LATDIUTATMEI 4
4
Pitar lev Jahon ta Pei khou Zay Guangmei
1Pitar lev Jahon tei lat sa bammei dyng khou, amuh nunc,#Baanhhy baibal asaekc khou thu amuh daihmei nunc twna hylou e. ravkai rigaanv nunc tuang kapypu, khatni Saddukimei nunc guang the. 2Jisu ringcthau dat kan the twna kaney rui meic nunc khou dinc bam ti khou, kaniw lungh puamc the. 3Kaniw rui kaney ta nym lana, nyan ti thena, kangkai khou bangc thangclou the. 4Tiki chamv tei chumei meic mpeyna lwmlou the; kumna nggaanvmei ching panguh tangc khwan e.
5Nthuanh thauna Jihudimei kapy nunc, gaanthaih nunc, khatni Riakdanv dinhpouc nunc Jerusalem khou guang kaduai the. 6Kumna Tingkuh Anna lev Kaiapha, Jahon, Alekzandar, khatni Tingkuh kaikhwangmei baihmei guay lev kaniw guang kaduai the. 7Kaniw rui latdiutatmei nei ta kaniw hu khou tidinglouna, “Tabui pumtan rui hamh e thei tabui zanc khou rui nangney mi hei taanh tu cho?” twna kaniw rui thanv the.
8Pitar tei Bumaengh Nthanmei rui padikna, mundawna sa the, “Meic nunc tuang kapythiu khatni gaanvthaihthiu, 9mi katan chuanchaymeipu khou taancloumei gaytaanv lam khou hei thanvna, akumhna kata tigaylou tu cho twna sa e thei, 10nangniw ni, Isaraelmei guay ni mi hei thaylou o; twmei thu: mi nangniw hu khou ding bammeipu ti hei tigay nthan thiakloumei hei, nangniw rui kros khou swluai kanmei khatni Ravguangc rui tiringcthaulou dat kanmei Nazarethmei Jisu Khrista zanc pumtan khou rui e.
11‘Kai taanhmei nunc rui gancpatloumei tauc tei rui kaikwnpy tauc sw the,’
twna nthanmei latrik khou hyloumei tei Jisu ta the.#Kal 118.22
12“Ringhbamv hei thu kapaan na rui laatow nina de; kalam thu aniw ta kanlou khang maansei pang khou tiiloumei zanc baihmei kandih nam ruc khou maek ge.”
13Pitar khatni Jahon rambau tei how pwkhou, kaney latrik thaymei ni hamh e twmei thay lana, peimei guay tei ngak the. Kaney hei Jisu thei laymei nei the twmei ni kaniw thay the. 14Tigayloumeipu tei kaney daeng khou ding bam tina kaniw ramh lat sa ngam mak khe. 15Kumna kaney ta kapaengc thangc tipat lana, kaniw rana kaphianh the. 16Kaniw rana sa the, “Mi nei ti hei aniu tabui tuang sw kho cho? Kaney rui mi daihmei sw-nchinmei taanv hei taanclou the twmei Jerusalem khou bammei guay thay ngam the; kiuc hamh e twna aniw sa dat ngam mak khe. 17Tiki mi hei meic nunc khou dinc paengv pat mak khang, kaney Jisu zanc khou meic gaanv khat na khou sini sa dat mak khang kadunglou di kho.”
18Kumna kaniw rui kaney ta kaw gut datna kaney Jisu zanc khou lat dinc dat nuh mak khe khatni nchamlou dat nuh mak khe twna kadunglou the. 19Tiki Pitar lev Jahon rui mundawna sa the, “Ravguangc mikzaw khou, nangniw lat piumei nchumh ni Ravguangc lat piumei nchumh cho, nangniw kakhanh zauc o. 20Aniw thu aniw rui howlou kanmei khatni chulou kanmei tei sa mak ngam mak ge.” 21Kumna Pei tei rui kaney ta kadung ranv katynlouna mpatlou the. Kaney rui taancloumei khang tei rui meic nunc rui Ravguangc ta thuanc bam tipui zaeng rui, kaney ta rai nuhpui chaeng maek khwan e. 22Kakhou mi sw-nchinmei taanv taanclou kanmeipu tei katingkwm riakdei mbumei di the.
Bauh khang Lwmmei nunc rui Huayneymei
23Pitar lev Jahon tei kaney ta mpatlou dat rappui lev, kaniw pammei nunc bamv khou tei guang datna, amuh daihmei nunc khatni gaanvthaih nunc rui kaney khou kadungna saloumei lat tei dinclou the. 24Kaniw hei tei chu la khou, kaniw lungh khatna swna Ravguangc khou mi kumcna huayney the, “He tingpuk, kandih, duipui khatni mi khou naimei guayna damcloumei Kaipouc!#Tat 20.11; Neh 9.6; Kal 146.6 25Nang rui aniw pupouc, nang bangc David khou Bumaengh Nthanmei paan rui, mi kumna salou the:
‘Tabui swna Zentelmei nunc
lungh puamc bam tu cho;
tabui swna meic nunc hei gaeng makmei,
nsa tuang sw kasic nimei raeng raengc bam tu cho?#Kal 2.1-2
26Poubauhmei khatni katuang Messia ta sw kasic khang,
kandih guangc nunc chamdaanv the,
khatni dihsinpouc nunc guang kaduai the.’
27“Hei tei kumcna, nang rui suangloumei Khrista, nang tuang nthanmei bangcpu Jisu ta sw kasic khang, guangh Herod lev Pontia Pilat tei Zentelmei nunc khatni Isaraelmei nunc lev mi kaidai khou hei guang kariu kan the.#Met 27.1-2; Mrk 15.1; Luk 23.1,7-11; Jhn 18.28-29 28Kum kan di tho twna nang pumtan khatni nang chwn khou rui dinglou kanmei guay tei taanc pat khang kaniw guang kariu kan the. 29Kumna, Poubauhmei, ntaw hei kaniw rui aniw ta kadung bammei ti hei zauc keylou o, kumna nang bangc nunc aniw baucna nang lat sa ngam khang tiilou o. 30Nnaumei ta tigaylou khang pumtan tiilou o, khatni nang tuang nthanmei Bangcpu Jisu zanc khou charynmei khatni sw-nchinmei taanv taanh khang tiilou o.” 31Kaniw huayney tang pwkhou, kaniw bammei bamv tei kanuk the. Kaniw guay tei Bumaengh Nthanmei rui padikna kaniw baucna Ravguangc lat tei sa thau the.
Lwmmei guay Kaniw tuang Puat Piu Nzanhmei
32Lwmloumei guay tei lungh chamc chwn chamcna bam khwan e. Meic gaanv khat na sini kakhou naimei tei kakhang na de twna sa mak khwan e; kaniw khou naimei guay tei meic guayna piu nzanh khwan e.#Lat 2.44-45 33Kaniw pumtan padikna, Poubauhmei Jisu ringcthaumei lam tei dinc bam khwan e, kumna kaniw khou Ravguangc zauzian geicna tiilou khwan e. 34Kaniw pang khou tei tuthuy zangvthuy lakmei gaanv khatna sini nai mak khwan e. Kai pw ni, lau pw ni naimei nunc rui kakai kalau zuancna, zuanc patmei syan tei, 35Latdiutatmei nunc khou guang tiilou khwan e. Kumna hei tei kaniw mathiuc khang kage nai naimei thei layna nzanh bam khwan e.
36Kumna Levimeipu, Kupra khou rui puanhmei, kazanc Josep twna kawmei, latdiutatmei nunc rui Barnabas, twmei thu— “Katiuloumeipu” twna kawmeipu rui, 37kalaupuk zuancna, zuanc patmei syan tei latdiutatmei nunc khou guang tii the.
Jelenleg kiválasztva:
LATDIUTATMEI 4: RONGBSI
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
