Génesis 5
5
Yë y'u'unk y'ok yë Adán
1Yaa jëtu'un kuja'ay myiny ja y'u'unk y'okëty yë Adán. Ko yë Tios ojts tyajkojy yë naaxwiinyëtë ja'ay. Jëtu'un ojts tyajkojy ijxtëm yë Tios kë'ëm y'ixëtyën. 2Ye'eytyëjk ets to'oxytyëjk ojts tyajkojy ets tmooy yë kyënu'kxën. Ja xëëw ma Tios ojts tyajkojyën yë naaxwiinyëtë ja'ay, ënät ojts y'ënä'äny: Ja'ay txëëwatëty.
3Mëko'px ja i'px majk ënäty yë Adán yë jyëmëjt, ko myëxu'unk'ajty yë myaank mëti'ipë xyëëwajtypyën Set. Yë Set jëtu'un ënäty y'ixëty tä yë tyeetyën. 4Ko jëtu'un yë Set y'ëkmiiny naaxwiiny, yë Adán jä'ä ojts jyaakjuuky'äty tuktujk mëko'px jëmëjt ets ojts jyaak mëxu'unk'atë yë y'u'unkëty y'ëna'këty ye'etyëjkpë ets to'oxytyëjkpë. 5Paaty yë Adán jä'ä ojts kä'pxy jyuuky'äty taxtujk mëko'px ja i'px majk jëmëjt. Jä'ä ojts y'o'knë.
6Mëko'px ja mëkoxk ënäty yë jyëmëjt yë Set ko myëxu'unk'ajty yë myaank Enós. 7Ko jëtu'un y'ëkmëxu'unk'ajty yë Enós, yë Set jä'ä ojts jyaakjuuky'äty tuktujk mëko'px ja wëxtujk jëmëjt ets ojts jyaak mëxu'unk'atë y'u'unkëty y'ëna'këty, ye'etyëjkpë ets to'oxytyëjkpë. 8Paaty yë Set jä'ä ojts kä'pxy jyuuky'äty taxtujk mëko'px ja majkmäjtsk jëmëjt ets jää ojts y'o'knë.
9Enós jä'ä ënäty yë jyëmëjt majkta'px majk, ko myëxu'unk'ajty yë y'u'unk mëti'ipë xyëëwajtypyën Cainán. 10Ko yë Cainán jëtu'un y'ëkmëxu'unk'ajty, jä'ä ojts yë Enós jyaakjuuky'äty tuktujk mëko'px ja majkmokx jëmëjt ets ojts jyaak mëxu'unk'atë y'u'unkëty y'ëna'këty, ye'etyëjkpë ets to'oxytyëjkpë. 11Paaty yë Enós, jä'ä ojts kä'pxy jyuuky'äty taxtujk mëko'px ja mëkoxk jëmëjt. Ets jää ojts y'o'knë.
12Cainán jä'ä ënäty yë jyëmëjt tëkë'px majk ko myëxu'unk'ajty yë myaank mëti'ipë xyëëwajtypyën Mahalalel. 13Ko jëtu'un yë Mahalalel y'ëkmëxu'unk'ajty, yë Cainán, jä'ä ojts jyaakjuuky'äty tuktujk mëko'px ja wëxtyikxy jyëmëjt. Ets ojts jyaak mëxu'unk'atë yë y'u'unkëty y'ëna'këty, ye'etyëjkpë ets to'oxytyëjkpë. 14Paaty yë Cainán jä'ä ojts kä'pxy jyuuky'äty taxtujk mëko'px ja majk jëmëjt ets jää ojts y'o'knë.
15Yë Mahalalel jä'ä ënäty yë jyëmëjt tëkë'px mëkoxk, ko myëxu'unk'ajty yë y'u'unk mëti'ipë xyëëwajtypyën Jared. 16Ko jëtu'un y'ëkmëxu'unk'ajty yë Jared, yë Mahalalel, jä'ä ojts jyaakjuuky'äty tuktujk mëko'px ja i'px majk jëmëjt. Ets ojts jyaak mëxu'unk'aty yë y'u'unkëty y'ëna'këty ye'etyëjkpë ets to'oxytyëjkpë. 17Paaty yë Mahalalel jä'ä ojts kä'pxy jyuuky'äty tuktujk mëko'px ja majkta'px majkmokx jëmëjt ets jää ojts y'o'knë.
18Jared jä'ä ënäty yë jyëmëjt mëko'px ja tëkë'px mäjtsk, ko myëxu'unk'ajty yë myaank mëti'ipë xyëëwajtypyën Henoc. 19Ko jëtu'un y'ëkmëxu'unk'ajty yë Henoc, jä'ä ojts yë Jared jyaakjuuky'äty tuktujk mëko'px jëmëjt ets ojts jyaak mëxu'unk'atë y'u'unkëty y'ëna'këty, ye'etyëjkpë ets to'oxytyëjkpë. 20Paaty yë Jared jä'ä ojts kä'pxy jyuuky'äty taxtujk mëko'px ja tëkë'px mäjtsk jëmëjt. Ets jää ojts y'o'knë.
21Henoc jä'ä ënäty yë jyëmëjt tëkë'px mëkoxk, ko myëxu'unk'ajty yë y'u'unk myääy mëti'ipë xyëëwajtypyën Matusalén. 22Yë Henoc xëmë ojts jyuuky'äty ijxtëm ënäty yë Tios tsokyën. Ko ënäty jëtu'un yë Matusalén të myëxu'unk'aty yë Henoc, jä'ä ojts jyaakjuuky'äty tëkëëk mëko'px jëmëjt ets ojts jyaak mëxu'unk'atë y'u'unkëty y'ëna'këty ye'etyëjkpë ets to'oxytyëjkpë. 23Paaty yë Henoc jä'ä ojts kä'pxy jyuuky'äty tëkëëk mëko'px ja tëkë'px mëkoxk jëmëjt. 24Yë'ë jëtu'un ënäty xëmë të jyuuky'äty ijxtëm yë Tios tsokyën, tu'kxëëw tu'kjëmëjt ojts jëtu'unyë tyëkooynyë. Jä'ä ko Tios ënäty të yajnëjkxyë.
25Matusalén jä'ä ënäty yë jyëmëjt mëko'px ja majkta'px wëxtujk, ko myëxu'unk'ajty yë y'u'unk Lámec. 26Ko jëtu'un y'ëkmëxu'unk'ajty yë Lámec, jä'ä ojts yë Matusalén jyaakjuuky'äty wëxtujk mëko'px ja majkta'px mäjtsk jëmëjt ets ojts jyaak mëxu'unk'atë yë y'u'unkëty y'ëna'këty ye'etyëjkpë ets to'oxytyëjkpë. 27Paaty yë Matusalén jä'ä ojts kä'pxy jyuuky'äty taxtujk mëko'px ja tëkë'pxtaxtujk jëmëjt. Ets jää ojts y'o'knë.
28Lámec jä'ä ënäty yë jyëmëjt mëko'px ja majkta'px mäjtsk, ko ojts tu'uk yë y'u'unk myääy jyä'ty naaxwiiny. 29Jä'ä ojts txëëwmo'oy Noé ets y'ënäny: Yë Wintsën të tpoky yë naax. Mëk jëtu'un ntu'unmëty täänëm jam winë pyëtsëmëty kamwinm. E ya'atë u'unk maay të jyä'tyën, yë'ë nëjkx yë po'kxën xytyuk'ijxëmë. 30Ko yë Noé jëtu'un y'ëkmëxu'unk'ajty, yë Lámec jä'ä ojts jyaakjuuky'äty mëkoxk mëko'px ja majkta'px majkmokx jëmëjt. Ets ojts yë y'u'unkëty y'ëna'këty jyaakmin jyaakja'të naaxwiiny, ye'etyëjkpë ets to'oxytyëjkpë. 31Paaty yë'ë jä'ä ojts kä'pxy jyuuky'äty wëxtujk mëko'px ja tëkë'px majkmokx mäjtsk jëmëjt ets jää ojts y'o'knë.
32Noé jä'ä ënäty yë jyëmëjnë mëkoxk mëko'px, ko ojts yë y'u'unkëty myëxu'unk'atë, mëti'ipë xyëëwajtëpën Sem, Cam ets Jafed.
Jelenleg kiválasztva:
Génesis 5: QUETZMIXE
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
Biblia en Mixe de Quetzaltepec, Oaxaca, México © Sociedad Bíblica de México, A.C., 2013. Active Translation in Process
