BOTHUBO 3
3
Timi no Ikiqivekeu
1AMPEU Alhou no tughashi lho keqo gholo apighino kumtsu nguno amqukiniue. Ike apighino atotiu vilo pi, “Kucho chono Alhou ye okujo vilo aghutulo axathi kumtsu chumla nani pi kesha?” 2-3Ike atotiuno apighi khochile pi, “Aghutu mtalo akeu subo xathi likhi thono kutau subo xathiye kumtsu okujono chulu nani. Alhou no ikujo vilo ti chukevilo eno tipaumu bukevilo pike; nino tishi aye thive nani pike.” 4Tile apighino atotiu vilo pi, “Okujoye kuchouno thimoke. 5Kughengu Alhou no ithi ani, ike okujono tipau xathi chuke tsala lono okujo nhethi tsukholuve nani eno okujoye Alhou toiveno akivi eno alhoksa ithiwuve nanike.” 6Atotiuno asuboye jukivipushi ithulu, tipau xathiye chukivipushi ithulu eno lino kumsu keuno alokutsu tsuluni keulo minemighe kepushi aghi. Ike lino axathi tipau xope chuve, tishino tipau xathi pesu li kimi tsu eno pa ghi ti chuve. 7Tishike mtsa pama nhethi xukhove eno pamaye aphikumsa akeu ithive; ikehu pamano khughuthi nipa tsughu kimeno pesu pama mini shie. 8Tipani avelau, AMPEU Alhou no aghutulo chechekeu sutsa pamano chilu, eno Adam ngo pa nipu pamano aghutulo asubo qholo AMPEU Alhou zu itshuwuve. 9Ikemu AMPEU Alhou no Adam kuno pi, “Noye khile ania?” 10Adam no pi, “Aghutulo osutsa chiluno niye msaveke, kughengu niye aphi kumsa kehu itshuwuveke.” 11Tile Alhou no pi, “Noye aphi kumsa ani pi khuno ovilo pikya? Ino ovilo chukevilo pi keu xathi chuvea kesha?” 12Adam no khochile pi, “Nono totimi igholo qhitsukeu huno axathi hu itsu puzu niye ti chuvae.” 13AMPEU Alhou no atotiu vilo iniju, “Noye kishi puzu hitoi shive kya?” Atotiuno khochile pi, “Apighino ipishiqhive puzu niye ti chuvae.” 14Tileno AMPEU Alhou no apighi vilo pi, “Nono hi shikeu ghenguno tughashi tikishi kumtsu nguno alau omusuinivae: Hinguno hilauye opokiyi itiwu peniu, eno noye ayeghi mukhu chupeniu. 15Atotiu ngo okujo dolo ino kimthikile keu sutsuni, oti ngo li ti dolo ino kimthikile keu sutsuni. Pano oboghe chisheda tsupeni eno nono pa phitsu mighi peni.”
16Alhou no atotiu vilo ghi pi, “Mishipu chekelo ino oghime alau shikupha tsuni, eno akijikusa shi ati anuli punu peniu, tishimu okimi jumine peni eno pano opeitha peniu.”
17Alhou no Adam vilo ghipi, “Nono onipu tsa inive puzu ino ovilo chukevilo pikeu subo xathi chuve ke ghenguno, ayeghiye musuinivae. Okuxu kupujulo noye aghichhe aghime shi mlano chupeniu. 18Ayeghino asahu eno ashuyebo ipeghi nani, eno noye aghatsuni chunia. 19Noye ayeghilo idewomoke kutolo, otsunhizu kighiji puzu ochuqupu chulupeni kughengu tipau lono olho phe kehu. Kughegu noye ayeghi mukhue eno ayeghi mukhulo idewonia.”
20Adam no pa nipu je Eva kutsu, kughengu liye lhoxu kumtsu paza kehu. 21AMPEU Alhou no Adam ngo panipu pama ghenguno tughashi yiko pesu aphimini mlano puue.
Aghutu lono Hapheve
22Tile AMPEU Alhou no pi, “Julo, itehi timiye ningu paphi shivae; kughengu pano kivikusa ithiwuvae. Eno pau chhopuwo akuxupi subo xathi ikhiluve puzu ti chuno pulhapuju xuacheuve nosae.” 23Ike AMPEU Alhou no Edenlo aghutu lono timi hu haphe pesu pa lhophe keu yeghi chi penike puwuve. 24Pano timi hapheve kethiu, kerubim kungumi ngo hula hila potsughu kulupu amikuiqu zuta ishi pesu Eden lo aghutu kipelau qhive, khuu pelomu akuxupi subo philo ighipemoniye khe auvepe.
Jelenleg kiválasztva:
BOTHUBO 3: SUMIBSI
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
Sumi Naga CL Bible - BAIBEL
Copyright © 2013 by The Bible Society of India
Used by permission. All rights reserved worldwide.
