Lii Lolo dhu Uru Tèka 10
10
Ana-èpu Noh dènge ana-èpu Yafet
1Èle èi aae, ka ana-ana Noh abhu ana-èpu. Nuka ana-èpu nèti Sem, Yafet, dènge Ham.
2-5Ana-èpu Yafet, nuka: Gomer, Magog, Madai, Yawan, Tubal, Mesek dènge Tiras. Èci-èci ka dènge lii, suku, aa dènge rai ra.
Ana-èpu Gomer, ka: Askenas, Rifat dènge Togarma.
Ana-èpu Yawan, ka: Elisa, Tarsis, dhèu Kitim, dènge dhèu Dodanim dhu pea ètu sebhe dhasi.#10:2-5Abhu sasuri cahagꞌe dhu uru sèra, peka na ‘Rodanim’.
Ana-èpu Ham
6Ana-èpu Ham, ka: Kus, Misraim, Put, dènge Kanaꞌan.#10:6Kus èèna, nuka ‘Etiopia’. Aa Misraim, nuka ‘Masir’.
7Ana-èpu Kus, ka: Seba, Hawila, Sabta, Raema dènge Sabteka.
Ana-èpu Raema, ka: Syeba dènge Dedan.
8Ana mone Kus, ka, Nimrod. Nèngu ne, kapala musu dhu uru tèka, aa èra. 9Aꞌèra na mai nèti LAMATUA, aa nèngu kahèi jꞌajꞌi dhèu dhu èra bia magèla badha. Nèti èèna ka, dhèu biasa peka na, “Sèna ka èu more dhèu dhu èra bia magèla badha, sèmi Nimrod, dhu abhu aꞌèra nèti LAMATUA.” 10Era na, mulai uru nèti rae Babel, Erek Akad, toke Kalne. Rae se aaꞌi-aaꞌi ra, ètu rai Sinear.#10:10Sinear èèna, ngara leo nèti Babel. Limuri ne, era èèna ètu Iran dènge Irak. 11Nèti era sèra, na nare hari Asyur. Ka na patitu kota Niniwe, Rehobot-Ir, Kala, 12dènge Resen, ètu talora aae Niniwe dènge Kala. Aaꞌi-aaꞌi sèra, kota-kota kapai hua.
13Ana-èpu Misraim, ka: dhèu Ludim, dhèu Ananim, dhèu Lehabim, dhèu Naftuhim, 14dhèu Patrusim, dhèu Kasluhim, dènge dhèu Kaftorim. Dhèu Kasluhim nuka bèi-baki nèti dhèu Pilistin.
15Ana uuru Kanaꞌan, nuka, Sidon. Kanaꞌan jꞌajꞌi bèi-baki nèti dhèu Het, 16dhèu Yebusi, dhèu Amori, dhèu Girgasi, 17dhèu Hiwi, dhèu Arki, dhèu Sini, 18dhèu Arwadi, dhèu Semari, dènge dhèu Hamati.
Ana-èpu Kanaꞌan se, pea palème dꞌai era dhu kajꞌèu, 19toke too rai rèngu mulai nèti Sidon taruu asa Gerar, dꞌai Gasa. Nèti èèna, laꞌe dꞌai Sodom, Gomora, Adma dènge Seboim, dꞌai kota Lasa.
20Rèngu aaꞌi-aaꞌi sèra, ana-èpu Ham. Èci-èci dènge lii, suku, aa dènge rai ra.
Ana-èpu Sem
21Sem, aꞌa Yafet, nèngu ka jꞌajꞌi bèi-baki dhèu Eber.#10:21Abhu dhèu dꞌèlu-mèu cahagꞌe dhu peka na, dhèu Eber sèra, nuka ‘dhèu Ibrani’.
22Ana-èpu Sem, ka: Elam, Asyur, Arpaksad, Lud dènge Aram.
23Ana-èpu Aram ka: dhèu Us, dhèu Hul, dhèu Geter, dènge dhèu Mas.#10:23Mas, ngara leo na, ‘Mesek’.
24Ana Arpaksad ka, Sela. Ana Sela ka, Eber.
25Ana Eber, mone dhèu dua. Ana uuru, ngara na Pelek (dhu sasoa na ‘palème era’), lula taa èèna dhèu pea palème ètu rai-haha ne. Ngara ari na, Yoktan.
26Ana-èpu Yoktan, ka: Almodad, Selef, Hasar-Mawet, Yera, 27Hadoram, Usal, Dikla, 28Obal, Abimael, Syeba, 29Ofir, Hawila, dènge Yobab. Rèngu aaꞌi-aaꞌi se, ana-èpu Yoktan.
30Era pea rèngu, mulai nèti Mesa, taruu dꞌai Sefar, nuka era dhu kabhuku re sebhe dhimu.
31Rèngu aaꞌi-aaꞌi se, ana-èpu Sem. Èci-èci ka dènge lii, suku, aa dènge rai ra.
32Aaꞌi-aaꞌi se, ana-èpu Noh, èci-èci ka dènge suku ra. Ropa èi aae lala èle, rèngu seꞌe ka pea papènu lème rai-haha ne.
Jelenleg kiválasztva:
Lii Lolo dhu Uru Tèka 10: nfaNTPO
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
© 2012, Wycliffe Bible Translators, Inc. All rights reserved
