Jénesii̱s 7
7
1Kósꞌe̱ Néná bi̱ katsoó Noee̱:
«Ngui̱jii̱n ngayeje xota̱ xi tjín kuí ni̱xtjin xi̱ꞌbi̱, jè kamábe an nga ta̱ jí tsí xi nda ji xota̱, kuíni nga ti̱tjásꞌi̱e̱njnú ngu̱i̱ya kui tjotso xi ta̱nisién ꞌniú jee̱, ji ko̱jo xota̱ ndiꞌáa̱. 2-3Ngayeje cho̱ xi kjíbé án nga niꞌánkꞌasꞌienna ngo kjo̱a̱tjó yito xi chjo̱on yito xi xi̱ꞌin chjábé jí tsi̱ꞌe̱ nga kꞌuíndo ra nga̱sondie, ta̱nga cho̱ xi kjíbéjín an nga niꞌánkꞌasꞌienna ngo kjo̱a̱tjó, ngo chjo̱on ngo xi̱ꞌin tsí chjábé jí. 4Ngatꞌa̱ ngotꞌe̱ yito ni̱xtjii̱n kꞌuitsꞌíyañáa̱ nga sa̱ꞌinkaꞌa an stsé nga̱són tꞌananguii̱, kó yichán ni̱xtjin yichán ni̱xtji̱e̱n nga ko̱a̱ꞌa. Kó bo̱a̱ tsꞌén sa̱ꞌinkjié an ngayeje ni xi katsꞌenda an kui nga̱sondiee̱».
5Kó Noee̱ bo̱a̱ má katsꞌén ngayeje ni xi katsoó Néná.
Bi̱ tsꞌén tsaꞌá stsé ꞌniuú
6-13Nguije jaꞌa yito ni̱xtjin, ndójoa xi tikón nguindiee̱ tꞌananguii̱ ítsꞌi̱yanii̱ nga katjonsón nga̱són tꞌananguii̱, kó ndójoa xi tikón nkꞌaján ti̱ ítsꞌi̱yanii̱ nga katjonsón tꞌananguii̱ nga. Yichán ni̱xtjin ko̱jo yichán ni̱xtji̱e̱n nga bo̱a̱ kamá. Jè má jaꞌa jó sá nga tsꞌasꞌien jun úchán nó Noee̱ nga kjindiboá stsé xí ta̱nisién ꞌniú nga̱són tꞌananguii̱. Kó tsꞌasꞌien Noee̱ ko̱jo chjo̱ón, ko̱jo jaá, ko̱jo ínchjín kja̱ndaa̱ ngu̱i̱ya tjotso xi ta̱nisién ꞌniú jee̱ tsi̱ꞌe̱ nga jmí ni ka̱májiín. Kó ti̱ tsꞌasꞌien ngu̱i̱ya kui tjotso xi ta̱nisién ꞌniú jee̱ cho̱ xi chjo̱on ko̱jo xi xi̱ꞌin xi tsꞌenjóꞌo Néná nga niꞌánkꞌasꞌiee̱n kjo̱a̱tjó, kó ti̱ tsꞌasꞌien cho̱ xi tsꞌenjóꞌojín Néná nga niꞌánkꞌasꞌiee̱n kjo̱a̱tjó nga, kó bo̱a̱ tsꞌén Noee̱ katsꞌénkjatjosoón Néná nga katsꞌén ni xi atíxomaa̱ nga sa̱ꞌín.
14-16Kó nínga tikón kui tjotso xi ta̱nisién ꞌniú jeé xki̱ jó jó jachó ngayeje to̱ko̱ya cho̱ xi ma ꞌbítji̱e̱, ko̱jo ngayeje to̱ko̱ya cho̱ kꞌijñá, ko̱jo ngayeje to̱ko̱ya cho̱ xi tjiín tsja̱nga̱ ko̱jo ngayeje to̱ko̱ya cho̱ xi ꞌbifé yojoo̱, ngo chjo̱on ngo xi̱ꞌin tsꞌasꞌien. Kó ngayejee̱ nga tsꞌasꞌien ngu̱i̱ya kui tjotso xi ta̱nisién ꞌniú jee̱, kó nguije kamaá nga tsꞌasꞌien ngayejee̱, Néná íchjá nga̱ntjo̱a̱a̱.
17-20Kó yichán ni̱xtjin yichán ni̱xtji̱e̱n kijínkꞌá ndójoaa̱. Achichí ꞌniú nkꞌa kijínijínguí ndójoaa̱ nga ngaskande na̱xi̱ xi ꞌniú nkꞌaa ngui yito metro̱ nkꞌa ngase kisꞌingandá. Kó kui tjotso xi ta̱nisién ꞌniú jee̱ kitsjiensón nga̱són ndójoaa̱, kó xikótsꞌen tjisíkitsie ndójoaa̱, ti̱ bo̱a̱ ti̱ tsꞌén katjoninkꞌa kui tjotsoo̱ nga. 21-24Úchán ichítié ni̱xtjin tsꞌandíyaá nga jaꞌajen ndójoaa̱. Kó bo̱a̱ tsꞌén jesón ngayeje xotaa̱, xi chjo̱on xí xi̱ꞌin. Kó ti̱ jesón ngayeje cho̱ xi ma ꞌbítji̱e̱, ko̱jo cho̱ kꞌijñá, ko̱jo cho̱ xi tjiín tsja̱nga̱, ko̱jo cho̱ xi ꞌbifé yojoo̱ nga̱són tꞌananguii̱ ko̱jo ndí cho̱ xi ꞌniú xi̱xi̱i̱. Jesón ngayeje xi síndo xi tjín nga̱sondiee̱. Ta̱ kuí tsí Noee̱ ko̱jo xota̱ xi nijan kisꞌińdojo̱ ngu̱i̱ya tjotso xi ta̱nisién ꞌniú jee̱ xi kisꞌińdo ngase nga̱sondie.
Jelenleg kiválasztva:
Jénesii̱s 7: MAIX
Kiemelés
Megosztás
Másolás
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fhu.png&w=128&q=75)
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014