तइरकर 10
10
कोरनेलियोस अरा पतरस
1कैसरेया नू इतालियन पलटन ही सौ सैनर ही मुद्धस कोरनेलियोस नामे ओन्टा आलस रहचस। 2आस अरा आसी एड़पा ता उर्मी आलर धर्मेसिन एल्चा लगियर अरा महबा ननू रहचर। अरा आस कीड़र गे बग्गे चि'आ लगियस अरा ओर्मा बेड़ा धर्मेसिन गोहरार'आ लगियस। 3आस उन्दुल ओनबीड़ी तीन बजे ता बेड़ा नू ओन्टा देखार नू फरीफरी ईरियस का धर्मेसी पैकस बरचस ती बाचस, “कोरनेलियोस।” 4आस आसी मइय्याँ ओन ढिठ ईरियस ती इल्चियस अरा बाचस, “उर्बायो, एन्द्रा?” ख़ने मेर्ख़ा पौकस बाचस, “निंग्है गोहरारनन अरा निंग्है कीड़र गे चि'अनन ओन्टा दाँड़े बेसे धर्मेस इंझ्रका र'अदस। 5अरा नीन अक्कुन जोक्क आलारिन योप्पॆ नगरे तइय्या ती सिमॊनसिन नॆ पतरस बारदस आसिन मॆख़ा ओन्द्र'आ। 6आस सिमॊन नामे चमरस गुसन ओक्रका र'अदस, आसी एड़पा समुदर पिंडी नू र'ई।” 7आसी गने कछनख्रस आ पैकस किर्रिम बिच्चियस ख़ने, आस तंग्है इरिब जॊंख़ारिन अरा धर्मेसिन एल्चू ओन्टा सैनासिन मीख़ियस। 8अरा आरिन ओर्मा कत्थन बाचस ती योप्पॆ तइय्यस।
9दोसर उल्ला आर बर'आ लगियर ती नगरे हेद्दे अंड़सियर ख़ने, पतरस नेख़'ओन लोहाड़ी बारा बजे गोहरार'आ गे पाटन मइय्याँ केरस। 10आ बारी आस गे कीड़ा लग्गिया, ख़ने आस गे मंडी ओना तुक्किया। आलर मंडी खट'आ लगियर ख़ने, पतरस ओन्टा देखार ईरियस। 11आस मेर्ख़न तिसगरका ईरियस अरा चरियो गंडा ऎप ती हॆंरका दिगहा अरा चकड़ चदर बेसे एन्देर लॊ एत्तना ती ख़ॆख़ेल नू उइरना ईरियस। 12अइय्या उर्मी रकम ही मेक्खो गुट्ठी अरा ख़ॆख़ेल नू ऎकना आलॊ गुट्ठी अरा ऒड़ा गुट्ठी रहचा। 13तहाँ आस गे ओन्टा ब'अना मेन्द्रा, “पतरस, चो'आ ती पिटा मॊख़ा।” 14लिकिन पतरस बाचस, “मला उर्बायो, कहियों ऎन नेम्हा मलका अरा सोतबोड़'आ आलॊन मल्ला मोक्का।” 15लिकिन अउरिम दोसर खेप आस गे आ ब'अना मेन्द्रा, “धर्मेस नेम्हा नंजकादस, अदिन नीन सोतबोड़'आ अमा ब'आ।” 16एन्ने तीन खेप मंजा, अरा अदही ख़ॊख़ा आ चदर मेर्ख़ा मइय्याँ होतारा केरा।
17पतरस ऎन ईरकन अदही मने एन्देर मना ऊंगी एन्ने तंग्है नू अकबक मना लगियस। आ बारिम कोरनेलियोसी तइय्का आलर सिमॊनसी एड़पन मिन्नुम बली गुसन इज्जर। 18आर मेंजर, “सिमॊन नॆकन पतरस ब'अनर आस इसन ओक्रकादस का?”
19अक्कु पतरस आ देखार ही पत्त नू सोच'आ लगियस ख़ने, नेम्हा बॊलतस आसिन बाचस, “ऎरा, तीन झन आलर निंगन बेद्दा लगनर। 20चो'आ अरा किय्या एत्ता बिगर धकधकर'आ ती आर ही गने कला, एन्देरगेका आरिन ऎन तइय्कादन।” 21पतरस इत्तियस ती आर ही गुसन केरस ती बाचस, “नीम नॆकन बेद्दा लगदर आस ऎन हिकदन। निम्है इसन बरना ही एन्देर चड्डे र'ई?” 22ख़ने आर बाचर, “कोरनेलियोस नॆ सौ सैनर ही मुद्धस अरा उजगो आलस अरा धर्मेसी इल्चुस र'अदस। उर्मी यहूदी आलर आसी मईन नन्नर। आस गे ओन्टा नेम्हा पैकस निंगन आसी एड़पा नू मॆख़ा ओन्द्र'आ गे पॆसस अरा निंग्है ती सिख्र'आ गे बारकी र'ई।” 23ख़ने पतरस आरिन भितरी मीख़ियस ती पाही ईरियस।
दोसर उल्ला पतरस चॊचस ती आर ही गने केरस। अरा योप्पॆ ता जोक्क पत्त'ऊ भइय्योर हूँ आसी गने केरर। 24नन्ना उल्ला आर कैसरेया अंड़सियर। कोरनेलियोस तंग्है संगीरिन अरा पाहियारिन मीख़ियस ती आर ही बरना ही पाब ऎरा लगियस। 25एकाबारी पतरस कोरचस ख़ने, कोरनेलियोस आसिन भेंट मंजस अरा आसी ख़ेडमूली खत्तरस ती ऒड़ लग्गियस। 26लिकिन पतरस आसिन चॊदस ती बाचस, “चो'आ, ऎन हूँ गा आलन हिकदन।” 27अरा आसी गने कछनख्रनुम एड़पा नू कोरचस अरा नगदे बग्गे आलारिन ख़ॊंड़रका ईरियस। 28अरा आस आरिन बाचस, “नीम गा अख़दर का ओर्त यहूदी आलस गे नन-यहूदीर गने भेंट मन्ना मलता आर ही एड़पा नू कोरना यहूदीर ही नॆग ही बिड़दो र'ई। लिकिन धर्मेस एंगा गे दहदर नंजस का एकअम आलारिन नेम्हा मलकस मलता सोतबोड़'आ मल ब'अना र'ई। 29औंगे निम्है मॆख़ना ती ऎन बिगर चाड़ाम इसन बरचकन। अक्कु तेंगा नीन एंगन एन्देरगे मॆख़ताचकय?”
30कोरनेलियोस किर्त'अर बाचस, “चार उल्ला मुन्द ई बेड़ा नुम ऎन एंग्है एड़पा नू ओनबीड़ी तीन बजे गोहरार'आ लिक्कन। आ बारी आचका बिलचना किचरी अत्तका ओन्टा आलस एंग्है मुन्दहारे बरचस ती इज्जस। 31आस बाचस, ‘कोरनेलियोस, निंग्है गोहरारना मेन्तारकी र'ई। अरा नीन कीड़र गे चिच्कादय अदिन धर्मेस सुरता नंजकादस। 32औंगे नीन योप्पॆ नगरे नू आल तइय्या ती सिमॊनसिन नॆकन पतरस ब'अनर आसिन मॆख़ा। आस चमरस सिमॊनसी एड़पा नू ओक्रकादस, आसी एड़पा समुदर पिंडी नू र'ई।’ 33औंगे ऎन लॆम निंगन मॆख़ा तइय्कन। अरा नीन बरचकय ती दौ नंजकय। एमा तेंगा गे उर्बस निंगा एन्देर एन्देर पॆसस अदिन मेना गे ऎम ओर्मम धर्मेसी मुन्दहारे ख़ॊंड़रका र'अदम।”
34पतरस ब'आ हेलरस, “ऎन अक्कु बड़ियर लगे बुझ्रकन का धर्मेस नॆकन हूँ तीना मल ख़ाँड़दस।#व्य 10:17 35आलर एकअम हूँ राजी ता र'ओर आर धर्मेसिन एल्चनर अरा एन्द्रा दौ र'ई अबड़न नन्नर होले धर्मेस आरिन इंझ्रदस। 36नीम अख़दर का धर्मेस इस्राऎल आलर गे तंग्है दौ कत्था तइय्यस अरा येसु मसीस ती नॆ ओर्मर ही उर्बस हिकदस कोड़े ही दौ कत्था तिंगियस। 37यॊहनस नॊड़रना ही पत्त नू तेंगना ही ख़ॊख़ा गलिलेया ती ऒरे मंजा ती गोट्टा यूदेया नू एन्देर एन्देर मंजा अदिन नीम अख़दर। 38नासरेत ता येसुसिन धर्मेस नेम्हा बॊलतस ती अरा सवंग ती बड़ियर नंजस अरा धर्मेस आसी गने रहचस। ख़ने आस दौ नन्नुम अरा सैतान ती बझ्रका आलारिन कोड़े नन्नुम कुद्दा लगियस। 39आस एन्देर एन्देर यूदेया राजी अरा येरुसलॆम नू नंजस अदही गोवाह ऎम हिकदम। आर आसिन क्रुस नू अरगर ती ठोकचर ती पिटियर। 40लिकिन धर्मेस आसिन तिसर उल्ला उज्जताचस अरा दहदर नंजस। 41ओर्मा आलर गे मला, लिकिन नॆकन धर्मेस मुन्द तिम चज्जिका रहचस आ गोवाह गुट्ठिर गे आसिन दहदर नंजस। आ गोवाह ऎम हिकदम। आसी केचका ती उज्जा चॊचका ख़ॊख़ा ऎम आसी गने ओंडकम मोक्कम। 42अरा आस एमन पॆसस का ऎम आलारिन तेंगोम अरा गोवाह चि'ओम का धर्मेस आसिन उज्जना आलर अरा केचका आलर ही नेंवई ननू कमचकादस। 43आसी पत्त नू उर्मी धर्मेसी कत्था तिंगुर गोवाह चि'अनर का नॆ आसिन पत्त'ओर आर गे आसी नामे ती पाप छमा ख़क्खोर।”
44इबड़ा कत्था गुट्ठिन पतरस तेंगा लगियस ख़नेम, कत्थन मिनू आलर मइय्याँ नेम्हा बॊलतस इत्तियस। 45ख़ने पतरस गने बरचका यहूदी पत्त'ऊ आलर इदिन ईरियर ती अनचकरर केरर, एन्देरगेका नन-यहूदीर गे हूँ नेम्हा बॊलतासी इनाम ख़क्ख्रकी रहचा। 46एन्देरगेका आर नन-यहूदीर नन्ना नन्ना भखा नू कछनख्रना अरा धर्मेसी ओहमा नन्नन मेना लगियर। ख़ने पतरस बाचस, 47“ईर गे नम्है लेक्खम नेम्हा बॊलतस ख़क्ख्रका र'अदस, होले नेकईम ईरिन अम्मु ती नॊड़रना ती छेक'आ ओंगोर का?” 48अरा आस आर गे येसु मसीसी नामे ती नॊड़र'आ गे आनियस। तहाँ आर पतरसिन जोक्क उल्ला तम्है गुसन र'आ गे बाचर।
Jelenleg kiválasztva:
तइरकर 10: KURUXBSI
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
Kurux NT - पुना गच्छरना NT
Copyright © Bible Society of India, 2014.
Used by permission. All rights reserved worldwide.
