Kuyamba 8
8
Kumala kwachigumula
1Koma Mulungu adakumbuka Nowa nabzinyama bzentse nabzifuwo bzaakhanabzo m'bote. Mulungu adachita kuti padziko pachite chonzi, pamwepo madzi nkuyamba kuphwilila. 2Ntsantsa zamaboo namazhanela yakudzulu bzidafunga, mvula yakudzulu idaleka kubvumba. 3Nakutenepo madzi yadaphwilila padziko. Kudapita ntsiku dzana namakumi mashanu (150) madzi yachindophwilila. 4M'mwezi wachinomwe, ntsiku yakhumi nanomwe yamwezi umwewo, bote lidatsama paphili la Ararati. 5Madzi yadapitiliza kuphwilila kufikila mumwezi wakhumi. Pantsiku yakuyamba yamwezi wakhumi, ntsonga zamapili zidawoneka.
6Pakudapita ntsiku makumi manayi, Nowa adafungula zhanela labote laadakonza, 7nkutuma khunkubwe. Ilo likhandozungunika kufikila madzi yawuma pantsi. 8Pamwepo Nowa adazatuma pomwe njiwa kuti ikawone kuti panango madzi yaphwilila padziko, 9koma njiwa idasaya pakukhala, idazabwelela kubote pakuti padziko pakhachana madzi. Nakutenepo iye adachosa janja lake nkuphata njiwayo, achiyibweza m'bote. 10Adayimila kwantsiku zinomwe, nkubulisa pomwe njiwa ile m'botemo. 11Chakumawulo njiwa idabwelela kwa Nowa idaluma kamuti kawisi kamuolivi. Pamwepo Nowa adadziwa kuti madzi padziko yaphwilila. 12Adayimila pomwe kwantsiku zinomwe, nkubulisa pomwe njiwa ile, koma njiwayo ilibe kuzabwelela.
13Mugole lamazana matanthatu nagole libodzi (601) ya Nowa, pantsiku yakuyamba yamwezi wakuyamba, madzi yadawuma padziko. Nowa adachosa ntsodzi yabotelo, paadanyangana adawona kuti pantsi pakhadatowuma. 14Mumwezi wachiwili, pantsiku yamakumi mawili nanomwe, pantsi pakhadatowumilatu.
15Mulungu adati kwa Nowa, 16“Bula mubote nankazi wako nawana wako naaloola wako. 17Ubulise bzentse bzamoyo bzawunabzo bziniti, mbalami nabzifuwo nabzinkwawa namimba, kuchitila kuti bzibalane bzidzadze pomwe dziko.” 18Nakutenepo Nowa adabula mubote pabodzi nankazi wake nawana wake naaloola wake. 19Nyama zentse nambalami nabzinkwawa namimba, bzidabula m'botemo kuteyeza mishowo yabzene.
Nowa ampeleka ntsembe
20Nowa adamangila Chawuta mbuto yakupelekela ntsembe, adatola nyama zentse zakuchena nambalami zentse zakuchena, nkupeleka mpfupo yakutenthelatu atali. 21Chawuta adabva n'nunkho wabwino wantsembeyo, iye adati chamuntima mwake, “Nin'zatembelela lini pomwe dziko nathangwe lamunthu, pakuti nkhumbukila zantima wamunthu n'zakuyipa kuyambila pawung'ono wake. Nin'zacheneka lini pomwe bzamoyo ninga bzandachita ibzi. 22Padziko pan'zakhala nanthawe yakubzala nayakukolola nayakujejela nayakuphsa nayachilimo nayamphepo nayamasikati nayawusiku.”
Jelenleg kiválasztva:
Kuyamba 8: KUNDA
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
Bhaibheri reChikunda © Bible Society of Zimbabwe
