Mateo 4
4
1Henyihaha Yesu badi akunkwishwe na Kikudi-E-Selelee mu kabāka, mu kutompibwa na dyabola. 2Na habashīle biakudia mafuku makumi ananka, kanya na bufuku, kumongo badi na nsala. 3Habafikile mutompi-a-munda kwadi, bakwile’shi: Su obe we mwan’Efile Mukulu, kamika’shi, ano mabwe ealule ta ntampa. 4Anka e bālulwile’shi: Ubafundjibwe’shi; Muntu takekala na muwa ku mampa anka’o, anka ku bishima bioso abituku kukanwa kw’Efile Mukulu. 5Biabia: diabola bamukamishe ku kibalokihatulwe-kishila, bamushadikile ku masaka wa ntempelo. 6Bamulungwile’shi: Sue Mwan’Efile Mukulu weihone hashi, mwanda ubafundjibwe’shi: Akakulayila bamwikeilu b’E, abo namu abakakutwala mu maboko abo, tala okakokola lwā lwobe kwībwe. 7Yesu bamulungwile’shi: Kibafundjibwe kabidi’shi: Tokatompa Yehowa, Efile Mukulu obe. 8Dimonyi diabola bamukamishe ha ngulu mula eyee, bamulesheshe mafumu oso a hanohansenga na ntumbo yao; 9Bamulungwile’shi, nankakuha bino bintu bioso s’onkunamine kundangwila. 10Binyibiabia Yesu bamulungwile’shi: Katuka Satana, mwanda ubafundjibwe’shi: Okalangwila Yehowa, Efile Mukulu obe, anka E okafubila. 11Henyihaha diabola bamulekyele, bamwikeilu abafikile mu kumukwashia.
12Habahushishe’shi, Yoano belwa mu lukano, batentulukile ku Ngadilea; 13Bakatukile mu Nasaleta, bayile mu kushāla ku Kahanauma, kibalo ki ku bukunkula bw’eshiba, ku mahia a Sebuluna na Nefatale. 14Biabia kukumbasha bibakwile mutemuki Esaiye’shi. 15Mahia a Sebuluna, na mahia a Nefatale kw’eshinda di’eshiba dia mema kwishīya dia Yodano, Ngadilea a Badjentaila; 16Bantu babashēle’mufito babamwene etata dikata, na kwi bantu babashēle mu kihindji na ku mwesheshe wa lufu, etata dibamwekyele.
17Ku kia kihindji Yesu babangile kulungula’shi; Elangei munda, mwanda bufumu bwa mwiilu butadi hehi.
18Yesu habatambukile kwishiba dia Ngadilea, bamwene balume babadi ba muntu’mune, Shimone aitanyinwa bu Petelo, n’Andeleyo mukwabo, kwete kwela bukondja’mema, mwanda babadi bampībwe ba mishiha. 19Bebalungwile’shi, Ndondei, nenwalule nwikale bu bampībwe ba bantu. 20N’abo namu kahindji nāka babalekyele makondja’bo, tabamulondo. 21Habadi ende kumpala, bamwene bangi balume babidi, Yakoba mwan’a Sebede, na Yoano mukwabo mu bwato na Sebede shabo; abatelula makondja’bo; E bebaitanyine. 22Abo, kahindji nāka babalekele bwato na shabo, tabamulondo.
23Yesu batambukile luhese lwoso lwa Ngadilea, balambukishe mu bitumbwilo biabo, balungwile mukāndu wibuwa wa bufumu bwa mwiilu, bahashishe bihaso bioso bia masungu, na kubofula koso kwa mbidi kwa bantu. 24Ntumbo ye yibahalakene mu luhese lwoso lwa Sidiya; babafikile kwadi E bantu boso babadi abakumbu, babakwatwa na masungu e bungi, na kwinyenga kwa mbidi, na baba bakwatshibwa na mikishi, na baba babadi na mombe, na bangi babadi na busungu bwa kususa, E bebahashishe. 25Biabia bibumbu bikata bibamulondele, bibafikile ku Ngadilea, na ku Dekahodi, na ku Yelusalema, na ku Yudea, na kwishīya dia Todano.
Jelenleg kiválasztva:
Mateo 4: NTLK52
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
© 1952 Alliance Biblique de la République Démocratique du Congo