Matayi 10

Abatumiwa 12

(Mlko. 3.13-19; Luk. 6.12-16)

1U Yesu akabitizya poka abamanyili bache 12 bala nukubapa ubulaghili ubwakwefezezya imizimu imibibi nukupozya ububine ghosi ubwakulekanalekana. 2Amatabwa agha batumiwa 12 bala gho agha: Uwakwanda we Simoni yuyo akitiziwanga ukuti we Pitala nu wamwabo u Andeleya, nu Yakobo nu wamwabo, nu Yohani abana aba Zebediya, 3nu Filipu, nu Batolomeyo, nu Tomasi nu Matayi umusonkezya sonko, nu Yakobo umwana uwa Alufeyo nu Tadayi, 4nu Simoni uwa akabukatila, kako kakalondagha ukuti mu Izilayeli mubanje ubusatuke nu Yudasi Sikaliyoti, yuyo pisinda pache akamubika u Yesu munyobe izya balwani.

U Yesu akubatuma 12 bala

(Mlko. 6.7-13; Luk. 9.1-6)

5U Yesu akabatuma abatumiwa 12 bala nukubabuzya ukuti, “Mutakabukaye pakasi pa bantu babo bate ba Yuda, pamo mutwaya tosi utwa mu Samaliya. 6Loli mubuke pakasi pa ba Izilayeli, babo bayanite bulo ni ng'ozi zizyo zisobelite. 7#Luk. 10.4-12Bukagha mulumbilile ukuti, ‘Ubumwene ubwa Kumwanya buli papipi!’ 8Pozya ababine, zyusya abafwe, swefya abamambombo nukwefya imizimu imibibi. Mwapokela umwakusita ukulipila, po namwe mupe ukusita ukulipiliwa. 9Mutakasende indalama izya golide pamo izya siliva pamo izya mukuba munyambi zyinyu, 10#1 Kol. 9.14; 1 Tim. 5.18pamo inyambi iya pa bulendo, pamo ilaya ilya palubazu, pamo inkwato, pamo indisa iyakwendela, pakuti uwambombo abaghiye pakupokela vivyo akusobelwa.

11“Nanti mwafika mukaya, mumulonde umuntu yuyo iyanizye pakubapokela akiza, mwikale nawe mupaka papo mukwiza pakwepapo pabuzilo bula. 12Bo mukwinjila munyumba munenaye ukuti, ‘Umutende ghubanje namwe.’ 13Nanti abantu aba munyumba yila bakubapokela akiza, ukulamuka kwinyu kwa mutende kubanje nabo, loli nanti batakubapokela akiza, nyokela nu mutende winyu. 14#Imbo. 13.51Nanti abantu bamo munyumba, pamo mukaya batakubapokela akiza pamo ukubateghelezya, epapo pabuzilo bula nukukung'unta ulufumbi munyayo zyinyu pakulanjizya ukuti mwabakana. 15#Mat. 11.24; Ubw. 19.24-28Naloli inkubabuzya ukuti pisiku lilyo u Chala akwiza pakubalonga abantu, u Chala akwiza pakubapelela ichisa nkani abantu aba mu Sodomu nu Gomola ukuchila abantu aba mukaya kala.

Ukuvwimiwa kuko kukwiza

(Mlko. 13.9-13; Luk. 21.12-17)

16 # Luk. 10.3 “Ivwa kuno! Inkubatuma amwe ngati zyo ng'ozi pakasi pa mpumpi. Po mubanje mwe bachevu ngati yo njoka, sona mubanje bololo ngati yo nkunda. 17#Mlko. 13.9-11; Luk. 12.11-12, 21.12-15Muchebaye na bantu pakuti bakwiza pakubalema nukubabika pamaso pa balongi, po bakwiza pakubasyempa munyumba izyakwiputilamo. 18Pachifukwa icha nene bakwiza pakubasitaka pamaso pa balaghili na pa bamwene na bantu abakuzi ukuti mubikile ubwakaboni nizya ane. 19Loli bo babasitaka, mutakapasyanje ukuti, ‘Nkimba tukwiza pakunena ichoni?’ Pamo ukuti, ‘Nkimba tukwiza pakwiyimila buli-buli.’ Bo akabalilo kala kakwana, mukwiza pakupeghiwa amazyu aghakunena. 20Pakuti amazyu ghagho mukwiza pakunena ghatakwiza pakuba ghinyu, loli ghakwiza pakuba gha Muzimu uwa Ghuso uwa kumwanya, ukunenela mumwinyu.

21 # Mlko. 13.12; Luk. 21.16 “Abantu bakwiza pakubabika abawamwabo ukuti baghoghiwe, sona na bawise bope bakwiza pakubabombela bunubu abana babo. Abana bakwiza pakubasambukila abapapi babo ukuti baghoghiwe. 22#Mat. 24.9, 13; Mlko. 13.13; Luk. 21.17Abantu bosi bakwiza pakubabenga pachifukwa chakuti mwe bakonki bane. Loli umuntu wesi yuyo ajimba mupaka pabumalilo akwiza pakupokiwa. 23Nanti bakubavwima mukaya koka, chimbilila mukaya akanji. Naloli inkubabuzya ukuti mute mukamalizye imbombo zyinyu mutwaya tosi utwa mu Izilayeli, bo u Mwana uwa Muntu atizite. 24#Luk. 6.40; Yoh. 13.16, 15.20Umumanyili ate wapamwanya ukumuchila umumanyisi wache, awe, sona uwambombo ate wapamwanya ukumuchila u mwene wache, awe. 25#Mat. 9.34, 12.24; Mlko. 3.22; Luk. 11.15Umumanyili atabaghiye pakuyana nu mumanyisi wache, sona umuzya ngati we mwene wache. Nanti usongo uwa nyumba akwitiziwa ukuti we Belezebuli, kokuti abantu aba munyumba yila bakwiza pakwitiziwa ni tabwa ibibi ukuchilapo.

We wenu yuyo tumunyilaye

(Luk. 12.2-7)

26 # Mlko. 4.22; Luk. 8.17 “Po mutabakanyilaye abantu. Ichintu chosi chicho chivwinkiwe chikwiza pakuvwinkuliwa, sona ichintu chosi chicho chakubusyefu chikwiza pakuboneka pabuzelu. 27Zyosi zizyo inkubabuzya kubusyefu mukwiza pakuzinena pabuzelu, sona zyosi zizyo mwivwa pakuteketa mukwiza pakufumusya pachisonje. 28Mutakabanyilaye abantu babo bakughogha umubili, loli batangaghogha umuzimu. Nkani-nkani mumunyile u Chala yuyo anganangannya vyosi umubili nu muzimu mu Gehena. 29Nkimba utwatiti tubili tungaghuliziwa ni salabazya yoka? Loli nakamo akatiti kako kakuwa pasi ukusita Ughuso uwa kumwanya ukuzimanya. 30Loli amwe, zyope ni sisi izya kumitu yinyu zibelengiwe. 31Po mutakanyilaye pakuti amwe mwe bapamwanya nkani ukuchila utwatiti utwinji!

Nizya kumwitika nu kumukana u Kilisitu

(Luk. 12.8-9)

32“Umuntu wesi yuyo akunyitika pamaso pa bantu, nane bulo inkwiza pakumwitika pamaso pa Tata wane uwa kumwanya. 33#2 Tim. 2.12Loli umuntu wesi yuyo akunkana pamaso pa bantu, nane bulo inkwiza pakumukana pamaso pa Tata wane uwa kumwanya.

Ghute mutende, loli nkondo

(Luk. 12.51-53, 14.26-27)

34“Nkimba mukwinong'ona ukuti niza pakubika umutende pachisu ichapasi? Awe, ntakizila pakubika umutende, loli nkondo. 35Nkiza pakubika ubulwani pakasi pa mwana umulumendo nu wise, pakasi pa mwana umulindu nu nyina, sona pakasi pa mulasagha nu nyinavyala. 36Abalwani aba muntu bakwiza pakuba bantu aba munyumba yache.

37“Umuntu wesi yuyo amughanite nkani uwise pamo unyina ukunchila, atabaghiye pakuba mumanyili wane; umuntu wesi yuyo amughanite nkani umwana umulumendo pamo umulindu ukunchila, atabaghiye pakuba mumanyili wane. 38#Mat. 16.24; Mlko. 8.34; Luk. 9.23Umuntu wesi yuyo atiyanizye pakuyimba mupaka nukufwa nu kunkonka, atabaghiye pakuba mumanyili wane. 39#Mat. 16.25; Mlko. 8.35; Luk. 9.24, 17.33; Yoh. 12.25Umuntu wesi yuyo akulonda pakubupoka ubumi bwache, akwiza pakubutagha. Loli umuntu wesi yuyo akubutagha ubumi bwache pachifukwa icha nene, akwiza pakubupoka.

Nizya muvwalo

(Mlko. 9.41)

40 # Mlko. 9.37; Luk. 9.48, 10.16; Yoh. 13.20 “Umuntu wesi yuyo akubapokela akiza akumpokela nene. Umuntu wesi yuyo akumpokela akiza, akumupokela wepe bulo yuyo akantuma. 41Umuntu wesi yuyo akumupokela umulaghuzi pachifukwa chakuti we mulaghuzi, akwiza pakupokela umuvwalo uwakuyana nu uwa mulaghuzi; sona umuntu wesi yuyo akumupokela umugholosu pachifukwa chakuti we mugholosu akwiza pakupokela umuvwalo uwakuyana nu uwa mugholosu. 42Umuntu wesi yuyo akumupa ulubako ulwa mizi amakatazu yumo uwa bamanyili bane pachifukwa chakuti mumanyili wane, naloli inkubabuzya ukuti akwiza pakupokela umuvwalo wache.”

Jelenleg kiválasztva:

Matayi 10: LMBNT2016

Kiemelés

Megosztás

Másolás