Genesis 9
9
Pakiꞌupakat it Ampuꞌang Diyus it ki Noe
1Bawnga piyatdekan it Ampuꞌang Diyus it ampang ya nga may guna si Noe baw mga anak gasiꞌ ni Noe. Maat i inampang ya, “Magꞌanak-anak kamu isaꞌun dumakel naga i taw kat sinirungat langit, isaꞌun magtaawan nagay muꞌsang banwa. 2Miꞌlam nat imyu i mga ramu-ramu, ganggang, baw manu-manuk, pati mga sedaꞌ, miꞌlam na gasit imyu, sabap ipagpabetang-betang ku nga muꞌsa ngaytu, kat pamegbeg mi na nga muꞌsa. 3Muꞌsang magkuliꞌget nga maginawa, magkakaꞌen mi na, nga yay dungag it pagkaꞌnen mi nang lagi nga mga luwak.
4Temed kuydaw kamu it kasalya kumaꞌen it karniꞌ nga ega piyadguꞌ, sabap ladawan it kaꞌgenan i duguꞌ ngaytu. 5Baw yay matuud, in siyuy paturuꞌ it duguꞌ mi, talagang abulun ku kat duguꞌ ya gasiꞌ. In may ramu-ramu nga mimatay it taw, kaꞌilangan imatayen naga kanya. 6Eeꞌ baꞌ, in siyu-siyuy mimatay it masigkataw ya, kaꞌilangan nga imatayen naga kanya, sabap taw ngaytu, pamwat it kanya, agen-agen it kaladawan it Ampuꞌang Diyus.
7Kamu ngaytu, subung nat inaat ku, garing kayti magꞌanak-anak kamu isaꞌun dumakel nagay taw. Talagang dumakel kamu nagang banar.”
8Beken pang inaat it Ampuꞌang Diyus it ki Noe baw kat mga anak ni Noe, 9maat ya, “Akuytu i magꞌampang ngaytu. Kayti may ipagpakiꞌupakat ku it imyu, pati mga kaꞌanak-anakan mi nga sumunud it imyu. 10Ega lamang kamu, pati muꞌsang giyuna ku nga may ginawa nga kaꞌibaan mi, ramu-ramu baw manu-manuk, kumpur limnampud duꞌun it siyakayan mi ngayti. 11Talagang ipagsanggup ku it imyu kayti nga ega na saꞌupan ku pat muuꞌ i muꞌsang may ginawa it danum nga lumyud paꞌ it subuk nagtaꞌlib ngaytu. Talagang ega na lumyud it ikaranggaꞌ paꞌ it muꞌsang banwa.
12Kayti, ituy keseg it sanggup ku ngaytut imyu, pati muꞌsang maginawa nga kaꞌiba-iba mi magtungtung-magꞌinapuꞌ,” maat it Ampuꞌang Diyus. 13“May ibtang ku na nga buluntung kat lawang. Itu nay katandaꞌ it isiyanggup ku pasar it banwa. 14Aypaꞌ kaꞌnu-kaꞌnu makunum i langit ka pagpaꞌuranen ku, kada maltegan i buluntung ngaytu, 15demdemen ku siꞌ i isiyanggup ku ngaytu, nga itu i binwat ku nga katandaꞌ tami, pati muꞌsang maginawa kat sinirungat langit, nga iyan danum, ega na lumyud it ikapuuꞌ nat muꞌsang maginawa. 16Eeꞌ baꞌ, kada timindeg kat lawang i buluntung, letganan ku bawnga demdemen ku i egay kaskedang sanggup ku it imyu, ka aku nga Ampuꞌang Diyus i nagsanggup kat muꞌsang maginawa kat sinirungat langit. 17Itu na ngaytu i katandaꞌ ta, nga keseg it ipagpakiꞌupakat ku ngaytu it imu baw muꞌsang maginawa situt sinirungat langit,” maat it Ampuꞌang Diyus.
Tanaꞌan it maraꞌway nga adat nga nasubli it anak ni Cam
18Iti basaꞌan i mga anak ni Noe ngayting kaꞌibaan ya it nagpasakay baw limnampud ngayti duꞌut sakayan, si Sem, si Cam baw si Jafet. Si Cam ngayti i amaꞌ ni Canaan. 19Tulu ngaytu nga mga anak ni Noe, sira na i piyanggaring-garingan it taw nga limingkep it banwa.
20Gimnaring it iting timpu, manigꞌuma siꞌ si Noe, baw kanyay uꞌna-uꞌnang nakalwak it luwak nga pagpangaranat ubas. 21Iyan magbuwaꞌ na, nagpesel kanya ka minwat it irimnun. Mininum na kanya seked it naglangu nga banar. Nalbasan nay magꞌigaꞌ duꞌut seled it bala-balay nira. 22Uꞌnang nakamuya it maglelbas na ngayti i amaꞌ nira nga si Noe, si Cam nga amaꞌ ni Canaan. Liyanggangan ya, bawnga isiyugid ya duꞌut duwa ngayting mga sulsug ya nga duꞌut liꞌwan. 23Pagkagneg it duwa ngayti, si Sem baw si Jafet, minsiꞌ sirat malabeg nga rambay, giyulamen nirang duwa bawnga minisnud. Bawnga iliyukyad nira duꞌut amaꞌ nira ngayting maglelbas, isaꞌun matagnepan. Ega naltegan niray kaꞌeyaꞌan it amaꞌ nira ka yanayti, pamanaw nirat minlep duꞌut amaꞌ nira ngayti, mamagꞌisnud.
24Iyan nasulag na si Noe baw miyasmasan nat langu ya, naꞌrutan ya na i binwat it anak ya nga si Cam. 25Pagkaꞌrut ya, miyampang kanya. Maat ya, “Sumpaan si Canaan!#9:25 Siyumpaan si Canaan ngayting kiyaꞌpusan nga anak na Cam sabap subrang maraꞌway i kanyang adat, subraꞌ paꞌ it amaꞌ ya ngayti. Baw yay matuud, in mga tungtung-inapuꞌ ya na nga mga Cananeo, subraꞌ na talaga i maraꞌway ngayting karaꞌe-raꞌetan nga pamagbuwaten nira (Levitico kapitulu 18, Deuteronomio 18:9-12, Esdras 9:1). Baraꞌan it mga kaꞌanak-anakan ya, ipabetang sira nga piyakatimawaꞌ nga mga uripen. Maꞌuripen sirat ega naga ugaling nira nga taw. 26Mabantug i AMPUꞌANG DIYUS ni Sem! Maꞌuripen it mga kaꞌanak-anakan ni Sem i mga kaꞌanak-anakan ni Canaan. 27Bagay it ki Jafet, padaklen kanya it Ampuꞌang Diyus. Mga kaꞌanakan yat kanya, makapasagpun sira duꞌut pagtataꞌidan it mga kaꞌanakan ni Sem ka surubung sira nga pagtatarimaen it Ampuꞌang Diyus. Temed maꞌuripen naga gasiꞌ it mga kaꞌanak-anakan ni Jafet i mga kaꞌanak-anakan ni Canaan ngaytu.”
28Garing it pagkatunaw ngaytit banwa, inabut paꞌ si Noe it tulung gatus baw limang puluꞌ nga taꞌun. 29Nakaꞌbut i idad ni Noe it siyam nga gatus baw limang puluꞌ nga taꞌun bawnga miyatay kanya.
Puꞌun-puꞌun it biyelag-belag i ampang baw ikiyapagbelag-belagen it pagbanwa
[Mga 2144 B.C.]
Jelenleg kiválasztva:
Genesis 9: TBWONT
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
© 1992, Wycliffe Bible Translators, Inc. All rights reserved.
