San Juan 21

Ndo Jesús konoxin ndo ngajin sen ya̱a̱to̱ bakajikao ndo

1Tjumeꞌe íjngo ndo Jesús konoxin ndo ngajin sen chrikao ndo ngandeꞌe ndachaon ndatinꞌin Tiberias. 2Naakua ste sen, ndo Simón Pedro ko ndo Tomás, xi nchekinꞌin sen xjan Kuatsi, ko ndo Natanael, xi tsiki̱ꞌxi̱n tjajna Caná nunte Galilea, ko yuu chjenꞌen ndo Zebedeo ko íjngo yuu sen bakajikao ndo Jesús. 3#Lc. 5:5.*Tjumeꞌe ndachro ndo Simón Pedro:

―Satsji xrotse̱ kuchee̱.

Ko juateꞌe sen:

―Kaxon janꞌanna itsjina.

Ko sakjui sen kuajinꞌin sen naa nta̱barco. Ko xroꞌan kuchee̱ itsé sen nchijíi tiie. 4Ko ó jitingasáña ko tuinxin bikon sen ndo Jesús ngandeꞌe ndachaon, ko juatsuanꞌi sen ndo. 5Ko juanchangiꞌe ndo sen:

―Jaꞌanta, ¿á xraxroꞌan kuchee̱ itsenta?

Ko juateꞌe sen, ndachro sen:

―Xraxroꞌan ngeꞌe.

6 # Lc. 5:6. *Ko ndo Jesús ndache ndo sen:

―Tjaꞌngangínta nochaꞌa nango jian nta̱barco ko xrotsénta ba.

Tjumeꞌe jaña juincheꞌe sen, banka sen nochaꞌa ko juaꞌi kuantsjexin sen inda nochaꞌa ixi kueya kuchee̱ itsé sen. 7Ko ndo ícha tjueꞌe ndo Jesús ndache ndo ndo Pedro:

―¡Ncháina jiꞌi!

Ko kuinꞌen ndo Simón Pedro ixi Ncháina, ko kuéyá ndo mantée ndo, manta jindatexin, ixi tsikantsje ndo manta ko juingi ndo inda. 8Tjumeꞌe sen kaxin bajikao ndo Jesús kuiji sen ngandeꞌe ndachaon bijikao sen nta̱barco jitingakjín nochaꞌa chónda kuchee̱ ixi tsikjin sen xranchi naa ciento metro kjínxin ti no jii ngandeꞌe inda. 9Tjumeꞌe kuiji sen ngandeꞌe inda ko xingajinxin sen nta̱barco ko bikon sen xruitja tsiche xroꞌi ko ngataꞌa xruitja jii naa kuchee̱ ko nango jii nutja. 10Tjumeꞌe ndo Jesús juanchia ndo:

―Tikuunta kaxin kuchee̱ sintenta.

11Ko ndo Simón Pedro kuajinꞌin ndo nta̱barco bingakjin ndo nochaꞌa jitjinga itsjé kuchee̱, naa ciento cincuenta ko níi ba. Ko maski kueya ba tsitsé sen tsichrindaonꞌa nochaꞌa. 12Tjumeꞌe ndachro ndo Jesús:

―Xrokuiinta, sintenta.

Tjumeꞌe ninaa sen juanchangiꞌe sen ndo ngisen jeꞌe ndo ixi ó juatsuan sen ndo. 13Ko konchjiñeꞌe ndo Jesús ko kua ndo nutja chjée ndo sen ko jaña kuajon ndo kuchee̱.

14Jiꞌi nínxin konoxin ndo Jesús ti tsixechón ndo.

Ndo Jesús nichja ndo ngajin ndo Simón Pedro

15Juexin juine sen juanchangiꞌe ndo Jesús ndo Simón Pedro:

―Jaꞌa Simón, chjenꞌen ndo Jonás, ¿á ícha tjauanna ixi sen jiꞌi?

Ko juateꞌe ndo Pedro:

―Jaán, Nchána, ó noꞌanta ixi tjuaꞌanta.

Ko ndachro ndo Jesús:

―Siá nduaxin meꞌe, tayakonꞌén kutuchjonna.

16Tjumeꞌe yuxin juanchangi ndo Jesús:

―Jaꞌa Simón, chjenꞌen ndo Jonás, ¿á tjauanna?

Ko juateꞌe ndo Pedro:

―Nchána, jaꞌanta noꞌanta kain ngeꞌe, janꞌan ó noꞌanta janꞌan tjaꞌonnta.

Ko ndachro ndo Jesús:

―Siá nduaxin meꞌe, tayakonꞌén kutuchjonna.

17Tjumeꞌe nínxin juanchangi ndo Jesús:

―Jaꞌa Simón, chjenꞌen ndo Jonás, ¿á tjauanna?

Ko koniꞌe aséen ndo Pedro ixi nínxin juanchangi ndo Jesús á tjaun ndo Pedro ndo Jesús ko ndachro ndo:

―Nchána, jaꞌanta ó noꞌanta kain ngeꞌe. Jaꞌanta ó noꞌanta janꞌan tjaunnta.

Ko ndachro ndo Jesús:

―Siá nduaxin meꞌe, tayakonꞌén kutuchjonna. 18Ko naa ngeꞌe nduaxin ntatjua ixi nchakon xrachájan jaꞌa, jaꞌua bakaria mantáa ko bakjia tinó tjauan. Ko nchakon tsotáchría tsinxé tjáa ko inaa ngisen sintekitsaa mantáa ko tsikaan na̱ ti no tjaunꞌa itsjia.

19Ti ndachro ndo Jesús xrondachro xranchi tsenxin ndo Pedro ko jiꞌi tachrjexin xranchi tsajon ndo juasaya ngajin ndo Dio. Ko juexin ndachro ndo jiꞌi, íjngo ndache ndo ndo Pedro:

―Ruaꞌna̱na.

Ngeꞌe tsonꞌen xi ícha tjueꞌe ndo Jesús

20 # Jn. 13:25. *Tjumeꞌe ndo Pedro tsjeꞌe ndo tuenxin ndo ko bikon ndo ixi ruéꞌe ndo ícha tjueꞌe ndo Jesús, ndo meꞌe bakeꞌe tjenka ti bakeꞌe ndo Jesús nchakon juine sen ko tsijanchangíꞌe ndo ndo Jesús ixi ngisen sinchekji ndo. 21Ko ndo Pedro bikon ndo ixi jiruéꞌe ndo meꞌe ko juanchangiꞌe ndo ndo Jesús:

―Nchána, ndo jiꞌi, ¿ngeꞌe tsonꞌen ndo?

22Ko juateꞌe ndo Jesús:

―Siá tjaꞌon xratsechón ndo ti nchakon xrokjan janꞌan, jaꞌa ngeꞌe kondaꞌa. Jaꞌa ruena̱na.

23Meꞌe juangíxin juao sen ixi tsenꞌa ndo meꞌe. Ko jeꞌa ndachro ndo Jesús ixi xrokuenꞌa ndo. Naꞌi. Jeꞌo ndachro ndo ixi siá tjaun ndo xratsechón ndo nchakon xrokjan jeꞌe ndo, ngeꞌe kondee jeꞌe ndo Pedro.

24Ndo meꞌe ngisen chronga ixi nduaxin konꞌen kain jiꞌi, ko ikjin ndo xroon jiꞌi. Ko ó noi̱na ixi ngeꞌe tsikjin ndo, meꞌe nduaxin.

25Xrajíi kueya ngeꞌe juako ndo Jesús kjinꞌa janꞌan. Siá xrokjin naanaa meꞌe, xrokuitjaꞌi nunte xasintajni xrobinga kain xroon ti xrokjin. Jaña tsonꞌen.

Jelenleg kiválasztva:

San Juan 21: ppsNT

Kiemelés

Megosztás

Másolás