CHABANGCHAM 7
7
Duidet
1 Rapiu niu Noah khuga din-e, “Nakikhunmai mathiutu maluang lujiu malee lung gase ngut milo; kadihpiriga kamaji kambo Iniu daolubo sira naronna-e: 2Chara-chengga masanbo khaoring hina ndah chinnia, chiudi masan makbo khaoringra ndah khat khailulo. 3Thingna hinadi ndah chinnia khailulo. Kadihpiriga pi lungpad lanra jengniu khaoring hina khatdi thingnatu haichiu kam lulo. 4Tuhoi gasu jeng chinnia sailam, Iniu nchun n-nien saomakjiu jeng atai tingriu langwang khaine, sichiujiu Iniu damkhai mibo khaoring-khaona hinatu kam maha mine.” 5Sichiujiu Rapiu niu chamtan pikhaibo hinase Noah niu kam khaide.
6Kadihpiriga tadui diwangbo tingga Noah hai tingkum kai charuk tangmide. 7#Mt 24.38,39; Lk 17.27.Panao panai, khatdi panahmaidung nai pamumaidung paliu duidet situ marira malee lungga ngut mide. 8Khaoring hina khatdi thingna hina, chara-chengga masanbodi, masan makbodi tammakjiu, 9malee lung gase Tingwang niu chamtan pikhaibo kumjiu Noah saisui ngut mide. 10Jeng chinnia saiga duidetse wangsude.
11 #
2 Pe 3.6. Noah niu takum kai charuk tangmiboga, niabo hiugu jeng kariu-je-chinniakiubo nai kadihpiriga bambo aladky hina lepadjiu, khatdi tingpukgu tingriuki hina lepadjiu, 12nchun n-nien saomakjiu jeng atai kadihpiriga tingriu kiu sude. 13Sibo nai siak Noah niu panao khatdi panahmai khang sum, Shem, Ham khatdi Japheth khatdi paliu naodungtu majang lujiu malee lungga ngut mide. 14Sichiujiu chaky-khaodi, nkan-khaodi, kati kadi tammakjiu, khatdi thingna hinatu paliuniu majang ngut mide. 15Tingwang niu chamtan pikhaibo saisuijiu malee lung gase karingbo khaoring hina, papui pareng khat khat Noah saisui lujiu ngut mide. 16Sibosai Rapiu niu Noah sailam akham mide.
17Tadui naibo hai jeng atai khangmide, sichiujiu maleese maten khangra tadui hai kusui mide. 18Tadui hai kubi-bi khangjiu malee hai malam khangsude. 19Tadui hai kengkhangjiu kuthubo maluong sidi naimide; 20haise kukhangjiu maluongton riga tachao kariu-je-mangiukiu tangbo kukhang mide. 21Kadihpiriga bambo khaoring hina—thingna, chakhao khatdi chamaina hina shai mide. 22Kadihpiriga bambo pasiu kathi hina shai mide. 23Rapiu niu kadihpiriga bambo khaoring-khaona—chakhao, chamai khatdi thingna hinatu kam maha kammide. Masiak khaibo sira Noah khatdi pasai suilujiu malee lungga ngutmai ronna-e. 24Naimikpui kai khat-je-ringiu lungga tadui hai npikiu makge.
Jelenleg kiválasztva:
CHABANGCHAM 7: LIANBSI
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
Liangmai Naga (Re-Edited) - Masanbo Bible
Copyright © 2014 by The Bible Society of India
Used by permission. All rights reserved worldwide.
