Sam 10
10
1Buyambam tapa, ga dasingge napmake paku maa yuayak?
Ga dasingge tapduu nata meya kaat komune na napmake paku kusopunggayak?
2Wai aminda yamandet sike kekekngana wena aminu apasiwan mainingge yawakaing.
Yawake aminu wa kekekngana wena aminu panggaganutnangge natake gapma kwaiwan undang pukuning.
3Wai aminda yamandet sike sanga wai musiaatang nataak kaknga tawake tasinggak.
Tawake tasike aminu sangabamde geengukgak kapa apbaknganggak. Apbakngake ita Buyambamtapa inisapduke ie masa imunggak.
4Masa imuke na kopsaapa yuat ngang musiane moo siknga nataak.
Natake Buyambam tapae dua natapan singgak. Aho. Natdetdetnaatangu Anutue dua siknga nataak.
5Sike sangabamu ita pasinggau takekan singgak.
Buyambam tapa, ita gae natdetdetde mateknga sipaa dua nataak.
Siwan ita sapdut wamu iwanae ayanggak.
6Itanu anzing nataak, “Na kekeknga yuat. Sanga tapatuta dua siknga kwasiwik,” ngang nataak.
Siwan, “Nata meya dua kawit. Aho, asinggan asinggan musipma tatanga natake yuwit,” ngang yanggak.
7Ita wamu wai yake aminu kundue asinggan yanisapdukgak. Yanisapduke ita kem wam gatu gwaut wamu aminu kundue yanikapmanggak.
Siakan, ita wamu waiaknga aknga yake gutonga kwaapzang pasinangge yanggak.
8Gatu itakan yotgapma kwaimune kusopuke yuwawan aminu noman amin tapata apan tanguwan kupikge natake yuak.
Siakan, ita akusopuke kayuwawan aminu tapatu tapatuta apa kake zipan kumningge kayuak.
9Unzing kaap zongu laion ngang yanikaingga ganangiatang kusopuke kayuaing binga kayuak.
Siwan akusopuke kekekngana wena amin panggaganutnangge kayuak.
Ita yapapnaatang panggagunuke kaipake kunggak.
10Ita ayaitapakusike yuwawan aminu kekekngana wena aminu zaatgaman maikaing.
Siakan, wai aminu waapatane kekeknganata ayapbikgak.
11Ayapbike ita anzing nataak, “Anututa gutonga nata pasinggatdenu nangaakan dua nataak.
Ita na dua nanduyuak. Kai gwa dopusangakutde nandupnanga dua.”
12Buyambam tapa, ga apso. Anutu, apuke gata wai aminu waakwau atasiwi mainong.
Sike gata aminu meya pakaing aminde dua botawim.
13Siwan wai aminu waapata gae masa gamuke musiaatangu anzing nataak,
“Nata gutonga tasinggatde Anututa meya yake dua namik.”
Dasingge, aminu waapa gae dua ba gwauke yuak?
14Siwan ngana wai aminu waapata wai takngatu takngatu pasiwan aminu kunduta meya pake maike yuwawan gata katak akaayak.
Akake gata toknga ba meya aminu kunduta kaaingu gata kake waaminu gatayamunangge atandaknganggayak.
Ngan, ga sangana wena aminu gae gepbiatang koke yuwawanu gata asinggan gatayamunggayak.
Siakan, aminu nana gwa kumbuu kekekngana wena apaya gata gatangamunggayak.
15Gata wai amindane kataknga puke kekekngana pasiwi sopunong.
Pasiwi sopuwan kotim tasike waiaknga waaminda tasikaingu
gatu dua tasiwan kaya.
16Buyambamtapa Kingu asinggan asinggan yuwik.
Yuke ita katum aminu inane kep komune yuke ie masa imukaingu yanikwasiwan kuke gatukande wena sining.
17Buyambam tapa, gata aminu meya takngatu takngatu pake yuainggane tumuk wamnae atnataayak.
Wamna natake gata musia papi kekekanong.
18Siwan wai aminda meya takngatu takngatu toitoitde yaman musiane meya nataaingu gata akgatayamunggayak.
Gatayami aminu kepdakane nanata gatu waaminu dua pasiwan gwautning.
Jelenleg kiválasztva:
Sam 10: wncB
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
© 2001, Wycliffe Bible Translators, Inc. All rights reserved.