Matayi 8

U Yesu akupozya umuntu uwa mambombo

(Mlko. 1.40-45; Luk. 5.12-16)

1Bo u Yesu ika pighamba, ichilundilo icha bantu chikamukonka. 2Umuntu yumo uwa mambombo akiza kwa Yesu, akamufughamila nukuti, “Mwene, nanti ukulonda unganswefya.”#8.2 unganswefya: Abantu bakabwinong'onelagha ububine bunubu ukuti bukumunyazya umuntu pamaso pa Chala.

3U Yesu akagholosya inyobe yache, akamulema nukwamula ukuti, “Nkulonda, swepa!” Panapo na panapo amambombo ghala ghakamuleka umuntu yula. 4#Lev. 14.1-32U Yesu akamubuzya akati, “Ivwa kuno! Utakamubuzyepo nayumo umuntu. Loli bukagha wilanjizye ku muputi ukuti akupime; ukuti abantu bosi bamanye ukuti wapola, ubike ichabupi chicho u Mozesi akalamula.”

U Yesu akupozya umubombi uwa songo uwa Chiloma

(Luk. 7.1-10)

5Bo u Yesu injila mukaya aka Kapelinahumu, usongo uwa Chiloma uwa basilikali 100 akakomana nawe nukumulaba ukuti amwavwe. 6Akati, “Mwene, uwambombo wane mubine kunyumba, aghonite pachitala, umwakuti akupotwa pakwenda, po akutamiwa nkani.”

7U Yesu akamubuzya akati, “Nkwiza pakubuka pakumupozya.”

8Usongo uwa basilikali 100 yula akamula akati, “Awe, Mwene, utabaghiye pakwinjila munyumba yane. Loli nena bulo izyu, uwambombo wane akwiza pakupola. 9Pakuti nane bulo, indi pasi pa bulaghili ubwa basongo bane, sona pasi papane indi na basilikali abankondo. Nanti inkumubuzya weka ukuti, ‘Bukagha,’ naloli akubuka. Po nanti inkumubuzya uyunji ukuti, ‘Zagha kuno,’ naloli akwiza, sona nanti inkumubuzya umuzya wane ukuti, ‘Bomba ichi,’ po naloli akuchibomba!”

10Bo u Yesu ivwa zinizi, akaswigha nkani, po akababuzya abantu babo bakamukonkagha ukuti, “Naloli inkubabuzya ukuti ntamwaghite nalumolumo umuntu uwa lwitiko ulukulu ngati we uyu pakasi pa ba Izilayeli. 11#Luk. 13.29Naloli inkubabuzya ukuti abantu abinji aba kubufumilo naba kubwinjililo ubwizuba bakwiza pakwiza nukwikala pasi poka nu Abulahamu, nu Yisaki nu Yakobo palusekelo mu Bumwene ubwa Kumwanya. 12#Mat. 22.13, 25.30; Luk. 13.28Abantu babo bakwinong'ona ukuti bakwiza pakwinjila mu Bumwene ubwa Kumwanya bakwiza pakusumbiwa kuzi muchisi. Kulakula bakwiza pakulila nu kusyeketula amino ghabo.” 13Po u Yesu akamubuzya usongo uwa basilikali yula akati, “Bwelagha, chicho wachisubila chikwiza pakubombiwa.”

Panapo na panapo umubombi uwa songo yula akapola.

U Yesu akupozya abantu abinji

(Mlko. 1.29-34; Luk. 4.38-41)

14Bo u Yesu injila bulo munyumba iya Pitala, akamwennya unyinavyala uwa Pitala alambalaye pachitala pakuti akabinagha izegema. 15Akamupalamasya inyobe, po umukolo yula akapola. Akanyamuka nukwanda pakubabombela.

16Pachamabwila abantu bakiza kwa Yesu na bantu abinji babo bakaba ni mizimu imibibi. U Yesu akefya imizimu yila nizyu bulo nukubapozya abantu ababine bosi. 17#Yes. 53.4Akabomba bunubu ukuti zizyo umulaghuzi u Yesaya akanena zikwanilisiwe ukuti,

“Akanyamula ububavu bwitu

nukwefya ububine bwitu bosi.”

Nizya kumukonka u Yesu

(Luk. 9.57-62)

18Bo u Yesu ennya ukuti ichilundilo icha bantu chamuzyungulila, akabalamula abamanyili bache akati, “Twende tulobokele kwisila ilinji ilya nyanja.” 19Umumanyisi uwa Ndaghilo akiza kukwache nukuti, “Wee Mumanyisi, inkwiza pakukukonka kosi kuko ukubuka.” 20U Yesu akamwamula akati, “Abakambwe bali ni mpako, ni viyuni vyope vili ni vivumbo, loli u Mwana uwa Muntu ate nu buyo ubwakughonapo nu kutuzyapo.”

21Umumanyili uyunji akati, “Wee Mwene, unyitikizye ukuti imbuke pakumusyila tasi utata wane.”

22U Yesu akamula akati, “Nkonka. Baleke abafwe basyilane abafwe benebene.”

U Yesu akupumizya impepo

(Mlko. 4.35-41; Luk. 8.22-25)

23Po u Yesu akakwela mubwato nukubuka poka na bamanyili bache. 24Umwakuchenusya bulo impepo iyakoghofya yikanda pakukuka panyanja, umwakuti ubwato bukaba papipi pakudwiba. Loli u Yesu akaghona utulo. 25Abamanyili bache bakabuka nukumunyamusya ukuti, “Wee Mwene tupoke! Ennya, tuli pakudwiba!”

26U Yesu akamula akati, “Mwe bantu balwitiko ulunandi, nkimba choni chicho mukunyila?” Akanyamuka nukulamula impepo na mayigha ghala ukuti vileke, umwakuti panyanja pakaba myee nkani.

27Umuntu wesi akaswigha, po akati, “Nkimba muntu wenu yunuyu, umwakuti impepo na mayigha vikumwivwila.”

U Yesu akubapozya abantu aba mizimu imibibi

(Mlko. 5.1-20; Luk. 8.26-39)

28Bo u Yesu afika muchigaba icha Gadala kwisila ilinji ilya nyanja, akakomana na bantu babili, babo bakafumila ku mapumpa. Abantu banaba bakaba ni mizimu imibibi, sona bakaba balwani nkani, umwakuti atakabapo nayumo umuntu uwakwenda kuzila yila. 29Abantu bala bakakolomoka nkani bakati, “Nkimba ukulonda ichoni naswe we Mwana uwa Chala? Nkimba wiza pakutufunda, bo na kabalilo kache katafikiye?”

30Papipi nu buyo bula pakaba umudimo umukulu uwa ngulube ghukalyanga. 31Imizimu imibibi yikamulaba u Yesu yikati, “Nanti ukulonda pakutwefya muno, ututume mu mudimo uwa ngulube ghula.”

32U Yesu akayibuzya akati, “Bukagha!” Imizimu yila yikafuma nukwinjila mu ngulube. Umudimo ghosi uwa ngulube ghukachimbilila kubusulumuka nukuwila munyanja nukufwila mulamula.

33Abadimi aba ngulube zila bakachimbila nukubuka mukaya nukunena vyosi vivyo vikababonekela abantu babo bakaba ni mizimu imibibi. 34Abantu bosi mukaya kala bakabuka pakumwennya u Yesu. Bo bamwennya, bakamulaba ukuti epemo muchigaba chabo chila.

Jelenleg kiválasztva:

Matayi 8: LMBNT2016

Kiemelés

Megosztás

Másolás