenleg kiválasztva:
MATIU 6: HWT
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
Havakinau New Testament © Bible Society of the South Pacific, 2016.
