INṬANNA 8
8
Tuilêt tâwpna
1Chun, Pathienin Noa le lawnga a kuoma thilhring tinrêng le ran um po po chu a hriet zing a; chun Pathienin hnuoi chunga hin thli ân hrângtir a, chuongchun, tui chu a hung kang ṭan tah a,
2tui inthûktak hnarhai le vân tukverhai khawm chu a hung inkhâr tah a, vâna inthawka ruo hung sûr chu sukchâtin a um ta bawk a;
3chuongchun, tui chu hnuoi chunga inthawk chun a kang ta deu deu a, ni za le sâwmnga chu a bo hnung chun tui chu a tlâwm ta deu a.
4Chuongchun, lawng chu thla sarina, ni sâwm le ni sari nia chun Ararat tlânga chun a lo innghat tah a.
5Chun, tui chu thla sâwmna chenin a tlâwm deu deu pei a; thla sâwmna ni khat nia chun, tlâng sîphai chu a hung inlang tah a.
6Chun, ni sâwmli hnunga chun Noa chun lawng tukver a siem kha a hawng tah a:
7chun, vaâk pakhat ân vuong suoktir a; chu chu a suok a, hnuoia inthawka tui chu a kang zo hmakhat chu a vuong vêl a vuong vêl a.
8Chun, hnuoi chunga tui a tlâwm ta le tlâwm ta naw hrietna dingin vaṭhu ân vuong suoktir nâwk a;
9nisienlakhawm, vaṭhu chun fûkna ding hrim hrim a hmu nawh a, a kuomah lawngah a kîr nâwk tah a, tui chu hnuoi chung po poa chun a la um sih a; chuongchun, a kut a hang pur dawk a, a man a, lawng sûngah a kuomah a lâk lût nâwk tah a.
10Chun, ni sari dang a nghâk nâwk a, vaṭhu chu lawnga inthawk ân vuong suoktir nâwk a;
11vaṭhu chu zântieng chun a kuomah a hung lût nâwk a; chun, ngai ta, oliv hna suktlawng hlim a hmûra chun a hung put a: chuongchun, Noa chun hnuoiah tui a tlâwm tah ti a hriet a.
12Chun, ni sari dang a nghâk nâwk a, vaṭhu chu ân vuong suoktir nâwk a; a kuomah a hung kîr nâwk ta nawh a.
13Chun, a kum za ruk le a kum khatnaah, a thla khatna ni khat nia chun tui chu hnuoia inthawk chun a kang zo tah a: chuongchun, Noa chun lawng inkhumna chu a hâwk a, a en a; chun, ngai ta, hnuoi chung chu a lo inhil ta huou el a.
14A thla hnina ni sâwmhni le ni sari nia chun hnuoi chu a hung ṭâwl zo tah a.
15Chun, Pathienin Noa kuoma chun a hril a,
16“Lawnga inthawkin suok ro, nang le i nuhmei, i naupasalhai le an nuhmeihai leh.
17Tisa po po laia mi thil hringna nei tinrêng i umpuihai, vate dâm, ran dâm, thilhring hnuoia bawkinvâka lâwn tinrêng dâm le khan i kuomah ṭhuoi suok rawh, hnuoia hin te neiin chi tamtak thlaha an hung pung theina dingin,” tiin.
18Chuongchun, Noa chu a suok a, a naupasalhai le a nuhmei le a nauhai nuhmeihai khawm a kuomah an suok veh a;
19sa tinrêng dâm, thilhring tinrêng dâm, vate tinrêng dâm, hnuoi chunga chângthei taphawthai chu anni chi umdân ang sengin lawnga inthawk chun an suok tah a.
20Chun, Noa chun LALPA ta dingin mâichâm a siem a; chun, sa thieng tinrêng laia mi le, vate thieng tinrêng laia mi a lâk a, mâichâma chun pumrawhmang thilinhlânhai ân hlân tah a.
21Chun, LALPAIN riminhnik chu a hriet a; chun, LALPA chun a lungrilin, “Hnuoi chu mihriem lei chun ṭawngsie inphur nâwk ta naw ning, mihriem lungril ngaituonahai chu an chîntea inthawkin a suol sih a; tuta ka hrem ang hin thilsiem hringna nei tinrêng chu hrem nâwk ta naw bawk ka tih.
22Hnuoi um sûng po bu tu le bu lâk, khaw dei le khaw lum, nipui le phalbi le, sûn le zân dâm hi bo naw nih,” a ta.
Jelenleg kiválasztva:
INṬANNA 8: HMARCLBSI
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
