Lia Uluk Fohon 2
2
1Hodi nunia, Maromak naseꞌi laleꞌan no raiklaran no sasoin hotu-hotu.
2Awan, kona baa loron dala hitu. Baa loron nia, Maromak nanawa serwisu. 3Hodi nunia, Nia nalo loron dala hitu nia, dadi baa loron boot. Nia nalo nunia, tan hotu-hotu mak Nia naseꞌi nia, tetuk no nesan tiꞌan. Hotu Nia nanawa baa loron dala hitu. 4aLia Maromak naseꞌi laleꞌan no raiklaran, nunia.
Lia Maromak naseꞌi feto no mane
(Mateus 19:4-6; Markus 10:4-9; 1 Korintus 6:16, 15:45,47; Efesus 5:31-33)
4bMAROMAK foin nahuu naseꞌi laleꞌan no raiklaran, 5-6ai horis la noo dauk, tan MAROMAK la natuun udan dauk. Baa oras nia, ababun dei saꞌe nosi rai, nabotes rai. Ema bodik nalo toꞌos moos, la noo dauk. 7Hotu MAROMAK nola rai isin oan ida, nodi naseꞌi ema. Nia nuu natama nawan baa ema nia inun, hotu ema nia moris.
8Hotu MAROMAK loke toꞌos ida iha rai Eden lorosaꞌe. Nia natama ema nia nein iha toꞌos nia. 9Iha toꞌos nia laran, MAROMAK nahoris ai horis kabaas oi-oik mak ema bele naa. Nia moos nahoris ai huun rua iha toꞌos klaran. Kalo ema naa ai huun ida fuan, bele moris nima-nimak. Naa ai huun ida seluk fuan, bele natene saa mak diꞌak no saa mak aat.
10Noo mota ida mak suli nabotes toꞌos nia. Suli sai nosi toꞌos nia, noo sorun haat. 11Sorun ida, naran Pison. Sorun nia, suli nalik rai Hawila mak noo mean waꞌin. 12Iha nia, noo mean isin, ai horis mahoo raan morin no fatuk mahoo matan leen. 13Mota sorun ida tenik, naran Gihon. Sorun nia nalik rai Kus.#2:13Uluk, rai neꞌe naran ‘Kus’. Oras neꞌe, nakoꞌak rai Etiopia no tama rai Sudan iha rai Afrika lorosaꞌe. 14Mota sorun ida tenik, naran Tigris. Sorun neꞌe, dadi kladik iha rai Asyur#2:14Oras neꞌe, rai Asyur tama rai Irak. lorosaꞌe. Mota sorun ida tenik, naran Efrat.
15MAROMAK natama ema nia baa toꞌos Eden atu babilan toꞌos nia diꞌa-diꞌak. 16Nia naruka naꞌak, “O bele maa ai fuan hotu-hotu iha toꞌos neꞌe laran. 17Mais noo ai fuan ida mak o la bele maa. Ai fuan nia, nosi ai huun mak foo natene saa mak diꞌak no saa mak aat. Kalo o maa ai fuan nia, o nanis mate.”
18Hotu MAROMAK katak naꞌak, “La furak ema neꞌe moris mesan. Diꞌak liu, Haꞌu kaseꞌi foo maluk ida mak makonak no nia.”
19-20Baa oras nia, MAROMAK raꞌut nola rai isin nalo baa osa no lotuk no manu oi-oik. Hotu, Nia nodi sia baa ema nia, nebee ema nia tau naran baa sia. Ema nia nanaran kedan osa no lotuk no manu nia sia, ida-idak no naran duꞌuk. Mais nia duꞌuk, la noo maluk makonak.
21Hotu MAROMAK nalo ema nia toba dukur. Oras toba dukur, MAROMAK nasai nola nosen ruin ida, hotu taka nikar kanek nia. 22Nia naseꞌi feto ida nosi nosen ruin nia, hotu latan baa ema nia. 23Naree feto nia, ema nia dale naꞌak,
“Haa! Neꞌe lai! Neꞌe foin kona baa haꞌu!
Niakaan ruin manesak no haꞌukaan.
Niakaan isin moos manesak no haꞌukaan.
Haꞌu kanaran nia ‘feto’, tan nia dadi nosi mane.”#2:23Iha lia Ibrani, ‘mane’ naꞌak ‘ish’. ‘Feto’ naꞌak ‘isha’. Iha neꞌe, ema nakdiuk lia fuan naꞌak, “iisha (feto) dadi nosi ish (mane).”
24Tan lia nia, mane musti laꞌo nela inan no aman,
nebee moris neon ida no feen,
tan sia dadi mesak tiꞌan.
25Oras nia, sia rua sei nakwalan, mais sia la moe.
Jelenleg kiválasztva:
Lia Uluk Fohon 2: tetNTPO
Kiemelés
Megosztás
Másolás
Szeretnéd, hogy a kiemeléseid minden eszközödön megjelenjenek? Regisztrálj vagy jelentkezz be
© 2013, Wycliffe Bible Translators, Inc. All rights reserved.
