MATHAIIN 9
9
Isuan Azeng khat Amandam
(Mk 2.1-12; Lk 5.17-26)
1Hava suale rakuanga a chuanga ankan hatuka a khuana ahong hanuk enta mi hozetinmo a kom azeng khat ahong ruai u ama ha vaienga a zal. 2Isuan ei iam u na amuna ha azeng ha, “Kalong ngam ro! Na pap andual zei,” ati pe. 3Hatuka enro, Lekhanziakpu ituklekinmo a malulunga, “Hiva mi hi Pathian adem keng,” ati u.
4Hanke Isuan amani mandon ariata, “Nangnin ichangmo mandon asiat na malunga nei vong u? 5Asik chu hovamo abei, ‘Na pap andual zei ati mo anthuia kal choi ro ati mo’? 6Tenchu phil chunga Miring Sapan pap andual ningneina adon hava ha nei riatthei u na ranga azeng ha anthuia na zamun choi ro hatuka na ina se ro!” ei ti.
7Hanke anthuia a ina ase. 8Hava muna mi doran achi na hatuka Pathianin miring hi hidor peia thotheina ei pek atia a manpak u.
Isuan Mathai ei Pai
(Mk 2.13-17; Lk 5.27-32)
9Hatuka hava mun ata ase tira Isuan ei mu Mathai ti na mikhat lei ansuangna muna ansut aman ati pe, “Ka nuk hong zi ro.” Hava han anthuia anuk azi len.
10Hanuk ina bu nek ansuta hatuka enro atampa lei ansuang ngai le papi ngai ahong u Isua le a zolai ngai le ansut u. #Lk 15.1-2 11Hava ha Pharisi ngaiin amuna a zolai ngai kom, “Ichangamo ananchupu un lei ansuang ngai le asiat ngai bila nek sak ei tho?” ati u.
12Hava ha ariata ei ti, “Adam ngai daktor nang mak hanekten ana ngai ke anang. 13Tenchu se u tan anchu u ro hiva chong imo omzia, ‘Lungkham ke ei zong dali nimak.’ Asik chu mi dik ngai rang ni making mi salui ngai a paia hong ka ni.” #Mt 12.7; Hos 6.6
Angoi ruia Ankelna
(Mk 2.18-22; Lk 5.33-39)
14Hava han Johon a zolai ngai a kom ahonga, “Pharisi ngai le koini nei ngoi ba bang tenchu na zolai ngai ngoi u mak imo asik?” ati u.
15Isuan hangai ha ei ti pe, “Makpa a om kar mui ruaia mi achap mo thei? Ten ahun la hong inti abil u ata makpa lan tuang inti hatik han la ngoi unti.
16“Puan marua ha puan athar le diba tho ngai mak asik chu adibana han puan ei chet rang keng hatuka haneka ei cheta asiat riam rang keng. 17Hatuka min bel marua le gerep uain athar thal ngai mak athal ten bel ngai um siat inti tenchu min bel athara ke uain athar ei thal, hava han aninin azok.”
Isuan Nupang khat le Nupangsanai Amandam.
(Mk 5.21-43; Lk 8.40-56)
18Hangai rang hiva chong ngai hi aril pe, hatuka enta, panchang khat a honga, ahonga moka ei ril, “Ka nainupang atun athi zei tenchu hong tan achunga kut na hong dap pe ro hava han dam inti,” ati.
19Hava han Isua anthuia a nuk azi a zolai ngai um ase u. 20Hatuka enta, kum somleianni tenpei nupang khat annim a nuk tiang a honga a puan mer a hong ton. 21Asik chu a malunga ei ti, “Ama apuan rong ngal ka ton thei ten dam ka ti.” 22Hanke Isuan anhoia a en, “Longnu ngam ro, nei iamnan ana mandam zei,” ati pe. Hava len han nupang nu ha adam.
23Hatuka Isua, ha panchang a ina a honga theilia tum le apu apar ngai ei mu le ei ti, 24“Ankhai u ro nupang sanai hi thimak a in ke!” Hava han amanin ama ha maniero tho u. 25Tenchu mi ngai ha a masuak ule asunga a luta nupang sanai a kut a sura hava han anthui. 26Hatuka mi he, rasa, ram pum abit, asip.
Isuan Acho Chongtheilui Amandam
27Hatuka havan ata ase le acho anni ama a nu nuka ase na ankhek u na, “David a naipasal lungkham na mu ro,” ati u. 28Ama ha ina alut suale ha acho ngai ha a kom ahong u na hanke Isuan hangai ha ati pe, “Na iam mo u kei tho thei ranga?” “O, Puma!” ati u.
29Hanke hangai mit aton pe na, “Nei iam u na anga na chung u na ni rase!” 30Hanke amit u anlong hatuka Isuan hangai ha, “Enro hiva hi tuten re ni!” atia adet mata akhar.
31Tenchu apanga asuak u na aram puma asin amanlang u.
Isuan Chongkului khat Amandam
32Amani ha tual panga asuak u han enro kachai ei sur chongkului khat akom ahong ruai u. 33Kachai ankhai le ha chongkului achong hanke mi doran changdong ei riat u na ei ti u, “Isarel laia la mu thak mak me.” 34Tenchu Pharisi ngaiin, “Kachai ulian le kachai ei khai ke,” ati u. #Mt 10.25; 12.24; Mk 3.22; Lk 11.15
Isuan Mipui Lungkham Amu
35Hatuka Isua khua le bung tina acheia anchunna ina a manchuna aram thangahui arila hanke ana tin le rikhotin a mandam. #Mt 4.23; Mk 1.39; Lk 4.44 36Hanuk mitampa amuna amani chunga lungkham amuna asik chu anpona sok acha nuka aruai abui bera rual anga. #Mip 27.17; 1 Rng 22.17; 2 Kr 18.16; Ez 34.5; Mk 6.34 37Hanke a zolai ngai ha ei ti, “Bu min atam, tenchu sin atho rang atom. #Lk 10.2 38Hasik han phai pumapa kom va zong u ro, hanke a phaia sin atho rang mi ei hong mathuan rang.”
Jelenleg kiválasztva:
MATHAIIN 9: RANGBSI
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
Ranglong NT with PSA - Dankit Athar Le SAM
Copyright © 2017 by The Bible Society of India
Used by permission. All rights reserved worldwide.
