मरकुस 2
2
येसुस लकवा बेमरहासिन कोड़े नन्दस
(मत्ता 9:1-8; लूक 5:17-26)
1जोक्क उल्ला ख़ॊख़ा येसुस अरा आसी चेलर कफरनहूम नगरे फिन केरर। आलर मेंजर का आस एड़पा नू र'अदस। 2औंगे नगदे बग्गे आलर असन ख़ॊंड़रर का एड़पा नू अरा एड़पा ता बली ही बहरी हूँ अड्डा मल रहचा। अरा आस आरिन धर्मेसी कत्थन तेंगा लगियस। 3अरा जोक्को आलर तम्है ती चार झन आलर ती ओन्टा लकवा बेमरहासिन खटी नू चेड्डर ती येसुस गुसन ओन्द्रर बरचर। 4लिकिन आलर ही ख़ोपरका चड्डे आर आसिन येसुस गुसन अंड़सत'आ पोल्लर, ख़ने आर येसुसी कुक्कु मइय्याँ मेसगन खटी समना कोहाँ अड्डन उम्पियर, अरा खटी नू ऎप हें'अरकी लकवा बेमरहासिन बिड़रका रांगे किइय्या एत्ताचर। 5येसुस अक्खस का ऎन ई लकवा बेमरहासिन कोड़े नना ओंग्दन एन्ने आर पत्त'अनर, अरा आर ही नलखन ईरियस ती लकवा बेमरहासिन बाचस, “अना ख़द्द! ऎन निंग्है पाप गुट्ठिन छमा नन्दन।”
6ख़ने जोक्को यहूदी नॆग सिखाब'उर असन उक्का रहचर, अरा आर सोच'आलियर, 7“ई आलस एन्देरगे एन्ने ब'अदस? ईस तंगन धर्मेसी लेक्खा सोचदस। धर्मेसिन अम्बरकी नॆ हूँ पाप छमा नना पोलनर।”
8येसुस लॆम तंग्है ती अक्खस का ईर तम्है नू एन्ने सोच'आलनर, अरा आस आरिन बाचस, “नीम एन्देरगे एन्ने सोचदर? 9सेब्बा एन्द्रा, लकवा बेमरहासिन ‘निंग्है पाप गुट्ठी छमा नन्तार'ई’, महले ‘चो'आ, निंग्है खटिन चॊद'आ ती कुद्दा नुंगा’ एन्ने ब'अना? 10लिकिन ऎन निमन ऎद'ओन, का मनवा ख़द्दन एंगा गे आलर ही पाप छमा नना गे ख़ॆख़ेल नू आकुस र'ई।” ख़ने आस लकवा बेमरहासिन आनियस, 11“ऎन निंगन ब'अदन, चो'आ, निंग्है खटिन चेड़'अरकी एड़पा कला।” 12आ आलस लॆम चॊचस अरा खटिन चेड्डस अरा ओर्मर ही ऎथ्रना नू बहरी ईकनुम केरस। ओर्मर अनचकरर केरर, अरा धर्मेसी ओहमा नंजर अरा बाचर, “नाम एन्ने एन्द्रा हूँ मल ईरका रहचकत।”
येसुस लॆबीसिन तंग्है चेला मना गे एड़दस
(मत्ता 9:9-13; लूक 5:27-32)
13येसुस फिन कफरनहूम नगरे ती उरखरकी गलिलेया समुदर ही पिंडी नू केरस। अरा कोहाँ गोंहड़ा आसी हेद्दे बरचा, अरा आस आरिन सिखाबाचस। 14आस कानुम कानुम हलफैसी ख़द्दस लेवीसिन मालगुजारी ऊज'ऊ एड़पा नू उक्का ईरियस। येसुस आसिन बाचस, “एंग्है गने चॊंख़्र'आ।” होले आस चॊचस ती आसी गने चॊंख़्रस।
15ख़ॊख़ा येसुस लेवीसी एड़पा नू मंडी ओना गे उक्कियस। येसुस अरा आसी चेलर गने बग्गे मालगुजारी ऊज'उर अरा पपहर#2:15 इय्या पपहर माने ‘नॆकन फरिसीर ख़ाँड़नर’। ओक्करकी ओना लगियर, एन्देरगेका आसी ख़ॊख़ा बर'ऊ अन्ने आलर बग्गे रहचर। 16फरिसीर#2:16 फरिसीर यहूदी ही समाज ता ओन यहूदी धरम खोंड़हा, नॆ मूसासी पॆसका, अरा मल लिखचका पुरखोती नॆग आबोन ख़ापुर। ती यहूदी नॆग सिखाब'उर येसुसिन मालगुजारी ऊज'उर अरा पपहर गने ओन्नन ऎररकी, आर आसी चेलारिन मेंजर, “आस एन्देरगे मालगुजारी ऊज'उर अरा पपहर गने ओन्दस?”
17इदन मेनरकी येसुस आरिन बाचस, “कोड़े दौ आलर गे बैधासी चाड़ मल्ला, लिकिन बेमरहर गे र'ई, ऎन नॆ तमन उजगो सोचनर आर गे मला नॆ तमन पपहा बुझुरनर आरिन एड़'आ बरचका र'अदन।”
येसुसी चेलर ही उपास नन्ना ही पत्त नू मेन्ना
(मत्ता 9:14-17; लूक 5:33-39)
18अबड़ा उल्ला नू यॊहनसी चेलर अरा फरिसीर उपास नना लगियर। उन्दुल जोक्को आलर येसुस गुसन बरचर ती आसिन मेंजर, “यॊहनसी चेलर अरा फरिसीर ही चेलर उपास नन्नर, लिकिन निंग्है चेलर एन्देरगे उपास मल नन्नर?” 19येसुस आरिन बाचस, “एका गूटी बेंजा जॊंख़स बरतियर गने र'अदस, आर एकासे उपास ननोर? बेंजा जॊंख़स आर ही गने र'अना गूटी आर मल उपास ननोर। 20लिकिन बेंजा जॊंख़स आर ती होतारना बेड़ा बर'ओ, आ उल्ला आर उपास ननोर। 21नॆ हूँ पुना किचरी ही खंडन एटेरका पच्चा किचरी नू मल सट'ई तुन'ई, अन्ने आस नन्दस होले, टस्का पच्चा किचरिन चर्रो चि'ओ, अरा एटेरकन कोहाँ ननो चि'ओ। 22नॆ हूँ पुना अंगुर रासी आबोन चपटा ही पच्चा कुड़वा नू मल निन्ददस उइय्दस, अन्ने नन्दस होले, बिचका अंगुर रासी चपटा ही कुड़वन पलको चि'ओ, अंगुर रासी अरा चपटा ही कुड़वा दुयो नठार'ओ कालो। औंगे अन्ने मल नन्दस। पुना अंगुर रासी आबोन चपटा ही पुना कुड़वा नू निन्ददस उइय्दस।”#2:22 येसुस तंग्है सिखाब'अना आर ही उपास नन्ना लेक्खा आर ही चाल गने जॊगे मलकी, अन्ने ऎद'आ गे इदन बाचस।
ख़न्न ऎख़ना उल्लन धर्मेस
(मत्ता 12:1-8; लूक 6:1-5)
23येसुस ओन यहूदी ख़न्न ऎख़ना उल्ला नू तंग्है चेलर गने ख़ल्ल गुट्ठी नू मन्नुम कालियस, अरा तंग्है चेलर ईकनुम ईकनुम बालन तोंखा हेलरर अरा मोक्खर।#व्य 23:25 24इदन ऎररकी जोक्को फरिसीर येसुसिन बाचर, “ऎरा, ईर एन्देरगे ख़न्न ऎख़ना उल्ला ही नॆग ही बिड़दो नलख नन्नर?”
25येसुस आरिन बाचस, “नीम मल्ला पढ़चका का? इकला दाऊद बॆलस अरा तंग्है संगेर कीड़ा रहचर, अरा मंडी ही चाड़ मंजा, ख़ने आस एन्देर नंजस?#1सामु 21:1-6 26अबियातर कोहाँ नैगासी बेड़ा नू दाऊद बॆलस धर्मेसी एड़पा नू कालरकी नैगस धर्मेस गे दाँड़े नंजका असमन मोक्खस, एकदन मॊख़ना मूसासी पॆसका नू नैगारिन अम्बरकी नॆका हूँ नॆग मल्ला। लिकिन दाऊदस मोक्खस, अरा तंग्है संगेर गे हूँ चिच्चस।”#लौव्य 24:9
27ख़ने येसुस अबड़ा फरिसीरिन बाचस, “ख़न्न ऎख़ना उल्ला आलर ही चाड़न पुराब'आ गे धर्मेस कमचकाचस, आस आलारिन ख़न्न ऎख़ना उल्ला ही चाड़न पुराब'आ गे मल्ला कमचका। 28औंगे मनवा ख़द्दन एंगा हूँ एंग्है चॊंख़्र'उर गे ख़न्न ऎख़ना उल्ला नू एन्देर एन्देर नन्ना र'ई अदही फैसला नना गे अदिया र'ई।”
Jelenleg kiválasztva:
मरकुस 2: KURUXBSI
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
Kurux NT - पुना गच्छरना NT
Copyright © Bible Society of India, 2014.
Used by permission. All rights reserved worldwide.
