LATDIUTATMEI 7
7
Stephen tuang Latdyn
1“Mi sa bammei hei kaling cho?” twna Tingkuh rui thanv ti khou, 2Stephen rui mundawna sa the, “Achanathiu khatni aputhiu, alat nkinglou o. Aniu pupouc Abraham kamei Haran thangc lungc tat mak khou, Mesopotamia khou bam khou, hymdaihmei Racguangc kakhou ndauhlouna,#Tha 12.1 3‘Nang kai kaikhunc khatni nang kandic mpatlouna ai rui nang khou nchinlou punimei kandic thangc tat ro,’ twna kakhou sa khwan e. 4Kumna kamei kakandic mpatlouna Haran thangc lungc tat the. Kapu theic kanmei tangv, Ravguangc rui kata ntaw nangniw lungc bammei kandic khou hei tiguang the.#Tha 11.31; 12.4 5Khoutei Ravguangc rui kakhang mi ramv kakiakna sini tiilou mak khwan he; tiki mi hei kakhang khatni kakikta guay khang tii puni twna Ravguangc rui nrianhlou khwan e. Mi ganv khou tei Abraham kanac maek khwan he.#Tha 12.7; 13.15; 15.18; 17.8
6“Mi ganv khou tei Ravguangc rui kakhou sa the, ‘Nang kikta nunc ginramdic khou bangh swna tingkwm phay padeih lungclou puni; mi khou tei meic nunc rui rai kasicna sw puni.#Tha 15.13-14 7Tiki kaniw ta bangh tisw nimei zaat ta tei ai rui latzan sw puni; mi tangv kiu mi kandic khou tei rui kaniw tat patna mi bamv khou hei kaniw ata kalum puni.’#Tat 3.12 8Mi tangv Ravguangc rui latdyng tuang gihruamhmei riak hei Abraham khou tiilou the. Kumna Abraham rui Isak ta zaeng tachat nungc gihruamc the; Isak rui kanac mpouh Jakob ta khatni Jakob rui kanac mpouh nunc aniu pupouc gaanv ruhna kanei ta gihruamc the.#Tha 17.10-14; 21.2-4; 25.26; 29.31—35.18
9“Aniu pupouc nunc tei rui kaniw kainac Josep ta mamavna Izip thangc bangh khang zuanclou the. Tiki Rav-guangc rui kata nkhavlouna,#Tha 37.11,28; 39.2,21; 46.27 10kata ryanramei bamv guay khou rui zay kaanlou khwan e. Ravguangc rui kata Izip guangc Pharou hu khou meic nzianpui lwn khatni ningting tiilou tina guangh tei rui kata Izip khou khatni guanghkai khou guanghkhyn tiswlou the.#Tha 41.39-41 11Mi tangv Izip khatni Kanaan kandih kapwm khou nap nkowna ryanra sih bam khwan e. Aniu pupouc nunc tei tu khang maek la thena,#Tha 42.1,2 12Izip khou nap nai e twmei chu lana, Jakob rui aniu pupouc nunc ta mi thangc tei ndiulou the. Hei tei tat reymei the. 13Key dat kaneimei khou thu Josep rui kachaic nunc khou kata tithaylou the, kumna Izip guangc rui ni kakai kaikhunc ta thay the.#Tha 45.1; Tha 45.16 14Kumna Josep rui kapu Jakob khatni kakai kaikhuncmei gaanv riakchaneina panguh ta Izip thangc key khang kaw the.#Tha 45.9-10,17-18; 46.27 15Jakob Izip khou key lungcna, mi khou tei kamei khatni kanac nunc theiclou the.#Tha 46.1-7; 49.33 16Kaniw ta Shekhem khou phungc guang datna, Hamor nac nunc khou rui liuloumei tarou khou tei mbeihlou the.# Tha 23.3-16; 33.19; 50.7-13; Jos 24.32
17“Ravguangc rui Abraham khou nrianhloumei tei guang tangh khang ana guang pwkhou, Izip khou aniu meic lungc kingckiuc pat the.#Tat 1.7-8 18Nkhamh khou Josep ta thay makmei guangc rui Izip khou guangh sw the. 19Kamei karoucsina aniu pupouc nunc ta sw kasicna, kaniw nac ngasatna nunc tei theic kan khang kaniw kai khou rui ganc pat nina e twna latdanv pat the.# Tat 1.10-11,22 20Mi ganv khou tei Mousi puanc the. Kamei lwn chav gaymei nac khwan e. Kata kakai khou bw thumh makuatlou khwan e.#Tat 2.2 21Kata ganc patlou pwkhou, guangh nacpui rui khuaicthauna, kanac swna makuat thau the.#Tat 2.3-10 22Kakhou Izipmei tuang ningting guay nchamlou the, kumna kamei lat khou ni, taanv khou ni ngammeipu akhat sw the.
23“Kamei tingkwm riakdei tangh khou, kakaamvmei Isaraelmei nunc ta tei akumhna sw bam bu cho twmei zauh khang kachwn khou ning pat the.#Tat 2.11-15 24Khoutei, Izipmeipu gaanv khat rui Isaraelmei gaanv khat ta sw kasicna sw bammei ta how lana, mi pu khwm tei khangcna, kamei rui Izipmeipu ta tei swluai the. 25(Mousi kapaan rui Ravguangc rui kaniw ta kanpatlou puni twmei kamei nunc tei thay pungh e twna kamei ning khwan e; tiki kaniw thay mak khe.) 26Nthuanh thau dat khou, Isaraelmei gaanv nei abay bammei ta ariw the, kumna kaney ta guat tisw dat khang kamei karamc the. ‘Alat nking o, tabui swna nang kai chana nei mi kumcna agay bam tu cho?’ twna Mousi rui sa the. 27Tiki sina sw bammeipu tei rui Mousi ta thui patna, ‘Thow rui nang ta aniw kaipouc khatni latzanpouc tiswlou pwna cho? 28Nang douclaneic Izipmeipu ta swluai kanmei tei kumcna ata ni swluai ni twna cho?’ twna sa the. 29Mousi hei tei chu la khou Izip mpatlouna Midian kandih thangc lungc tat kan the. Mi khou tei kanac mpouh gaanv nei puanclou the.#Tat 18.3-4
30“Tingkwm riakdei tangv, Sinai chyng tuang ramvkaengv ramv khou maibwang chuangc bammei thing phwam khou rui kauh baanchara khat rui Mousi ta ariw the.#Tat 3.1-10 31Mousi hei tei how pwkhou ngak the, kumna zauc diangh khang tat ana guang pwkhou, 32‘Ai hei nangniw pupouc nunc Racguangc e, Abraham, Isak, khatni Jakob Racguangc e,’ twna Poubauhmei rui samei khwan chu the. Mousi ping kadunh the, zauc bauh mak khe. 33‘Nang tuang phaythuapc luak ganc o, nang ding bammei bamv hei nthanmei bamv e. 34Amei nunc ta Izip khou rai kasic bammei ta ai how the khatni kaniw kalangh bammei khwan ai chu the, kumna kaniw ta kanlou khang ai guang tuang e. Guang tho, ai nang ta Izip thangc ndiulou puni the,’ twna Poubauhmei rui sa the.
35“Mousi hei, ‘Nang ta thow rui aniw tuang kaipouc khatni latzanpouc tiswlou pwna cho?’ twna sana meic nunc rui laalou makmeipu e. Kamei hei meic nunc tuang kaipouc sw khang khatni maibwang chuangc bammei thing phwam khou kata ariw kanmei kauh baanchara tei rui nkhavlouna kaniw ta kanduak patlou kanmeipu e.#Tat 2.14 36Kamei rui Izip khou, Ntou Duipui khou khatni tazikramv khou tingkwm riakdei charynmei khatni sw-nchinmei taanv taanclouna meic nunc ta tei Izip khou rui nduangh patlou khwan e.#Tat 7.5; 14.21; Sin 14.33 37‘Ravguangc rui ata ndiuloumei kumcna,#Ravguangc rui ata ndiuloumei kumcna; hamh e thei Ai kumhmei muhzwng. nangniw makaamv khou rui Ravguangc rui nangniw khou muhzwng akhat ndiu guang puni,’ twna saloumei tei Mousi rui e.#Ria 18.15,18 38Isaraelmei nunc tazikramv khou kaduai bammei ganv khou tei, kaniw ta nduanghloumei tei kamei hei e; kamei mi khou tei aniu pupouc nunc khatni kata Sinai Chyng khou kachucmei kauh baanchara tei lev bam khwan e; kamei rui ringhmei Racguangc lat laa lana aniu khou tiilou the.#Tat 19.1-20; Ria 5.1-33
39“Tiki aniu pupouc nunc kabiang piu zihna, kata thui patna, Izip ta ning khwan e. 40Kumna, ‘Aniu hu khou tat khang rav kasiamhlou tho, aniu ta Izip khou rui nduangh patloumeipu Mousi tei tabui sw kan thena cho, aniw thay mak khe,’ twna kaniw rui Aron khou sa the.#Tat 32.1 41Kumna kaniw guaituam launa maengc kasiamhna, mi ta tei kalum the; kumna kaniw rui kasiamhmei puat khang khaengna nngay the.#Tat 32.2-6 42Kumna Ravguangc rui kaniw ta ganc patlou the; muhzwng nunc latrik khou mi kumcna hyloumei kumcna kaniw tingpuk gaanchuangcna ta kalum khang ganclou the:#Amo 5.25-27
‘Isaraelmei nunc!
Nangniw tazikramv khou
tingkwm riakdei kiruai downa khaeng guang kanmei tei akhang hamh e.
43Nangniw puanc tat bammei pheykai tei,
Molokh rav tuang de;
nangniw kasiamhna kalum bammei ravmaengc tei
gaanchuangcna rav Rephan maengc e.
Hei zaeng rui nangniw ta
Babilon paengc thangc bangh tisw tat puni.’
44“Aniu pupouc nunc tei kaniw tazikramv khou bam khou, kaniw pang khou Ravguangc tuang Pheykai nai khwan e. Mi kai tei Ravguangc rui mi kumcna sw o twna lyanloumei kahak tei swlou tuang e.#Tat 25.9,40 45Aniu pupouc nunc rui mi Pheykai tei kaniw pu nunc khou rui laa lana kaniw Joshua thei layna kaniw guang pwkhou, Ravguangc rui Zentelmei guay ta nthau gancloumei kandic khou hei guang lou the. Kumna mi kai tei David kin nganv nai bam khwan e.#Jos 3.14-17 46Kamei Ravguangc zauzian laatowmeipu khwan e, kumna Jakob Racguangc khang#Baanhhy baibal asaekc khou Isaraelmei nunc khang. kai akhat swlou nii e twna Ravguangc khou ney khwan e.#2 Sa 7.1-16; 1 Ki 17.1-14 47Tiki mi kai tei thu Solomon rui sw khwan e.#1 Ki 6.1-38; 2 Ki 3.1-17
48“Tiki Kauh Liangmei Racguangc thu maansei rui swloumei kai khou lungh mak ge; muhzwng rui mi kumcna salou e:
49‘Poubauhmei rui sa e:
Tingkauh hei atuang bamvpaeng e,
kandih hei aphayba paeng e.
Nang rui akhang tabui kumhmei kai swlou nina cho?
Ai lunghpui bamv khang tabui khou swlou nina cho?#Isa 66.1-2
50Mi guay hei ai rui swlou tuang hamhna cho?’
51“Nangniw nu hei adih tanh tu cho! Nangniw lung khatni nangniw nu hei gihruamh makmei Zentelmei lung khatni Zentelmei nu di the. Nangniw pupouc nunc kumcna nangniw hei Bumaengh Nthanmei lat ta laalou mak khe!#Isa 63.10 52Nangniw pupouc nunc rui sina swlou kan makmei muczwng thow naina cho? Ntaw nangniw rui tinymna swluai kanmei, katuang ravchaptatmei Bangcpu hei guang nimei chamv dinc ndauh kanmei Ravguangc latdiu tatmei nunc ta kaniw swluai kan the. 53Nangniw hei kauh baanchara guay rui phungc guangmei Ravguangc tuang Riakdanv laatowmei nunc the; tiki nangniw hei tei piu mak ge.”
Stephen ta Ntauh Kwamluaimei
54Kaniw hei tei chu pwkhou, kaniw reic thauna kaniw huc khaic ndyang kariak riak thau the. 55Tiki Stephen tei Bumaengh Nthanmei rui padikna tingkauh thangc zauc ku the; kumna Ravguangc hymdaihmei khatni Jisu Ravguangc baanzat khou ding bammei ta how the. 56Kumna, “Zauclo! Tingkauh laanc patloumei ta ai how the, khatni Meic Nac Mpouh Ravguangc baanzat khou ding bammei ta how the!” twna kamei rui sa the.
57Tiki kaniw tei kaniw nu nkatna kauc ranvna kadaeng khou pak guang the, 58kumna kata kaidai paengc thangc katun patna ntauh kwam the. Sakhi nunc tei kaniw tuang pheybaan, kazanc Saul twna kawmei chabwanpu khou nsinlou the. 59“Poubauhmei Jisu, abumaengc laa thaulou o!” twna huayney bam khou, kasut makna kaniw ntauh kwam gut the. 60Kamei khuksun keyna, “Poubauhmei, mi paap hei kaniw ruc khou tikeylou rio!” twna kauc ranvna kauc the. Kamei mi hei salouna theic kan the.
Jelenleg kiválasztva:
LATDIUTATMEI 7: RONGBSI
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
