San Marcos 9

1Rágaba Jesús‑ni ke:

―Netiru ria: ttu chupale se'ele nii nnanna labí chi uttile axtaliba ganna chi bilenle isia Tata Do Yebáha innabie lhe ra tsitsi lebie lhe.

Jesús‑ni tti due iki i'iyaha besea lobie

(Mt. 17:1-13; Lc. 9:28-36)

2Iki de chi ute xxupa ubisaha nna tti ugwapi Jesús‑ni iki ttu i'iya xeni do niha, chebie sun Pedro‑niba lhe Jacobo‑ni lhe Juan‑ni lhe. Niha besea lobie arlokani. 3Ka xoeha raka lhalhabakana lhe sitsi túba beyakakana lhe. Ni ttú benne do yiesi lo yu‑ni dhaabie otsitsie ttu lari atti beyaka ka xo Jesús‑ni la'ania. 4Lengwa chi bela'akinna uka xxe Elías‑ni lhe Moisés‑ni lhe, se'eke gwenne len Jesús‑ni. 5Pedro‑ni nna rana Jesús‑ni:

―Maestru, ¡gwen tte uka se'etu nii! Usiatu tsunna ka yo'o lhaga gele: ttu gelu nna ttu ge Moisés‑ni nna attu ge Elías‑ni nna.

6Aníha‑ba rana kumu de labí yuna bixa innána de si rasilakinna. 7Nianna tti bebe tteba ttu bea ata se'ekeha. Lhe'e beaha nna biyien tsi'i ttu benne unnebie, ree:

―Benne‑ni anke Xi'inia lhe rakati gebie lhe. Ge benne‑ni gwaludo nagale.

8Ttiruba nna ttu nnelaba benitti loo ka benneha, laxkala atti bodeki lokani belannikana abi'iba kwe'ekani nna nurua ka benneha bilákinna, a sunruba Jesús‑ni du niha.

9Tti deyyake reyadike lati i'iyaha nna ra Jesús‑ni kana:

―Nuttu nu kixxi'enle ge nu bilenle‑ni axtaliba ganna neti benne daya yebáha chi beyaka bania attu libe lagwi ge ka benne chi uttiha, la'anialiba nna chi dina kixxi'ale.

10Lake nna labí utixxi'ake, gwa ulu'uba leke nuha. Sun raba luesike: “¿Bíla dianie tti ree deki eyaka benbe attu libe?”

11Nianna tti unnaba tisake Jesús‑ni, ráke bie:

―¿Beakala ka nu rule'ekinna ka benne nu ra lo bia bennabi bodha'an Moisés‑ni nna rákana deki Elías‑ni teeki esie lade'a tte, niala nna tti isia Cristuha?

12Jesús‑ni nna bekabie, ree kana:

―Gwalí galá deki Elías‑ni esie lade'a tte ki ose'e tsebie iyá nu se'e. Ttaka ganna aníha aka nna, ¿beakala ra lo ka yetsi ge Tata Do Yebáha deki neti benne daya yebáha teeki sate xxattaa lhe ku'u ni'akani neti lhe? 13Ttaka neti ria, Elías‑ni chiba bita benneha nna bedhakabakane attiba ukaba lekani, benbakana attiba chi ga'anna lo ka yetsi ge Tata Do Yebáha satebie.

Jesús‑ni beyonie ttu nu kwiti yu'u ttu espíritu xxegwi latini

(Mt. 17:14-21; Lc. 9:37-43)

14Tti besin Jesús‑ni lenie a tsunna ka benneha ata se'e adíru ka benne rudhetinieha, nianna gwaxxakake ixe juisiru ka benne chi tupake abi'iba kwe'e ka benneha. Niha‑gaba se'e ka nu rule'ekinna ka benne nu ra lo bia bennabi bodha'an Moisés‑ni. Ka nuha ridaka lenkana ka benne rudhetinieha. 15Ka benne se'e niha nna tti chi bilákanie dedá Jesús‑ni nna iyábake bebanakanie, nianna biresu ttebake gwatsáke bie ki gwagweke bie padiuxi. 16Jesús‑ni nna unnaba tise ka benne rudhetinieha, ree ke:

―¿Bíunna ridaka lenle ka nuná?

17Ttu benne sela lhe'e ka benne tupa niha nna bekabie ree:

―Xa tata maestru, laa chea xi'in biyúa‑ni len kwinalu. Yu'u ttu espíritu xxegwi latibi nna bodha'anna bi biría, nuní runi ki bittu raka innebi. 18Gaxaba dubi rettina gebi nna tti rurixxi lona bi ribeana kuchina ro'obi, lhe raka rriba lo layabi. Nianna tti rodá yaga ttebana latibi. Chi unnabaa len ka benne rudhetinlu‑ni kini ebeake espíritu xxegwi‑ni latibi, ttaka labí udaake.

19Jesús‑ni nna ree ka benneha:

―¡Aalexa nu a ria leni! ¿Nukalila sa dhua len lebi'i? ¿Nukalila sa utto uchíaya ge nu ruinle? Daka aní gwataxxí nu kwiti‑na.

20Nianna tti gwaxxíke nu kwitiha, ttaka tti bilani espíritu yu'u lati nu kwitiha Jesús‑ni, nianna bexxidi ttebana nu kwitiha, nna betesina na lo yu, lhe ribeana kuchina ro'oni lhe. 21Jesús‑ni nna unnaba tise tata ge nu kwitiha, ree benneha:

―¿Si isá chi ridakabi nuní?

Benneha nna bekabie ree:

―Attiliba ankabi nutoha xa. 22Ixe lidú chi bedelhana bi lo gi lhe bedelhana bi lhe'e inda lhe, ruinna uttina bi. Laxkala ganna gwaka gelu uinlu ttu bixa, gwatuachi lelu ri'itu lhe betechi nálu len ri'itu.

23Jesús‑ni nna bekabie ge benneha, ree:

―¿Gasina nuha nna innálu: “Ganna gwaka gelu”? Neti ria, nu ria leniha gwakaba iyába nu innabana.

24Tata ge nu kwitiha nna unne ttebe idisa, ree:

―¡Gwa ria galá lasia! ¡Rinnabaa len kwinalu, akachi lenlu neti kini tsia chiettiru lasia!

25Tti bilani Jesús‑ni adíla chi rituparu ka benne, nianna bedhaka dise espíritu satsaha, ree nuha:

―¡Espíritu kwechu lhe biría lhe, neti rulisaa lu! ¡Beria lati nu kwiti‑ni nna bitturu eteta'alu latini!

26Espíritu satsaha nna ribesi'abana, nianna tti bodoxxidi xxattana lati nu kwitiha attu libe, niala nna tti beriana. Nu kwitiha nna ttiba ttu nu yatti beya'anna, laxkala ixeba ka benne ráke deki uttibana. 27Ttaka Jesús‑ni nna bedaxxue ná nu kwitiha nna bechidhe na. Nu kwitiha nna beyadha ttebana bedúna.

28Iki de nuha nna uta'a Jesús‑ni lhe'e ttu yo'o. Tti chi due niha sun lenbe ka benne rudhetinieha, nianna tti unnaba tisa ka benneha, ráke bie:

―¿Beakala ri'itu nna a udaatu ebeatu espíritu satsaha?

29Lee nna bekabie, ree ke:

―Luesi espíritu xxegwi‑na labí kwenta eria nuná, ganna abíba innabari'i len Tata Do Yebáha [lhe ganna abíba utte ubina lhe'eri'i lhe].

Jesús‑ni redegixxi'abie attu libe deki teeki uttikane

(Mt. 17:22-23; Lc. 9:43-45)

30Bedábake ata se'ekeha nna beteke daka Galilea‑ni, ttaka Jesús‑ni nna labí raka lebie una ka benne deki rekike niha, 31kumu lee raka lebie ule'enie ka benne rudhetinieha, nianna ree ke:

―Neti benne daya yebáha utekana neti lasi ná ka nu uttikana neti, ttaka ganna chi beyonna ubisa uttiaha, la'ania nna eyaka benbaa attu libe.

32Ttaka lake nna labí rite dákanie ge nu reeha nna rasibakanie innaba tisake bie.

Gasina uni ttu benne kini ake nu loni ge adíke

(Mt. 18:1-5; Lc. 9:46-48)

33Tti chi besinke lhe'esi Capernaum, atti chi se'eke lhe'e yo'oha nna unnaba tisa Jesús‑ni ka benne rudhetinieha, ree ke:

―¿Bí ge nuha ridaka len luesile tti deyu'uri'i nedaha?

34Ttaka lake nna siiba ukake labí bekabike, kumu atti deyu'uke nedaha ridaka len luesike ge nuxake ankake nu ra xxeniru leni. 35Nianna tti urebie nna uxie ka benne tsi'inu (12) rudhetinieha nna ree ke:

―Ganna nuxa ttúle raka lele akale nu loni delo iyále, benne ake nu loniha labí unie deki ra xxeni lebie, akalee nu ixúni iyále.

36Nianna tti bedaxxue ttu nuto bedúe nuha lagwi geke nna tti ulhenie bi'iniha nna ree ke:

37―Nuxaba benne de ria lebie neti, ganna ulabie ttu luesi nuto‑ni, neti nuha rulabi benneha, nna benne ulabie netiha, laa netiga nuha rulabie, Tata kia benne udhelhe netiha, benneha nuha rulabie.

Benne abittu rigu'u ni'e ri'i, gwa duba benneha len ri'i

(Lc. 9:49-50)

38Juan‑ni nna rana Jesús‑ni:

―Maestru, chi bilentu ttu nubiyú reki naa rudettina lu tti rebeana ka espíritu xxegwi yu'u lati ka benne. Ttaka ri'itu nna chi besunatu kini abitturu uinna aná, kumu de labí rekina len ri'i.

39Ttaka Jesús‑ni nna ree kana:

―Bittu usunale ebeana ka espíritu‑na. Kumu lanú ttu benne do rudettie neti tti runie ttu milagru, delo nna eyekie innebie kia. 40Kumu benne abittu rigu'u ni'e ri'i, benneha gwa dube len ri'i. 41Netiru ria, nuxaba benne ganna utebie kwadiba ttu xiga inda i'iyale de ankale benne ria lele neti, de nu unieha nna gugweba Tata Do Yebáha benneha nu tse ralhe dhie.

Jesús‑ni rabie: “Gwaluyú gele ka ixú yiele uinle nu satsa”

(Mt. 18:6-9; Lc. 17:1-2)

42’Nuxaba benne ganna unie dhi yiebie ttu ka benne abittu ra xxeni leke; delába ttu ka benne ria leke neti, ganna benneha unie dhi yiebie ttu ka benneha ki uinke nu satsa, netiru ria, tserula taríane uxxigakana yienie ttu íyya ge mulinu nna udelhakane lhe'e indatooha. 43Ganna nálu‑na abittuba daa siina, nnelaba ruinlu ttu bixa nu satsa lenna, tsa ttela uchú nuná, kumu tserula taríana lu esinlu ata aka benlu ttu dia liiha anka choku nálu, a laa kila esinlu len ixpa lha'a nálu ata uyúlu elha disa tsialu lo giha, delába gi nu abittuba reyola loniha nu satíaba rite loniha. 44[Niha labí ratti ka bedua‑na, lhe nigaba labí reyola lo giha lhe.] 45Lhe anágaba ni'alu‑na ganna abittuba ridú siina, nnelaba ruinlu ttu bixa nu satsa lenna, tsa ttela uchú nuná, kumu tserula saríana lu esinlu ata aka benlu ttu dia liiha anka choku ni'alu, a laa kila esinlu len ixpa lha'a ni'alu ata uyúlu elha disa nna iru'unalu tsialu lo giha, gi nu abittu reyola loniha, nu satíaba rite loniha. 46[Niha labí ratti ka bedua‑na lhe nigaba labí reyola lo giha lhe.] 47Anágaba ganna iyya lolu‑na rixuinlu na ki ruinlu ttu nu satsa, tsa ttela ulea nuná kumu tserula taríana lu esinlu ata rinnabia Tata Do Yebáha suna len ttu lha'aba iyya lolu, a laa kila esinlu leni ixpa lha'a lolu ata uyúlu elha disaha nna iru'unalu tsialu lo giha. 48Niha labí ratti ka bedua‑na lhe nigaba labí reyola lo giha lhe.

49’Kumu iyába ka benne, giha nuha uinna ki tsettike ixe ttiba ttu deti. 50Deti‑na tseba anka nuná, ttaka ganna deti‑na itua ixe geni, la'ania nna, ¿gasina uinri'i kini eyona ixe? De nuha nna latsiru gwaluni. Elha ruin gele‑na akana attiba ttu deti. Ttiba deti‑na rugwena ixí ge ttu elho, aníha‑ba lebi'i latsiru gwaltse'e, bittu ttilha len luesile.

Jelenleg kiválasztva:

San Marcos 9: zae

Kiemelés

Megosztás

Másolás