San Mateo 6

^Sañaꞌa Jesús xaꞌa ña taxi yo nuu na ndaꞌvi

1’Ra te kuni ndo sa ndo iin ña vaꞌa xiꞌin na ndaꞌvi, ra na küni ndia nii yuvi ña sa ndo ña xiꞌin na, chi tu na kuni na, ña saniꞌi ndo ñaꞌa na ndaꞌvi, saa ra xaꞌa na satoꞌo na ndoꞌo xaꞌa chiñu ña xa va ndo; ra tu ña kuni ndo satoꞌo na ndoꞌo va ke xa ndo ña, saa ra köo ña vaꞌa saniꞌi vi Tata yo Ndioxi ra iyoo ndivi ndoꞌo. 2Ña kan ke te taxi ndo ñaꞌa ndaꞌa na ndaꞌvi, ra na käꞌan ndoso ndo xaꞌa ña xiꞌin takundiꞌi yuvi ña na kundaa ini na, chi saa ke ^xa inka yuvi na chiꞌña tuꞌun va, chi na kan ra iin kunani na xika na ña ndatuꞌun na xiꞌin takundiꞌi na veꞌe ñuꞌu, ra xika tu na iin takundiꞌi yaꞌya va ña ndatuꞌun na xiꞌin yuvi, ña kuni na ña vaꞌa ni na kaꞌan yuvi xaꞌa na; ra ña ndixa ke kaꞌan yu xiꞌin ndo, chi na xa saa, ra xa ña kan ke niniꞌi va na, chi köo ka ñaꞌa taxi vi Ndioxi ndaꞌa na. 3Ña kan ke te chindiee taꞌan ndoꞌo xiꞌin na ndaꞌvi na kumani ñaꞌa nuu, ra ndatüꞌun ndo xiꞌin ndia nii yuvi, ra na kundäa ini ndaꞌa ichin ndo xaꞌa chiñu ña xa ndaꞌa kuaꞌa ndo. 4Ra ña vaꞌa ña xa ndo xiꞌin na ndaꞌvi na kumani nuu, ra ña seꞌe va na kuu ña, ra saa ke niꞌi ndo ña vaꞌa nuu Tata yo Ndioxi ra iyoo ndiví ra ^kundaa ini xaꞌa takundiꞌi chiñu ña iyoo seꞌe ―kachi Jesús xiꞌin na.

Sañaꞌa Jesús yuvi ña kaꞌan na xiꞌin Ndioxi

5Ra saa ndikaꞌan ka ra kachi ra saa xiꞌin na:

―Te kaꞌan ndo xiꞌin Ndioxi, ra xä ndo ta xa na chiꞌña tuꞌun, chi na kan ra kutoo ni na kundita na ini veꞌe ñuꞌu nuu tuvi, ra xini sii ni tu na ña kundita na tutun yaꞌya va ña kaꞌan na xiꞌin Ndioxi, ña vaꞌa na kuni yuvi na, ra kaꞌan toꞌo ni na xaꞌa na kuni na. Ra ña ndixa kaꞌan yu xiꞌin ndo, chi na kan, ra köo ka ñaꞌa taxi Ndioxi ndaꞌa vi na, chi xa ña kan ku yaꞌvi va na. 6Ndi su ndoꞌo, ra te kaꞌan ndo xiꞌin Ndioxi ra suꞌva va ke na sa ndo: chi ini veꞌe va ndo ke na ndee ndo; ra ndakasi ndo yeꞌe ndo, ra ikan va na kaꞌan seꞌe ndo xiꞌin Tata ndo Ndioxi, ra saa ke niꞌi ndo ña vaꞌa nuu ra, chi ra kan, ra kundaa va ini ra xaꞌa ña kaꞌan seꞌe ndo xiꞌin ra, ra taxi va ra ña vaꞌa ndaꞌa ndo.

7’Ra te kaꞌan ndo xiꞌin Ndioxi, ra xä ndo ta xa yuvi na xïni ichi Ndioxi, chi na kan ra te kaꞌan na xiꞌin Ndioxi, ra iin tuku, tuku nandiko na kaꞌan na indaa tuꞌun ña köo yaꞌvi ndiaa, chi xiꞌin ña kan va ke kundaꞌvi ini Ndioxi kuni ra na, ra ndakuiin ra yuꞌu na, tuvi na. 8Ndi su ndoꞌo, ra xä ndo ta xa na kan, chi Iva yo Ndioxi ra xa kundaa va ini ra ni ñaꞌa ke kumani nuu ndo, te kuni ka nduku ndo ña nuu vi ra. 9Ña kan ke te kaꞌan ndoꞌo xiꞌin Ndioxi ra suꞌva va na kachi ndo xiꞌin ra:

Tata ndi, ra iyoo ndiví, ña yii ni na kuu kivi kun.

10Ra na kixi kun kaꞌndia kun chiñu nuu ña yuuvi yoꞌo.

Ra ta xa kun ndivi ke, na sa kun nuu ñuꞌu yoꞌo va.

11Ra iin ndisaa kii ke ná taxi kun ña xiniñuꞌu nuu ndi kuxi ndi; ra na kumäni ña nuu ndi.

12Ra na sakaꞌnu ini kun xaꞌa kuáchi ndi,

Ta kuꞌva xa ndi ña ^xakaꞌnu ini ndi xaꞌa kuachi yuvi, na xa ña väꞌa xiꞌin ndi.

13Ra täxi kun koyo ndi ndaꞌa ña väꞌa;

Chi na ndakiꞌin va kun nduꞌu ndaꞌa ña.

Chi yoꞌo kuvi ra kaꞌnu xaꞌndia chiñu,

ra kuu mii kun ndiee, ra xaꞌndia kun xaꞌa takundiꞌi va ñaꞌa,

ndia ndikaa ndikuꞌun. Amén.

14’Ra na kundaa ini ndo, saa chi tu xakaꞌnu ini ndo xaꞌa kuachi ña xa inka yuvi xiꞌin ndo, saa ra koo kaꞌnu tu ini Tata yo Ndioxi ra iyoo ndivi xaꞌa kuachi tu ndoꞌo va. 15Ndi su tu na köo kaꞌnu ini ndo xaꞌa kuachi ña xa inka yuvi xiꞌin ndo, saa ra nii Tata yo Ndioxi ra iyoo ndivi köo kaꞌnu ini tu xaꞌa kuachi ndoꞌo va ―kachi Jesús xiꞌin na.

^Sañaꞌa Jesús na ndia kuꞌva ke sa na ña koo suꞌun na

16Ra saa ndikaꞌan ka ra xiꞌin na kachi ra saa:

―Te iyoo suꞌun ndo ña xïxi ndo, ra na ndañäꞌa ndo mii ndo ña kuvita ini ndo ta kuꞌva xa na chiꞌña tuꞌun, chi na kan, ra iin ndanama chuun na nuu na, ña kuni na kuni yuvi ña iyoo suꞌun na ña xïxi na. Ra ña ndixa ke kaꞌan yu xiꞌin ndo, chi na xa saa kan, ra xa ña kan kuvi yaꞌvi va na, ra köo ka ñaꞌa taxi Ndioxi ndaꞌa vi na. 17Ña kan ke ndoꞌo, ra te iyoo suꞌun ndo ña xïxi ndo, ra na ndakatia va ndo nuu ndo, ra vivii va na ndasa ndo xiꞌin mii ndo. 18Ra saa ke na kundäa ini yuvi ña iyoo suꞌun ndo, ra takua Tata ndo Ndioxi ra xini ña xa seꞌe va ndo kuvi ra na kundaa ini, ra saa ke niꞌi ndo ña vaꞌa nuu Tata yo Ndioxi ―kachi Jesús xiꞌin na.

Na chivaꞌa yo ña kuika chi ndivi

19Ra saa ndikaꞌan ka Jesús xiꞌin na, kachi ra saa:

―Chiväꞌa ndo ña kuika nuu ña yuuvi yoꞌo, chi yoꞌo ra ^kíꞌvi va tikixin ña, ra kuxi va tu ña, saa ra ndiꞌi xaꞌa va ña, ra ^kíꞌvi tu na kuiꞌna va sakuiꞌna na ña. 20Ña kan ke kaꞌan yu xiꞌin ndo, ña na chivaꞌa ndo ña kuika chi ndivi nuu ^kïꞌvi tikixin, ra nii küxi ña, ra nii ndïꞌi tu xaꞌa va ña, ra nii na kuiꞌna kïꞌvi ña sakuiꞌna na ña. 21Saa chi nuu ^chivaꞌa ndo ña kuika ña kuu mii ndo, ra ikan ke koo tu nima va ndo ―kachi Jesús xiꞌin na.

Ta iyoo ñùꞌù yeꞌe saa iyoo nduchi nuu yo

22Ra saa ndikaꞌan ka ra kachi ra saa xiꞌin na:

―Nduchi nuu yo, ra ñùꞌù ña ^tuun nuu iinii saa iki kuñu va yo kuvi ña; ra tu vaꞌa nduchi nuu ndo, saa ra vaꞌa tu iyoo iinii saa mii va ndo, saa chi nuu iyoo ñuꞌu va iyoo ndo. 23Ndi su tu ña kueꞌe va kuvi nduchi nuu ndo, saa ra nuu ñaa va iyoo iki kuñu ndo, ra tu ñùꞌù yeꞌe ña kuu mii ndo ra ña ñaa va kuvi ña, saa ra nuu ñaa tu iyoo iinii saa va ndo ―kachi Jesús xiꞌin na.

^Sañaꞌa Jesús yuvi xaꞌa ña kuika xiꞌin xaꞌa ichi Ndioxi

24Ra saa ndikaꞌan ka Jesús xiꞌin na kachi ra saa:

―Ra kuni yu na kundaa ini ndo, chi ndia nii yuvi ra küvi sachiñu na nuu uvi tiaa ndia xaꞌndia chiñu, saa chi na xachiñu nuu uvi tiaa, ra küvi kindoo vaꞌa na xiꞌin uvi saa ndia. Saa chi tu vaꞌa na kitaꞌan na xiꞌin iin ra, ra inka tu ra sáa̱ na xiꞌin va. Xaꞌa ña kan ke küvi sachiñu ndo nuu Ndioxi ra sachiñu tu ndo nuu xuꞌun ―kachi Jesús xiꞌin na.

Ndioxi kuvi ra ndiaa takundiꞌi seꞌe ra na kandixa ichi ra

25Ra saa ndikaꞌan ka Jesús kachi ra saa xiꞌin na:

―Ra vichin ke kaꞌan yu xiꞌin ndo, ña na ndïꞌi ni ini ndo xaꞌa ña kuxi ndo, xiꞌin xaꞌa ña koꞌo ndo, ña vaꞌa kutiaku ndo, ra nii na ndïꞌi ni tu ini ndo xaꞌa tikoto ña kundixi va ndo; saa chi ndiaa yaꞌvi ni ka va ña tiaku ndo nuu ña xíxi ndo, ra ndiaa yaꞌvi ni ka va tu iki kuñu ndo nuu tikoto ña ndixi ndo. 26Ra na kutoꞌni ndo ndia kuꞌva ke iyoo saa vali, ri ndachi xika ndivi, chi nii chïꞌi ri, ra nii sakëe ri, ra nii yaka nuu chivaꞌa ri ñaꞌa kuxi ri köo vi, ndi su Tata ndo Ndioxi ra iyoo ndivi va kuvi ra kiꞌin kuenda xiꞌin ri ña xixi ri. Ra saa ke sa tu ra xiꞌin ndoꞌo va, saa chi ndiaa yaꞌvi ni ka va ndoꞌo nuu saa vali kan. 27Ña kan ke na kundïꞌi ni ini ndo xaꞌa ña tiaku ndo vichin, saa chi vaꞌa ni ndiꞌi ni va ini ndo, ra tu na kachi Ndioxi kuvi ndo, saa ra kuvi va ndo, ra ndia nii hora loꞌo ka ke kuchüun vi ndo kutiaku ndo. 28¿Ra nichuun ke ndiꞌi ni tu ini ndo xaꞌa ña kundixi ndo? Kutoꞌni ndo ndia kuꞌva ke iyoo ita vali ña iyoo iku, saa chi ña kan ra nii xachïñu ña, ra nii xaväꞌa ña tikoto ña kundixa ña, ndi su nduvi ni va ña. 29Ra ña ndixa ke kaꞌan yu xiꞌin ndo, saa chi ndia nii ra rey Salomón ra vaꞌa ni kuika ni va ndixiyo ra, ndi su ndikuchüun vi ra ña sa̱ví ni koo tikoto ra ta kuꞌva iyoo ita vali kan. 30Ra tu nduvi ni sakundixi Ndioxi ita vali ña iyoo iku, ra vichin iyoo ña, ra tiaan xa ndachi va ña, saa ra ndakaya na ña ra xaꞌmi va na ña, ra kachi ka vi tu ndoꞌo, ¿a täxi ra ñaꞌa ña kumani nuu ndo ndaꞌa ndo tuvi ndo? ¿Nichuun ndiee ni ini ndo ña xïin ndo kandixa ndo Ndioxi? 31Ña kan ke na ndïꞌi ni ka ini ndo ña kachi ndo saa: “¿Ni ke kuxi yo vichin, ra ni ndutia kuvi ra koꞌo yo, ra ndia mii kee tu tikoto ña kundixi yo?”, na kachi ndo. 32Saa chi xaꞌa takundiꞌi ñaꞌa yoꞌo kuvi ña ndiꞌi ni ini yuvi na xïni ichi Ndioxi va. Ndi su ndoꞌo, ra na kundïꞌi ni ka ini ndo xaꞌa ña yoꞌo, saa chi Tata ndo Ndioxi ra xa xini mii va ra kan ni ñaꞌa ke xamani nuu ndo. 33Ña kan ke, ndoꞌo, ra xiꞌna ka va chiñu ña xaꞌndia Ndioxi ke ná ndanduku ndo, ra sa ndo ña, ra saa ke taxi ra takundiꞌi ñaꞌa ña xíniñuꞌu nuu ndo ndaꞌa ndo. 34Ra na kundïꞌi ni ini ndo xaꞌa tundoꞌo ña kuu kii ña vaxi, saa chi kundiëe ndo ña kundiꞌi ini ndo xaꞌa tundoꞌo ña ^kuu kii vichin, ra kundiꞌi tu ini ndo xaꞌa tundoꞌo ña kuu kii ña vaxi. Chi ta iin, ta iin kii, ra xa iyoo, xa iyoo va tundoꞌo vaxi xiꞌin ña ―kachi Jesús xiꞌin na.

Jelenleg kiválasztva:

San Mateo 6: mxvNT

Kiemelés

Megosztás

Másolás