Kuyamba 27
27
Isaki an'dalisa Jakobho
1Isaki paadakalamba maso yake yadachita khungu, nakutenepo akhawona lini, adachemela Esau mwana wake wakuyamba, adati kwayiye, “Mwanangu.” Iye adati, “Ndili pano.”
2Isaki adati, “Ine ndakalamba, nindziwa lini ntsiku yakufa kwangu. 3Tsapano iwe utakule bzombo bzako bzakusodzesa, chola chamisewe nawutati, yenda n'thengo ukandiphele nyama. 4Undiphikile chakudya chabwino chaninfunisisa, undibwelesele ndidye ndichizakudalisa ndinati ndafa.”
5Tsapano Rabheka akhatetekela Isaki paakhalewa-lewa namwana wake Esau. Nakutenepo Esau paadayenda n'thengo kasodza nyama yan'thengo kuti abwele nayo, 6Rabheka adati kwamwana wake Jakobho, “Ndabva apayi wako achilewa-lewa nankulu wako Esau, achimuwuza kuti, 7‘Ndibweleseleko nyama yan'thengo undiphikile chakudya chabwino, ndikadya ndichizakudalisa patsogolo pa Chawuta ndinati ndafa.’ 8Tsapano mwanangu, unditetekele bzandikukuwuza kuti uchite. 9Yenda kuthanga undibwelesele tuwana twambuzi tuwili twakunenepa, ndizaphikile apayi wako chakudya chabwino chaanfunisisa. 10Iwe uchizayenda nacho kwaapayi wako, akadya achizakudalisa anati afa.” 11Koma Jakobho adati kwaamayi wake Rabheka, “Nkulu wangu Esau ana ukuse thupi lake lentse, koma ine ndilibe ukuse. 12Ko peno apayi an'zandiphata, achizadziwa kuti ndikuwanamiza, an'zanditembelela lini pana kuti andidalise.” 13Koma amayi wake adati, “Mwanangu, tembelelo limwelo ngalibwele kwayine, iwe yenda ukachite bzandakuwuza.” 14Nakutenepo Jakobho adayenda katakula tumbuzi, achitupeleka kwaamayi wake. Amayi wake adaphika chakudya chabwino chaakhafunisisa apayi wake. 15Pamwepo Rabheka adatola bzakubvala bzabwino bza Esau mwana wake nkulu, bzaakhanabzo munyumba mwake, nkubzibvadzika Jakobho, mwana wake mung'ono. 16Adam'bvadzika makanda yatumbuzito m'manja nan'khose mwake. 17Rabheka adatola chakudya chaakhadaphika nazingwa achibzipasa Jakobho. 18Jakobho adayenda nacho kwaapayi wake, iye adati, “Apayi.” Iwo adati, “Ndiwe yani?”
19Jakobho adati kwaapayi wake, “Ndine Esau mwana wanu wakuyamba. Ndachita bzamwalewa, khalani mudye nyama yan'thengo yamunfunisisa, mukadya mundidalise.”
20Koma Isaki adati kwamwana wake, “Wakulumiza tani kuyiwona nyama imweyo mwanangu?” Iye adati, “Pakuti Chawuta Mulungu wanu ndiye wanditsogolela.” 21Tsapano Isaki adati kwa Jakobho, “Fika pafupi ndiphate thupi lako ndibve kuti chadidi ndiwe mwana wangu Esau panango nee.” 22Nakutenepo Jakobho adafendela pafupi naapayi wake. Iwo adam'phata thupi lake nkuti, “Fala likubveka kuti ndiwe Jakobho, koma m'manja mukubveka kuti ndiwe Esau.” 23Isaki alibe kuzadziwa kuti ni Jakobho pakuti m'manja mwake mukhana ukuse ninga mwankulu wake Esau. Nakutenepo Isaki adadalisa Jakobho. 24Isaki adati, “Ndiwe chadidi mwana wangu Esau?” Jakobho adati, “Ndine.”
25Isaki adati, “Bwela nayo kwayine kuti ndidye nyama yan'thengo yamwana wangu, ndikudalise.” Jakobho adapeleka nyama imweyo iye nkudya, achiwapasa vinyu iwo nkumwa. 26Pamwepo apayi wake adati kwayiye, “Fika pafupi mwanangu undipsopsode.” 27#Ahe 11:20Jakobho adafendela pafupi achiwapsoda. Isaki paadabva kununkhila kwabzakubvala bzake, adamudalisa. Koma iye adati,
“Kununkhila kwamwana wangu ninga,
kudandolingana nathengo lidadalisiwa na Chawuta.
28Mulungu ngaakupase maweto yakudzulu,
akulise mbewu zako, akupase chakudya chizinji navinyu.
29 #
Kuya 12:3
Wanthu ngaakutumikile,
mishowo mizinji ikukotamile.
Ukhale ntongi waazimano wako,
wana waamayi wako akukotamile,
Ngaatembelelewe awo ankutembelela,
ngaadalisiwe wentse ankudalisa!”
Esau ankumbila madaliso ya Isaki
30Isaki paadandoti malizeni kudalisa Jakobho, Jakobho paadandoti chokeni patsogolo paapayi wake, nkulu wake Esau adafika achichoka kasodza. 31Esau adaphikambo chakudya chabwino kwene-kwene achikayipeleka kwaapayi wake. Iye adati kwaapayi wake, “Lamukani mudye nyama yan'thengo yamwana wanu, kuti mundidalise.”
32Koma apayi wake adati, “Ndiwe yani?”
Iye adati, “Ndine Esau mwana wanu wakuyamba.”
33Isaki adayamba kutetemela kwene-kwene nkuti, “Ko mbani wasodza nyama yan'thengo yandadya iwe unati wabwela, ndichimudalisa? Ndiye an'zawa wakudalisiwa.”
34Esau paadabva mafala yaapayi wake adalila, kwakushupika kwene-kwene, adati kwaapayi wake, “Apayi ndidalisemboni!” 35Koma Isaki adati, “M'bale wako wabwela achindinamiza ndiye watola madaliso yako.” 36#Kuya 25:29–34Esau adati, “Ko sindibzo bzidachitisa kuti apasiwe dzina lakuti Jakobho? Tsapano aka kawa kachiwili kundinamiza. Pakuyamba adanditolela ukulu wangu, lelo uno wanditolela madaliso yangu.”#27:36 Jakobho muchi Hebhelu bzinilewa kuti, “Kupumpsa.” Pamwepo adazati, “Ko mulibe kundisiyilako yanango madaliso?”
37Isaki adati kwa Esau, “Ndatomuchita mbuya wako, abale wake wentse achawa alanda wake, ndamukhupusa nachakudya navinyu. Pachalibe chaningachite kwayiwe mwanangu.” 38#Ahe 12:17Esau adati kwaapayi wake, “Ko madaliso yamweyo ndiyo yokha yamukhanayo? Ndidalisenimbo apayi!” Esau adalila bzikhabvesa ntsisi.
39 #
Ahe 11:20
Isaki adati kwayiye,
“Minda yako in'zachosa lini chinthu,
maweto yakudzulu yan'zagwa lini m'minda mwako.
40 #
Kuya 36:8; 2 Maz 8:20 Umoyo wako wentse un'zawa wamadipa,
un'zatumikila mung'ono wako;
pawun'zatsudzuka,
un'zachosa joko lake kuchoka nkhosi mwako.”
41Esau adazonda Jakobho nathangwe lamadaliso yaadapasiwa naapayi wake. Koma Esau chamuntima mwake adati, “Ntsiku zakulila apayi wangu zawa pafupi. Nakutenepo m'bale wangu Jakobho nin'zamupha.”
42Koma Rabheka paadabva bzikhakumbukiwa na Esau mwana wake nkulu, adachemela Jakobho mwana wake mung'ono, nkuti kwayiye, “Nkulu wako Esau anfuna kubzinyamaliza nakukupha. 43Tsapano mwanangu, tetekela bzandikukuwuza. Iwe uthawile ku Harani kwamano wangu Labhani, 44ukakhale kumweko kwakanthawe mpaka ukali wankulu wako wamala. 45Ukali wake ukamala akayebwa bzawudamuchita, nin'zatuma munthu kuzakuchemela kuti ubwelele. Pakuti ine ningatayikiliwe lini nawana awili pantsiku ibodzi?”
Isaki aniyendesa Jakobho kwa Labhani
46Rabheka adati kwa Isaki, “Ndakolewa naazikazi wachi Hiti. Jakobho akaloolambo akazi wachi Hiti ninga awa, nkazi wamuno mudziko, umoyo wangu un'zakhala lini chinthu kwayine.”
Jelenleg kiválasztva:
Kuyamba 27: KUNDA
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
Bhaibheri reChikunda © Bible Society of Zimbabwe
