LATDIUTATMEI 19
19
Paul Ephisi khou
1Apollo Korin khou bam khou, Paul mi ramv lungc khou tei tat ruan gutna Ephisi khou guang the. 2Kamei mi khou tei ziap gaanvsaekc ta ariw lana, “Nangniw lwmlou khou tei Bumaengh Nthanmei laatow thah?” twna kaniw khou thanv the.
“Bumaengh Nthanmei nai e twmei sini aniw thay mak ge,” twna kaniw rui daw the.
3“Kum e thei, akumhmei tuang duilup nangniw lup lana cho?” twna Paul rui thanv the.
“Jahon tuang duilup tei,” twna kaniw rui daw the.
4Khoutei Paul rui sa the, “Jahon rui duilupmei tei thu lungh laihmei tuang duilup de; kumna kathei khou guangmeipu ta lwm khang kamei rui Isaraelmei nunc khou salou khwan e. Mi kiu Jisu ta e.”#Met 3.11; Mrk 1.4,7-8; Luk 3.4; Jhn 1.26-27
5Kaniw mi hei chu pwkhou, kaniw Jisu zanc khou duilup the. 6Paul rui kaniw ruc khou kabaanc bouclou pwkhou, kaniw khou Bumaengh Nthanmei keylou the. Khoutei kaniw thay makmei lat sana ravmundinc the. 7Kaniw meic guayna gaanv ruhna kanei dou e.
8Paul sinagog thangc tatna bw thumh, baucna meic nunc tei lev Ravguangc Guangcdic lam khou kaphianh kariu the, kumna kaniw ta tikwmlou khang karamc the. 9Tiki kaniw gaanvsaekc thu kaniw lung tancna lwmlou mak khe. Kumna Poubauhmei tuang Chaeng ta tei meic guay hu khou sa kasicna sa the. Kum tina Paul kaniw ta mpatlouna lwmmei guay ta nduangh tatna tingmik pum#laukhwan ganvdak ruhna akhat khou rui tingzyn ganvdak 4 nganv twna baanhhy baibal asaekc khou thu hylou e. Turana tuang latdinhkai khou lat kaphianh kariu the. 10Hei tei tingkwm kanei tat key khwan e, kum tina Asia kandih khou bammei Jihudimei ni Zentelmei ni Ravguangc lat chu tow the.
Skiba Nac Mpouh nunc
11Ravguangc rui kadath datmei charynmei taanv mpeyna Paul ta titaanclou bam khwan e. 12Kamei rui sinsw bammei pheyzai pw ni, phey pw ni nnaumei nunc khou laaguang pwkhou, kaniw tuang ravpuat gay dat the khatni kaniw khou rui ravsic tat pat the. 13Ravsic nthau ganhmei taanv ruanna taanc tat bammei Jihudimei gaanvsaekc ravsic nthau khang, Poubauhmei Jisu zanc sinsw khang sw the. “Nang tat pat khang, Paul rui dinc bammei Jisu zanc khou ai nangniw khou latdanv tii e,” twna kaniw rui ravsic nunc khou sa the. 14Jihudimei tuang tingkuc Skiba nac gaanv chanei rui mi hei kumcna sw tat bam khwan e.
15Tiki, “Ai Jisu ta thay e, Paul ta ni thay e; nangniw thu thow e twna cho?” twna ravsic rui kaniw khou sa the.
16Ravsic gutmeipu tei rui kaniw ta ngamna anuay the, kumna kaniw pheybaan siat kaek ngamna kabiu kabaengna mi kai khou tei rui paliucna pak kan the. 17Ephisi khou bammei Jihudimei khatni Zentelmei guay mi chamv tei chu pwkhou, pingmei padik the khatni Poubauhmei Jisu zanc hym mbu thau the. 18Khoutei lwmmei nunc mpeyna guangna kaniw rui taanc bammei tei charuangc khou kalauh the. 19Duaih sinmei nunc rui kaniw tuang latrik guay phungc guang kaduaina mathiuc mav khou mai ntei the. Kaniw tuang latrik guay manv tei chak pwkhou daandi syan#Mi hei namvmei nunc tuang neih khat zaengphy e. Mat 20.2 tei zauc o. ching riakngu e. 20Mi hei kumcna Poubauhmei tuang lat tei zin lik pat the khatni tanc thau the.#Hamh e thei Poubauhmei tuang pumtan paan rui lat tei zin lik pat the.
Ephisi khou
21Mi tangv hei, Makidonia lev Akhaia kandic tat ruanlouna Jerusalem tat khang Bumaengh rui Paul lung khou tiilou the.#Hamh e thei Bumaengh rui zayloupui thei layna Paul kalung dinglou the. “Mi khou tei ai guanglou lana Rom thangc tat puni,” twna kamei rui sa the. 22Kumna kamei Asia kandih khou bam kanak ni he twna, kata nkhav bammei gaanv nei—Timothi lev Erasta ta Makidonia thangc ndiulou the.
23Mi ganv khou tei Poubauhmei tuang Chaeng zaeng khou tei rui Ephisi khou ranv sihmei katuakcmei pat the. 24Artemis ravpui tuang ravkai maengc daandi rui kasiamhna lanvguanh bammei kazanc Demitria twna kawmeipu nai khwan e. Hei tei rui taanvtaanhmei nunc khang syan mpeyna ntaanvpui chaeng sw bam khwan e. 25Kumna kamei rui kabangc khou taanc bammei guay khatni mi ravkai maengc kasiamhmei taanv tei taanc bammei baihmei guay ta ni kaw guang kaduaina sa the, “Meic nuncthiu, mi taanv khou rui aniu lunggai ntaanv bammei tuang e twmei nangniw thay e. 26Mi Paul hei rui sw bammei hei nangniw how the khatni chu the. Baanh rui kasiamhmei rav nunc hei thu rav hamh e twna kamei rui samei khou tei Ephisi khou na hamhna Asia kandih kapwm khou bammei guay lwmlou the. 27Aniu tuang lanvguanhmei taanv ti hei meic nunc rui sakasicmei na hamhna, Asia khatni mbaanv kapwm khou kalum bammei Artemis ravpui tuang ravkai khatni kahym ta meic nunc ning nthuk dat pw lak khe.”
28Mi lat hei chu pwkhou, meic kangdai tei lungh puamcna, “Ephisi tuang Artemis hei daihmei e!” twna kauc thau the. 29Kaidai kapwm tei kachin karo thau the. Meic kangdai tei rui, Paul thei lay tatmei Makidoniamei Gaia lev Aristarkha ta nymna, chadi chadana charuangc kai khou zay gut the. 30Meic kangdai hu khou tei Paul ni guang nii khwan e, tiki ziap nunc tei rui tiguang mak khe. 31Kapammei, Asia tuang saengc daihmei gaanvsaekc rui ni mi kai khou tei guangna kata tihow nangh e twna sa guang the. 32Mi khou tei bammei guay tei kachin karo the: gaanvsaekc rui lat khat kauc the, baihmei gaanvsaekc rui lat baihmei kauc the. Kalam thu kaniw meic geihmei thu tabui zaeng rui mi khou tei kaniw guang kaduai bam tu cho twmei thay mak ge. 33Jihudimei nunc rui Alekzandar ta hu khou tipat tina, kazaeng rui mi hei sw bam tu khuangh the twna meic nunc gaanvsaekc rui laa the. Khoutei rimh rim keylou khang kabaanc rui kabeyna, kazaeng khou rui hamh e twmei sa nthanlou khang sw the. 34Tiki kamei Jihudimei e twmei thay lana, “Ephisi tuang Artemis hei daihmei e!” twna ganvdak kanei dou kauc the.
35Nkhamh khou kaidai pei lat hymeipu rui meic nunc ta tei khaam keylou the. Kumna kamei rui sa the, “Ephisimei thiule, Ephisi kaidai rui daihmei Artemis tuang ravkai khatni tingkauh thangc rui keymei suangtauc ta gaek bam tuang e twmei meic thay makmei maek khe. 36Meic gaanv khat na sini kiuc hamh e twna sa dat ngam mak khe. Mi zaeng rui, nangniw nchu keylou o; chadi chadana sw riu. 37Nangniw rui zay guangmeipu nei hei, ravkai tuang kwam laa mak ge, aniu tuang ravpui ta ni sakasic mak ge. 38Demitria khatni kamei nunc rui thowkumhmei ruc khou lat sa nii e thei, latzankai nai e khatni latzanpouc nunc nai e; mi khou tei phungclou nuh de. 39Mi khang suangc sini mbuna nangniw kahaw e thei, pei nai e. 40Aseic sw bammei khou hei, abay adapmei pat re thei aniw ruc khou keylou puni. Mi kum pwkhou, aniw sa daw khang maek puni.” 41Mi hei salou lana kamei rui meic nunc ta tei titat ntamvlou the.
Jelenleg kiválasztva:
LATDIUTATMEI 19: RONGBSI
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
